រដ្ឋអាជ្ញា​អាមេរិក លាត​ត្រដាង​វីដេអូ​លោក គ្រី ម៉ះផល នាំ​យក​សត្វ​ស្វា​ក្ដាម​ព្រៃ​ឱ្យ​ក្រុមហ៊ុន Vanny Bio-Research ដើម្បី​នាំ​ចេញ

0:00 / 0:00

រដ្ឋអាជ្ញា​តុលាការ​សហព័ន្ធ​អាមេរិក​ប្រចាំ​តំបន់ លាតត្រដាង​វីដេអូ ដែល​ជា​ភស្តុតាង​រឹងមាំ ក្នុង​ការ​បញ្ជាក់​ថា លោក គ្រី ម៉ះផល ពិតជា​បាន​នាំ​យក​សត្វ​ស្វា​ក្ដាម ដែល​ត្រូវ​បាន​គេ​ចាប់​ពី​ព្រៃ​ទៅ​ផ្គត់​ផ្គង់​ដល់​ក្រុមហ៊ុន វ៉ាន់នី បាយអូ រីស៊ើច (Vanny Bio-Research) ដើម្បី​នាំ​ចេញ​ទៅ​លក់​នៅ​ក្រៅ​ប្រទេស។ មន្ត្រី​អង្គការ​សង្គម​ស៊ីវិល​យល់​ថា រដ្ឋាភិបាល​គួរ​សហការ​ស៊ើប​អង្កេត​ជាមួយ​តុលាការ​អាមេរិក និង​ឈប់​ការពារ លោក គ្រី ម៉ះផល ដើម្បី​រក្សា​មុខ​មាត់​លើ​ឆាក​អន្តរជាតិ។

ប្រធាន​រដ្ឋ​អាជ្ញា​តុលាការ​សហព័ន្ធ​អាមេរិក​ប្រចាំ​តំបន់ លោក ថូម៉ាស់ វ៉ាត់ ហ្វីតហ្គើរ៉ល (Thomas Watts-Fitzgerald) កាល​ពី​ថ្ងៃ​អង្គារ ទី៦ ធ្នូ បាន​ប្ដឹង​ទាស់​ទៅ​នឹង​សេចក្ដី​សម្រេច​របស់​ចៅក្រម​តុលាការ​ក្រុង​ញូវយ៉ក (New York) ដែល​បាន​យល់ព្រម​តាម​សំណើ​របស់​ឯកអគ្គរដ្ឋទូត​កម្ពុជា​ប្រចាំ​សហរដ្ឋអាមេរិក លោក កែវ ឈា ស្នើ​ឱ្យ​តុលាការ​ផ្ទេរ​លោក គ្រី ម៉ះផល ពី​មន្ទីរ​ឃុំឃាំង​នៅ​ទីក្រុង​ញូវយ៉ក ទៅ​នៅ​ស្ថាន​ទូត​ខ្មែរ​ក្នុង​រដ្ឋធានី​វ៉ាស៊ីនតោន (Washington) វិញ។

លោក ថូម៉ាស់ វ៉ាត់ ហ្វីតហ្គើរ៉ល បាន​សំអាង​លើ​ហេតុផល​២យ៉ាង​ធំ​ៗ ចំពោះ​ការ​ប្ដឹង​ទាស់​នេះ។ ទី១ អាជ្ញាធរ​អាមេរិក​មាន​ភស្តុតាង​ជា​វីដេអូ បញ្ជាក់​ថា មន្ត្រី​ជាន់​ខ្ពស់​ក្រសួង​កសិកម្ម លោក គ្រី ម៉ះផល ពិត​ជា​ពាក់ព័ន្ធ​នឹង​ការ​នាំ​យក​សត្វ​ស្វា​ក្ដាម​ដែល​ត្រូវ​បាន​គេ​ចាប់​ព្រៃ​យក​ទៅ​ផ្គត់​ផ្គង់​ដល់​ក្រុមហ៊ុន វ៉ាន់នី បាយអូ រីស៊ើច ដោយ​បន្លំ​ឯកសារ​ដាក់​ថា​ជា​ស្វា​ក្ដាម​ចិញ្ចឹម​ពី​កសិដ្ឋាន ដើម្បី​នាំ​ចេញ​ស្រប​ច្បាប់។ ហេតុផល​ទី២ លោក ថូម៉ាស់ ថា ការ​ស្នើ​សុំ​របស់​ស្ថាន​ទូត​ខ្មែរ​ដែល​សន្យា​ថា នឹង​លះបង់​អភ័យ​ឯកសិទ្ធិ​ស្ថាន​ទូត ដើម្បី​ឱ្យ​សមត្ថកិច្ច​អាមេរិក​ចូល​ពិនិត្យ​វត្ត​មាន ឬ​នាំ​ខ្លួន​លោក គ្រី ម៉ះផល ឡើង​តុលាការ គឺ​ប្រៀប​ដូចជា​រឿង​បោក​បញ្ឆោត ហើយ​លោក គ្រី ម៉ះផល អាច​នឹង​គេច​ខ្លួន​តាម​រយៈ​ការ​គាំទ្រ​ពី​រដ្ឋាភិបាល​កម្ពុជា។

លោក​បន្ថែម​ថា ឯកអគ្គរាជទូត​ខ្មែរ លោក កែវ ឈា ឬ​មន្ត្រី​ស្ថានទូត​ខ្មែរ​ថ្នាក់​ក្រោម​របស់​លោក នឹង​មាន​ភាព​ងាយស្រួល​ក្នុង​ការ​សម្រួល​ដល់​ការ​គេច​ខ្លួន​របស់​លោក គ្រី ម៉ះផល បើ​សិន​ជា​គាត់​ត្រូវ​បាន​ផ្ទេរ​ឱ្យ​ទៅ​រស់នៅ​ក្នុង​បរិវេណ​ស្ថានទូត​ខ្មែរ​នៅ​រដ្ឋធានី​វ៉ាស៊ីនតោន។

ជុំវិញ​រឿង​នេះ អ្នកនាំពាក្យ​ក្រសួង​កសិកម្ម រុក្ខា​ប្រមាញ់ និង​នេសាទ កញ្ញា អ៊ឹម រចនា ប្រាប់​វិទ្យុ​អាស៊ី​សេរី​ថា ក្រសួង​កសិកម្ម​នៅ​តែ​បន្ត​ស្វែងរក​យុត្តិធម៌​ដល់​លោក គ្រី ម៉ះផល និង​ចង់​ឃើញ​មន្ត្រី​ជាន់​ខ្ពស់​ក្រសួង​កសិកម្ម​រូប​នេះ​នៅ​ក្រៅ​ឃុំ​បណ្ដោះ​អាសន្ន។ កញ្ញា​បន្ត​បញ្ជាក់​ថា មក​ដល់​ពេលនេះ​លោក គ្រី ម៉ះផល នៅ​តែ​ជា​ជន​មិន​ទាន់​មាន​ទោស​នៅ​ឡើយ​ទេ៖ « នៅ​ក្នុង​ពេល​ដែល​មេធាវី​ការពារ​ក្ដី​កំពង់​តែ​ តតាំង​ជាមួយ​តុលាការ​ដើម្បី​ស្វែងរក​យុត្តិធម៌​ជូន​ដល់​មន្ត្រី​កម្ពុជា​យើង ការ​លើកឡើង​ពី​ករណី​នេះ នៅ​គ្រប់​ដំណាក់កាល​ទាំងអស់​ វា​មិន​អាច​ជួយ​អ្វី​បាន​ច្រើន​ក្រៅ​តែ​ពី​ផ្ដល់​ព័ត៌មាន​ទី១ ទី២​វា​អាច​នឹង​ធ្វើ​ឲ្យ​ប្រជាពលរដ្ឋ​លោក​មាន​ការ​បែក​ខ្ញែក​មតិ​គ្នា​នៅ​ក្នុង​សំណុំ​រឿង​នេះ »

ប្រធាន​នាយកដ្ឋាន​សត្វ​ព្រៃ និង​ជីវចម្រុះ​នៃ​​ក្រសួង​កសិកម្ម លោក គ្រី ម៉ះផល កំពុង​ជាប់​ឃុំ​បណ្ដោះ​អាសន្ន​នៅ​មន្ទីរ​ឃុំ​ឃាំង​ក្រុង​ញូវយ៉ក សហរដ្ឋអាមេរិក (Brooklyn's Metropolitan Detention Center) រង់ចាំ​សវនាការ​លើ​អង្គសេចក្ដី។ លោក​ត្រូវ​បាន​អាជ្ញាធរ​អាមេរិក​ចាប់​ខ្លួន​កាល​ពី​ថ្ងៃ​ទី១៦ ខែវិច្ឆិកា ក្នុង​ពេល​ដែល​លោក​កំពុង​ធ្វើ​ដំណើរ​ឆ្លង​កាត់​សហរដ្ឋអាមេរិក​នៅ​ឯ​អាកាស​យានដ្ឋាន​អន្តរជាតិ ចន អេហ្វ ខេននឺឌី (John F. Kennedy International Airport) នៅ​ក្រុង​ញូវយ៉ក ដើម្បី​ទៅ​ចូលរួម​កិច្ច​ប្រជុំ​របស់​អង្គការ​សហប្រជាជាតិ​នៅ​ឯ​ប្រទេស​ប៉ាណាម៉ា (Panama)។

កន្លង​មក​ក្រសួង​កសិកម្ម​របស់​រដ្ឋាភិបាល​កម្ពុជា រួម​ទាំង​រដ្ឋបាល​ព្រៃ​ឈើ បាន​ចេញ​សេចក្ដី​ថ្លែងការណ៍​មួយ​ជា​បន្ទាន់​អំពី​ការ​ចាប់​ខ្លួន​លោក គ្រី ម៉ះផល ថា​រដ្ឋាភិបាល​កម្ពុជា​នឹង​ខិតខំ​ប្រឹងប្រែង​អស់​ពី​សមត្ថភាព ដើម្បី​ស្វែង​រក​យុត្តិធម៌​ជូន​មន្ត្រី​របស់​ខ្លួន ជា​ពិសេស​អ្នក​ដែល​បំពេញ​កាតព្វកិច្ច​ផ្លូវ​ការ​តំណាង​ប្រទេស​ស្រប​តាម​អនុ​សញ្ញា​អន្តរជាតិ។

វិទ្យុ​អាស៊ីសេរី មិន​អាច​ទាក់ទង​អ្នក​នាំ​ពាក្យ​រដ្ឋាភិបាល លោក ផៃ ស៊ីផាន និង​អ្នក​នាំ​ពាក្យ​ក្រសួង​ការបរទេស លោក ជុំ សុន្ទរី ដើម្បី​សុំ​អត្ថាធិប្បាយ​ជុំវិញ​រឿង​នេះ​នៅ​ឡើយ​ទេ​នា​ថ្ងៃទី៧ ខែធ្នូ។

ចាប់ពី​ឆ្នាំ ២០១៧ ដល់ឆ្នាំ ២០២១ កម្ពុជា​បាន​រាយការណ៍​ពី​ការ​នាំ​ចេញ​សត្វ​ស្វា​ក្ដាម​ ឬ​ស្វា​កន្ទុយ​វែង​ចំនួន​ជាង​៩​ម៉ឺន​៣​ពាន់​ក្បាល (៩៣.៨៣៤ក្បាល) ក្បាល​នៅ​ទូទាំង​ពិភព​លោក។ ក្នុង​នោះ​សហរដ្ឋអាមេរិក​បាន​នាំ​ចូល​សត្វ​ស្វា​ក្ដាម​ចំនួន​ជាង​ ៧​ម៉ឺន​៦​ពាន់​ក្បាល (៧៦.៥៦៨ក្បាល) បន្ទាប់​ពី​ការ​ចាប់​ផ្ដើម​នៃ​ជំងឺ​រាតត្បាត​កូវីដ ១៩ ក្នុង​ឆ្នាំ២០២០។

ប្រភព​ឲ្យ​ដឹង​ថា សត្វ​ស្វា​កម្រ​នេះ ត្រូវ​បាន​គេ​រត់​ពន្ធ​ដោយ​សារ​តែ​ការ​បង្កាត់​ពូជ​ថ្មី​ត្រូវ​ការ​ចំណាយ​ថវិកា និង​ពេល​វេលា​យូរ ព្រោះ​សត្វ​
ស្វា​ញី​កើត​កូន​បាន​តែ​ម្ដង​ប៉ុណ្ណោះ​ក្នុង​រយៈពេល​ពីរ​ឆ្នាំ ហើយ​វា​ត្រូវ​បំបៅ​កូន​រយៈពេល​ ៤២០​ថ្ងៃ។ ប្រភព​បន្ត​ថា ខណៈ​ការ​ទិញ​ស្វា​យក​ទៅ​ពិសោធន៍​មាន​តម្រូវការ​ខ្ពស់​ ដូច្នេះ​ហើយ​ទើប​ធ្វើ​ឱ្យ​ក្រុមហ៊ុន​នាំ​ស្វា​ចេញ​ទទួល​យក​ស្វា​ព្រៃ​មក​ចិញ្ចឹម​ក្នុងរយៈពេល​ខ្លី​ ហើយ​ធ្វើ​ការ​នាំចេញ​តែ​ម្ដង។

ពាក់ព័ន្ធ​នឹង​រឿង​នេះ​ដែរ មន្ត្រី​ផ្នែក​តស៊ូ​មតិ​នៃ​គម្រោង​អ្នក​ការពារ​ព្រៃ​ឈើ​នៃ​សមាគម​បណ្ដាញ​យុវជន​កម្ពុជា​ (CYN) លោក សាន់ ម៉ាឡា យល់ឃើញ​ថា រដ្ឋាភិបាល​កម្ពុជា​គួរ​ចូលរួម​សហការ​ជាមួយ​តុលាការ​អាមេរិក​ ហើយ​ធ្វើ​ស៊ើប​អង្កេត​បន្ថែម​ជុំវិញ​ការ​ជួញដូរ​សត្វ​ស្វា​ក្ដាម​ព្រៃ​នេះ ជា​ជាង​បន្ត​ការពារ​លោក គ្រី ម៉ះផល ដោយ​គ្មាន​អំណះអំណាង​ច្បាស់លាស់​ដូចនេះ។ លោក​ថា កន្លង​មក​សហគមន៍​ព្រៃឈើ​នៅ​ខេត្តពោធិ៍សាត់ និង​តាម​ជួរ​ភ្នំក្រវ៉ាញ​ផ្សេងៗ​ក៏​ធ្លាប់​បាន​លើកឡើង​ពី​ការ​ចាប់​ទាក់​យក​សត្វ​ស្វា​ព្រៃ​ដោយ​ខុស​ច្បាប់​យ៉ាង​សន្ធឹកសន្ធាប់​ដែរ៖ « ឥរិយាបថ​រដ្ឋាភិបាល​ធ្វើ​បែប​នេះ​នៅ​ពេល​ដែល​ អាមេរិក​ជំនុំជម្រះ​និង​មាន​សាលក្រម​បញ្ជាក់​ថា​លោក គ្រី ម៉ះផល ពិតជា​មាន​បទល្មើស​មែន​វា​នឹង​ធ្វើ​ឲ្យ​បាក់​មុខ​ ខូច​កិត្តិយស​របស់​កម្ពុជា​ដែល​ព្យាយាម​ការពារ​មន្ត្រី​ខិលខូច​ រដ្ឋាភិបាល​កម្ពុជា​គួរតែ​ធ្វើការ​ស៊ើបអង្កេត​បន្ថែម​និង ចាប់​ខ្លួន​បក្សពួក​របស់​លោក គ្រី ម៉ះផល មក​ផ្ដន្ទាទោស​នៅ​តុលាការ​កម្ពុជា​បន្ថែម​ទើប​ជា​រឿង​សម​គួរ និង​អាច​ទទួល​យក​បាន »

ចៅក្រម​តុលាការ​អាមេរិក​ប្រចាំ​ក្រុង​ញូវយ៉ក នៅ​មិន​ទាន់​ចេញ​សេចក្ដី​សម្រេច​លើ​បណ្ដឹង​ទាស់​របស់​ប្រធាន​រដ្ឋអាជ្ញា​តុលាការ​សហព័ន្ធ​អាមេរិក​ប្រចាំ​តំបន់ ជុំវិញ​ការ​សម្រេច​ឱ្យ​លោក គ្រី ម៉ះផល នៅ​ក្រៅ​ឃុំ​នៅ​ឡើយ​ទេ ខណៈ​រង់ចាំ​សវនាការ​លើ​អង្គ​សេចក្ដី​លើ​សំណុំ​រឿង​នេះ។ លោក គ្រី ម៉ះផល អាច​ប្រឈម​នឹង​ជាប់​ពន្ធនាគារ​នៅ​អាមេរិក​រហូត​ដល់ ១៤៥ឆ្នាំ ប្រសិន​បើ​តុលាការ​រក​ឃើញ​ថា លោក​ពិត​ជា​បាន​ប្រព្រឹត្ត​បទល្មើស​ជួញ​ដូរ​សត្វ​ព្រៃ​មែន។ ទន្ទឹម​នឹង​នេះ សំណុំ​រឿង​នេះ ក៏​អាច​ជាប់​ពាក់ព័ន្ធ​នឹង​គណបក្ស​ប្រជាជន​កម្ពុជា ដែល​បាន​ទទួល​យក​លុយ ១ម៉ឺនដុល្លារ ពី​ក្រុម​ហ៊ុន Vanny Bio Research ដែល​សហរដ្ឋ​អាមេរិក​ចោទ​ប្រកាន់​ថា ​នៅ​ពី​ក្រោយ​អំពើ​រត់​ពន្ធ​ជួញ​ដូរ​សត្វ​ស្វា​ក្ដាម​ព្រៃ​នេះ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។