ប៉ូលិស​ខេត្ត​ស្ទឹងត្រែង​ឃាត់​សហគមន៍​ព្រៃ​ឡង់​មិន​ឱ្យ​ចូល​ទៅ​ធ្វើ​បុណ្យ​បំបួស​ព្រៃឈើ

ដោយ ម៉ៅ សុធានី
2020-02-22
អ៊ីម៉ែល
មតិ
Share
បោះពុម្ព
សមត្ថកិច្ច​ខេត្ត​ស្ទឹងត្រែង ឃាត់​សហគមន៍​ពលរដ្ឋ និង​ក្រុម​និស្សិត​មិន​ឱ្យ​ចូល​ព្រៃឡង់ នៅ​ល្ងាច​ថ្ងៃ​ទី២១ កុម្ភៈ ២០២០។
សមត្ថកិច្ច​ខេត្ត​ស្ទឹងត្រែង ឃាត់​សហគមន៍​ពលរដ្ឋ និង​ក្រុម​និស្សិត​មិន​ឱ្យ​ចូល​ព្រៃឡង់ នៅ​ល្ងាច​ថ្ងៃ​ទី២១ កុម្ភៈ ២០២០។
រូប៖ សហគមន៍​ព្រៃឡង់

អាជ្ញាធរ​ខេត្ត​ស្ទឹងត្រែង​រារាំង​សកម្មជន​ការពារ​ព្រៃឈើ ព្រះសង្ឃ និង​អង្គការ​សង្គម​ស៊ីវិល ប្រមាណ​៦០០​នាក់ មិន​ឱ្យ​ចូល​ធ្វើ​ដំណើរ​ទៅ​ចូលរួម​ធ្វើបុណ្យ​សុំ​សេចក្ដី​សុខ​នៅ​តំបន់​ព្រៃ​ឡង់ នៅ​ព្រឹក​ថ្ងៃ​ទី​២១ កុម្ភៈ​។​សហគមន៍​ព្រៃ​ឡង់ ចាត់​ទង្វើ​របស់​អាជ្ញាធរ​នេះ ថា​ជា​ចេតនា​មិនល្អ។

អ្នក​សម្របសម្រួល​សហគមន៍​ព្រៃ​ឡង់ ខេត្ត​ស្ទឹងត្រែង កញ្ញា ឈឿ លី ថ្លែង​នៅ​រសៀល​ថ្ងៃ​ទី​២១ កុម្ភៈ​ថា ប៉ូលិស​មូលដ្ឋាន​ស្រុក​ថាឡាបរិវ៉ាត់ ហាមឃាត់​ពួក​កញ្ញា និង​សហគមន៍​ដទៃ​ទៀត​មិន​ឱ្យ​ធ្វើដំណើរ​ចេញពី​ឃុំ​រៀងៗ​ខ្លួន ដើម្បី​ទៅ​ចូលរួម​ធ្វើបុណ្យ​សុំ​សេចក្ដី​សុខ​នៅ​ក្នុង​ព្រៃ​ឡង់​នោះ​ទេ។ កញ្ញា​បន្ថែម​ថា ប៉ូលិស​ទប់ស្កាត់​ក្រុម​សហគមន៍​នេះ ដោយមាន​បទបញ្ជា​ពី​សាលាខេត្ត​ស្ទឹងត្រែង ដើម្បី​រាំង​ខ្ទប់​កុំ​ឱ្យ​ពួកគេ​ចូល​ទៅដល់​គោលដៅ​។​សកម្មជន​ព្រៃឈើ​រូប​នេះ ចាត់​ទុក​វិធានការ​របស់​អាជ្ញាធរ​នេះ ថា ការ​រួម​ចំណែក​ធ្វើ​ឱ្យ​ហិនហោច​ព្រៃឈើ​កាន់តែ​ឆាប់រហ័ស៖ «ខ្ញុំ​សួរ​គាត់​ថា​គ្រាន់តែ​ខ្ញុំ​ទៅ​ធ្វើ​បុណ្យ​មូលហេតុ​អី​បានជា​មិន​ឱ្យ​ពួក​ខ្ញុំ​ទៅ​ធ្វើ​បុណ្យ គាត់​និយាយ​ច្រើន គាត់​ថា​មេ​គាត់​ចេញពី​ក្រសួង​មិន​ឱ្យ​ធ្វើ​តែម្ដង​។ ខ្ញុំ​ថា​គ្រាន់តែ​ធ្វើបុណ្យ​អត់​មានរឿង​អី​ត្រូវ​ខុស​ទេ ហើយ​បើ​ចុះ​ពួកគាត់​ដែល​ជា​មន្ត្រី​ក្របខ័ណ្ឌ​មាន​ប្រាក់ខែ ឃើញ​បទល្មើស​ដឹក​ឈើ​ម៉េច​បានជា​គាត់​មិន​ចាប់​ផង ហើយ​មាន​បទល្មើស​ព្រៃឈើ​មាន​ពាសពេញ​ព្រៃ​ហេតុ​អី​មិន​មាន​ចំណាត់​ទៅ ដើម្បី​ការពារ​ព្រៃ​ឱ្យ​បាន​គង់វង្ស»

កញ្ញា​បន្ថែម​ថា គម្រោង​ចូល​ទៅ​បុណ្យ​នេះ ក្នុង​បំណង​ជា​ការ​ដឹងគុណ​ព្រៃឈើ​ដែល​បាន​ផ្ដល់​ទីជម្រក​ដល់​មនុស្ស​និង​សត្វ ការ​រំលឹក​គុណ​ដល់​អ្នក​ដែល​បាត់បង់​ជីវិត​ដោយសារ​ការពារ​ព្រៃឈើ​តំបន់​នោះ ព្រមទាំង​ដើម្បី ធ្វើបុណ្យ​តាម​ប្រពៃណី​ជនជាតិ​ដើម​ភាគតិច​កួយ​ដែល​ធ្លាប់​ប្រារព្ធ​កន្លងទៅ។

សហគមន៍​ព្រៃ​ឡង់ គ្រោង​រៀបចំ​ពិធីបុណ្យ​ព្រៃឈើ​នេះ​ចាប់ពី​ថ្ងៃ​ទី​២២ ដល់​ថ្ងៃ​ទី២៣ កុម្ភៈ នៅ​ចំណុច​អូរពពែល ដែល​ជា​ចំណុចប្រសព្វ​របស់​ព្រៃ​ឡង់ រវាង​ខេត្ត រួមមាន​ក្រចេះ ស្ទឹងត្រែង ព្រះវិហារ និង​ខេត្ត​កំពង់ធំ​។​

ទាក់ទង​នឹង​បញ្ហា​នេះ​អ្នកនាំពាក្យ​សាលាខេត្ត​ស្ទឹងត្រែង លោក ម៉ែន គុង ប្រាប់​អាស៊ីសេរី​ថា មូលហេតុ​ដែល​ហាមឃាត់​ពលរដ្ឋ​ចូល​ទៅ​ធ្វើបុណ្យ​នៅ​ក្នុង​ព្រៃ​ឡង់ ដើម្បី​រក្សា​សន្តិសុខ​នៅ​ក្នុង​សង្គម​ព្រោះ​អ្នក​ទាំងនោះ​មិនបាន​សុំច្បាប់​ពី​អាជ្ញាធរ​ចូល​ទៅ​ធ្វើបុណ្យ​នោះ​ទេ៖ «បើ​តាម​របាយការណ៍​ពី​មូលដ្ឋាន​មក​គឺ បញ្ជាក់​ថា សហគមន៍​ដែល​គាត់​ធ្វើ​ហ្នឹង​គឺជា​សហគមន៍​ដែល​មិន​មាន​ឯកសារ​ទទួលស្គាល់​ស្របច្បាប់​ទេ ហើយ​កន្លង​ទៅ​នេះ​នៅ​ក្នុង​តំបន់​ព្រៃ​ឡង់ គឺ មាន​ក្រសួងបរិស្ថាន​ជាមួយ​ហ្នឹង​មូលដ្ឋាន​គេ​បាន​រៀបចំ​ធ្វើ​ពិធី​ហ្នឹង​ម្ដង​ហើយ ស្រដៀង​គ្នា​ហ្នឹង​ពិធី​ហ្នឹង»

មន្ត្រី​ពង្រឹង​សិទ្ធិ​អំណាច​សហគមន៍​មូលដ្ឋាន​នៃ​សមាគម​ការពារ​សិទ្ធិមនុស្ស​អាដហុក (ADHOC) លោក ប៉ែន ប៊ុណ្ណារ៍ មាន​ប្រសាសន៍​ថា ប្រជាពលរដ្ឋ​រួមគ្នា​ទៅ​បុណ្យ​នៅ​ក្នុង​ព្រៃ​ជា​រឿង​ល្អ ព្រោះ​ជា​ការ​រួមចំណែក​ថែរក្សា​ព្រៃឈើ​ឱ្យ​បាន​គង់វង្ស គឺ​មិន​ខុសច្បាប់​ឡើយ​។​លោក​បន្ថែម​ថា អាជ្ញាធរ​ដែល​រារាំង​សហគមន៍​ទៅវិញ​ទេ​ដែល​ខុសច្បាប់ ព្រោះ​ជា​ការ​រួមចំណែក​ធ្វើ​ឱ្យ​ជនល្មើស​លួច​កាប់​ព្រៃឈើ​បាន​ដោយ​សេរី​៖ «គាត់​អត់​មាន​បិទ​សិទ្ធិ​មិន​ឱ្យ​ធ្វើ​ទេ ហើយ​ថ្មីៗ​នេះ​សារាចរ​ដែល​ចេញ​ដោយ​លោក ស ខេង អនុញ្ញាត​ឱ្យ​សង្គម​ស៊ីវិល ហើយ​នៅ​ក្នុង​នោះ​ក៏​មាន​សហគមន៍​ដែរ​។​អីចឹង​លោក​បើ​ថា មិនបាច់​ជូនដំណឹង​ទៅ​អាជ្ញាធរ​ទៀត​ផង ធ្វើ​សកម្មភាព​ទៅ​ឱ្យ​តែ​សហគមន៍​មានការ​ទទួលស្គាល់​ពី​ក្រសួងមហាផ្ទៃ​ទៅ ហើយ​អីចឹង​យើង​គិត​ថា​នេះ​ជា​អំពើ​មួយ​ទប់ស្កាត់​ដំណឹង​កុំ​បែក​ខ្ចាយ​ក្នុង​ព្រៃ​ឡង់​វិញ ជាជាង​រឿង​ច្បាប់ទម្លាប់​។ ពីព្រោះ​ការបាត់បង់​ព្រៃឡង់​ហ្នឹង​គឺ​វា​ពាក់ព័ន្ធ​ជាមួយ​អាជ្ញាធរ​ដែនដី​ហើយ​មន្ត្រី​ជំនាញ​ទាំងអស់​ហ្នឹង»

របាយការណ៍​សិក្សា​ស្រាវជ្រាវ​ផ្ដល់​ដោយ​បណ្ដាញ​សហគមន៍​ព្រៃ​ឡង់​ឱ្យ​ដឹង​ថា ព្រៃ​ឡង់ គឺជា​ព្រៃធំ​ជាងគេ​បង្អស់ និង​ជា​ប្រភេទ​ព្រៃស្រោង នៅ​សេសសល់​ក្នុង​ប្រទេស​កម្ពុជា និង​ឧបទ្វីប​ឥណ្ឌូចិន ដែល​មាន​ទំហំ​ប្រមាណ ៣.៦០០​គីឡូម៉ែត្រ​ក្រឡា និង​មាន​តំបន់​ស្នូល​ទំហំ​ប្រមាណ​ពី ៨ ទៅ ១០ ម៉ឺន​ហិកតារ ឋិត​ក្នុងស្រុក​រវៀង ស្រុក​ត្បែងមានជ័យ និង​ស្រុក​ជ័យ​សែន ខេត្ត​ព្រះវិហារ ស្រុក​សៀម​បូក និង​ស្រុក​ថាឡាបរិវ៉ាត់ ខេត្ត​ស្ទឹងត្រែង និង​ស្រុក​សំបូរ​ខេត្ត​ក្រចេះ។

អ្នកចូលរួម​ធ្វើបុណ្យ​ព្រៃឈើ កញ្ញា ឈឿ លី ឱ្យដឹង​ថា គិត​ត្រឹម​ម៉ោង​៤​រសៀល​ថ្ងៃ​សុក្រ ទី​២១​កុម្ភៈ​ដដែល ប្រជាពលរដ្ឋ ក្រុម​សហគមន៍​ព្រៃ​ឡង់ ព្រះសង្ឃ និង​មន្ត្រី​អង្គការ​សង្គម​ស៊ីវិល ដែល​ចូលរួម​ពិធី​នេះ មិន​ទាន់​បាន​ចូល​ទៅ​ក្នុង​ព្រៃ​ឡង់​នៅឡើយ​ទេ ដោយសារ​អាជ្ញាធរ​ហាម​ឃាត់​។ កញ្ញា បន្ថែម​ថា ពួកគាត់​កំពុង​ប្រឹក្សា​គ្នា​រក​វិធី​ដើម្បី​ធ្វើ​ការងារ​នេះ​បន្ត​ទៀត៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល