សហគមន៍​នៅ​ខេត្ត​រតនគិរី​បន្ត​ហាមឃាត់​ក្រុមហ៊ុន​អូស្ត្រាលី​មិន​ឲ្យ​ចូល​ស្រាវជ្រាវ​រ៉ែ

ដោយ រដ្ឋា វិសាល
2015-09-19
អ៊ីម៉ែល
មតិ
Share
បោះពុម្ព
កិច្ច​ប្រជុំ​រវាង​សហគមន៍​ភូមិ​តាំងម្លូ ឃុំ​ញ៉ាង ស្រុក​អណ្ដូងមាស ជាមួយ​ក្រុមហ៊ុន អង្គរ ហ្គោល (Angkor Gold) និង​អាជ្ញាធរ​មូលដ្ឋាន​អង្គការ​សង្គម​ស៊ីវិល​រឿង​វិនិយោគ​សម្បទាន​រ៉ែ​លោហៈ កាល​ពី​ថ្ងៃ​ទី​១០ ខែ​ឧសភា ឆ្នាំ​២០១៥ នា​ខេត្ត​រតនគិរី។
កិច្ច​ប្រជុំ​រវាង​សហគមន៍​ភូមិ​តាំងម្លូ ឃុំ​ញ៉ាង ស្រុក​អណ្ដូងមាស ជាមួយ​ក្រុមហ៊ុន អង្គរ ហ្គោល (Angkor Gold) និង​អាជ្ញាធរ​មូលដ្ឋាន​អង្គការ​សង្គម​ស៊ីវិល​រឿង​វិនិយោគ​សម្បទាន​រ៉ែ​លោហៈ កាល​ពី​ថ្ងៃ​ទី​១០ ខែ​ឧសភា ឆ្នាំ​២០១៥ នា​ខេត្ត​រតនគិរី។
RFA/Ratha Visal

ទាញ​យក​កម្មវីធី

ក្រុមហ៊ុន​ស្រាវជ្រាវ​រ៉ែ​លោហៈ អង្គរ ហ្គោល (Angkor Gold) នៃ​ប្រទេស​អូស្ត្រាលី ខកខាន​សិក្សា​ស្រាវជ្រាវ​រ៉ែ តាម​អាជ្ញាប័ណ្ណ​របស់​ខ្លួន បន្ទាប់​ពី​សហគមន៍​ជនជាតិ​ដើម​ភាគតិច​ភូមិ​តាំងម្លូ ស្រុក​អណ្ដូងមាស ខេត្ត​រតនគិរី ប្រឆាំង​មិន​ឲ្យ​ក្រុមហ៊ុន​ចូល​ទៅ​បោះ​ទីតាំង​ស្រាវជ្រាវ​នៅ​តំបន់​អ្នក​ភូមិ​រស់​នៅ។ តំណាង​ក្រុមហ៊ុន​កំពុង​ស្វែង​រក​កិច្ច​អន្តរាគមន៍​ពី​ក្រសួង​រ៉ែ និង​ថាមពល។

តំណាង​ក្រុមហ៊ុន អង្គរ ហ្គោល អះអាង​ថា មន្ត្រី​ក្រសួង​រ៉ែ និង​ថាមពល មិន​ទាន់​ឆ្លើយ​តប​ទៅ​នឹង​លិខិត​ស្នើ​សុំ​ជួយ​អន្តរាគមន៍​ពី​ការ​ប្រឆាំង​របស់​សហគមន៍​ភូមិ​តាំងម្លូ ទាក់ទិន​គម្រោង​ចូល​ស្រាវជ្រាវ​រ៉ែ​លោហៈ​របស់​ក្រុមហ៊ុន​នៅ​ឡើយ។

កាល​ពី​ចុង​ខែ​កក្កដា សហគមន៍​ភូមិ​តាំងម្លូ បាន​បដិសេធ​ដាច់​ខាត​ទៅ​នឹង​ការ​សម្របសម្រួល​របស់​មន្ត្រី​អាជ្ញាធរ​មូលដ្ឋាន តំណាង​ក្រុមហ៊ុន និង​មន្ត្រី​អង្គការ​សង្គម​ស៊ីវិល ដែល​បាន​លើក​ឡើង​គោលការណ៍​បី​ចំណុច​ស្ដីពី​ដំណោះស្រាយ​ផល​ប៉ះពាល់​ប្រជាពលរដ្ឋ​រួម​មាន ការ​បង្កើត​ក្រុម​ការងារ​មាន​តំណាង​សហគមន៍​ពី​៥ ទៅ ៧​នាក់ ចូល​រួម​តាមដាន​ពិនិត្យ​សកម្មភាព​ស្រាវជ្រាវ​រ៉ែ​របស់​ក្រុមហ៊ុន។ បង្កើត​ក្រុម​ទស្សនកិច្ច​សិក្សា​សហគមន៍​ស្វែង​យល់​ពី​តំបន់​កំពុង​សិក្សា​ស្រាវជ្រាវ​រ៉ែ​លោហៈ​របស់​ក្រុមហ៊ុន និង​ការ​ចុះ​កិច្ចព្រមព្រៀង​ធានា​ផ្លូវ​ច្បាប់ ប្រសិន​ក្រុមហ៊ុន​បង្ក​ផល​ប៉ះពាល់​ប្រជាពលរដ្ឋ។

បន្ទាប់​ពី​ការ​បដិសេធ​នោះ តំណាង​ក្រុមហ៊ុន លោក ម៉ា សំអាត ចាត់​ទុក​ថា ការ​ពិភាក្សា​ដោយ​សន្តិវិធី​របស់​ក្រុមហ៊ុន និង​សហគមន៍​មិន​អាច​សម្រេច​បាន​លទ្ធផល ហេតុនេះ​ក្រុមហ៊ុន​សម្រេច​ធ្វើ​លិខិត​សុំ​ឲ្យ​ក្រសួង​រ៉ែ និង​ថាមពល ជួយ​អន្តរាគមន៍​ក្នុង​រឿង​នេះ៖ «យើង​ចង់​ឲ្យ​ក្រសួង​ឆ្លើយ​តប​ដើម្បី​ជួយ​អន្តរាគមន៍​ឲ្យ​ប្រជាពលរដ្ឋ គាត់​យល់​ព្រម​ដើម្បី​ក្រុមហ៊ុន​ចុះ​ធ្វើ​ការងារ​ហ្នឹង។ យើង​ទទួល​បាន​អាជ្ញាប័ណ្ណ​ពី​ក្រសួង​ត្រូវ​ឲ្យ​ក្រសួង​មាន​ចំណាត់ការ​បន្ថែម​លើ​អ្វី​ដែល​យើង​បាន​ធ្វើ​កន្លង​មក»

​ក្រុមហ៊ុន អង្គរ ហ្គោល បាន​ធ្វើ​បទ​បង្ហាញ​ចំនួន​៤ លើក​ពី​លក្ខណៈ​បច្ចេកទេស និង​លិខិត​បទដ្ឋាន​ពាក់ព័ន្ធ​ការសិក្សា​ស្រាវជ្រាវ​របស់​ក្រុមហ៊ុន បន្ទាប់ពី​ទទួល​បាន​អាជ្ញាប័ណ្ណ​ស្រាវជ្រាវ​រ៉ែ​លោហៈ​ពី​ក្រសួង​រ៉ែ និង​ថាមពល។ ក្រុមហ៊ុន​នេះ​គឺ​ជា​ក្រុមហ៊ុន​ដំបូង​ដែល​ព្យាយាម​អនុវត្ត​គោលនយោបាយ​ដោះស្រាយ​រាល់​ផល​ប៉ះពាល់​ប្រជាពលរដ្ឋ​ឈរ​លើ​គោលការណ៍​ពិភាក្សា​ឯកភាព​គ្នា​រវាង​ក្រុមហ៊ុន និង​សហគមន៍​តាមច្បាប់​ស្ដីពី​សម្បទាន។

ទាក់ទិន​លិខិត​ស្នើសុំ​របស់​ក្រុមហ៊ុន អង្គរ ហ្គោល នេះ អ្នក​នាំ​ពាក្យ និង​ជា​អនុរដ្ឋលេខាធិការ​ក្រសួង​រ៉ែ និង​ថាមពល លោក ម៉េង ស័ក្កធារ៉ា បដិសេធ​ថា ក្រសួង​មិន​បាន​ឃើញ​លិខិត​ស្នើសុំ​របស់​ក្រុមហ៊ុន​នោះ​ទេ ក៏ប៉ុន្តែ​ជា​គោលការណ៍​ប្រសិនបើ​ក្រុមហ៊ុន​ស្នើ​សុំ​ក្រសួង​ជួយ​ដោះស្រាយ​បញ្ហា​នោះ ក្រុម​ការងារ​ថ្នាក់​ក្រសួង​នឹង​ត្រូវ​បង្កើត​ឡើង​ដើម្បី​ជួយ​សម្របសម្រួល​បញ្ហា​នេះ៖ «នៅ​រង់ចាំ​រហូត​ដល់​ពេល​ណា​ប្រជាពលរដ្ឋ​គាត់​យល់​ដឹង ហើយ​មាន​ជំនឿ​ថា អា​ហ្នឹង​ផ្តល់​ប្រយោជន៍​ដល់​មូលដ្ឋាន​គាត់​ដែរ គាត់​ស្វាគមន៍​វិនិយោគ​នោះ​ដែរ បាន​យើង​អនុញ្ញាត​ឲ្យ​បន្ត ពីព្រោះ​ការ​វិនិយោគ​រ៉ែ​ជា​ការ​វិនិយោគ​រយៈពេល​វែង»

សហគមន៍​ភូមិ​តាំងម្លូ ចាប់​ពី​ដើម​ខែ​សីហា បាន​បន្ត​លើ​ស្លាក​សរសេរ​អក្សរ​ដាក់​នៅ​មុខ​ផ្លូវ​ចូល​ភូមិ​ហាម​មិន​ឲ្យ​ក្រុមហ៊ុន អង្គរ ហ្គោល ចូល​ទៅ​ក្នុង​ភូមិ​ជា​ការ​បង្ហាញ​ឆន្ទៈ​មិន​ទទួល​យក​គម្រោង​វិនិយោគ​មួយ​នេះ។

ចំណែក​អភិបាល​ស្រុក​អណ្ដូងមាស លោក នង ដារិទ្ធ ឲ្យ​ដឹង​ដែរ​ថា អាជ្ញាធរ​ស្រុក​បាន​ធ្វើ​របាយការណ៍​ទាក់ទិន​ការ​បដិសេធ​របស់​សហគមន៍​ជូន​អាជ្ញាធរ​ខេត្ត​រួច​ហើយ ប៉ុន្តែ​អាជ្ញាធរ​ខេត្ត​មិន​ទាន់​មាន​វិធានការ​នៅ​ឡើយ។ ដោយ​ឡែក​ក្រុមហ៊ុន​បាន​បន្ត​សិក្សា​ពី​គម្រោង​អភិវឌ្ឍន៍​មូលដ្ឋាន​ជា​បណ្ដោះអាសន្ន រង់ចាំ​ការ​សម្របសម្រួល​ពី​ថ្នាក់​ជាតិ៖ «ខ្ញុំ​ឃើញ អង្គរ ហ្គោល គេ​ចុះទៅ​ក្រុម​ការងារ​ជួយ​ប្រជាពលរដ្ឋ​ស្អី​ខ្លះ​ក្នុង​ភូមិ។ អ៊ីចឹង​ទាល់តែ​ថ្នាក់​លើ​ជួយ​ជ្រោមជ្រែង អាជ្ញាធរ​សម្របសម្រួល​បី​ដង​ហើយ»

ក្រសួង​រ៉ែ និង​ថាមពល បាន​កំណត់​ឲ្យ​ក្រុមហ៊ុន អង្គរ ហ្គោល សិក្សា​ស្រាវជ្រាវ​រ៉ែ​លោហៈ​លើ​ផ្ទៃដី​ទំហំ​ជិត ២០០​គីឡូម៉ែត្រក្រឡា នៅ​តំបន់​បរខាំ ស្រុក​អណ្ដូងមាស ស្រុក​បរកែវ និង​ស្រុក​អូរយ៉ាដាវ ចាប់​ពី​ថ្ងៃ​ចេញ​អាជ្ញាប័ណ្ណ​រហូត​ដល់​ចុង​ខែ​ធ្នូ ឆ្នាំ​២០១៦។

​ទោះ​ជា​យ៉ាង​នេះ​ក្តី អ្នក​នាំ​ពាក្យ​ក្រសួង​រ៉ែ ឲ្យ​ដឹង​ដែរ​ថា គោល​ការពិភាក្សា​ជាមួយ​សហគមន៍​នឹង​ត្រូវ​​បន្ត​ធ្វើ​រហូត​ទីបំផុត​ដោយ​ឈរ​លើ​ការ​គោរព​សិទ្ធិ​សហគមន៍៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (1)
Share

អ្នក​អាន​អនាមិក

តើវាចម្លែកទេ?ក្រុមហ៊ុនអង្គរហ្កូលមានអជ្ញាបណ្ណ័ត្រឹមត្រូវតែមិនអាចដំណើរការបានហើយបែរជាពួកដែលគ្មានអជ្ញាបណ្ណ័អាចធ្វើបានតាមទំនើងចិត្តហើយគ្មានឃាត់ឃាំងពីអជ្ញាធម៌ទាល់តែសោះ។

Sep 19, 2015 02:59 PM

គេហទំព័រ​ទាំងមូល