ក្រសួង​ធនធាន​ទឹក និង​ឧតុនិយម ជូន​ដំណឹង​ថា រដូវ​វស្សា ចាប់​ផ្ដើម​ចូល​មក​ដល់​ហើយ

ដោយ ទីន ហ្សាការីយ៉ា
2019-05-20
អ៊ីម៉ែល
មតិ
Share
បោះពុម្ព
កសិករ​នៅ​ស្រុក​អង្គស្នួល ខែត្រ​កណ្ដាល ស្ទូង​ស្រូវ ក្រោយ​ពេល​ភ្លៀង​ធ្លាក់​ថ្មីៗ កាល​ពី​ថ្ងៃ​ទី៣ ខែ​សីហា ឆ្នាំ២០១០។
កសិករ​នៅ​ស្រុក​អង្គស្នួល ខែត្រ​កណ្ដាល ស្ទូង​ស្រូវ ក្រោយ​ពេល​ភ្លៀង​ធ្លាក់​ថ្មីៗ កាល​ពី​ថ្ងៃ​ទី៣ ខែ​សីហា ឆ្នាំ២០១០។
RFA

ក្រសួង​ធនធាន​ទឹក និង​ឧតុនិយម ជូន​ដំណឹង​ថា រដូវ​វស្សា​ បាន​ចាប់​ផ្ដើម​ចូល​ដល់​ហើយ ចំណែក​​ឥទ្ធិពល​ឡើង​កម្ដៅ អ៊ែល​ នីណូ​ (​El Nino) បាន​ថយ​​ចុះ​ជា​បន្ត​បន្ទាប់។

ការ​ព្យាករ​អាកាសធាតុ​បង្ហាញ​ថា សីតុណ្ហភាព នៅ​ចន្លោះ​ថ្ងៃ​ទី១៩ ដល់​ថ្ងៃ​ទី២៥ ឧសភា នឹង​ធ្លាក់​ចុះ​នៅ​ចន្លោះ​ពី ៣៣ ទៅ ៣៦អង្សា​សេ។ បើ​ទោះ​ស្ថានភាព​សីតុណ្ហភាព​ធ្លាក់​ចុះ​បន្តិច ប៉ុន្តែ បាតុភូត​ផ្គរ រន្ទះ និង​ខ្យល់​កន្ត្រាក់ នៅ​បន្ត​កើត​មាន​ច្រើន​ដដែល។

ចំណែក​ស្ថានភាព​ទឹក​ភ្លៀង​ នៅ​អំឡុង​ពេល​ចាប់​ផ្ដើម​ចូល​រដូវ​វស្សា​នេះ ពី​ថ្ងៃ​ទី១៩ ដល់​ទី២០ ឧសភា ភ្លៀង​នឹង​ធ្លាក់​ពី​ខ្សោយ​ទៅ​មធ្យម នៅ​រាជធានី​ភ្នំពេញ និង​ខេត្ត​មួយ​ចំនួន ដោយសារ​ទទួល​រង​ឥទ្ធិពល​ជ្រលង​សំពាធ​ទាប និង​ខ្យល់​មូសុង​និរតី។

នៅ​ថ្ងៃ​ទី២១ ដល់​ថ្ងៃ​ទី២៥ ឧសភា ជ្រលង​សំពាធ​ទាប និង​ខ្យល់​មូសុង​និរតី នឹង​កើន​ឡើង ហើយ​ភ្លៀង​នឹង​ធ្លាក់​ច្រើន​នៅ​ទូទាំង​ប្រទេស។

អាកាស​ធាតុ​ឡើង​កម្ដៅ​ខ្លាំង​នៅ​កម្ពុជា បាន​ចាប់​ពី​ខែ​មករា ដល់​អំឡុង​ពាក់​កណ្ដាល​ខែ​ឧសភា។ អាកាស​ធាតុ​ក្ដៅ​ខ្លាំង​បំផុត នៅ​កំឡុង​ខែ​មេសា គឺ​សីតុណ្ហភាព ចន្លោះ​ពី ៤០ ទៅ ៤១អង្សា​សេ។

របាយ​ការណ៍​របស់​​គណៈកម្មាធិការ​ជាតិ​គ្រប់គ្រង​គ្រោះ​មហន្តរាយ រយៈពេល ៤ខែ ដើម​ឆ្នាំ២០១៩ បង្ហាញ​ថា មនុស្ស​យ៉ាង​ហោច​ណាស់ ១៦នាក់​ស្លាប់ និង​ប្រមាណ ៤០នាក់​ទៀត រង​របួស ដោយសារ​ខ្យល់​កន្ត្រាក់ និង​រន្ទះ​បាញ់ ហើយ​ផ្ទះ​សម្បែង​ប្រជាពលរដ្ឋ​ប្រមាណ ៣ពាន់​ខ្នង និង​កសិផល​ជា​ច្រើន​ហិកតារ រង​ការ​ខូច​ខាត ដោយសារ​ខ្យល់​កន្ត្រាក់៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល