លទ្ធផលជំរឿនសត្វត្មាតលើកទី៣ សម្រាប់ឆ្នាំ២០២២ បង្ហាញថា ចំនួនសត្វត្មាតមានចំនួន ១២៨ក្បាល គឺច្រើនជាងចំនួនសត្វត្មាតដែលក្រុមអ្នកអភិរក្សបានរកឃើញកាលពីឆ្នាំ ២០២១ ចំនួន ៧ក្បាល។
រដ្ឋលេខាធិការក្រសួងបរិស្ថាន លោក នេត្រ ភក្ត្រា បានសរសេរលើទំព័រហ្វេសប៊ុករបស់លោក កាលពីថ្ងៃទី១៨ ខែមិថុនា ឲ្យដឹងថា លទ្ធផលជំរឿនសត្វត្មាតដែលបានធ្វើឡើងកាលពីថ្ងៃទី ១៧ ខែមិថុនា នៅក្នុងដែនជម្រកសត្វព្រៃក្នុងខេត្តចំនួន ៤ រកឃើញសត្វត្មាតសរុបចំនួន ១២៨ក្បាល។
ក្នុងនេះ សត្វត្មាតនៅខេត្តក្រចេះមានចំនួន ២៤ក្បាល នៅខេត្តស្ទឹងត្រែងមានចំនួន ៨០ក្បាល ខេត្តព្រះវិហារមានចំនួន ១៥ក្បាល និងខេត្តមណ្ឌលគិរី មានចំនួន ៩ក្បាល។
ក្រុមអ្នកអភិរក្សគ្រោងនឹងធ្វើជំរឿនសត្វត្មាត ចំនួនពីរលើកទៀត ដើម្បីទទួលបានព័ត៌មានច្បាស់លាស់ពីការកើនឡើងនៃចំនួនសត្វត្មាត។ ជំរឿនលើកទី ៤ និងលើកទី៥ សម្រាប់ឆ្នាំ ២០២២នេះ នឹងធ្វើឡើងនៅខែកញ្ញា និងខែធ្នូ។
កាលពីជាង ១០ឆ្នាំមុន សត្វត្មាតនៅកម្ពុជា ធ្លាប់ត្រូវបានគេរកឃើញថា មានចំនួនជិតបីរយក្បាល (២៨៩) ប៉ុន្តែចាប់ពីពាក់កណ្ដាលឆ្នាំ ២០១៤ ចំនួនសត្វត្មាតបានបាត់បង់ជិតពាក់កណ្ដាល នៅសល់ប្រមាណចន្លោះពី ១២០ក្បាល ទៅ១៤០ក្បាល។
ទោះបីជា រដ្ឋលេខាធិការក្រសួងបរិស្ថាន លោកនេត្រ ភក្ត្រា អះអាងថា ស្ថានភាពត្មាតនៅកម្ពុជា មានសញ្ញាវិជ្ជមាន ថាអាចនឹងកើនឡើង ក្រោមការខិតខំប្រឹងប្រែងរបស់ក្រុមអភិរក្សសត្វត្មាតយ៉ាងណាក្តី ក៏ចំនួនសត្វត្មាតនៅកម្ពុជា ក្នុងពេលបច្ចុប្បន្ននេះ នៅមានចំនួនតិចជាង កាលពី ១០ឆ្នាំមុន ជិតពាក់កណ្តាលដដែល។
ទន្ទឹមគ្នានេះ អ្នកគ្រប់គ្រងផ្នែកស្រាវជ្រាវ និងតាមដានជីវចម្រុះរបស់អង្គការ WWF លោក អៀម សំអ៊ន់ លើកឡើងថា សត្វត្មាតនៅកម្ពុជា កំពុងប្រឈមបញ្ហាខ្វះចំណី ដោយសារតែចំនួនសត្វព្រៃ និងសត្វស្រុកដែលស្លាប់ កាន់តែតិច។ លោកបន្ថែមថា បញ្ហាប្រឈមនេះ តម្រូវឲ្យក្រុមអភិរក្ស ត្រូវផ្ដល់ចំណីបន្ថែមជាប្រចាំខែ។
សត្វត្មាតនៅប្រទេសកម្ពុជា មានចំនួន ៣ប្រភេទ រួមមានត្មាតភ្លើង (Red-headed Vulture) ត្មាតត្នោត (Slender-billed Vulture) និងត្មាតកសផេះ (White-rumped Vulture )។ ត្មាតទាំងនេះ រស់នៅ ក្នុងដែនជម្រកសត្វព្រៃក្នុងខេត្តចំនួន ៤ គឺដែនជម្រកសត្វព្រៃសម្បូណ៌ ខេត្តក្រចេះ ដែនជម្រកសត្វព្រៃសៀមប៉ាង ខេត្តស្ទឹងត្រែង ដែនជម្រកសត្វព្រៃឆែប ខេត្តព្រះវិហារ និងដែនជម្រកសត្វព្រៃស្រែពក ខេត្តមណ្ឌលគិរី។
សត្វត្មាតទាំង ៣ប្រភេទនេះ ត្រូវបានអង្គការអន្តរជាតិផ្នែកអភិរក្សធម្មជាតិ IUCN បានចាត់ទុកថាជា សត្វជិតផុតពូជ៕