ក្រុមហ៊ុនម៉ាឡេស៊ីឈ្មោះហ្គ្រីនរ៊ី (GreenRE) បានចុះអនុស្សរណៈយោគយល់គ្នាមួយស្ដីពីការសាងសង់អគារបៃតង ជាមួយក្រុមប្រឹក្សាអគារបៃតងកម្ពុជា (CamGBC) ដើម្បីជួយអភិវឌ្ឍផ្នែកសំណង់បៃតង និងលើកស្ទួយបរិស្ថាននៅកម្ពុជា។
ក្រុមហ៊ុន ហ្គ្រីនរ៊ី ដែលជាក្រុមហ៊ុនអចលនទ្រព្យរបស់ម៉ាឡេស៊ី នឹងផ្តល់ការណែនាំ ពីរបៀបសាងសង់អគារ ឬផ្ទះបរិស្ថានបៃតង ព្រមទាំងផ្តល់ការហ្វឹកហ្វឺន ដល់សមាជិករបស់ក្រុមប្រឹក្សាអគារបៃតងកម្ពុជា រួមមាន ស្ថាបត្យករ និងវិស្វករផងដែរ។
ប្រធានក្រុមប្រឹក្សាអគារបៃតងកម្ពុជា លោក ជា ប៊ុនសេង ប្រាប់កាសែតខ្មែរថាមស៍ នៅថ្ងៃទី២៣ ខែឧសភា ថា តាមរយៈអនុស្សរណៈយោគយល់គ្នានេះ ក្រុមហ៊ុនលោកអាចទទួលបានផលប្រយោជន៍ និងចំណេះដឹងច្រើន ពីស្តង់ដារនៃការសាងសង់អាគារបៃតង និងពង្រីកធនធានមនុស្ស។ ក្រុមហ៊ុនហ្គ្រីនរ៊ី នឹងទទួលបានកម្រៃ៥% រាល់គំរោងសាងសង់អគារបៃតង នៅឆ្នាំទី១ នៃកិច្ចសន្យា ហើយនឹងទារតម្លៃសេវា ១០% នៅឆ្នាំក្រោយៗទៀត។
ក្រុមប្រឹក្សាអគារបៃតងកម្ពុជា ជាអង្គការក្រៅរដ្ឋាភិបាលមួយ បង្កើតឡើងកាលពីឆ្នាំ២០១៩ ដែលប្រតិបត្តិការស្ថិតក្រោមសមាគមស្ថាបត្យករកម្ពុជា (AAC) ក្នុងគោលបំណងសាងសង់អគារ ឬផ្ទះប្រកបដោយបរិស្ថានបៃតង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។