គណៈកម្មការ​​ព្រៃឈើ​ប្រកាស​វិធានការ​ថ្មី​ដោយ​ដុត​បំផ្លាញ​មធ្យោបាយ​ដឹក​ឈើ​នៅ​កន្លែង

ដោយ វ៉ែន សុមេធ
2019-07-09
អ៊ីម៉ែល
មតិ
Share
បោះពុម្ព
បទល្មើស​ព្រៃឈើ​ក្នុង​ព្រៃ​អារក្ស​ឋិត​នៅភូមិ​ប៉ាដល់ ឃុំ​សេសាន ស្រុក​អូរយ៉ាដាវ ខេត្ត​រតនគិរី ជាប់​ព្រំដែន​កម្ពុជា​វៀតណាម ដែល​សហគមន៍​ស្ទាក់​ចាប់​បាន​កាល​ពី​ចុង​ខែ​តុលា ឆ្នាំ​២០១៨។
បទល្មើស​ព្រៃឈើ​ក្នុង​ព្រៃ​អារក្ស​ឋិត​នៅភូមិ​ប៉ាដល់ ឃុំ​សេសាន ស្រុក​អូរយ៉ាដាវ ខេត្ត​រតនគិរី ជាប់​ព្រំដែន​កម្ពុជា​វៀតណាម ដែល​សហគមន៍​ស្ទាក់​ចាប់​បាន​កាល​ពី​ចុង​ខែ​តុលា ឆ្នាំ​២០១៨។
រូបភាព៖ ចលនា​មាតា​ធម្មជាតិ

គណៈកម្មការ​ជាតិ​ទប់ស្កាត់ និង​បង្ក្រាប​បទល្មើស​ព្រៃឈើ ប្រកាស​ជំហរ​ជាថ្មី​ម្តង​ទៀត នឹង​ចាត់​វិធានការ​ច្បាប់​ដល់​ក្រុមហ៊ុន និង​បុគ្គល​ណា​ដែល​ជាប់​ពាក់ព័ន្ធ​បទល្មើស​ព្រៃឈើ និង​ដុត​បំផ្លាញ​ភស្តុតាង​ដែល​បម្រើ​មធ្យោបាយ​ដឹកជញ្ជូន​ឈើ​ខុសច្បាប់​នៅ​ហ្នឹង​កន្លែង​។ សកម្មជន​បរិស្ថាន និង ក្រុម​ជនជាតិ​ដើម​ភាគតិច សាទរ​ចំណាត់​ការ​ថ្មី​នេះ តែ​ពួកគេ​បារម្ភ​ថា វិធានការ​នេះ​នឹង​គ្មាន​ប្រសិទ្ធភាព ប្រសិនបើ​ស្ថាប័ន​មួយ​នេះ មិន​ចាត់វិធានការ មន្ត្រី​ខិលខូច ដែល​ប្រព្រឹត្ត​អំពើពុករលួយ និង​ក្រុម​ឧកញ៉ា ធ្វើ​អាជីវកម្ម​ឈើ​ខុសច្បាប់​ដុះ​ស្លែ​នោះ​ទេ។

សហគមន៍​ការពារ​ព្រៃឈើ និង​សកម្មជន​បរិស្ថាន​រង់ចាំ​មើល​ការ​ប្ដេជ្ញា​ចិត្ត​ជា​ថ្មី​ទៀត​របស់​គណៈកម្មការ​ជាតិ​ទប់ស្កាត់ និង​បង្ក្រាប​បទល្មើស​ព្រៃឈើ​នេះ ថា តើ​មាន​ចេតនា​ការពារ​ព្រៃឈើ​ពិតប្រាកដ ឬ​គ្រាន់តែ​ធ្វើឡើង​បង្គ្រប់​កិច្ច​។ ពួកគេ​ថា ប្រសិនបើ​គណៈកម្មការ​ជាតិ​ទប់ស្កាត់ និង​បង្ក្រាប​បទល្មើស​ព្រៃឈើ មាន​ឆន្ទៈ​ថែរក្សា​ព្រៃឈើ ឱ្យ​គង់វង្ស មែន​នោះ គឺ​ត្រូវ​ផ្តល់​ឱកាស​ឱ្យ​សមត្ថកិច្ច​មូលដ្ឋាន​តូចតាច​គ្រប់​លំដាប់ថ្នាក់ មានលទ្ធភាព​បង្ក្រាប​បទល្មើស​ព្រៃឈើ នៅ​មូលដ្ឋាន​ជាក់ស្ដែង ប្រសើរ​ជាង​អនុវត្ត​ច្បាប់​បាន​តែមួយ​ប្រាវ នៅ​គ្រា​ដែល​មាន​បទបញ្ជា​ពី​ថ្នាក់លើ ម្ដងម្កាល​នោះ។

គណៈកម្មការ​ជាតិ​ទប់ស្កាត់ និង​បង្ក្រាប​បទល្មើស​ព្រៃឈើ នៅ​ថ្ងៃទី៨ កក្កដា បាន​ចេញ​សេចក្ដី​ប្រកាស​ព័ត៌មាន​ថា ត្រូវ​អនុវត្ត​ច្បាប់ ដល់​បុគ្គល ឬ​ក្រុមហ៊ុន និង​បំផ្លាញ​មធ្យោបាយ​ដែល​ពាក់ព័ន្ធ​បទល្មើស​ព្រៃឈើ​។ គណៈកម្មការ​នេះ រក​ឃើញ​ថា មាន​ការ​លួច​បន្លំ​កាប់​ឈើ ដឹកជញ្ជូន​ឈើ​ខុសច្បាប់ និង​បាន​ដាក់​ចេញ​វិធានការ ២​ចំណុច ក្នុង​ទិសដៅ​ដោះស្រាយ​បញ្ហា​ព្រៃឈើ គឺ​ទី​១- បុគ្គល ឬ​ក្រុមហ៊ុន​ដែល​ពាក់ព័ន្ធ​បទល្មើស​ព្រៃឈើ នឹង​ត្រូវ​អនុវត្ត​ច្បាប់​យ៉ាង​តឹងរ៉ឹង។ ទី​២- មធ្យោបាយ​បម្រើ​ដឹកជញ្ជូន​ឈើ​រួមមាន​រថយន្ត គោយន្ត និង ម៉ូតូ​ជាដើម ត្រូវ​បំផ្លាញ​ចោល​នៅ​ហ្នឹង​កន្លែង។

សហគមន៍​ការពារ​ព្រៃ​ឡង់ ខេត្ត​ស្ទឹងត្រែង លោក យឹម សុភ័ក្ត្រ យល់ថា ប្រសិនបើ​គណៈកម្មការ​នេះ​ធ្វើ​កិច្ច​ការងារ ដើម្បី​ផលប្រយោជន៍​ជាតិ គួរតែ​អនុវត្ត​ច្បាប់​ដល់​សមត្ថកិច្ច និង​អាជ្ញាធរ​ពាក់ព័ន្ធ​ណា ដែល​លាក់បាំង រាល់​សកម្មភាព​ដឹកជញ្ជូន​ឈើ និង​ការ​ធ្វើ​អាជីវកម្ម​ឈើ​គ្រប់​រូបភាព​។ លើស​ពី​នេះ គណៈកម្មការ​នេះ ត្រូវ​ពិនិត្យមើល​ឡើងវិញ លើ​ទីផ្សារ​ផ្គត់ផ្គង់​ឈើ និង​មធ្យោបាយ​ទាំងឡាយ ដែល​សម្រួល​ដល់​ការ​ធ្វើ​អាជីវកម្ម​ឈើ ជាពិសេស​ត្រូវ​ចាត់វិធានការ​ច្បាប់​ដល់​អាជីវកម្ម​ប្រមូល​ទិញ​ឈើ និង​រោង​សិប្បកម្ម​កែច្នៃ​ឈើ​គ្រប់​រូបភាព។ លោក​អះអាង​ថា ប្រសិនបើ​ចំណុច​ទាំងអស់​នេះ គណៈកម្មការ​ជំនាញ​មួយ​នេះ មិន​អនុវត្ត​ទេ លោក​មិន​សង្ឃឹមថា ការ​ប្ដេជ្ញា​ចិត្ត​ជា​ថ្មី​ទៀត​នេះ នឹង​មាន​ប្រសិទ្ធភាព​ទេ៖ «ខ្ញុំ​នៅតែ​មាន​ការ​ព្រួយបារម្ភ​ចំពោះ​ការ​រឹត​បណ្ដឹង​ច្បាប់​ទាំងនេះ តើ​មាន​ប្រសិទ្ធភាព​ប៉ុណ្ណា តែ​ប្រសិនបើ​ពុំ​មាន​ការអនុវត្ត​ច្បាប់​ទេ វិធានការ​ហ្នឹង​ក៏​មិន​អាច​អនុវត្ត​បាន​ទេ។ លោក អេង ហ៊ី គួរតែ​ដាក់​វិធានការ​ក្ដៅ​ចំពោះ​អាជ្ញាធរ​មូលដ្ឋាន ចៀសវាង​បិទបាំង​ការ​ដឹក​ជញ្ជូន​ឈើ និង​ការ​ធ្វើ​អាជីវកម្ម​ព្រៃឈើ»

សហគមន៍​ជន​ជនជាតិ​ដើម​ភាគតិច ខេត្ត​មណ្ឌលគិរី លោក ក្រើង តុលា មាន​សង្ឃឹម​តិច​តួច​ណាស់ ពី​ប្រសិទ្ធភាព​ការងារ​របស់​មន្ត្រី​ជំនាញ​អនុវត្ត​ច្បាប់​ព្រៃឈើ​ឱ្យ​មាន​ប្រសិទ្ធភាព ព្រោះ​ជំនួញ​ឈើ​ឆ្លងដែន និង​ការ​ធ្វើ​អាជីវកម្ម​ខុសច្បាប់​ខ្នាត​ធំ​ភាគច្រើន មាន​ជាប់​ពាក់ព័ន្ធ​មន្ត្រី​គ្រាក់ៗ និង​ឧកញ៉ា​មួយ​ចំនួន ជា​មេខ្លោង​។ លោក​គិត​ថា ចំណាត់ការ​ថ្មី​នេះ នឹង​មាន​ប្រសិទ្ធភាព​តែ​រយៈពេល​ខ្លី​ប៉ុណ្ណោះ ព្រោះ​បេសកកម្ម​របស់​គណៈកម្មការ​មួយ​នេះ​កន្លងទៅ ធ្វើឡើង​ដូច​ភ្លើង​ចំបើង ឬមួយ​ឆាវៗ ផ្អែក​តាម​ទំហំ​កញ្ចប់​ថវិកា​របស់​រដ្ឋ និង​បទបញ្ជា​ពី​ថ្នាក់លើ​ម្ដងម្កាល៖ «វា​ប៉ះពាល់​បក្សពួកនិយម វា​ប៉ះពាល់​សាច់​ញត្តិ វា​ប៉ះពាល់​មិត្តភ័ក្ដិ​អ៊ីចឹង​ទៅ មិន​អនុវត្ត​ច្បាប់​ឱ្យ​បាន ១០០​ភាគរយ​ទេ ខ្ញុំ​ជឿ​អ៊ីចឹង​ហ្មង តែ​ខ្ញុំ​ជឿ​ច្រើន​ជាងគេ គឺ​គាត់​អនុវត្ត​បទបញ្ជា​។ ទោះជា​យ៉ាងណា ខ្ញុំ​នៅតែ​អបអរ ដែល​បញ្ចេញ​កណ្ដាប់​ដៃ ទោះជា​រយៈពេល​ប៉ុន្មាន​ក៏​ខ្ញុំ​អរគុណ​ដែរ»

សកម្មជន​បរិស្ថាន​ដែល​ចុះ​សង្កេត​បទល្មើស​ព្រៃឈើ លោក ហេង ស្រស់ សង្កេត​ឃើញ​ថា រយៈពេល ៥​ឆ្នាំ​កន្លង​មក​នេះ វិធានការ​បង្ក្រាប​បទ​ល្មើស​ព្រៃឈើ របស់​គណៈកម្មការ​ជាតិ មានតែ​លើ​ក្រដាស តែ​ការអនុវត្ត​ជាក់ស្ដែង​វិញ គឺ​គ្មាន​ប្រសិទ្ធភាព​នោះ​ទេ​។ តែ​យ៉ាងណា លោក​នឹង​ចាំ​អ៊ុត​មើល​ថា តើ​គណៈកម្មការ​ជំនាញ​នេះ ហ៊ាន​អនុវត្ត​ច្បាប់​ដល់​ក្រុម​ឧកញ៉ា និង​អ្នក​មាន​អំណាច ដែល​ជ្រក​ក្រោម​ស្លាក​ដី​សម្បទាន​សេដ្ឋកិច្ច ធ្វើ​អាជីវកម្ម​ឈើ​ទ្រង់ទ្រាយ​ធំ នៅ​ខេត្ត​ភាគ​ឦសាន​ឬទេ​? ប្រសិនបើ​ចង់​សង្គ្រោះ​ព្រៃឈើ​មែន​នោះ៖ «មានតែ​វិធីសាស្ត្រ​មួយ ចាប់​បាន​ហើយ ត្រូវតែ​កម្ទេច​ចោល​តែម្ដង ត្រូវតែ​ធ្វើ​ឱ្យ​អ្នក​ទាំង​អស់ហ្នឹង​រាង និង​ចាប់​ពួក​ហ្នឹង​ទៅ​ដាក់គុក​តែម្ដង ព្រោះ​ពួក​ហ្នឹង​ជា​ក្រុម​ជន​បំផ្លាញ​ជាតិ ហើយ​មួយវិញទៀត ត្រូវ​ចុះ​ត្រួតពិនិត្យ​មន្ត្រី​ថ្នាក់ក្រោម​ទាំងអស់​ដែរ ប្រព្រឹត្ត​អំពើពុករលួយ​ជាមួយ​ក្រុម​ឧក្រិដ្ឋជន​ហ្នឹង ចាប់​អូស​ដាក់​ពន្ធនាគារ​ទាំង​អស់ តែ​មាន​តែ​លើ​ក្រដាស ពេល​ពួកគាត់​ចុះទៅ​មិន​យក​ក្រដាស​ហ្នឹង​កាន់​តាម»

ទោះ​យ៉ាងណា អ្នកនាំពាក្យ​គណៈកម្មការ​ជាតិ​ទប់ស្កាត់ និង​បង្ក្រាប​បទល្មើស​ព្រៃឈើ លោក អេង ហ៊ី ព្រមាន​ធ្ងន់ៗ​ថា ប្រសិនបើ​រក​ឃើញ​​​​ថា មាន​ក្រុមហ៊ុន​ណា ប្រព្រឹត្ត​ខុស​ច្បាប់ គណៈកម្មការ​ជំនាញ​នឹង​អនុវត្ត​តាមច្បាប់។ លោក​ថា បុគ្គល​ណា​ក្តី ឱ្យ​តែ​រកឃើញ​ថា មាន​ជាប់​ពាក់ព័ន្ធ​ប្រព្រឹត្ត​បទល្មើស​ព្រៃឈើ ត្រូវតែ​អនុវត្ត​ច្បាប់ ដោយ​បញ្ជូន​សំណុំរឿង​ទៅ​តុលាការ។ លោក​បញ្ជាក់​ថា គណៈកម្មការ​ជាតិ​នឹង​ចុះ​ឆែកឆេរ ក្រុមហ៊ុន​សម្បទាន​សេដ្ឋកិច្ច​មួយ​ចំនួន ហើយ​ប្រសិនបើ​រក​ឃើញ​ថា ក្រុមហ៊ុន​ណាមួយ មាន​ជាប់​ពាក់ព័ន្ធ​បទល្មើស​ព្រៃឈើ​នឹង​ត្រូវ​អនុវត្ត​ច្បាប់​ជា​ធរមាន៖ «ប្រធាន​គណៈកម្មការ​ជាតិ​ទប់ស្កាត់ និង​បង្ក្រាប​បទល្មើស​ព្រៃឈើ​បាន​រៀបចំ​ផែនការ ជាមួយ​យន្តការ​ការងារ​ច្បាស់លាស់ ដូច្នេះ​លោក​ឧត្ដមសេនីយ៍​ឯក ហុង វិណុល គាត់​នឹង​ដឹកនាំ​កម្លាំង​ចម្រុះ ចុះទៅ​ធ្វើ​ការងារ​គ្រប់កន្លែង​ទាំងអស់ ពាក់ព័ន្ធ​ករណី​ល្មើសច្បាប់​។ ប្រសិនបើ​រក​ឃើញ​ថា ក្រុមហ៊ុន​ណា ប្រព្រឹត្ត​ល្មើសច្បាប់​នឹង​ត្រូវ​អនុវត្ត​ច្បាប់​។ មន្ត្រី​ណា​ក៏​ដោយ ឱ្យ​តែ​រក​ឃើញ​ថា ខុសច្បាប់ គឺ​យើង​អនុវត្ត​ទៅតាម​ច្បាប់»

របាយការណ៍​របស់​គណៈកម្មការ​ជាតិ​ទប់ស្កាត់ និង​បង្ក្រាប​បទល្មើស​ព្រៃឈើ​បង្ហាញ​ថា អំឡុង​ឆ្នាំ ២០១៦ គណៈកម្មការ​នេះ​បាន​រឹបអូស​ឈើ​ប្រណិត​បាន​ជាង ៧ ម៉ឺន​ម៉ែត្រ​គួប និង​បញ្ជូន​សំណុំរឿង​ទៅកាន់​តុលាការ​ចំនួន​ជិត ៦០​ករណី (៥៧) ហើយ​ឈើ​ដែល​រឹប​អូស​បាន​ត្រូវ​បាន​លក់ បង្វិល​កញ្ចប់​ថវិកា​ចូល​រដ្ឋ។ ទន្ទឹម​នឹង​នេះ អំឡុង​ឆ្នាំ​២០១៨ គណៈកម្មការ​នេះ​បង្ក្រាប​បទល្មើស​ព្រៃឈើ​បាន ៣៣៨​លើក ឃាត់ខ្លួន​មនុស្ស​ជាង ១០០​នាក់ ក្នុង​នោះ​បញ្ជូន​ទៅ​តុល​ការ ៦៥​នាក់ និង​បាន​រឹបអូស​ឈើ​ចំនួន​ជាង ៤​ពាន់​ម៉ែត្រ​គួប។ ក៏ប៉ុន្តែ​មន្ត្រី​សង្គម​ស៊ីវិល​រិះគន់​ថា គណៈកម្មការ​នេះ​មិនបាន​អនុវត្ត​ច្បាប់​ដល់​ក្រុម​ឧក្រិដ្ឋជន​មាន​ងារ​ជា​ឧកញ៉ា​ជួញដូរ​ឈើ​ឆ្លងដែន ដុះ​ស្លែ​ណា​ម្នាក់​នោះ​ទេ​។​

មន្ត្រី​ពង្រឹង​សិទ្ធិ​អំណាច​សហគមន៍ នៃ​សមាគម​អាដហុក (Adhoc) លោក ប៉ែន ប៊ុណ្ណារ៍ ថ្លែង​ថា វិបត្តិ​ព្រៃឈើ គឺជា​ចំណុច​រសើប​មួយ ដែល​គណៈកម្មការ​ជាតិ មាន​ចេតនា​បណ្ដោយ​ឱ្យ​ជនល្មើស ដែល​ជា​ក្រុម​ឧកញ៉ា និង​បុគ្គល​មានអំណាច ដែល​ពាក់ព័ន្ធ​បទល្មើស​ព្រៃឈើ​ដុះ​ស្លែ រស់នៅ​ដោយ​សេរី ដោយ​ពុំបាន​នាំ​ខ្លួន​ពួកគេ បញ្ជូន​ទៅ​តុលាការ​។ លោក​ថា បើ​ទោះ​បីជា​រក​ឃើញ វត្ថុ​តាង​ជាក់ស្ដែង​ជាច្រើន​មាន​ជាប់​ពាក់ព័ន្ធ​ឧកញ៉ា​មួយ​ចំនួន​ក្តី ក៏ប៉ុន្តែ​គណៈកម្មការ​មួយ​នេះ មិនបាន​នាំ​ខ្លួន ជនសង្ស័យ​ទាំងនោះ​ទៅកាន់​តុលាការ អនុវត្ត​ច្បាប់​នោះ​ទេ៖ «បទល្មើស​ឧក្រិដ្ឋ​នៅ​ប្រទេស​កម្ពុជា វា​ទុំជោរ​មិន​អាច​បង្ក្រាប​បាន បើ​ទោះ​បី​បង្កើត​គណៈកម្មការ ហើយ​មានការ​គាំទ្រ​ថ្នាក់ដឹកនាំ​រដ្ឋ ប្រើ​ឧទ្ធម្ភាគចក្រ យ៉ាងម៉េច​ក៏ដោយ ឃើញ​តែ​រឹបអូស​រាប់​ម៉ឺន​ម៉ែត្រ​គូប តែ​អត់​មាន​ឆន្ទៈ​នាំ​ខ្លួន​ក្រុម​ឧក្រិដ្ឋជន​ទៅ​តុលាការ​។ យើង​ឃើញ​ថា បណ្ដោយ​ឱ្យ​កាប់​បំផ្លាញ​ព្រៃឈើ​តទៅទៀត»

សកម្មជន​បរិស្ថាន និង​សហគមន៍​ព្រៃឈើ​សង្កេត​ឃើញ​ថា នៅ​រយៈពេល​ប៉ុន្មាន​ឆ្នាំ​ចុង​ក្រោយនេះ បទល្មើស​ព្រៃឈើ​កើត​មាន​ច្រើន ឋិត​ក្នុង​តំបន់​ព្រៃ​ការពារ​ធម្មជាតិ ដែល​ការពារ​ដោយ​អនុក្រឹត្យ និង​ព្រះរាជក្រឹត្យ និង​ព្រៃ​សហគមន៍ ដែល​ឋិត​ក្រោម​ការគ្រប់គ្រង​របស់​ក្រសួងបរិស្ថាន​។ លើស​ពី​ព្រៃ​អភិរក្ស​ទាំងនោះ ក្រុម​ឧកញ៉ា និង​ឈ្មួញ​ទុច្ចរិត បាន​ប្រើ​គ្រប់​មធ្យោបាយ ប្រមូល​ឈើ​មូលៗ​ធំ មាន​តម្លៃ ធ្វើ​អាជីវកម្ម កាប់ និង​ដឹកជញ្ជូន​លក់​ទៅ​ប្រទេស​វៀតណាម និង​ផ្គត់ផ្គង់​ទីផ្សារ​ក្នុងស្រុក។

មន្ត្រី​ជាន់ខ្ពស់ ក្រសួង​បរិស្ថាន​ធ្លាប់​អះអាង​ថា ខ្លួន​បាន​គ្រប់គ្រង​តំបន់​ព្រៃ​ការពារ​ធម្មជាតិ​ជិត ៦០​កន្លែង ដែល​មាន​ផ្ទៃដី​ជាង ៧​លាន​ហិកតារ (,៥ លាន​) នៅ​ទូទាំង​ប្រទេស និង​មាន​មន្ត្រី​ឧទ្យាន​រក្ស​ជាង ១ ពាន់ ២ រយ​នាក់ (.២២១)។ មន្ត្រី​ឧទ្យានុរក្ស ក្នុង​ម្នាក់ៗ​ត្រូវ​គ្រប់គ្រង​ផ្ទៃដី ៥​ម៉ឺន​ហិកតារ ហេតុនេះ​ការគ្រប់គ្រង​ព្រៃ​ការពារ​ធម្មជាតិ នៅ​តំបន់​នីមួយៗ​នៅ​មាន​កម្រិត​នៅឡើយ​។ ក្រសួង​បាន​ចែក​រំលែក​ការទទួលខុសត្រូវ​ភារកិច្ច គ្រប់គ្រង​ធន​ធនធានធម្មជាតិ​ទៅ​ឱ្យ​ស្ថាប័ន​ផ្សេងៗ សហការ​ចូលរួម​អភិរក្ស។

ទោះជា​យ៉ាងណា ការ​រក្សា​ការពារ​ធនធានធម្មជាតិ​គឺជា​ការទទួលខុសត្រូវ​របស់​រដ្ឋាភិបាល ដែល​អ្នក​សង្កេតការណ៍​មើល​ឃើញ​ថា រដ្ឋាភិបាល​កម្ពុជា​បរាជ័យ​ក្នុង​ការ​ធ្វើ​បេសកកម្ម​នេះ។

កាលពី​អំឡុង​ឆ្នាំ​២០១៨ អង្គការ​សង្គម​ស៊ីវិល​ជាតិ និង​អន្តរជាតិ ២០​ស្ថាប័ន​រក​ឃើញ​ថា ប្រទេស​វៀតណាម​នៅតែ​គាំទ្រ​ឱ្យ​មាន​ឧក្រិដ្ឋកម្ម​ព្រៃឈើ​ខុសច្បាប់​ទ្រង់ទ្រាយ​ធំ ដោយមាន​ការ​ឃុបឃិត​ជា​ប្រព័ន្ធ​រវាង​អាជ្ញាធរ​កម្ពុជា និង​វៀតណាម៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល