"មន្ត្រី​បរិស្ថាន​មួយ​ចំនួន​នៅ​ស្ទឹងត្រែង​ជំរិត​ទារ​លុយ​ពី​អ្នក​ដឹក​ឈើ​ខុស​ច្បាប់​ជា​ថ្នូរ​មិន​អនុវត្ត​ច្បាប់"

ដោយ ហេង រស្មី
2019-02-28
អ៊ីម៉ែល
មតិ
Share
បោះពុម្ព
មន្ត្រី​កម្មវិធី​បណ្ដាញ​សហគមន៍​នៃ​សមាគម​អាដហុក (ADHOC) លោក ប៉ែន ប៊ុណ្ណារ៍ ក្នុង​កម្មវិធី​វេទិកា​អ្នក​ស្ដាប់​វិទ្យុ​អាស៊ីសេរី កាល​ពី​ថ្ងៃ​ទី​១២ ខែ​ឧសភា ឆ្នាំ​២០១៧។
មន្ត្រី​កម្មវិធី​បណ្ដាញ​សហគមន៍​នៃ​សមាគម​អាដហុក (ADHOC) លោក ប៉ែន ប៊ុណ្ណារ៍ ក្នុង​កម្មវិធី​វេទិកា​អ្នក​ស្ដាប់​វិទ្យុ​អាស៊ីសេរី កាល​ពី​ថ្ងៃ​ទី​១២ ខែ​ឧសភា ឆ្នាំ​២០១៧។
RFA

មន្ត្រី​បរិស្ថាន​មួយ​ចំនួន ដែល​ប្រចាំ​នៅ​ទីស្នាក់ការ​ស្រុក​សៀម​បូក​ខេត្ត​ស្ទឹងត្រែង រង​ការ​ចោទ​ថា ជំរិត​ទារ​លុយ​ពី​ពលរដ្ឋ​ដឹក​​ជញ្ជូន​​​ឈើ​​​ខុស​​ច្បាប់​​ចេញ​ពី​ដែន​ជម្រក​សត្វ​ព្រៃឡង់។ អ្នកភូមិ​ថា ឆ្មាំ​អភិរក្ស​របស់​ក្រសួង​បរិស្ថាន បាន​​បង្ខំ​​ឱ្យ​​​ពួក​​គេ​​​បង់​​លុយ​ច្រើន​​​លាន​​​រៀល​​​ជា​​​ថ្នូរ​មិន​អនុវត្ត​ច្បាប់​បរិស្ថាន។

ពលរដ្ឋ​រស់នៅ​ភូមិ​អូរឡង់ ឃុំ​សៀម​បូក ស្រុក​សៀម​បូក ប្រាប់​អាស៊ីសេរី​នៅ​ថ្ងៃទី២៧ កុម្ភៈ​ថា អ្នកភូមិ​ប្រមាណ ៤០​នាក់ បាន​បង្ខំចិត្ត​រំដោះ​គោយន្ត ៦​គ្រឿង​ចេញពី​មន្ត្រី​បរិស្ថាន កាលពី​យប់​ថ្ងៃទី២៤ កុម្ភៈ ដោយសារ​ពួកគេ​គ្មាន​ប្រាក់​គ្រប់គ្រាន់ សម្រាប់​​បង់​ឱ្យ​មន្ត្រី​បរិស្ថាន​ចំនួន​ជាង ៤​លាន​រៀល ​(៤២០.០០០) ឬ​ស្នើ​ជាង ១​ពាន់​ដុល្លារ ជា​ថ្នូរ​​មិន​​ឃាត់​​គោយន្ត​​របស់​​ពួក​គេ​​មក​​រក្សា​ទុក។

ពលរដ្ឋ​រស់នៅ​ភូមិ​អូរឡង់ លោកស្រី សែម ហេង រំឭក​ថា កាលពី​យប់​ថ្ងៃ​ទី២៤ កុម្ភៈ​អ្នកភូមិ​បាន​ចូល​ព្រៃ​ដើម្បី​អារ​ឈើ​លក់ និង​ធ្វើជា​គ្រឿងផ្ទះ​នៅ​ចំណុច​ស្រែបាច ក្នុង​ដែន​ជម្រក​សត្វព្រៃ​ឡង់ តែ​ត្រូវ​បាន​មន្ត្រី​បរិស្ថាន​មាន​គ្នា ៧​នាក់​ប្រដាប់​ដោយ​អាវុធ ៣​ដើម ស្ទាក់​ចាប់​តាម​ផ្លូវ​។ លោកស្រី​ថា មន្ត្រី​បរិស្ថាន​ទាំងនោះ​បាន​តម្រូវ​ឱ្យ​ពួកគេ​បង់​ប្រាក់​ក្នុង​មួយ​គោរ​យន្ត ៧០​ម៉ឺន​រៀល សរុប សម្រាប់​គោយន្ត​ចំនួន​៦​គោយន្ត ជា​ថ្នូរ​មិន​អនុវត្ត​ច្បាប់ ហើយ​ពួកគេ​ពុំ​មាន​ប្រាក់​គ្រប់គ្រាន់​នោះ​ទេ រហូត​ឈាន​ដល់​ការ​ផ្ទុះ​អាវុធ​ចំនួន ៣​គ្រាប់​។ ចំណែក​អ្នកភូមិ ៤០​នាក់ បាន​នាំគ្នា​រំដោះ​គោយន្ត​ទាំង​នោះ​មក​លំនៅឋាន​រៀងៗ​ខ្លួន៖ «ដោយសារ​ប្រជាជន​យក​គោយន្ត​មកវិញ​មិនបាន​បង់​ប្រាក់​។ បង់​ឱ្យ​គេ​៧០​ហើយ តែ​សល់​គោយន្ត​មួយ​គេ​អត់​យក ប្រមូល​ឱ្យ​គេ​តែ​អត់​គ្រប់គ្នា​គាត់ (មន្ត្រី​បរិស្ថាន) អត់​យក គាត់​អត់​ឱ្យ​គោយន្ត​មក»

ឆ្លើយតប​ការ​ចោទ​ប្រកាន់​នេះ ប្រធាន​មន្ទីរ​បរិស្ថាន​ខេត្ត​ស្ទឹងត្រែង លោក អេង ភីរុង ឱ្យ​ដឹង​ថា ក្រុម​ពលរដ្ឋ​ទាំង​នោះ​បាន​សារភាព​ទោសកំហុស​រួចហើយ រីឯ​លោក​បាន​ផ្ញើ​សំណុំ​រឿង​នេះ​ទៅ​ក្រសួង​សាមី​រួច​អស់ហើយ​ដែរ​។ លោក​បញ្ជាក់​ថា ពលរដ្ឋ​ឈ្មោះ សែម ហេង គឺជា​អ្នក​ដែល​ប្រព្រឹត្ត​បទល្មើស​ព្រៃឈើ៖ «សារភាព​ទោស​របស់​គាត់​មាន​អស់ហើយ​ខ្ញុំ​បាន​ទៅ​ក្រសួង​អស់ហើយ​។​ប្រជាជន​ឈ្មោះ សែម ហេង ជា​អ្នក​ប្រព្រឹត្តិ​បទល្មើស។ អ៊ីចឹង​រឿង​ហ្នឹង​ទាក់ទង​ទៅ​ក្រសួងបរិស្ថាន​ទៅ​ព្រោះ​អី​ភស្តុតាង​អី​ខ្ញុំ​បាន​ផ្ញើ​ទៅ​អស់ហើយ អ្នក​ប្រព្រឹត្តិ​បទល្មើស​អី​គាត់​បាន​សារភាព​អស់ហើយ»

សហគមន៍​ការពារ​ព្រៃ​ឡង់ ខេត្ត​ស្ទឹងត្រែង លោក សែម សុធា សង្កេត​ឃើញ​ថា ពលរដ្ឋ​រស់នៅ​ភូមិ​អូរឡង់ ប្រមាណ ៨០​ភាគ​រយ សុទ្ធ​សឹង​ជា​អ្នក​រក​ស៊ី​អារ​ឈើ និង​ចូល​ព្រៃ​អារ​ឈើ​ខុសច្បាប់ ជា​របរ​អាជីព បន្ទាប់ពី​ធ្វើស្រែ​ចម្ការ។ លោក​ថា ដើម​ហេតុ​រឿង​​នេះ ដោយសារ​ដឹកជញ្ជូន​ឈើ​ខុសច្បាប់ ហើយ​មន្ត្រី​បរិស្ថាន​គួរតែ​អនុវត្ត​ច្បាប់​ព្រៃឈើ​ឱ្យ​ពិតប្រាកដ ដោយ​​មិន​​ត្រូវ​​យក​​លុយ​ពី​​ជន​ល្មើស ជា​ថ្នូរ​មិន​អនុវត្ត​ច្បាប់​នោះ​ទេ៖ «ចង់​សុំ​ទៅ​មន្ត្រី​ឧទ្យានុរក្ស​ឱ្យ​អនុវត្ត​ច្បាប់​ឱ្យ​បាន​​ពេញលេញ​​តែ​ម្ដង​។​ មិន​គួរ​យក​​លុយ​​អ៊ីចឹង ពីព្រោះ​​យើង​​ដឹង​​ហើយ​​ថា នៅ​ក្នុង​ច្បាប់​ដែន​តំបន់​ការពារ​ គឺ​​គេ​​មាន​​ច្បាប់​​មួយ ​ដែល​​និយាយ​​ពី​​ពិន័យ​​អន្តរកាល យក​​តែ​​លុយ​​ហើយ​​និង​​វត្ថុតាង​​ទាំង​អស់​​ត្រូវ​​បាន​​ដោះ​លែង​​វិញ។ អាហ្នឹង​ខ្ញុំ​គិត​ថា ចាប់​ផ្ដើម​​អនុវត្ត​​ខុស​​ហើយ។ ដល់​​អ៊ីចឹង​​មាន​​ន័យ​​ថា ជំរុញ​​ឱ្យ​ក្រុម​បទល្មើស​ដែល​ប្រព្រឹត្ត​បទល្មើស​​ព្រៃ​ឈើ​​ហ្នឹង​​គាត់​​មិន​​រាង​​ចាន​​ទេ»

មន្ត្រី​ពង្រឹង​សិទ្ធិ​អំណាច​សហគមន៍​នៃ​សមាគម​អាដហុក (Adhoc) លោក ប៉ែន ប៊ុណ្ណា​រ៍ យល់ថា ការ​​ដឹក​​ជញ្ជូន​​ឈើ គឺជា​ទង្វើ​ខុសច្បាប់ ដែល​ទាមទារ​ឱ្យ​មន្ត្រី​ជំនាញ​អនុវត្ត​ច្បាប់​ព្រៃឈើ​ឱ្យ​ម៉ឹង​មាត់ ។ ក៏ប៉ុន្តែ​បើ​មន្ត្រី​ជំនាញ យក​តួនាទី ជំរិត​ទារ​ប្រាក់​ពី​អ្នក​ដឹកឈើ ជា​ថ្នូរ​មិន​អនុវត្ត​ច្បាប់ គឺជា​ប្រភេទ​នៃ​អំពើពុករលួយ​។ លោក​សង្កេត​ឃើញ​ថា បាតុភាព​នេះ​តែងតែ​កើតមាន​ជារឿយៗ ដោយមាន​ការ​ព្រមព្រៀង​គ្នា​ពី​អ្នក​ដឹកឈើ និង​មន្ត្រី​ជំនាញ ដែល​លោក​ចាត់ទុកថា ជា​ប្រភព​នៃ​វិនាសកម្ម​ព្រៃឈើ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល