អាជីវករផ្សារក្រុងស្ទឹងសែនខេត្តកំពង់ធំស្នើសុំអាជ្ញាធរជួយដោះស្រាយបញ្ហាសំរាម
គំនរសំរាមនៅជាប់ផ្សារស្ទឹងសែន ខេត្តកំពង់ធំ ដែលពលរដ្ឋ និងអាជីវករស្នើសុំអាជ្ញាធរជួយដោះស្រាយ និងប្រមូល។ រូបថតថ្ងៃទី២៨ ខែមេសា ឆ្នាំ២០១៥
អាជីវករលក់សម្លៀកបំពាក់ ស្បែកជើង និងរបស់របរផ្សេងទៀតនៅក្នុងផ្សារចាស់ ឬផ្សារស្ទឹងសែន ក្រុងស្ទឹងសែន ខេត្តកំពង់ធំ ត្អូញត្អែរចំពោះបញ្ហាសំរាមស្អុយរលួយ ដែលបង្កផលប៉ះពាល់ដល់សុខភាពរបស់ពួកគាត់។ ពលរដ្ឋទាំងនោះ ស្នើឲ្យអាជ្ញាធរលៃលកយ៉ាងណាយកសំរាមចេញពីតំបន់នោះ ឬក៏មានវិធានការលើក្រុមហ៊ុនប្រមូលសំរាមឲ្យប្រមូលទាន់ពេលវេលា ជៀសវាងប៉ះពាល់សុខភាពពលរដ្ឋតទៅទៀត។
នៅពេលដើរចូលក្នុងផ្សារចាស់ ឬផ្សារស្ទឹងសែន នៅជាប់ដងស្ទឹងសែនទិសខាងលិច គឺមានភាយក្លិនស្អុយស្ទើរតែទ្រាំមិនបាន។ លើសពីនេះទៀត នៅតាមផ្លូវធ្វើដំណើរក្បែរផ្សារ អ្នកដំណើរភាគច្រើន គឺយកដៃខ្ទប់ច្រមុះនៅពេលឆ្លងកាត់តំបន់ផ្សារកន្លែងផ្ញើម៉ូតូកង់។ ក្លិនស្អុយទាំងនោះ គឺចេញពីគំនរសំរាមដែលដាក់នៅម្ខាងផ្លូវ ជាប់មាត់ស្ទឹងសែនក្នុងអាងស្តុកសំរាមមួយ។
ពលរដ្ឋ និងអាជីវករផ្សារទាំងអស់ នាំគ្នារអ៊ូរទាំចំពោះបញ្ហានេះ ដោយពួកគាត់ស្នើសុំឲ្យអាជ្ញាធរក្រុង និងម្ចាស់ភាស៊ីផ្សារ ឬអ្នកប្រមូលសំរាម ដោះស្រាយបញ្ហាសំរាមនេះជាបន្ទាន់។
អាជីវករលក់សម្លៀកបំពាក់នៅក្នុងផ្សារស្ទឹងសែន អ្នកស្រី អ៊ុន ចន្ធូ មានប្រសាសន៍ថា បញ្ហាក្លិនស្អុយចាប់ផ្ដើមកើតមានតាំងពីគេបង្កើតកន្លែងដាក់សំរាមនៅទីនោះប្រមាណ ២ឆ្នាំមកម្ល៉េះ។ អ្នកស្រីថា មូលហេតុបណ្ដាលឲ្យមានក្លិនស្អុយ គឺដោយសារការប្រមូលសំរាមមិនបានស្អាត និងមិនបានទាន់ពេលវេលាជាដើម៖ «គេប្រមូលដែរ ប៉ុន្តែនៅតែធុំ គេប្រមូលមិនអស់។ ប្រមូលមិនអស់ធុំរាល់ថ្ងៃ វាខូចសុខភាពអាជីវករនៅក្នុងហ្នឹងផង។ ចា៎! លក់អត់ដាច់ទេពូ គ្រាន់តែគេចូលមកគេខ្ទប់ច្រមុះគេធុំពេក»។
ដោយឡែកអាជីវករលក់ស្បែកជើង និងមួកមួយរូបទៀត អ្នកស្រី សុខ លាងនី ស្នើឲ្យអាជ្ញាធរក្រុង ជួយដោះស្រាយចំពោះបញ្ហាសំរាមនេះ ពីព្រោះក្រៅតែពីលក់ដូរទំនិញមិនសូវដាច់ដោយសារតែមានក្លិនស្អុយហើយ ពេលខ្លះពួកគាត់ពិសាបាយ ឬនំចំណីក៏ពិបាកដែរ។ ម្យ៉ាងក្លិនស្អុយនោះ គឺបណ្ដាលឲ្យប៉ះពាល់ដល់សុខភាពពួកគាត់ ពិសេសក្មេងៗ៖ «ចា៎! មិនដឹងយ៉ាងម៉េចដែរ ខេត្តកំពង់ធំ ទទួលបានផ្កាពីរទងយ៉ាងស្រស់ ឥឡូវវាប្រែក្លាយជាស្អុយរលួយហើយណា។ ខេត្តកំពង់ធំ ទីក្រុងស្អាតមិនគួរអ៊ីចឹងទេ»។
ម្ចាស់តូបអ៊ុតសក់ក្នុងផ្សារម្នាក់ទៀត អ្នកស្រី ឆេង ស៊ាវហួយ និយាយថា បញ្ហាសំរាម គឺកើតចេញពីអ្នកប្រមូលសំរាមមិនបានស្អាតផង និងកើតចេញពីពលរដ្ឋខ្លះផង ពីព្រោះមានអាជីវករលក់បន្លែខ្លះ យកសំរាមទៅដាក់នៅខាងក្រៅអាងស្តុកសំរាម ទើបបណ្ដាលឲ្យអ្នកយកសំរាមទៅតាមក្រោយពិបាកចូល ហើយក៏ចេះតែបោះនៅខាងក្រៅអាងទៅ ជាហេតុធ្វើឲ្យអ្នកប្រមូលសំរាមប្រមូលមិនបានស្អាត។
យ៉ាងណា វិទ្យុអាស៊ីសេរី មិនអាចស្វែងរកប្រភពទាក់ទងភាគីម្ចាស់ភាស៊ីផ្សារ និងក្រុមហ៊ុនប្រមូលសំរាមបានទេ នៅថ្ងៃទី២៨ មេសា។
យ៉ាងណា អភិបាលក្រុងស្ទឹងសែន លោក សុខ វិន មានប្រសាសន៍ថា បញ្ហានេះ គឺមានក្រុមហ៊ុនដឹកសំរាមជាអ្នកប្រមូលចេញពីកន្លែងស្តុកសំរាមទាំងនោះ។ លោកបន្ថែមថា ការប្រមូលសំរាមមិនអាចកកស្ទះយូរថ្ងៃបានទេ ប៉ុន្តែអាចការប្រមូលសំរាមនោះមិនបានអស់ ឬមិនបានស្អាត ទើបនាំឲ្យមានក្លិនស្អុយបែបនេះ។ តែយ៉ាងណា លោកថានឹងជំរុញការដោះស្រាយបញ្ហាមួយនេះ៖ «ប៉ុន្តែអត់អីទេ ខ្ញុំទទួលព័ត៌មាន ខ្ញុំនឹងជំរុញបន្ថែមអំពីការខិតខំប្រមូលចេញពីកន្លែងដេប៉ូស្តុកសំរាម»។
ទោះបីជាយ៉ាងណាក៏ដោយ អាជីវករខ្លះនិយាយថា អាជ្ញាធរមិនគួរឲ្យមានកន្លែងស្តុកសំរាមនៅជាប់មាត់ស្ទឹងដូចនេះឡើយ ពីព្រោះវាបណ្ដាលឲ្យប៉ះពាល់ដល់បរិស្ថាន និងកង្វក់ទឹកស្ទឹងថែមទៀត ពិសេសនៅពេលមានភ្លៀងធ្លាក់ម្តងៗ ទឹកចេញពីសំរាមស្អុយរលួយទាំងនោះ នឹងហូរចូលទៅក្នុងទឹកស្ទឹងតែម្ដង។ អាជីវករថា ប្រសិនបើមិនមានការដោះស្រាយទេ នោះពួកគាត់នឹងធ្វើលិខិតស្នាមដាក់ទៅអាជ្ញាធរក្រុង ឬខេត្តបន្តទៀត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
- ស្ដាប់ផ្ទាល់ (ព្រឹក ៥:៣០-៦:៣០ ល្ងាច ៧:៣០-៨:៣០)
- សំឡេង
- ពលរដ្ឋមួយចំនួនស្នើលោក ហ៊ុន សែន ឱ្យចុះចេញពីតំណែងដោយសារគ្មានសមត្ថភាពជួយពលរដ្ឋក្នុងគ្រាអាសន្ន
- ជំនួយការនាយករដ្ឋមន្ត្រីត្អួញថា ខ្លួនលំបាកជាងពលរដ្ឋរស់នៅតំបន់បិទខ្ទប់
- អ្នកជំងឺកូវីដម្នាក់ស្លាប់ ក្រោយមន្ទីរពេទ្យមួយចំនួនបដិសេធព្យាបាល និងទារសេវាថ្លៃ
- មន្ត្រីបក្សប្រឆាំងរិះគន់ លោក ហ៊ុន សែន ដែលយកកីឡាករបាល់ទាត់ពិភពលោកមកពាក់ព័ន្ធរឿងនយោបាយ
- លោក សម រង្ស៊ី ប្រកាសថានឹងប្ដឹងលោក ហ៊ុន សែន ទៅតុលាការព្រហ្មទណ្ឌអន្តរជាតិទាក់ទងនឹងការបិទខ្ទប់បង្អត់អាហារពលរដ្ឋ
