ក្រុមចុះល្បាតព្រៃឡង់ ដែលចុះពិនិត្យបទល្មើសព្រៃឈើ បានចុះបំពេញសកម្មភាពល្បាតព្រៃដូចការគ្រោងទុកហើយនៅថ្ងៃទី១៤ ខែឧសភា បើទោះជាត្រូវប្រឈមបញ្ហាខ្លះៗក៏ដោយ។
មន្ត្រីជំនួយការផ្នែកទំនាក់ទំនងនៃមជ្ឈមណ្ឌលអប់រំច្បាប់សម្រាប់សហគមន៍ លោក អែម សារុំ ឲ្យដឹងនៅថ្ងៃទី១៤ ខែឧសភា ថា ក្រុមយុវជន អង្គការសង្គមស៊ីវិល រួមនឹងសហគមន៍នៅតាមតំបន់គោលដៅផង បានចុះល្បាតក្នុងព្រៃឡង់ហើយចាប់ពីថ្ងៃទី១៤ នេះទៅ។
បើតាម លោក អែម សារុំ គម្រោងចុះល្បាតព្រៃជាថ្មីទៀតនេះ គឺដើម្បីស្វែងរកបទល្មើសព្រៃឈើដែលរងការកាប់បំផ្លាញដោយក្រុមហ៊ុនឯកជន ដែលទទួលបានសិទ្ធិវិយោគនៅតំបន់ព្រៃឡង់ ក្រោមគោលនយោបាយសម្បទានដីសេដ្ឋកិច្ច ហើយគម្រោងចុះល្បាតលើកនេះ គឺត្រូវប្រើពេលរយៈពេល ៥ថ្ងៃ ដែលគ្រោងនឹងបញ្ចប់ទៅវិញនៅថ្ងៃទី១៧ ឧសភា។
លោកបន្តថា មូលហេតុដែលសកម្មជនព្រៃឡង់ អង្គការសង្គមស៊ីវិល និងក្រុមយុវជនផង សម្រេចចិត្តចុះល្បាតជាថ្មីទៀតនៅពេលនេះ គឺដើម្បីរុករកបទល្មើស ទប់ស្កាត់ការកាប់បំផ្លាញព្រៃឈើ និងអប់រំច្បាប់ដល់ពលរដ្ឋនៅក្នុងមូលដ្ឋានខ្លះៗ ដើម្បីឲ្យយល់ដឹងពីសារសំខាន់នៃព្រៃឈើផង។ លោក អែម សារុំ បន្តថា «គោលបំណងធំរបស់ក្រុមយុវជននិស្សិតដែលទៅហ្នឹង ទីមួយ គឺដោយសារគាត់មានថ្ងៃឈប់សម្រាកច្រើន។ គាត់ចង់ចូលរួមបុណ្យស្ដេចហ្នឹងហើយ។ ទីពីរទៀត ពួកគាត់ចូលរួមដើម្បីជាលក្ខណៈតស៊ូមតិ ដើម្បីកុំឲ្យមានការកាប់បំផ្លាញព្រៃឡង់ថែមទៀត។ ទីបី គាត់ចង់ទៅជួយពន្យល់ផ្សព្វផ្សាយផ្នែកច្បាប់ទៅដល់ប្រជាពលរដ្ឋសហគមន៍ នៅក្នុងតំបន់ព្រៃឡង់ហ្នឹង ដើម្បីលើកទឹកចិត្តពួកគាត់ ព្យាយាមធ្វើយ៉ាងណាដើម្បីឲ្យអ្នកខាងក្រោម យល់អំពីអត្ថប្រយោជន៍នៃព្រៃឈើ»។
បន្ថែមពីលើនេះ លោក អែម សារុំ បញ្ជាក់ថា ការចុះល្បាតជាថ្មីឡើងវិញនេះ គឺមាន ៤ក្រុមធំៗ ដែលក្រុមនីមួយៗត្រូវចេញពីតាមបណ្ដាខេត្តដែលនៅជាប់ព្រៃឡង់ ក្នុងនោះមានខេត្តព្រះវិហារ កំពង់ធំ ក្រចេះ និងខេត្តស្ទឹងត្រែង។
ក៏ប៉ុន្តែជាអកុសលសម្រាប់មុខសញ្ញាខេត្តស្ទឹងត្រែង ដែលដឹកនាំដោយ លោក កែម ឡី និងព្រះតេជព្រះគុណ ប៊ុត ប៊ុនទិញ ត្រូវខកខានវិញ ដោយសារកម្លាំងមានសមត្ថកិច្ចទប់ស្កាត់ដោយលើកហេតុផលថា ក្រុមល្បាតព្រៃនេះពុំមានលិខិតអនុញ្ញាតត្រឹមត្រូវ។
បើទោះជាបែបណា ទាំង លោក កែម ឡី និងព្រះតេជព្រះគុណ ប៊ុត ប៊ុនទិញ សម្រេចចិត្តចូលរួមជាមួយក្រុមដែលមកពីខេត្តក្រចេះ និងខេត្តព្រះវិហារ ជាបន្តទៀត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។