មន្ត្រី​ក្រសួង​រ៉ែ​និង​ថាមពល​សន្យា​មិន​ឲ្យ​មាន​សកម្មភាព​បូម​ខ្សាច់​ពី​ទន្លេ​នៅ​ភ្នំពេញ

ដោយ អ៊ុក សាវបូរី
2014-12-20
អ៊ីម៉ែល
មតិ
Share
បោះពុម្ព
សកម្មភាព​កាណូត​បូម​ខ្សាច់​នៅ​មុខ​ព្រះបរមរាជវាំង កាល​ពី​ថ្ងៃ​ទី​១៩ ខែ​ធ្នូ ឆ្នាំ​២០១៤។
សកម្មភាព​កាណូត​បូម​ខ្សាច់​នៅ​មុខ​ព្រះបរមរាជវាំង កាល​ពី​ថ្ងៃ​ទី​១៩ ខែ​ធ្នូ ឆ្នាំ​២០១៤។
RFA/Ouk Savborey

ខ្សាច់​ជា​ប្រភេទ​រ៉ែ​ដែល​កំពុង​មាន​ការ​ជួញ​ដូរ​ខ្លាំងក្លា​នៅ​ក្នុង​ប្រទេស​កម្ពុជា។ ចំណែក​នៅ​ផ្នែក​ខាង​មុខ​ព្រះបរមរាជវាំង កាណូត​ច្រើន​គ្រឿង​កំពុង​សម្រុក​បូម​ខ្សាច់​ពី​ក្នុង​ទន្លេ។ កាណូត​ខ្លះ​បាន​បើកបរ​បូម​ខ្សាច់​ទាំង​យប់​ទាំង​ថ្ងៃ។ កាណូត​ខ្លះ​សំចត​មួយ​កន្លែង ខួង​បូម​យក​ដី​ក្នុង​ទន្លេ​ដោយ​ប្រើ​ទុយោ​ធំៗ។

ករណី​កាណូត​បូម​ខ្សាច់​នេះ ត្រូវ​ប្រជាពលរដ្ឋ​នៅ​ក្នុង​សង្កាត់​វាលស្បូវ ខណ្ឌ​ច្បារអំពៅ ចោទ​ថា បាន​ធ្វើ​ឲ្យ​បាក់​ដី​ច្រាំង​ក្នុង​ភូមិ​ព្រែកជើងព្រហ្ម កាល​ពី​ដើម​សប្ដាហ៍​នេះ។ បញ្ហា​បាក់​ដី​នេះ មន្ត្រី​ក្រសួង​រ៉ែ និង​ថាមពល អះអាង​ថា នឹង​ធ្វើ​ការ​ជាមួយ​ស្ថាប័ន​ពាក់ព័ន្ធ ឲ្យ​ការ​ប្រកប​អាជីវកម្ម​ខ្សាច់​មិន​ប៉ះពាល់​ក្នុង​ទឹក​ដី​រាជធានី​ភ្នំពេញ​ទេ។

មាន​កាណូត​ធុន​ធំ​ច្រើន​គ្រឿង កំពុង​ធ្វើ​អាជីវកម្ម​ខ្សាច់​នៅ​ក្នុង​ទន្លេ​មុខ​ព្រះបរមរាជវាំង ដែល​ពលរដ្ឋ​នៅ​សង្កាត់​វាលស្បូវ ខណ្ឌ​ច្បារអំពៅ រាជធានី​ភ្នំពេញ ចោទ​ថា​បាន​ធ្វើ​ឲ្យ​ដី​ច្រាំង​បាក់​ធ្លាក់​ចូល​ទឹក​ទទឹង ១៥​ម៉ែត្រ បណ្តោយ ២០​ម៉ែត្រ។

ពាក់ព័ន្ធ​ករណី​នេះ អ្នក​នាំ​ពាក្យ​ក្រសួង​រ៉ែ និង​ថាមពល លោក ស៊ុយ ឌីម៉ង់ ថ្លែង​ថា ក្រសួង​រ៉ែ និង​ថាមពល រួម​ទាំង​ស្ថាប័ន​ពាក់ព័ន្ធ នឹង​ចុះ​ពិនិត្យ​ផល​ប៉ះពាល់​ជាក់ស្តែង និង​ចុះ​ឆែកឆេរ​រក​លិខិត​អនុញ្ញាត​ពី​ម្ចាស់​អាជីវកម្ម​ខ្សាច់​នោះ។ លោក​ថ្លែង​យ៉ាង​ដូច្នេះ បន្ទាប់​ពី​ទទួល​ដំណឹង​ថា មាន​ភស្តុតាង​ជាក់ស្តែង​នៅ​ភូមិ​ព្រែកជើងព្រហ្ម ក្នុង​សង្កាត់​វាលស្បូវ ដី​ភូមិ​នៅ​ច្រាំង​ទន្លេ​មេគង្គ បាក់​ធ្លាក់​ចូល​ទឹក​ទន្លេ​កាល​ពី​ថ្ងៃ​ច័ន្ទ ទី​១៥ ធ្នូ សប្ដាហ៍​នេះ។

លោក ស៊ុយ ឌីម៉ង់ ថ្លែង​បន្ត​ថា នៅ​ក្នុង​ភូមិសាស្ត្រ​រាជធានី​ភ្នំពេញ ក្រសួង​មិន​អនុញ្ញាត​ឲ្យ​មាន​ការ​បូម​ខ្សាច់​ទេ វា​អាច​ធ្វើ​ឲ្យ​ប៉ះពាល់​ច្រាំង​ទន្លេ ប៉ុន្តែ​អាច​ឲ្យ​បូម​នៅ​ក្នុង​បរិវេណ​ដី​ដុះ​នៅ​កណ្ដាល​ទន្លេ ដែល​បង្ក​ឲ្យ​របត់​ទឹក​ហូរ​ខុស​ប្រក្រតី។ លោក​ថា សិទ្ធិ​អនុញ្ញាត​ឲ្យ​បូម​ខ្សាច់​តាម​ទន្លេ បឹង ស្ទឹង ព្រែក នេះ គឺ​ច្បាប់​ចេញ​ពី​ក្រសួង​ធនធាន​ទឹក និង​មាន​ការ​យល់​ព្រម​ពី​អាជ្ញាធរ​មូលដ្ឋាន​ដែរ៖ «អ៊ីចឹង​បន្ទាប់​ពី​ការ​ស្រាវជ្រាវ​មក បើ​ថា​មាន​ច្បាប់​ទម្លាប់ នេះ​ត្រូវ​មើល​ឡើង​វិញ បច្ចេកទេស ថា​តើ​ហេតុ​អី​បាន​ជា​ខាង​ធនធាន​ទឹក គាត់​ចេញ​ជលធារ​ឲ្យ​គេ​បូម​ដែរ ព្រោះ​អី​មុន​នឹង​បូម​នេះ គឺ​ត្រូវ​សិក្សា​ជលធារ នេះ​បើ​សិន​ជា​មាន​ច្បាប់។ តែ​បើ​សិន​ជា​អត់​ច្បាប់​ទេ អា​ហ្នឹង​គឺ​ជា​រឿង​របស់​រដ្ឋ​អំណាច​មូលដ្ឋាន ដែល​គាត់​ត្រូវ​គ្រប់គ្រង​ក្នុង​ដែន​សមត្ថកិច្ច​របស់​គាត់»

ចំណែក​អ្នក​នាំ​ពាក្យ​សាលា​រាជធានី​ភ្នំពេញ លោក ឡុង ឌីម៉ង់ ថ្លែង​ថា បាន​ណែនាំ​ឲ្យ​អាជ្ញាធរ​មូលដ្ឋាន​ស្ទាក់​ចាប់ និង​បណ្ដេញ​កាណូត​ដែល​លួច​ចូល​បូម​ខ្សាច់​ក្នុង​ទឹក​ដី​រាជធានី​ភ្នំពេញ ឲ្យ​ចេញ​ពី​ភូមិសាស្ត្រ​នេះ៖ «យើង​បាន​ទទួល​អំពី​សំណូមពរ​អំពី​ប្រជាពលរដ្ឋ ហើយ​អាជ្ញាធរ​រាជធានី​ក៏​បាន​ណែនាំ​ឲ្យ​ខាង​អាជ្ញាធរ​ខណ្ឌ ចុះ​ធ្វើ​ការ​ត្រួត​ពិនិត្យ​រឿង​ហ្នឹង​ដែរ ហើយ​លោក​អភិបាល​ខណ្ឌ​ក៏​បាន​ដឹក​នាំ​គណៈ​បញ្ជាការ​ឯកភាព​ខណ្ឌ ចុះ​ធ្វើ​ការងារ​ហ្នឹង​ដែរ កាល​ពី​ដើម​សប្ដាហ៍​នេះ»

ចំពោះ​ការ​ដេញ​កាណូត​បូម​ខ្សាច់​នៅ​សង្កាត់​វាលស្បូវ នោះ អភិបាល​រង​ខណ្ឌ​ច្បារអំពៅ លោក រស់ សុភ័គ្រ ថ្លែង​ថា ក្រោយ​ពី​មាន​ការ​លើក​គ្នា​ទៅ​បណ្ដេញ​កាណូត​ទាំង​នោះ ចេញ​ពី​មូលដ្ឋាន​ខណ្ឌ​នេះ​មក គ្មាន​កាណូត​ចូល​មក​បូម​ខ្សាច់​នៅ​ទីនោះ​ទៀត​ទេ។ លោក​ថា អាជ្ញាធរ​ខណ្ឌ​បាន​ចាប់​ឆែក​រក​ច្បាប់​អនុញ្ញាត​ឲ្យ​ធ្វើ​អាជីវកម្ម​ខ្សាច់ គឺ​ច្បាប់​ចេញ​ពី​ខេត្ត​កណ្ដាល៖ «ខាង​សាលា​ខណ្ឌ ហើយ​និង​ខាង​សាលា​រាជធានី​ភ្នំពេញ មិន​អនុញ្ញាត​ឲ្យ​បូម​ទេ ហើយ​រាល់​ថ្ងៃ​ហ្នឹង​ក៏​អត់​មាន​អ្នក​ណា​គេ​បូម​ដែរ។ តាម​ការ​ឃាត់​ចាប់ រក​ឃើញ​មាន​អាជ្ញាប័ណ្ណ​ពី​ខេត្ត​កណ្ដាល ទេ មិន​មែន​នៅ​សាលា​រាជធានី គឺ​អត់​មាន​ទេ។ អ៊ីចឹង​ទេ​ទាក់ទង​រឿង​ហ្នឹង គឺ​ខាង​អាជ្ញាធរ​ខេត្ត​កណ្ដាល។ ដល់​ពេល​ឥឡូវ​នេះ គឺ​មិន​អនុញ្ញាត និយាយ​រួម​ទៅ ខាង​សាលា​រាជធានី​មិន​ឲ្យ​មាន​ការ​បូម​ខ្សាច់​ទេ​នៅ​តាម​ដង​ទន្លេ​ហ្នឹង»

ពលរដ្ឋ​សង្កាត់​វាលស្បូវ លោក សុខ សឿន អះអាង​ថា ដី​បាក់​ធ្លាក់​ចូល​ទន្លេ​កាល​ពី​ថ្ងៃ​ច័ន្ទ សប្ដាហ៍​នេះ គឺ​ដី​នៅ​ក្នុង​បរិវេណ​ផ្ទះ​ជន​បរទេស​នៅ​ភូមិ​ព្រែកជើងព្រហ្ម។ លោក​ថា ជន​បរទេស​មិន​បាន​ប្ដឹង​ទៅ​អាជ្ញាធរ​ភូមិ ឲ្យ​បាន​ដឹង​ពី​ដី​ផ្ទះ​បាក់​ចូល​ទឹក​ទេ ប៉ុន្តែ​អ្នក​ភូមិ​ដែល​នៅ​ក្បែរ​នោះ បាន​ប្ដឹង​ជំនួស ព្រោះ​បារម្ភ​ដី​អាច​នឹង​បាក់​បន្ត​ទៀត ព្រោះ​កំពុង​ស្រុត​បន្ថែម​ទៀត​ហើយ​នៅ​ក្បែរ​កន្លែង​បាក់​ពី​មុន​នោះ៖ «ដល់​ពួក​គាត់​មក​បូម​បាន​១​អាទិត្យ​ហើយ បាន​អាជ្ញាធរ​ធ្វើ​សកម្មភាព​អ៊ីចឹង​ទៅ។ តាម​ពិត វា​បូម​បាន​កន្លះ​ខែ បើ​ប្រជាជន​អត់​ងើប​តវ៉ា អត់​បាន​ដុត​កង់ឡាន​ទេ ពួក​ហ្នឹង​បូម​បាន​យូរ​ទៅ ជួន​កាល​ទៅ​អាច​កន្លះ​ខែ​របស់​គេ​ដែរ បើ​សិន​ពួក​យើង​រាង​ឆាប់​តវ៉ា​អ៊ីចឹង​ទៅ អាច​វា​បូម​មួយ​ថ្ងៃ​២​ថ្ងៃ​បាន​វា​ឈប់ រួច​ទៅ​រត់​មួយ​សា ហើយ​មក​បន្ត​រហូត​ទៀត​ទៅ»

ពលរដ្ឋ​មួយ​រូប​ទៀត​ថ្លែង​ថា គាត់​បារម្ភ​ជា​ខ្លាំង​នៅ​ពេល​យប់​អាច​កំពុង​សម្រាក​មិន​ដឹង​ខ្លួន ប្រសិន​បើ​មាន​ហេតុការណ៍​ដី និង​ផ្ទះ​ធ្លាក់​ចូល​ទឹក មិន​ដឹង​បាន​អ្នក​ណា​ជួយ​ទេ​នៅ​ពេល​យប់។ លោក​ស្នើសុំ​ឲ្យ​បញ្ឈប់​ការ​អនុញ្ញាត​បូម​ខ្សាច់៖ «ទើប​តែ​ឥឡូវ​នេះ វា​ចាប់​ផ្ដើម​បូម​ខ្សាច់​ហ្នឹង វា​បូម​មិន​ប្រើ​អា​ម៉ាស៊ីន​តូចៗ​ទេ គឺ​ម៉ាស៊ីន​ធំៗ។ ទូក​វា​ហ្នឹង​បូម​១​ទូក​ហ្នឹង​ប្រហែល​ជា​ខ្ទង់ ២​ពាន់​គូប​អី​នោះ មួយ​ទូក​វា​ហ្នឹង​គឺ​បូម​អ៊ីចឹង។ វា​បូម​យូរៗ​ដែរ វា​លួច​មក​បូម ហើយ​អា​សាឡង់​ដាក់​ទៅ​ក្បាល​បូម​វា ចេញ​ម្តង​៤​ឯណោះ បឺត​យក​បើ​ឃើញ​គួរ​ឲ្យ​ខ្លាច​តែ​ម្តង»

ករណី​ដី​ក្នុង​ភូមិ​នោះ​បាក់​ចូល​ទឹក ត្រូវ​មេ​ភូមិ​ព្រែកជើងព្រហ្ម លោក រស់ ប៊ុនហេង ឲ្យ​ដឹង​ថា អាជីវកម្ម​ខ្សាច់ គឺ​ក្នុង​កាណូត​មួយ​គ្រឿងៗ​អាច​ផ្ទុក​ខ្សាច់​រាប់​រយ​តោន។ លោក​ថា មាន​កាណូត​ខ្លះ​បើកបរ​ចល័ត​ដើម្បី​បូម​ខ្សាច់។ កាណូត​ខ្លះ​ទៀត​ឈប់​សំចត​នៅ​មួយ​កន្លែង ហើយ​ទម្លាក់​ទុយោ​ចំនួន​៤ ដែល​មាន​មុខ​កាត់​ធំៗ​រុក​បូម​ទៅ​ក្នុង​ទឹក​ទន្លេ មិន​ដឹង​បែរ​ទុយោ​ទៅ​ខាង​ណា​ខ្លះ​ទេ ឮ​សន្ធឹក​បូម​ទាំង​យប់​ទាំង​ថ្ងៃ​នៅ​ក្នុង​ទន្លេ ចន្លោះ​ស្រុក​ល្វាឯម ខេត្ត​កណ្តាល និង​រាជធានី​ភ្នំពេញ។ លោក​ថា ក្រោយ​ពី​កាណូត​ធំៗ​សំចត​នៅ​ក្នុង​ទន្លេ​ក្បែរ​ភូមិ​នោះ​បូម​ខ្សាច់ ហើយ​បើក​រត់​ទៅ​មកៗ ដោយ​ការ​បណ្ដេញ​របស់​អាជ្ញាធរ និង​អ្នក​ភូមិ​មក​រំលង​បាន​តែ​ជាង ១​ខែ ដី​ច្រាំង​ទន្លេ​ក៏​បាក់៖ «ទើប​ខាន​បាក់​៤ ទៅ ១០​ឆ្នាំ​ហ្នឹង ឥឡូវ​ចាប់​ផ្ដើម​បាក់​ទៀត​ហើយ បើ​អ៊ីចឹង​បាក់​កន្លែង​ដី​បារាំង​ហ្នឹង ឲ្យ​ខ្ញុំ​ទៅ​ការពារ​ម៉េច​ការ​បាក់​ច្រាំង​ទន្លេ»

កាល​ពី​ចុង​ខែ​វិច្ឆិកា និង​ដើម​ខែ​ធ្នូ អ្នក​ភូមិ​នៅ​សង្កាត់​វាលស្បូវ បាន​ដុត​កង់ឡាន​ទាមទារ​ឲ្យ​អាជ្ញាធរ​ជួយ​បណ្ដេញ​កាណូត​បូម​ខ្សាច់​ចេញ​ពី​ភូមិ​វាលស្បូវ និង​ភូមិ​ក្តីតាកុយ ព្រោះ​ខ្លាច​បាក់​ដី​វត្ត​ចូល​ទឹក​ផង និង​សំឡេង​បូម​ខ្សាច់​រំខាន​ការ​រស់នៅ​ផង។ ក្រោយ​ពី​មាន​ដី​បាក់​នៅ​ភូមិ​ព្រែកជើងព្រហ្ម អ្នក​ភូមិ​គំរាម​ថា​នឹង​ប្រើ​ហិង្សា ប្រសិន​បើ​កាណូត​បូម​ខ្សាច់​បំពាន​ច្បាប់ ហើយ​រំខាន​ការ​រស់នៅ​របស់​ពួក​គាត់។

ចៅ​សង្កាត់​វាលស្បូវ អ្នកស្រី យឹម ស៊ីម៉ន អះអាង​ថា កាណូត​បូម​ខ្សាច់​មិន​ឃើញ​មក​លួច​បូម​ដូច​មុន​ទេ ព្រោះ​អាជ្ញាធរ​ខណ្ឌ​បាន​ត្រៀម​កាណូត​ដើម្បី​ចុះ​បង្ក្រាប​បទល្មើស​តាម​ដង​ទន្លេ ក្នុង​ខណ្ឌ​ច្បារអំពៅ។ អ្នកស្រី​ថា បើ​មាន​កាណូត​លួច​ចូល​បូម​ខ្សាច់​ទៀត អាជ្ញាធរ​ខណ្ឌ​ច្បារអំពៅ អាច​ស្ទាក់​ចាប់​កាណូត​នោះ​បាន៖ «ពី​ថ្ងៃ​ច័ន្ទ ទើប​រៀបចំ​សាឡង់​របស់​ខ្លួន​ឯង​ហើយ ដេញ​ចាប់​គ្រប់​សង្កាត់​ហ្នឹង​តែ​ម្តង វា​រត់​គេច​ហើយ ចាប់​បាន​ប៉ុន្មាន​សាឡង់​ប៉ុន្មាន​អ៊ូ​ដែរ​ហ្នឹង សាលា​ខណ្ឌ​ចាប់​ហ្នឹង»

ពលរដ្ឋ​ក្នុង​សង្កាត់​វាលស្បូវ អះអាង​ថា ការ​ស្ងប់ស្ងាត់​កាណូត​មិន​ចូល​លួច​បូម​ខ្សាច់​ក្នុង​សង្កាត់​នេះ​តែ​ក្នុង​រយៈពេល​កន្លះ​ខែ​ទៅ​១​ខែ​ប៉ុណ្ណោះ បើ​អាជ្ញាធរ និង​ប្រជាពលរដ្ឋ​ភ្លេច​ខ្លួន កាណូត​ទាំង​នោះ​នឹង​ឆ្លៀត​ចូល​លួច​បូម​ក្បែរ​ច្រាំង​ក្នុង​រាជធានី​ភ្នំពេញ​ទៀត​មិន​ខាន​ឡើយ។ ពួក​គាត់​ទាមទារ​ឲ្យ​មាន​ការ​អនុវត្ត​ច្បាប់​ពី​ស្ថាប័ន​ពាក់ព័ន្ធ​ឲ្យ​ច្បាស់​លាស់៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (1)
Share

អ្នក​អាន​អនាមិក

ព្រះម្ចាស់ថ្លៃអើយ ពិតជាភ្ញាក់ពីសុបិន្តមែនទេ ឬក៏ខ្លាចបែកពោះ ឬក៏​ជិតដល់រដូវចម្រោតយកសន្លឹកឆ្នោត បើគ្រប់ក្រសួងមន្ទីរទាំងអស់ សុទ្ធតែមានឆន្ទះបែបនេះ ម្លេះសមរាស្រ្តមិនល្ហាម ដូចរាល់ថ្ងៃនេះទេ។

Dec 22, 2014 07:38 AM

គេហទំព័រ​ទាំងមូល