សហគមន៍​ព្រៃ​ឡង់​ថា​ ក្រុមហ៊ុន ស៊ីង បាយអូ​ថេក ចាប់​ផ្ដើម​ធ្វើអាជីវកម្ម​ឈើ​កក្រើក​ឡើងវិញ​

ដោយ អាស៊ីសេរី
2019-12-01
អ៊ីម៉ែល
មតិ
Share
បោះពុម្ព
ដើមឈើ​ផលិត​ជ័រ​ទឹក​របស់​សហគមន៍​ព្រៃឡង់ នៅ​តែ​រង​ការ​កាប់​រំលំ​ជា​បន្ត រហូត​មក​ដល់​ថ្ងៃ​ទី៧ ខែ​មករា ឆ្នាំ២០១៩។
ដើមឈើ​ផលិត​ជ័រ​ទឹក​របស់​សហគមន៍​ព្រៃឡង់ នៅ​តែ​រង​ការ​កាប់​រំលំ​ជា​បន្ត រហូត​មក​ដល់​ថ្ងៃ​ទី៧ ខែ​មករា ឆ្នាំ២០១៩។
រូបថត៖ សហគមន៍

សហគមន៍​ព្រៃ​ឡង់​ និង​សកម្មជន​បរិស្ថាន​ អះអាង​ថា ក្រុមហ៊ុន​ អង្គរ​ប្លាយ​វូដ (Angkor Plywood) ដែល​ទទួល​សិទ្ធិ​បើក​រោងចក្រ​អារ​ច្រៀក​ឈើ​បន្ត​ ពី​ក្រុមហ៊ុន​ ស៊ីង​ បាយអូ​ថេក (Think Biotech Cambodia) បាន​ធ្វើអាជីវកម្ម​ឈើ​ទ្រង់ទ្រាយ​ធំ​ឡើង​វិញ​ នៅ​ជាប់​តំបន់​ព្រៃ​ឡង់​ខេត្ត​ក្រចេះ​។ សហគមន៍​ថា​ ក្រុមហ៊ុន​នេះ​ បាន​ទទួល​ទិញ​ឈើ​ពី​ក្រុម​ពលរដ្ឋ​នៅ​មូលដ្ឋាន​ ដោយ​ជួល​កម្មករ​កាប់​ និង​ដឹក​ជញ្ជូន​ឈើ​ក្នុង​ព្រៃ​ឡង់​លក់​ឱ្យ​ខ្លួន។

សហគមន៍​ព្រៃ​ឡង់​ និង​សកម្មជន​បរិស្ថាន​ អំពាវនាវ​ជាថ្មី​ទៀត​ ឱ្យ​គណៈកម្មការ​ជាតិ​ទប់ស្កាត់​ និង​បង្ក្រាប​បទល្មើស​ព្រៃឈើ​ និង​ស៊ើបអង្កេត​ឡើង​វិញ​ ពី​ភាព​មិន​ប្រក្រតី​ របស់​ក្រុមហ៊ុន​ អង្គរ​ប្លាយ​វូដ​ និង​ក្រុមហ៊ុន​ ស៊ីង​ បាយអូ​ថេក ដែល​ពួកគេ​ចោទ​ថា​ ក្រុមហ៊ុន​ទាំង​នេះ មាន​មហិច្ឆតា​ធ្វើ​អាជីវកម្ម​ឈើ​ទ្រង់ទ្រាយ​ធំ​ ក្នុង​តំបន់​ព្រៃ​ការពារ​ធម្មជាតិ។

សមាជិក​សហគមន៍​ព្រៃ​ឡង់​ ខេត្ត​ស្ទឹងត្រែង​ លោក យឹម សុភ័ក្ត្រ ឱ្យ​ដឹង​នៅ​ថ្ងៃ​ទី១ ធ្នូ​ថា ក្រុមហ៊ុន​អង្គរ ប្លាយវូដ​ និង​ក្រុមហ៊ុន​ ស៊ីង​ បាយអូ​ថេក កំពុង​ធ្វើសកម្មភាព​កាប់​ឈើ​ឡើង​វិញ​ នៅ​តំបន់​ព្រៃ​ឡង់​ ជាង​ ២សប្តាហ៍​មក​ហើយ​ ដោយ​មាន​រថយន្ត​ស្ទូច អា​រ៉េវ​ ឬ​រថ​យន្ត​ប៉ាកុង​ជា​មធ្យោបាយ​ដឹក​ជញ្ជូន​ឈើ​មូល​ធំៗ ចូល​រោងចក្រ។ លោក​ថា​ ក្រុមហ៊ុន​បាន​ឈូស​ឆាយ​ផ្លូវ​ចំនួន ៣ខ្សែ​ ចូល​ក្នុង​តំបន់​ព្រៃ​ឡង់​ ដើម្បី​ងាយ​ស្រួល​ធ្វើ​អាជីវកម្ម​ឈើ។ ទន្ទឹម​នឹង​នេះ​ ឈើ​ដែល​កម្មករ​របស់​ក្រុមហ៊ុន​កំពុង​កាប់​ ឋិត​នៅ​ចំណុច​ អូរជុំ​ហួយ​ អូរ​ស្ងួត​លើ​ និង​អូរ​ស្ងួត​ក្រោម ព្រោះ​តំបន់​ទាំង​នោះ​ មាន​នៅ​សេសសល់​ដើម​ឈើ​ផលិត​ជ័រទឹក​របស់​អ្នកស្រុក​ច្រើន៖ «»

សមាជិក​សហគមន៍​ព្រៃ​ឡង់​ ខេត្ត​ក្រចេះ​ លោក​ វ៉ន​ ត្រៃ​ សង្កេត​ឃើញ​ថា​ ពលរដ្ឋ​មូលដ្ឋាន​មួយ​ចំនួន​ បាន​ស៊ី​ឈ្នួល​កាប់​ឈើ​ ក្នុង​ព្រៃ​ដឹក​លក់​ឱ្យ​ក្រុមហ៊ុន​ ដើម្បី​រក​ប្រាក់​កម្រៃ​ ដែល​ជា​ហេតុ​ធ្វើ​ឱ្យ​ព្រៃ​ឡង់​ នៅ​តែ​បន្ត​បាត់បង់​ដើម​ឈើ​ធំៗ។ លោក​បារម្ភ​ថា​ វត្តមាន​ក្រុមហ៊ុន​សម្បទាន​សេដ្ឋកិច្ច​នៅ​ជាប់​ព្រៃ​ឡង់​ បង្ក​ហានិភ័យ​ខ្ពស់​ ពី​ជោគវាសនា​ ព្រៃ​ការពារ​ធម្មជាតិ​មួយ​នេះ​ ស្រប​ពេល​ដែល​សហគមន៍​គ្មាន​លទ្ធភាព​គ្រប់គ្រាន់​ ទប់ស្កាត់​បទ​ល្មើស​ព្រៃឈើ​ទាំងនោះ​ទេ៖ «»

អាស៊ី​សេរី​មិនទាន់​អាច​ទាក់ទង​ តំណាង​ក្រុមហ៊ុន​ អង្គរ​ប្លាយ​វូដ​ និង​ក្រុមហ៊ុន​ ស៊ីង​ បាយ​អូ​ថេ​ក ដើម្បី​សុំ​ការ​បំភ្លឺ​ជុំវិញ​ការ​ចោទ​ប្រកាន់​នេះ​ បាន​នៅ​ឡើយ​ទេ នៅ​ថ្ងៃ​ទី១ វិច្ឆិកា។ រី​ឯ​អ្នក​នាំ​ពាក្យ​ក្រសួង​កសិកម្ម​ លោក​ ស្រី​ វុឌ្ឍី​ ក៏​មិន​លើក​ទូរ​សព្ទ​ដែរ​នៅ​ថ្ងៃ​ដដែល​នេះ។

ចំណែក​ អ្នកនាំពាក្យ​គណៈកម្មការ​ជាតិ​ ទប់ស្កាត់​ និង​បង្ក្រាប​បទល្មើស​ព្រៃឈើ​ លោក​ អេង​ ហ៊ី​ មាន​ប្រសាសន៍​ថា​ ឱ្យ​តែ​បទ​ល្មើស​ គណៈកម្មការ​ជាតិ​នឹង​មាន​វិធានការ​ច្បាប់​ទាំង​អស់។ លោក​រុញ​ឱ្យ​សហគមន៍​ព្រៃ​ឡង់​ដា​ក់​បណ្ដឹង​ករណី​នេះ​ទៅ​អាជ្ញាធរ​ដែនដី​ និង​គណៈកម្មការ​ជាតិ​។ ចំពោះ​សំណួរ​ថា​ តើ​គណៈកម្មការ​ជាតិ​មាន​វិធានការ​បន្ទាន់​ឬ​ទេ​ នៅ​ពេល​ដែល​ដឹង​ថា​ មាន​បទ​ល្មើស​ព្រៃ​ឈើ​ខ្នាត​ធំ​ ជាប់​ព្រៃ​ឡង់​ អ្នក​នាំ​ពាក្យ​រូប​នេះ​ឆ្លើយ​យ៉ាង​ខ្លី​ថា​ ឱ្យ​តែ​ល្មើស​ច្បាប់​ គឺ​គណៈកម្មការ​ជាតិ​នឹង​បង្ក្រាប​ទាំង​អស់៖ «»

សកម្មជន​បរិស្ថាន​ លោក​ ហេង​ ស្រស់​ សង្កេតឃើញ​ថា ដើម​ធំៗ​ បន្សល់​ចុងក្រោយ​ នៅ​ក្នុង​តំបន់​ព្រៃ​ឡង់​ កំពុង​ទទួល​រង​ការ​កាប់​រំលំ​ ធ្វើ​អាជីវកម្ម​ពីសំណាក់​ក្រុមហ៊ុន​ទាំង​នេះ​ ជាង​ ២សប្តាហ៍​មក​ហើយ​ ប្រសិនបើ​គ្មាន​វិធានការ​ទប់ស្កាត់​ជា​បន្ទាន់​ទេ​ ដើម​ឈើ​ធំៗ ជាពិសេស​ដើម​ច្បោះ​ជ័រទឹក​នឹង​ហិនហិច។ លោក​សង្ស័យ​ថា គណៈកម្មការ​ជាតិ​ អាជ្ញាធរ​ខេត្ត​ និង​ក្រសួង​ពាក់ព័ន្ធ​ហាក់​មាន​ចេតនា​បើក​ដៃ​ឱ្យ​ក្រុមហ៊ុន​នេះ​ កាប់​បំផ្លាញ​ព្រៃ​ឈើ​ក្នុង​ព្រៃ​អភិរក្ស​ និង​ដើម​ឈើ​ផលិត​ជ័រទឹក​របស់​អ្នក​ បង្ហើយ​ចុង​ក្រោយ​ នៅ​រដូវប្រាំង​នេះ​។ លោក​គិត​ថា មហិច្ឆតា​របស់​ក្រុមហ៊ុន​ គ្រោង​លេប​ត្របាក់​ឈើ​មូល​ធំៗ​ ទាំងអស់​នៅ​តំបន់​ព្រៃ​ឡង់​ ក្នុង​ខេត្ត​ចំនួន៤​ រួមមាន​ ព្រៃ​ឡង់​ខេត្ត​ក្រចេះ​ ស្ទឹងត្រែង​ កំពង់ធំ​ និង​ខេត្ត​ព្រះវិហារ​៖ «​»

សកម្មជន​បរិស្ថាន​រូប​នេះ​បន្ថែម​ថា ថ្មីៗ នេះ​ ក្រុមហ៊ុន​បាន​គាស់​ឈើ​ ដែល​កប់​ក្នុង​ដី​​មក​អារ​ច្រៀក​ធ្វើ​អាជីវកម្ម​ និង​កំពុង​ធ្វើ​សកម្មភាព​អារ​ច្រៀក​ឈើ​យ៉ាង​មមាញឹក​ ដើម្បី​លក់​នៅ​ក្រៅ​ប្រទេស។ លោក​អំពាវនាវ​ឱ្យ​ម្ចាស់​ជំនួយ​ អភិរក្ស​ព្រៃ​ឡង់​ ពិនិត្យ​មើល​ឡើង​ករណី​នេះ​ និង​ត្រូវ​ទម្លាក់​ការ​ទទួល​ខុស​ត្រូវ​មួយ​ផ្នែក​ ទៅ​ក្រសួងបរិស្ថាន​ ដែល​មាន​ភារកិច្ច​អភិរក្ស​ព្រៃ​ឡង់​៖ «»

កាលពី​ខែ​មិថុនា​ ឆ្នាំ២០១២​ ក្រសួង​កសិកម្ម​ បាន​ផ្ដល់​សិទ្ធិ​ឱ្យ​ ក្រុមហ៊ុន​ ស៊ីង បាយ​អូ​ថេ​ក វិនិយោគ​ដំណាំ​ឧស្សាហកម្ម​ អាកា​ស្យា​ ឬ​ស្ថានីយ​ ស្ដារ​ព្រៃឈើ​ឡើង​វិញ​ លើ​ផ្ទៃដី​ចំនួន​ជាង​ ៣ម៉ឺន​ ៤ពាន់​ហិកតារ (៣៤.០០៧) ឋិតនៅ​ក្នុង​ស្រុក​សំបូរ ខេត្តក្រចេះ​ និង​មួយ​ផ្នែក​ចូល​ទឹក​ដី​ស្រុក​សៀមបូក​ ខេត្ត​ស្ទឹងត្រែង​។ ទន្ទឹម​គ្នា​នេះ​ ក្រុមហ៊ុន​ ស៊ីង បាយអូ​ថេក (Think Biotech) បាន​ផ្ទេរ​សិទ្ធិ​បើក​រោងចក្រ​អារ​ឈើ​ទៅ​ឱ្យ​ក្រុមហ៊ុន​ អង្គរ​ ប្លាយ​វូដ (Angkor Plywood) កាលពី​ចុង​ឆ្នាំ២០១៨​។

សហគមន៍​ព្រៃ​ឡង់​ រាយការណ៍​ថា​ ក្រុមហ៊ុន​ទាំង​នេះ​ មាន​មហិច្ឆតា​ធ្វើអាជីវកម្ម​ឈើ​ខ្នាត​ធំ​ និង​នាំ​ចេញ​ទៅ​លក់​នៅ​ប្រទេស​ចិន​តាម​ផ្លូវ​ទឹក​ ខណៈ​កន្លង​ទៅ​ សកម្មជន​បរិស្ថាន​បាន​ទៅ​ដល់​ការដ្ឋាន​​ក្រុមហ៊ុន​នេះ​ ប្រទះ​ឃើញ​ ឈើ​មូល​ធំៗ​ រាប់​រយ​ម៉ែត្រគូប​ ត្រៀម​ដឹក​ចេញ​ក្រៅ​ ដែល​ភាគ​ច្រើន​ជា​ប្រភេទ​ឈើ​ទាល​ និង​ត្រាច​ ដែល​អ្នក​ស្រុក​ដុត​យក​ជ័រទឹក​លក់​ចិញ្ចឹម​ជីវិត៕

(ឈើ​នៅ​ក្នុង​ក្រុមហ៊ុន ស៊ីង បាយអូ​ថេក (Think Biotech) កាល​ពី​ថ្ងៃ​ទី២០ ខែ​កុម្ភៈ ឆ្នាំ២០១៩។ រូប៖ សហគមន៍)


កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល