ប្រធាន​សហគមន៍​សង្ឃ​រុក្ខវ័ន្ត​បារម្ភ​បាត់​បង់​ព្រៃ​ឈើ​ជាង​៥​ពាន់​ហិកតារ​នៅ​ឧត្ដរមានជ័យ

ដោយ ហង្ស សាវយុត
2015-01-29
Share
ព្រះសង្ឃ​ការពារ​ព្រៃ​ឈើ ឧត្ដរមានជ័យ ៦២០ សកម្មភាព​ព្រះសង្ឃ​ការពារ​ព្រៃឈើ​នៅ​ខេត្ត​ឧត្ដរមានជ័យ។ រូបថត​កាល​ពី​ខែ​កញ្ញា ឆ្នាំ​២០១០
Photo: RFA

អាជ្ញាធរ​ខេត្ត​ឧត្តរមានជ័យ ឲ្យ​ដឹង​ថា ខេត្ត​នេះ​នឹង​មាន​វារីអគ្គិសនី​កម្លាំង​ពី ១០ ទៅ ២០​មេហ្គាវ៉ាត់​ប្រើប្រាស់​នៅ​ពេល​ដែល​ក្រុមហ៊ុន​ចិន ចាប់​ផ្ដើម​សាងសង់​ទំនប់​ទឹក​នៅ​តំបន់​ភ្នំ​អាតោ នៅ​ស្រុក​ចុងកាល់ បាន​រួច​រាល់។ ក៏ប៉ុន្តែ គម្រោង​វារីអគ្គិសនី​ឈ្មោះ​ថា ស្ទឹង​ស្រែង​ទី​២ នេះ អាច​នឹង​ប៉ះពាល់​ទៅ​លើ​ដី​ស្រែ​ចម្ការ​របស់​ប្រជាពលរដ្ឋ ព្រៃ​សហគមន៍ និង​ជម្រក​សត្វ​ព្រៃ​ជាច្រើន​ពាន់​ហិកតារ។

អ្នក​គ្រប់គ្រង​សហគមន៍​ព្រៃ​ឈើ​សង្ឃ​រុក្ខវ័ន្ត ក្នុង​ខេត្ត​ឧត្តរមានជ័យ ព្រួយ​បារម្ភ​ថា ព្រៃ​ឈើ​រាប់​ពាន់​ហិកតារ​ដែល​រដ្ឋាភិបាល​ធ្លាប់​តែ​លក់​កាបូន​ទៅ​ឲ្យ​អន្តរជាតិ អាច​នឹង​បាត់​បង់ ហើយ​សត្វ​ព្រៃ​ជាច្រើន​ប្រភេទ ក៏​រួម​ខើច​ទីជម្រក​នៅ​ពេល​ណា​ដែល​ទំនប់​វារីអគ្គិសនី​លេច​ចេញ​ជា​រូបរាង​នៅ​តំបន់​ជាប់​គ្នា​នោះ។

ប្រធាន​សហគមន៍​សង្ឃ​រុក្ខវ័ន្ត ដែល​ជា​ម្ចាស់​ពាន​រង្វាន់​ត្រូពិក​ផ្នែក​ការពារ​ព្រៃ​ឈើ គឺ​ព្រះភិក្ខុ ប៊ុន សាលួត។ ព្រះអង្គ​មាន​ថេរ​ដីកា​កាល​ពី​ព្រឹក​ថ្ងៃ​ពុធ ទី​២៨ ខែ​មករា ថា ព្រះអង្គ​បាន​ការពារ​ព្រៃ​ទំហំ​ជាង ១៨.០០០​ហិកតារ​តាំង​តែ​ពី​អំឡុង​ឆ្នាំ​២០០២។ ព្រៃ​ឈើ​ទាំង​នេះ ត្រូវ​រដ្ឋាភិបាល​ចុះ​កិច្ច​ព្រមព្រៀង​លក់​កាបូន​ទៅ​ឲ្យ​អន្តរជាតិ​តាំង​តែ​ពី​ឆ្នាំ​២០១០ មក។ ក្រៅ​ពី​នោះ ព្រៃ​សហគមន៍​បាន​ផ្ដល់​ឲ្យ​ប្រជាពលរដ្ឋ​ជាច្រើន​អាច​រក​កម្រៃ​ចិញ្ចឹម​ជីវិត​ពី​អនុផល​ព្រៃ​ឈើ ដូចជា​ដក​ផ្សិត​ព្រៃ បោច​វល្លិ ផ្ដៅ និង​បេះ​ជ័រ​ចុង​លក់ ជាដើម។

ព្រះភិក្ខុ ប៊ុន សាលួត ព្រួយ​បារម្ភ​ថា ទាំង​ការ​លក់​កាបូន​ព្រៃ​ឈើ និង​ការ​រក​កម្រៃ​ចិញ្ចឹម​ជីវិត​របស់​ប្រជាពលរដ្ឋ អាច​នឹង​ប៉ះពាល់​ខ្លាំង​នៅ​ពេល​ណា​ដែល​ក្រុមហ៊ុន​ចិន ឈ្មោះ ស៊ីណូ​ហៃក្រូ ធ្វើ​ទំនប់​វារីអគ្គិសនី បណ្ដាល​ឲ្យ​ផ្ទៃ​ទឹក​ជន់​លិច​ព្រៃ​សហគមន៍៖ «អាត្មា​ថា​មិន​ឲ្យ​ក្រុមហ៊ុន​ចិន ទៅ​បិទ​កន្លែង​ហ្នឹង​ទេ វា​ប៉ះពាល់​ដល់​ព្រៃ​ឥណទាន​កាបូន​នៅ​លើ​ពិភពលោក។ ក្រុមហ៊ុន​ធ្វើ​អ៊ីចឹង​បាន​ប្រយោជន៍​តែ​ក្រុមហ៊ុន​ហ្នឹង»

ព្រះភិក្ខុ ប៊ុន សាលួត ប៉ាន់​ប្រមាណ​ថា ប្រសិន​បើ​ក្រុមហ៊ុន​ចិន សាងសង់​ទំនប់​ទឹក​នៅ​តំបន់​ភ្នំ​អាតោ នោះ​រួច​រាល់ គឺ​នៅ​រដូវ​វស្សា​ទឹក​នឹង​ជន់​លិច​ព្រៃ​របស់​ព្រះអង្គ​ប្រមាណ ៥.០០០​ហិកតារ។

ប្រជាពលរដ្ឋ​នៅ​ភូមិ​ស្រះកែវ និង​ភូមិ​ចារ ឃុំ​ពង្រ ស្រុក​ចុងកាល់ ជាង ១៥០​គ្រួសារ ក៏​ធ្លាប់​ព្រួយ​បារម្ភ​អំពី​បញ្ហា​ទឹក​ជំនន់​លិច​លង់​ដី​ស្រែ​ចម្ការ​របស់​ពួក​គេ​ដែរ បន្ទាប់​ពី​គេ​ឃើញ​ក្រុមហ៊ុន​ចិន ដឹក​ជញ្ជូន​គ្រឿងចក្រ​ចូល​ទៅ​ចាប់​ផ្ដើម​ការងារ​កាល​ពី​ថ្ងៃ​ទី​១៨ ខែ​មករា កន្លង​ទៅ។

នាយក​រដ្ឋបាល​សាលា​ខេត្ត​ឧត្តរមានជ័យ លោក ហោ ជិនវិរៈយុទ្ធ ឲ្យ​ដឹង​ថា ការ​សាងសង់​ទំនប់​ទឹក​នៅ​ភ្នំ​អាតោ នោះ គឺ​ជា​គម្រោង​វារីអគ្គិសនី​ឈ្មោះ​ថា ស្ទឹង​ស្រែង​ទី​២។ លោក ហោ ជិនវិរៈយុទ្ធ ឲ្យ​ដឹង​ទៀត​ថា ប្រសិន​បើ​ក្រុមហ៊ុន​ចិន សាងសង់​ទំនប់​ទឹក​នោះ​រួច​រាល់ គឺ​គេ​រំពឹង​ថា​អាច​នឹង​ទាញ​យក​ថាមពល​អគ្គិសនី​ពី ១០ ទៅ ២០​មេហ្គាវ៉ាត់ សម្រាប់​ប្រើប្រាស់​នៅ​ក្នុង​តំបន់។ ក៏ប៉ុន្តែ អាជ្ញាធរ​ទទួល​ស្គាល់​ថា គម្រោង​នោះ​ពិត​ជា​មាន​ផល​ប៉ះពាល់​ដី​ស្រែ​ចម្ការ និង​ព្រៃ​ឈើ​ច្រើន​ពាន់​ហិកតារ​មែន៖ «ក្នុង​កិច្ច​ប្រជុំ​គណៈ​បញ្ជាការ​ឯកភាព អភិបាល​ខេត្ត​លោក​ឲ្យ​ប្រមូល​ទិន្នន័យ​ប៉ះពាល់​ពី​ប្រជាពលរដ្ឋ​ឲ្យ​បាន​ច្បាស់លាស់ ហើយ​ស្នើ​ទៅ​ថ្នាក់​ជាតិ​ឲ្យ​ជំរុញ​ទៅ​ក្រុមហ៊ុន ឲ្យ​ដោះស្រាយ​ការ​ប៉ះពាល់​រួច​រាល់​សិន មុន​នឹង​ចាប់​ផ្ដើម​សាងសង់»

លោក ហោ ជិនវិរៈយុទ្ធ បញ្ជាក់​ថា ជុំវិញ​ការ​ប៉ះពាល់​ព្រៃ​សហគមន៍​ជាច្រើន​ពាន់​ហិកតារ​នោះ គឺ​ជា​រឿង​ថ្នាក់​ជាតិ​ដែល​ត្រូវ​ដោះស្រាយ ពីព្រោះ​ព្រៃ​ឈើ​ជា​សម្បត្តិ​របស់​រដ្ឋ។

អ្នក​សម្រប​សម្រួល​សមាគម​ការពារ​សិទ្ធិ​មនុស្ស​អាដហុក (adhoc) ខេត្ត​ឧត្តរមានជ័យ លោក ស្រី ណារ៉េន ឲ្យ​ដឹង​ថា ចាប់​តាំង​ពី​ថ្ងៃ​ទី​១៨ រហូត​ដល់​ថ្ងៃ​ទី​២៨ ខែ​មករា គឺ​មាន​ប្រជាពលរដ្ឋ​ជាង ៦០​គ្រួសារ​ហើយ​ដែល​ដាក់​ពាក្យ​ប្ដឹង​តវ៉ា ជុំវិញ​ការ​ប៉ះពាល់​ដោយសារ​គម្រោង​ទំនប់​វារីអគ្គិសនី​នេះ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)

មើល​មតិ​ទាំង​អស់.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល