ក្រុមហ៊ុន​មួយ​បន្ត​ចូល​កាប់​ឈើ​នៅ​តំបន់​ការពារ​ភ្នំ​ក្រឡាពស់ ខេត្ត​ស្ទឹងត្រែង

ដោយ ហ៊ុំ ចំរើន
2024.02.24
ក្រុមហ៊ុន​មួយ​បន្ត​ចូល​កាប់​ឈើ​នៅ​តំបន់​ការពារ​ភ្នំ​ក្រឡាពស់ ខេត្ត​ស្ទឹងត្រែង រូបភាព​បង្ហាញ​ពី​ក្រុម​កម្មករ​របស់​ក្រុមហ៊ុន​ធី.អេស.អិម.ដាប់បែលយូ ឯ.ក (T.S.M.W. Co., Ltd ) កាប់​យ៉ាង​រង្គាល ស្ថិត​នៅ​ត្រង់​ចំណុច​ភ្នំ​ក្រឡាពស់ ឃុំ​តាឡាត ស្រុក​សេសាន ខេត្ត​ស្ទឹងត្រែង។
រូប​៖ ​ផ្តល់ឱ្យ

ក្រុមហ៊ុន​ធី.អេស.អិម.ដាប់បែលយូ ឯ.(T.S.M.W. Co., Ltd.) បន្ត​ឲ្យ​ក្រុម​កម្មករ​របស់​ខ្លួន​ចូល​​ទៅ​កាប់​ឈើ​ដែល​មាន​តម្លៃ​នៅក្នុង​តំបន់​ការពារ​ភ្នំ​ក្រឡា​ពស់ ខេត្តស្ទឹងត្រែង ហើយ​ដឹកជញ្ជូន​ឈើ​ទាំងនោះ ចូល​ទៅ​ក្នុង​តំបន់​សម្បទាន​សេដ្ឋកិច្ច ដោយ​គ្មាន​ការទប់ស្កាត់​ពី​អាជ្ញាធរ​ពាក់ព័ន្ធ​។​ សកម្មជន​ព្រួយបារម្ភ​ពី​ការ​ហិនហោច​ព្រៃឈើ​នៅ​តំបន់​ការពារ​ទាំងនោះ ខណៈ​មន្ត្រី​នាំពាក្យ​កងរាជអាវុធហត្ថ​អះអាង​ថា ប្រសិនបើ​មាន​ករណីនេះ​កើតឡើង កម្លាំង​សមត្ថកិច្ច​នឹង​ចាត់វិធានការ​តាម​ច្បាប់។

ដើមឈើ​មូល​ធំ​រាប់​រយ​ដើម នៅ​ក្នុង​តំបន់​ការពារ​ភ្នំ​ក្រឡាពស់ ស្ថិត​នៅ​ក្នុង​ភូមិសាស្ត្រ​ស្រុក​សេសាន ខេត្ត​ស្ទឹងត្រែង ត្រូវ​បាន​ក្រុម​កម្មករ​របស់​ក្រុមហ៊ុន​ ធី.អេស.អិម.ដាប់បែលយូ ឯ.ក កាប់​ផ្ដួល​និង​ដឹកជញ្ជូន​យក​ទៅ​ដាក់​ក្នុង​បរិវេណ​ក្រុមហ៊ុន​ដោយ​សេរី​។ ក្រុមហ៊ុន​មួយ​នេះ បាន​ឈូស​ឆាយ​ផ្លូវ​ខ្វាត់​ខ្វែង​នៅក្នុង​តំបន់​ការពារ​មួយ​នេះ អស់​រយៈពេល​ជាង​មួយឆ្នាំ​ហើយ បន្ទាប់ពី​ទទួល​បាន​ដី​សម្បទាន​សេដ្ឋកិច្ច​។ សកម្មជន​បរិស្ថាន​ថា ក្រុម​ឧក្រិដ្ឋជន​ប្រើប្រាស់​រូបភាព​ដដែល ដើម្បី​កាប់​បំផ្លាញ​ព្រៃឈើ​នៅ​កម្ពុជា ដោយ​ជ្រក​ក្រោម​ស្លាក​ដី​សម្បទាន​សេដ្ឋកិច្ច រួច​លួច​កាប់​ឈើ​តំបន់​ការពារ ដើម្បី​បំពេញ​តម្រូវការ​របស់​ខ្លួន។

សកម្មជន​ការពារ​ព្រៃឈើ​ដែល​ចុះ​ស៊ើបអង្កេត​រឿង​នេះ លោក ម៉ែន ម៉ាត់ ប្រាប់​វិទ្យុ​អាស៊ីសេរី​នៅ​ថ្ងៃទី​២៣ ខែ​កុម្ភៈ​ថា ក្រុមហ៊ុន ធី.អេស.អិម.ដាប់បែលយូ ឯ.ក បាន​ដំណើរការ​អាជីវកម្ម​ឈើ​របស់​ខ្លួន​ជាង ១​ឆ្នាំ​មក​ហើយ ក្រុមហ៊ុន​នេះ​បាន​បញ្ជូន​កម្មករ​ជាច្រើន​នាក់​ចូល​ទៅ​កាប់​យក​ឈើ​មានតម្លៃ​នៅក្នុង​តំបន់​ការពារ​ភ្នំ​ក្រឡា​ពស់ ដោយ​បាន​ប្រើប្រាស់​ត្រាក់ទ័រ​អូស​ឈើ និង​រថយន្ត​ប៉ាកុង ឬ​អារ៉ែវ​ចូល​ទៅ​ក្នុង​បរិវេណ​ក្រុមហ៊ុន​មួយ​នេះ។ លោក​សោកស្ដាយ​ព្រៃឈើ​នៅ​តំបន់​ការពារ​កាប់​បំផ្លាញ​បែប​នេះ ហើយ​លោក​ក៏​ទទូច​ទៅ​រដ្ឋាភិបាល​ថ្មី ធ្វើ​យ៉ាងណា​ទប់ស្កាត់​បទល្មើស​កុំ​ឲ្យ​មានការ​លួច​កាប់​ដើម​ឈើ នៅក្នុង​តំបន់​អភិរក្ស​បន្ត​ទៀត។

លោក ម៉ែន ម៉ាត់៖ «អំពាវនាវ​ដល់​រដ្ឋាភិបាល​ឲ្យ​ជួយ​ទប់ស្កាត់​ការ​កាប់បំផ្លាញ​ព្រៃឈើ​ ពីព្រោះ​វា​មាន​ការ​កើតឡើង​ជា​រៀងរាល់​ឆ្នាំ តំបន់​របស់​ខ្លួន​គេ​អត់​កាប់​ទេ វា​តែង​តែ​មក​កាប់​នៅក្នុង​តំបន់​ការពារ​ទៅវិញ ពី​ព្រោះ​នៅ​ក្នុង​តំបន់​ការពារ​វា​មាន​ឈើ​ល្អៗ​ ជាច្រើន​សុទ្ធតែ​ជា​ឈើ​មាន​តម្លៃ។ អ៊ីចឹង​បាន​ជា​គេ​មក​លួច​កាប់​ឈើ​ក្នុង​តំបន់​ការពារ​ហ្នឹង»

រីឯ​សកម្មជន​ចលនា​មាតា​ធម្មជាតិ លោក លី ចាន់ដារ៉ាវុត លោក​ព្រួយ​បារម្ភ​ព្រៃឈើ​នៅ​តំបន់​ការពារ និង​បន្ត​បាត់បង់​បន្ថែម​ទៀត​ដោយសារតែ​គម្រោង​អភិវឌ្ឍន៍ ផ្ដល់​ដី​សម្បទាន​សេដ្ឋកិច្ច​ទៅ​ឲ្យ​ក្រុមហ៊ុន​ឯកជន ដោយ​គ្មាន​តម្លាភាព ហើយ​មិន​មាន​អ្វី​ចំណេញ​សម្រាប់​សង្គមជាតិ​នោះ​ទេ។

លោក លី ចាន់ដារ៉ាវុត៖ «​ការខូចខាត​របស់​ប្រជាជន​ទាំងនោះ​មិនដែល​ឃើញ​មាន​ការ​ប៉ះប៉ូវ​ពី​រដ្ឋាភិបាល និង​ក្រុមហ៊ុន​ឯកជន​ដែរ ដូច្នេះ​ខ្ញុំ​មើល​ឃើញ​ថា វា​ជា​ជំនួញ​ខាត​មិន​បាន​ចំណេញ​ទៅ​ដល់​ប្រទេស​ទេ ប៉ុន្តែ​វា​ចំណេញ​ទៅលើ​ក្រុមហ៊ុន​ឯកជន និង​មន្ត្រី​ដែល​ពាក់ព័ន្ធ​នឹង​ជំនួញ​ឈើ​នេះ​ទៅវិញ»

ក្រុមហ៊ុន​ធី.អេស.អិម.ដាប់បែលយូ របស់​ប្រទេស​កូរ៉ ដែល​មានលោក មិក សាផាណារេត ហៅ​ឧកញ៉ា ជ័យ ជា​អ្នកគ្រប់គ្រង​និង​បាន​បញ្ជូន​កម្មករ​របស់​ខ្លួន​ឲ្យ​ចូល​ទៅ​កាប់​យក​ឈើ​មាន​តម្លៃ​នៅ​តំបន់​ការពារ​ភ្នំ​ក្រឡា​ពស់ មាន​ដូចជា ដើម​ស្រឡៅ ឈើទាល និង​ដើម​ឈ្លីច​ជាដើម។

វិទ្យុ​អាស៊ីសេរីមិនអាច​ទាក់ទង​តំណាង​ក្រុមហ៊ុន ​ធី.អេស.អិម.ដាប់បែលយូ ដើម្បី​សុំ​ការ​បកស្រាយ​បាន​ទេ​ នៅ​ថ្ងៃទី​២៣ ខែ​កុម្ភៈ។

ជុំវិញ​រឿង​នេះ​អ្នកនាំពាក្យ​កងរាជអាវុធហត្ថ​លើ​ផ្ទៃ​ប្រទេស លោក អេង ហ៊ី បាន​និយាយ​ការពារ​ក្រុមហ៊ុន​ថា កន្លងទៅ​ក្រុមហ៊ុន ​ធី.អេស.អិម.ដាប់បែលយូ កាប់​ប្រមូល​ឈើ​នៅតែ​ក្នុង​តំបន់​ដី​សម្បទាន​សេដ្ឋកិច្ច​របស់​ខ្លួន​ប៉ុណ្ណោះ​។ តែ​ទោះជា​យ៉ាងណា​លោក​ថា ប្រសិនបើ​មាន​ករណី​កាប់​ឈើ​នៅក្នុង​តំបន់​ការពារ និង​ក្រៅ​តំបន់​ដី​សម្បទាន​សេដ្ឋកិច្ច​មែន អាជ្ញាធរ​ជំនាញ​នឹង​មិន​លើកលែង​ចំពោះ​ជន​ប្រព្រឹត្ត​ឡើយ។

លោក អេង ហ៊ី៖ «ឲ្យ​តែ​មាន​បទល្មើស​គឺ​យើង​បង្ក្រាប​ហើយ​មិន​ចាំបាច់​អ្វី​តទៅ​ទៀត​ទេ ពីព្រោះ​យើង​បាន​ដាក់​ពាក្យស្លោក​មក​ហើយ​កន្លង​មក គណៈកម្មាធិការ​ជាតិ​បាន​ដាក់​ពាក្យស្លោក​ចេញ​ឲ្យ​តែ​ប្រព្រឹត្ត​បទល្មើស​គឺ​បង្ក្រាប ហើយ​អ្វី​ដែល​មិន​ធ្ងន់ធ្ងរ​ធ្វើ​ការ​អប់រំ​និង​សន្យា»

កាល​ពី​ចុង​ឆ្នាំ​២០២៣ លោកនាយក​រដ្ឋមន្ត្រី ហ៊ុន ម៉ាណែត បាន​បញ្ជា​ឲ្យ​មន្ត្រី​ក្រោម​ឱវាទ​របស់​ខ្លួន បង្ក្រាប​បទល្មើស​ធនធាន​ធម្មជាតិ និង​ត្រូវ​អនុវត្ត​ច្បាប់​ព្រៃឈើ​ឲ្យ​បាន​តឹងរ៉ឹង​បំផុត។

ទាក់ទិន​នឹង​បញ្ហា​នេះ នាយក​ប្រតិបត្តិ នៃ​សមាគម​បណ្ដាញ​យុវជន​កម្ពុជា លោក ហេង គឹមហុង យល់​ឃើញ​ថា រដ្ឋាភិបាល​ត្រូវតែ​ចុះ​ស៊ើបអង្កេត ស្វែងរក​ការពិត​និង​ត្រូវ​ចាត់វិធានការ​ឲ្យ​បាន​តឹងរ៉ឹង​បំផុត ប្រសិនបើ​ក្រុមហ៊ុន​មួយ​នេះ បាន​កាប់​បំផ្លាញ​ធនធាន​ធម្មជាតិ និង​កេងប្រវ័ញ្ច​ទ្រព្យសម្បត្តិ​របស់​ជាតិ ហើយ​ត្រូវ​អនុវត្ត​ច្បាប់​ដោយ​មិន​មាន​ការ​លើកលែង។

លោក ហេង គឹមហុង៖ «ក្រសួង​បរិស្ថាន​មិន​គួរ​ព្រងើយកន្តើយ ហើយ​គួរតែ​ធ្វើការ​ស៊ើបអង្កេត​ជា​បន្ទាន់ ហើយ​ទប់ស្កាត់​ប្រសិនបើជាក្រុមហ៊ុន​នេះ​មាន​ជាប់​ពាក់ព័ន្ធ​ ហើយ​មាន​ភស្តុតាង​គ្រប់គ្រាន់​ ដើម្បី​ធ្វើ​ការ​ដាក់​បន្ទុក​ទៅលើ​សកម្មភាព​ខុសច្បាប់​ក្រុមហ៊ុន​នេះ ទាក់ទង​ក្នុង​ការ​កាប់​បំផ្លាញ​ព្រៃឈើ​ផ្ទុយ​ពី​គោល​នយោបាយ​របស់​ប្រទេស​កម្ពុជា​ទាំងស្រុង ត្រូវតែ​មាន​ការ​ដាក់​ទណ្ឌកម្ម​ផ្អាក​ជា​បណ្ដោះអាសន្ន ឬ​ធ្វើ​សកម្មភាព​ណាមួយ​ ដើម្បី​ឲ្យ​ក្រុមហ៊ុន​នេះ​ទទួលខុសត្រូវ​ចំពោះមុខ​ច្បាប់»

ក្រុមហ៊ុន​កូរ៉េ ហឹរ៉ាយហ្សិន អេហ្គរីខលឈ័រ ឌេវេឡុបមេន (Horizon Agriculture Development Co., Ltd) ទទួល​បាន​ដី​សម្បទាន​សេដ្ឋកិច្ច ទំហំ​ជិត​ ១​ម៉ឺន (.៧៨៨) ហិកតារ​ស្ថិត​នៅ​ក្នុង​ខេត្តស្ទឹងត្រែង ពី​រដ្ឋាភិបាល​លោក ហ៊ុន សែន កាលពី​ខែ​មីនា ឆ្នាំ​២០២២។ ប៉ុន្តែ​ភ្លាមៗ ​នោះ​ក្រុមហ៊ុន​មួយ​នេះ​ក៏បាន​ផ្ទេរ​ដី​សម្បទាន​ទាំងនោះ ទៅ​ឱ្យ​​ក្រុមហ៊ុន​ ធី.អេស.អិម.ដាប់បែលយូ រយៈពេល ៥០​ឆ្នាំ ដើម្បី​ដាំ​ដើម​កៅស៊ូ និង​ដើម​ប្រេងខ្យល់ ដែល​មាន​លោក សូ សារ៉ាន ជា​នាយក​ក្រុមហ៊ុន ប៉ុន្តែ​រហូត​មក​ដល់​ពេល​នេះ ក្រុមហ៊ុន​មិន​បាន​ធ្វើ​ដំណាំ​អ្វី​នោះ​ទេ ក្រៅពី​ការ​កាប់​ឈើ​ក្នុង​តំបន់​ការពារ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។