គ្រូបង្រៀនឈ្មោះ ឌឿន ថាវី រស់នៅស្រុកកំពង់លាវ ក្រុងព្រៃវែង មានប្រសាសន៍ឲ្យវិទ្យុអាស៊ីសេរីដឹងថា ល្បែងភ្នាល់បាល់បានកើតមានយ៉ាងអនាធិបតេយ្យ និងចេញមុខពេញទំហឹង នៅទីប្រជុំជន ខេត្តព្រៃវែង ដោយមិនមានសមត្ថកិច្ចចាត់វិធានការបង្ក្រាបនោះទេ។
លោកឲ្យដឹងថា ល្បែងភ្នាល់បាល់នេះជ្រកក្រោមស្លាកហាងខារ៉ាអូខេ យីហោជាប់ចិត្ត មានទីតាំងនៅសង្កាត់កំពង់លាវ ស្រុកកំពង់លាវ ក្រុងព្រៃវែង និងកំពុងធ្វើសកម្មភាពជារៀងរាល់ថ្ងៃ។
គ្រូបង្រៀនរូបនេះស្នើដល់សមត្ថកិច្ចមូលដ្ឋាន ក៏ដូចជារដ្ឋាភិបាល ឲ្យចាត់វិធានការលុបបំបាត់ល្បែងភ្នាល់បាល់ឲ្យអស់ពីទឹកដីខេត្តព្រៃវែង ព្រោះបានបង្កើតឲ្យមានអំពើហិង្សា និងធ្វើឲ្យពលរដ្ឋក្នុងមូលដ្ឋានមានជីវភាពកាន់តែក្រីក្រ។
គ្រូបង្រៀនឈ្មោះ ឌឿន ថាវី បញ្ជាក់ថា ៖ «បើកលក្ខណៈបើកអ៊ិនធើណិត ប៉ុន្តែអ្នកចាក់ហ្នឹងគឺចាក់ច្រើននៅព្រៃវែង។ នៅក្រោយអេស៊ីលីដាធំ នៅទីរួមខេត្តព្រៃវែង។ បាល់ហ្នឹងគឺចាក់ពេញទំហឹងតែម្ដង!»។
ស្ត្រីជាអាជីវករម្នាក់ស្ថិតក្នុងចំណោមស្ត្រីផ្សេងទៀត ដែលស្វាមីរបស់គាត់បានឈ្លក់វង្វេងនឹងល្បែងបៀរ-អាប៉ោងងើបមុខមិនរួច មានប្រសាសន៍ថា ប្លង់ដី និងផ្ទះរបស់ពួកគេ ត្រូវបានប្តីយកទៅបញ្ចាំយកលុយលែងល្បែងអស់គ្មានសល់ និងបានកើតមានអំពើហិង្សាក្នុងគ្រួសារស្ទើររាល់ថ្ងៃ បណ្ដាលមកពីល្បែងភ្នាល់ទាំងនេះ។ ស្ត្រីរូបនេះបានស្នើទៅសមត្ថកិច្ចពាក់ព័ន្ធ ឲ្យជួយបង្ក្រាបវង់ល្បែងបៀរ-អាប៉ោង កំពុងកើតមាននៅមូលដ្ឋានឃុំឈើកាច់ ស្រុកបាភ្នំ ឲ្យបានទាន់ពេលវេលា បើមិនដូច្នេះទេ នឹងបង្កមហន្តរាយធ្ងន់ធ្ងរទៅថ្ងៃអនាគត។
ទាក់ទងនឹងល្បែងភ្នាល់នេះដែរ កសិករវ័យចំណាស់ឈ្មោះ ជុំ ឈឿន រស់នៅឃុំឈើកាច់ ស្រុកបាភ្នំ ខេត្តព្រៃវែង មានប្រសាសន៍ឲ្យវិទ្យុអាស៊ីសេរីដឹង នៅថ្ងៃទី១៩ ខែកញ្ញា ថា នៅមូលដ្ឋាននេះក៏កើតមានវង់ល្បែងបៀរ-អាប៉ោងជាច្រើនកន្លែង ហើយសមត្ថកិច្ចមិនបានបង្ក្រាបឡើយ។ លោកថា វង់ល្បែងទាំងនេះបាននាំឲ្យពលរដ្ឋក្នុងមូលដ្ឋានមានជីវភាពកាន់តែក្រទៅៗ ព្រោះបានយកប្លង់ដី និងទ្រព្យសម្បត្តិ ដែលមានទាំងប៉ុន្មាន លក់ដើម្បីលេងល្បែងអស់គ្មានសល់ និងកើតមានអំពើហិង្សា ព្រមទាំងមានប្តីប្រពន្ធលែងលះគ្នាជាច្រើនគ្រួសារទៀតផង។
កសិករវ័យចំណាស់ឈ្មោះ ជុំ ឈឿន រស់នៅឃុំឈើកាច់ ៖ «មាន ២ ទៅ ៣កន្លែងនៅផ្សារឈើកាច់ ២កន្លែង នៅទ្រា ១កន្លែង និងនៅក្បាលដំរី ១ទៀត។ លេងនៅក្បាលដំរី លេងអាប៉ោង ចាញ់សុទ្ធតែអស់រាប់លាន! ហើយនៅឈើកាច់ ២កន្លែង គឺមានលេងប៉ក់ លេងកាតេ ហើយនៅទ្រាលេងប៉ក់ផង លេងហាំផង លេងអាប៉ោងផង។ ច្បាប់គេលេង គេថា ក្រោម ៥ម៉ឺន តែឥឡូវលើសពី ១០ម៉ឺនទៅទៀត!»។
ឆ្លើយតបនឹងការអះអាងរបស់ប្រជាពលរដ្ឋ លោក ឡុង សុផាត មេប៉ុស្តិ៍នគរបាលឃុំឈើកាច់ បានបដិសេធថា នៅមូលដ្ឋានរបស់លោកមិនមានទីតាំងបើកវង់ល្បែងបៀរ-អាប៉ោងច្រើនកន្លែង ដូចជាការចោទប្រកាន់នោះទេ។ លោកមានប្រសាសន៍ឲ្យវិទ្យុអាស៊ីសេរី ដឹងនៅថ្ងៃទី១៩ ខែកញ្ញា ដូច្នេះ ៖ «គ្មាននរណាហ៊ានទេ! គ្មានអ្នកហ៊ានបើកល្បែងទេ!»។
ស្នងការនគរបាលខេត្តព្រៃវែង លោក ទឹម ផន ក៏បានបដិសេធថា អត់មានវង់ល្បែងបៀរ-អាប៉ោង និងទីតាំងភ្នាល់បាល់ កើតមានអនាធិបតេយ្យនៅមូលដ្ឋានខេត្តព្រៃវែងនោះទេ។ ប៉ុន្តែលោកថា សមត្ថកិច្ចនឹងបើកការស៊ើបអង្កេត ទៅតាមការចង្អុលបង្ហាញរបស់ប្រជាពលរដ្ឋ ប្រសិនបើកើតមានមែននោះ សមត្ថកិច្ចនឹងចាត់វិធានការបង្ក្រាប។
លោក ទឹម ផន ស្នងការនគរបាលខេត្តព្រៃវែង មានប្រសាសន៍ដូច្នេះ ៖ «ភ្នាល់បាល់ យើងពិបាកណាស់ សមត្ថកិច្ចយើងតាមដាន ប៉ុន្តែគេលេងតាមទូរស័ព្ទ និងអ៊ិនធើណិត។ វាពិបាកដែរ ខ្ញុំវាអត់រកឃើញសោះឥឡូវនេះ!»។
កាលពីថ្ងៃទី២៤ ខែកុម្ភៈ ឆ្នាំ២០០៩ លោកនាយករដ្ឋមន្ត្រី ហ៊ុន សែន បានបញ្ជាឲ្យអាជ្ញាធរក្រោមឱវាទ បិទកន្លែងភ្នាល់បាល់ និងកន្លែងលេងល្បែងស្លត់ម៉ាស៊ីននៅទូទាំងប្រទេស ដោយលោកថ្លែងថា ទីតាំងទាំងនោះបានធ្វើឲ្យធ្លាក់ចុះសីលធម៌ និងបង្កើតឲ្យមានអសន្តិសុខក្នុងសង្គម។
ទោះយ៉ាងនេះក្តី ប្រជាពលរដ្ឋបានលើកឡើងថា ល្បែងភ្នាល់ទាំងនេះនៅបន្តកើតមាននៅទីក្រុងភ្នំពេញ និងនៅតាមខេត្ត-ក្រុងមួយចំនួនក្នុងប្រទេសកម្ពុជា ដោយអាជ្ញាធរមិនធ្វើការបង្ក្រាបឲ្យមានប្រសិទ្ធភាពឡើយ៕