ចំនួនអ្នកស្លាប់ដោយសារជំងឺកូវីដ-១៩ បានកើនឡើងដល់៥៦នាក់ហើយបន្ទាប់ពីអ្នកជំងឺប្រាំពីរនាក់ទៀតបានស្លាប់បន្តបន្ទាប់គ្នា កាលពីថ្ងៃទី១៨ និងថ្ងៃទី២១ខែមេសា។ អ្នកស្លាប់ទាំងប្រាំពីរនាក់នោះគឺជាពលរដ្ឋរស់នៅរាជធានីភ្នំពេញ ខេត្តកណ្តាល និងខេត្តព្រះសីហនុ។
សេចក្ដីប្រកាសព័ត៌មានរបស់ក្រសួងសុខាភិបាលអោយដឹងថា អ្នកស្លាប់ចុងក្រោយ២នាក់ កាលពីថ្ងៃទី២១ មេសា គឺជាស្រ្តីជនជាតិខ្មែរ។ ពួកគេ បានស្លាប់នៅមន្ទីរពេទ្យមិត្តភាពខ្មែរ-សូវៀត។ ក្នុងនោះម្នាក់មានអាយុ៥៤ឆ្នាំជាអ្នករស់នៅសង្កាត់ស្ទឹងមានជ័យ។ ចំណែកម្នាក់ទៀតមានអាយុ៥៤ឆ្នាំដែរជាអ្នករស់នៅក្នុងសង្កាត់ផ្សារអូឫស្សី៣ ខណ្ឌ៧មករា។ ស្រ្តីទាំង២នាក់សុទ្ធតែមានអាការៈហត់ ក្អក និងដង្ហក់ខ្លាំង។ គ្រូពេទ្យសន្និដ្ឋានថាអ្នកទាំង២ស្លាប់ដោយសារមានវិបត្តិផ្លូវដង្ហើមស្រួចស្រាល ធ្ងន់ធ្ងរ និងរលាកសួតទាំងសង្ខាងដោយសារវីរុសកូវីដ-១៩។
ទាក់ទងនឹងករណីឆ្លងថ្មីវិញ ក្រសួងសុខាភិបាលរកឃើញជាង៣រយនាក់ (៣០៣) ជាករណីឆ្លងក្នុងសហគមន៍។ ការរកឃើញថ្មីនេះធ្វើឱ្យចំនួនអ្នកឆ្លងក្នុងព្រឹត្តិការណ៍សហគមន៍២០ កុម្ភៈកើនដល់ជាង ៧ ពាន់នាក់ (៧.២០២) ហើយ។ ប៉ុន្តែនៅថ្ងៃដដែលនេះក៏មានអ្នកជំងឺជាង ២រយនាក់ (២៣៩) បានជាសះស្បើយវិញដែរ។
គិតត្រឹមព្រឹកថ្ងៃទី២១ខែមេសា ម្សិលម៉ិញ កម្ពុជាមានអ្នកកើតជំងឺកូវីដ-១៩ ជាង ៧ពាន់ ៧រយនាក់ (៧.៧៤៧) ក្នុងនោះអ្នកជាសះស្បើយមានជិត ២ពាន់ ៨រយនាក់ (២.៧៩៤) ហើយអ្នកកំពុងសម្រាកព្យាបាលមានជិត៥ពាន់នាក់(៤.៨៩៣)៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។