សង្គម​ស៊ីវិល ព្រួយបារម្ភ​រឿង​ប្រទេស​មួយ​ចំនួន​ដាក់​កម្ពុជា ក្រោម​ការ​ឃ្លាំ​មើល​អំពី​បញ្ហា​វីរុស​កូរ៉ូណា​ដូច​នៅ​ចិន

ដោយ ខែ សុណង
2020-02-07
អ៊ីម៉ែល
មតិ
Share
បោះពុម្ព
យន្តហោះ​ចត​នៅ​អាកាសយានដ្ឋាន​​អន្តរជាតិ​ភ្នំពេញ ថ្ងៃ​ទី២៩ ខែ​មករា ឆ្នាំ២០២០។
យន្តហោះ​ចត​នៅ​អាកាសយានដ្ឋាន​​អន្តរជាតិ​ភ្នំពេញ ថ្ងៃ​ទី២៩ ខែ​មករា ឆ្នាំ២០២០។
រូប៖ ពលរដ្ឋ​ផ្ដល់​ឱ្យ

សង្គម​ស៊ីវិល ព្រួយ​បារម្ភ​រឿង​ប្រទេស​មួយ​ចំនួន អាច​នឹង​ដាក់​កម្ពុជា ឱ្យ​ស្ថិត​ក្រោម​ការ​ឃ្លាំមើល​ករណី វីរុស​កូរ៉ូណា ស្រប​ពេល​ដែល​រដ្ឋាភិបាល​កម្ពុជា នៅ​តែ​អនុញ្ញាត​ឲ្យ​មាន​ជើង​ហោះហើរ​ទៅ​វិញ​ទៅ​មក រវាង​កម្ពុជា-ចិន ជា​ធម្មតា​ដូច​ដើម ខណៈ​ការ​ឆ្លង​មេរោគ​វីរុស​កូរ៉ូណា បន្ត​រាតត្បាត​ធ្ងន់ធ្ងរ​ដដែល។ ចំណែក​មន្ត្រី​រដ្ឋាភិបាល ចាត់​ទុក​ការ​បញ្ចេញ​មតិ​យោបល់​នេះ​ថា មាន​លក្ខណៈ​ជ្រុល​និយម និង​អះអាង​ទៀត​ថា រដ្ឋាភិបាល​មាន​វិធានការ​គ្រប់គ្រាន់ ដើម្បី​បង្ការ និង​ទប់​ស្កាត់​វីរុស​កូរ៉ូណា​ថ្មី​នេះ។

មន្ត្រី​សង្គម​ស៊ីវិល​មួយ​ចំនួន សម្ដែង​ការ​ព្រួយ​បារម្ភ​ថា ប្រសិន​បើ​រដ្ឋាភិបាល​កម្ពុជា បន្ត​រក្សា​ជំហរ​មិន ផ្អាក​ជើង​ហោះហើរ​ទៅ​វិញ​ទៅ​មក​រវាង​កម្ពុជា-ចិន ស្រប​ពេល​មេរោគ​កូរ៉ូណា កាន់​តែ​រាតត្បាត​ធ្ងន់ធ្ងរ​ឡើង នៅ​ក្នុង​ប្រទេស​ចិន​នោះ គឺ​អាច​នាំ​ឲ្យ​ប្រទេស​ជឿនលឿន​មួយ​ចំនួន រឹត​បន្តឹង​អ្នក​ដំណើរ​ពី​កម្ពុជា​ទៅ​កាន់​ប្រទេស​ទាំង​នោះ ព្រោះ​គេ​បារម្ភ​ថា កម្ពុជា​អាច​ជា​ភ្នាក់ងារ​ចម្លង​មេរោគ​កូរ៉ូណា​ថ្មី។

នាយក​ប្រតិបត្តិ​អង្គការ​សម្ព័ន្ធ​គណនេយ្យភាព​សង្គម​កម្ពុជា លោក សន ជ័យ មាន​ប្រសាសន៍​ថា នៅ ពេល​ប្រទេស​មួយ​ចំនួន​ធំ ព្យាយាម​នៅ​ឆ្ងាយ​ពី​ប្រទេស​ចិន ដោយ​ខ្លាច​មេរោគ​វីរុស​កូរ៉ូណា ហើយ​កម្ពុជា​បែរ​ជា​ឆក់​ឱកាស​បង្កើន​ភាព​ល្អូកល្អិន​ជា​មួយ​ចិន​បែប​នេះ ទោះ​ចង់​ឬ​មិន​ចង់ គឺ​ប្រទេស​ដែល​ខ្លាច​វីរុស​កូរ៉ូណា​មួយ​ចំនួន ​ប្រាកដ​ជា​មើល​កម្ពុជា​ក្នុង​ផ្លូវ​អវិជ្ជមាន​មិន​ខាន​ឡើយ។

ទោះ​ជា​យ៉ាង​ណា​ក្ដី លោក​អះអាង​ថា នេះ​គ្រាន់​តែ​ជា​ដំណាក់​កាល​នៃ​ការ​ព្រួយ​បារម្ភ​ប៉ុណ្ណោះ ព្រោះ​មក​ទល់​ពេល​នេះ លោក​មិន​ទាន់​ដឹង​ថា មាន​ប្រទេស​ណា​មួយ​រឹត​បន្តឹង​អ្នក​ដំណើរ​ពី​កម្ពុជា ឬ​ក៏​ដាក់​កម្ពុជា​ក្រោម​ការ​ឃ្លាំមើល​វីរុស​កូរ៉ូណា​នៅ​ឡើយ​ទេ។ លោក សន ជ័យ ជំរុញ​ក្រសួងសុខាភិបាល ឱ្យ​រឹត​បន្តឹង​ការ​ត្រួត​ពិនិត្យ​ឲ្យ​មាន​ប្រសិទ្ធភាព ចំពោះ​អ្នក​ដំណើរ​មក​ពី​ប្រទេស​ចិន ព្រោះ​ករណី​ផ្ទុះ​វីរុស​កូរ៉ូណា​នៅ​កម្ពុជា គឺ​អាច​ជះ​ឥទ្ធិពល​អវិជ្ជមាន​ច្រើន​ដល់​សេដ្ឋកិច្ច​កម្ពុជា​ទាំង​មូល ដែល​ពិបាក​វាយ​តម្លៃ​បំផុត៖ «យើង​មើល​ជា​រួម​ឃើញ​ថា ទំនង​ជា​ចិន​បាន​ផល​ប្រយោជន៍​ច្រើន​ពី​ការ​មិន​បិទ​ជើង​យន្តហោះ​នេះ ជា​ជាង​កម្ពុជា​ព្រោះ​អី​កម្ពុជា ទោះ​បី​ជា​មាន​ការ​ចំណេញ​ដល់ សេដ្ឋកិច្ច​មែន ប៉ុន្តែ​ការ​ចំណេញ​នៅ​ពី​ក្រោយ​ក្នុង​កម្រិត​ណា​មួយ​នោះ ការ​បារម្ភ​ក៏​វា​កើត​ឡើង​ស្រប គ្នា​ដែរ​ជា​មួយ​មេរោគ​នេះ។អ៊ីចឹង​កម្ពុជា ឋិត​ក្នុង​ចំណុច​កណ្ដាល​នៃ​ការ​ព្រួយ​បារម្ភ។ ពលរដ្ឋ​កម្ពុជា បារម្ភ​ពី​ជន​ជាតិ​ចិន ឬ​អ្នក​ដំណើរ​មក​ពី​ចិន ហើយ​ប្រទេស​ផ្សេង គេ​បារម្ភ​អំពី​អ្នក​ដំណើរ​ដែល​ចេញ​ពី​កម្ពុជា​ទៅ​ប្រទេស​គេ​ដែរ»

ចំណែក​នាយក​ប្រតិបត្តិ​មជ្ឈមណ្ឌល​សម្ព័ន្ធភាព​ការងារ និង​សិទ្ធិមនុស្ស (CENTRAL) លោក មឿន តុលា ថ្លែង​ថា ស្រប​ពេល​ដែល​ប្រទេស​ភាគ​ច្រើន រួម​មាន​អាមេរិក​ជា​ដើម ផ្អាក​ជើង​ហោះ​ហើរ និង​រឹត បន្តឹង​អ្នកដំណើរ​ពី​ប្រទេស​ចិន គឺ​ប្រាកដ​ណាស់​ប្រទេស​ចិន នឹង​ប្រឈម​ការ​ធ្លាក់​ចុះ​សេដ្ឋកិច្ច​ធ្ងន់ធ្ងរ។ ជាក់​ស្ដែង​រដ្ឋាភិបាល​ចិន បាន​បញ្ចេញ​ប្រតិកម្ម​រួច​ហើយ ចំពោះ​អាមេរិក និង​ប្រទេស​មួយ​ចំនួន​ថា មាន​ការ​ព្រួយ​បារម្ភ និង​មាន​ចំណាត់​ការ​ជ្រុល​ហួស​ហេតុ។ ស្ថិត​ក្នុង​បរិបទ​នេះ​លោក មឿន តុលា មើល​ឃើញ​ថា នៅ​ពេល​រដ្ឋាភិបាល​កម្ពុជា​ធ្វើ​ដំណើរ​ទៅ​ទីក្រុង​ប៉េកាំង ប្រទេស​ចិន និង​ថ្លែង​ការពារ​ប្រទេស​ចិន ព្រម​ទាំង​ប្រកាន់​ជំហរ​ដាច់​ខាត មិន​ផ្អាក​ជើង​ហោះហើរ និង​មិន​ជម្លៀស​និស្សិត​របស់​ខ្លួន​ចេញ​ពី​ទីក្រុង​វូហាន គឺ​បង្ហាញ​ថា រដ្ឋាភិបាល​កម្ពុជា ហាក់​មាន​ចេតនា​ការពារ​ការ​ធ្លាក់​ចុះ​សេដ្ឋកិច្ច​របស់​ចិន ច្រើន​ជាង​ការពារ​ប្រជាពលរដ្ឋ​របស់​ខ្លួន៖ «ប្រទេស​គេ​ផ្សេងៗ ប្រសិន​បើ​សិន​ចិន​ហោះ​មក​ស៊ីងហ្គាពួ គឺ​ស៊ីងហ្គាពួ បិទ​ហើយ។ បើ​ហោះ​ទៅ​ហ្វីលីពីន គឺ ហ្វីលីពីន បិទ​ហើយ បើ​ហោះ​ទៅ​វៀតណាម គឺ​វៀតណាម បិទ​ហើយ។ ដូច្នេះ​នៅ​ច្រក​កម្ពុជា​មួយ ឧបមា​ថា ឥឡូវ​ចិន​ចង់​ទៅ​ប្រទេស​ទី៣ អ៊ីចឹង​ប្រទេស​កម្ពុជា អាច​ជា​កន្លែង​ឆ្លង​កាត់ (Transit) របស់​ជន​ជាតិ ឬ​អ្នក​ជំនួញ​ចិន​អ៊ីចឹង​ទៅ។ នេះ​ហើយ ដែល​អាច​ជួយ​ដល់​សេដ្ឋកិច្ច​ចិន។ មួយ​ទៀត​ជំហរ​នៅ​លើ​ពិភព​លោក ក៏​គេ​មើល​ឃើញ​ថា អូ! វីរុស​នេះ គឺ​មិន​មាន​បញ្ហា អី​ទេ ជា​ពិសេស​ដូច​ជា​កម្ពុជា​ខណៈ​មិន​ទាន់​ប្រព័ន្ធ​សុខាភិបាល​រឹង​មាំ​នៅ​ឡើយ​ផង ប៉ុន្តែ​គេ​ក៏​មិន ខ្លាច​អី​ពេក​ដែរ ដូច្នេះ​នេះ​ជា​សារ​មួយ​លួងលោម​ទៅ​ពិភព​លោក​ទាំង​មូល​កុំ​បារម្ភ​រឿង​វីរុស​នេះ​ពេក​ហើយ គួរ​តែ​បើក​ជើង​មេឃ​ឲ្យ​ជន​ជាតិ​ចិន​អី​ជា​ដើម»

ទោះ​ជា​យ៉ាង​ណា​ក្តី លោក មឿន តុលា ព្រួយ​បារម្ភ​ថា ក្នុង​ករណី​កម្ពុជា​នៅ​តែ​រក្សា​ជំហរ​មិន​ផ្អាក ជើង​ហោះហើរ​ជាមួយ​ចិន​ដដែល ហើយ​វីរុស​កូរ៉ូណា នៅ​តែ​បន្ត​វាយ​លុយ​ខ្លាំងក្លា​ឥត​ស្រាកស្រាន្ត​នៅ​ក្នុង​ប្រទេស​ចិន និង​ពិភព​លោក ដែល​មិន​ទាន់​ទប់​ស្កាត់​បាន​ក្នុង​រយៈ​ពេល​យូរ គឺ​កម្ពុជា អាច​នឹង​ក្លាយ​ជា​ទីតាំង​មួយ ដែល​ប្រទេស​មួយ​ចំនួន​ដាក់​ក្នុង​បញ្ជី​ឃ្លាំមើល​វីរុស​កូរ៉ូណា ដូច​ជា​នៅ​ប្រទេស​ចិន​ដែរ៖ «ឧទាហរណ៍ ដូច​ប្រទេស​ហ្វីលីពីន ដែល​ខ្ញុំ​ទទួល​បាន​ព័ត៌មាន​គឺ គេ​ចេញ​គោល​នយោបាយ​ថ្មី​ពាក់ព័ន្ធ​នឹង​យន្តការ​ទប់​ស្កាត់​ក្នុង​សុខភាព គឺ​មាន​ន័យ​ថា ជន​ជាតិ​ហ្វីលីពីន​ណា ដែល​មក​ស្រុក​ខ្មែរ​ហើយ​ត្រឡប់​ទៅ​វិញ គេ​តម្រូវ​ឲ្យ​ដាក់​ក្នុង​ការ​ឃ្លាំមើល​សុខ​ភាព​រយៈ​ពេល ១៤ថ្ងៃ ហើយ​បើ​គ្មាន​វីរុស​កូរ៉ូណា​នេះ គឺ​អត់​អី​ទេ។ ដូច្នេះ បើ​មាន​ករណី​នេះ​ច្រើន​វា​អាច​ប៉ះពាល់​ដល់​កម្ពុជា មាន​ន័យ​ថា ប្រទេស​មួយ​ចំនួន អាច​ឈាន​ដល់​ការ​បិទ​ជើង​យន្តហោះ​ជា​បណ្ដោះអាសន្ន និង​មិន​ឲ្យ​វីសា (Visa) ជន​ជាតិ​ណា​ក៏​ដោយ ដែល​ឆ្លង​កាត់​កម្ពុជា ដូច្នេះ​គឺ​វា​នាំ​ឲ្យ​មាន​បញ្ហា​ធ្ងន់ធ្ងរ​ថែម ទៅ​លើ​សេដ្ឋកិច្ច​កម្ពុជា»

មាន​ប្រទេស​ជាង ៦០ បាន​ដាក់​ចេញ​វិធានការ​រឹត​បន្តឹង​លើ​ការ​ធ្វើ​ដំណើរ​របស់​ជន​ជាតិ​ចិន ចាប់​តាំង​ពី​មាន​ការ​រីក​រាលដាល​នៃ​វីរុស​នេះ រួម​មាន សហរដ្ឋ​អាមេរិក សិង្ហបុរី និង​ជប៉ុន​ជា​ដើម។ ដោយ​ឡែក កាល​ពី​សប្ដាហ៍​មុន ប្រមុខ​រដ្ឋាភិបាល​កម្ពុជា លោក ហ៊ុន សែន ប្រកាស​ថា អាជ្ញាធរ​គ្មាន​វិធានការ​បិទ​ជើង​ហោះហើរ និង​ជម្លៀស​និស្សិត​ខ្មែរ​ពី​ចិន​នោះ​ទេ ដោយ​លោក​អះអាង​ថា វិធានការ​នេះ​គឺ ស្មើនឹង​សម្លាប់​សេដ្ឋកិច្ច​កម្ពុជា និង​កាត់​បន្ថយ​ទំនាក់ទំនង​ជា​មួយ​ចិន។

អ្នក​នាំ​ពាក្យ​ក្រសួង​ការ​បរទេស​កម្ពុជា លោក កុយ គួង មាន​ប្រសាសន៍​ថា កម្ពុជា​នៅ​តែ​រក្សា​ជំហរ ដូច​ការ ប្រកាស​ម្ដង​ហើយ​ម្ដង​ទៀត របស់​លោក​នាយក​រដ្ឋមន្ត្រី ហ៊ុន សែន ហើយ​លោក​អះអាង​ថា ជំហរ​នេះ គ្មាន​ការ​បង្គាប់​បញ្ជា​ពី​រដ្ឋាភិបាល​ចិន​នោះ​ទេ គឺ​ជា​ជំហរ​អព្យាក្រឹត្យ ព្រោះ​កន្លង​មក ទោះ​បី​ជា​មាន​ប្រទេស​ផ្សេង​ផ្ទុះ​ការ​រីក​រាល​ដាល​វីរុស ក៏​កម្ពុជា មិន​ដែល​ផ្អាក​ជើង​ហោះហើរ​ដែរ។ លោក ចាត់​ទុក​ថា ការ​ព្រួយ​បារម្ភ​នានា គឺ​ជា​សិទ្ធិ​សេរីភាព ។ អ្នកនាំ​ពាក្យ​ក្រសួង​ការ​បរទេស​រូប​នេះ ឲ្យ​ដឹង​ដែរ​ថា ចំពោះ​ប្រទេស​ណា ដែល​ដាក់​កម្ពុជា​ក្រោម​ការ​ឃ្លាំមើល ឬ​មាន​ត្រួត​ពិនិត្យ សុខភាព​ពលរដ្ឋ​របស់​ខ្លួន​រយៈ​ពេល ១៤ថ្ងៃ ដោយសារ​ខ្លាច​ឆ្លង​មេរោគ​វីរុស​កូរ៉ូណា​ពី​កម្ពុជា គឺ​ជា​នីតិវិធី​ផ្ទៃ​ក្នុង​ប្រទេស​គេ ហើយ​លោក​មិន​បាន​ដឹង​រឿង​នេះ​ទេ៖ «យើង​មាន​វិធានការ​ដោយ​យើង​បាន​ដាក់​បណ្ដាញ​តាម​ច្រក​ទ្វារ អន្តរជាតិ​នានា ទាំង​ផ្លូវ​គោក​ផ្លូវ​ទឹក និង​ផ្លូវ​អាកាស​ជា​ដើម គឺ​យើង​បាន​ដាក់​ម៉ាស៊ីន​ស្កែន​កម្ដៅ​ដោយ​ហ្មត់ចត់​បំផុត ជា​ពិសេស ខាង​ក្រសួង​សុខាភិបាល​លោក យក​ចិត្ត​ទុក​ដាក់​ណាស់។ ដូច​ជា​កន្លែង​មក មាន​ជន​ជាតិ​ចិន​ម្នាក់ ដែល​ថា​សង្ស័យ​នោះ គឺ​ថា ម៉ាស៊ីន​យើង​មាន​លទ្ធភាព​ដឹង ហើយ​រក​ឃើញ ហើយ​យើង​យក​គាត់​ទៅ​ព្យាបាល។ ដូច្នេះ​ហើយ​ជំហរ​យើង​នៅ​រក្សា​ដដែល។ ខ្ញុំ​យល់​ថា វា​មិន​មាន​ផល​ប៉ះពាល់​អ្វី​ទេ ផ្ទុយ​ទៅ​វិញ​យើង​បាន​បើក​ទូលំទូលាយ​ហើយ​វិស័យ​ផ្សេងៗ គឺ​នៅ​លក្ខណៈ​ដដែល បាទ ទាំង​វិស័យ​ទេសចរណ៍​អី​ផ្សេងៗ»

អាស៊ី​សេរី បាន​ព្យាយាម​ទាក់ទង​អ្នក​នាំ​ពាក្យ​ក្រសួង​សុខាភិបាល គឺ​អ្នកស្រី ឱ វណ្ណឌីន និង​លោក លី សូវ៉ាន់ ជា​ច្រើន​លើក ប៉ុន្តែ​ទូរស័ព្ទ​ចូល​ពុំ​មាន​អ្នក​ទទួល។

រដ្ឋាភិបាល​លោក ហ៊ុន សែន បាន​បង្កើន​ទំនាក់ទំនង​ជាមួយ​មហា​អំណាច​កុម្មុយនិស្ត​ចិន​កាន់​តែ​ស៊ី​ជម្រៅ បន្ទាប់​ពី​ក្រុម​ប្រទេស​ប្រជាធិបតេយ្យ​ធំៗ នៅ​លើ​ពិភព​លោក ​បាន​ថ្កោលទោស ចំពោះ​ចំណាត់​ការ​ទាំង​ឡាយ​លើ​គណបក្ស​សង្គ្រោះ​ជាតិ ដោយ​បាន​ចាត់ទុកថា នោះ​ជា​ការ​គាស់​រំលើង​គ្រឹះ​ប្រជាធិបតេយ្យ​នៅ​កម្ពុជា។ សហភាព​អឺរ៉ុប នឹង​សម្រេច​ជា​ផ្លូវការ​ដក ឬ​មិន​ដក ឬ​ដក​ផ្នែក​ខ្លះ​នៃ​ប្រព័ន្ធ​អនុគ្រោះ​ផ្នែក​ពាណិជ្ជកម្ម ''គ្រប់​មុខ​ទំនិញ​លើក​លែង​តែ​អាវុធ ឬ​ហៅ​កាត់ EBA'' ពី​កម្ពុជា នៅ​សប្ដាហ៍​ក្រោយ​នេះ។

ក្នុង​ដំណើរ​ទស្សន​កិច្ច​ពិសេស​មួយ​ទៅ​កាន់​ទីក្រុង​ប៉េកាំង​ប្រទេស​ចិន កាល​ពី​ថ្ងៃ​ទី៥ ខែ​កុម្ភៈ លោក ហ៊ុន សែន មិន​បាន​ជួប​សួរ​សុខ​ទុក្ខ​និស្សិត​ខ្មែរ​ដោយ​ផ្ទាល់ ឬ​ទំនាក់ទំនង​តាម​វិធី​ណា​មួយ ដើម្បី​ដឹង អំពី​សុខ​ទុក្ខ​របស់​ពួក​គេ​នោះ​ទេ។ ប៉ុន្តែ​នៅ​ទី​នោះ លោក ហ៊ុន សែន បាន​ស្នើសុំ​ត្រង់ៗ ទៅ​មេ​ដឹក​នាំ ចិន​ឲ្យ​ជួយ​ដល់​សេដ្ឋកិច្ច​កម្ពុជា ដែល​កំពុង​ប្រឈម​មុខ​នឹង​ការ​បាត់​បង់​ប្រព័ន្ធ EBA របស់​សហភាព​អឺរ៉ុប ដោយ​សារ​មិន​ព្រម​ស្តារ​លទ្ធិ​ប្រជាធិបតេយ្យ និង​ការ​គោរព​សិទ្ធិមនុស្ស​តាម​សំណើ​របស់​សហភាព​អឺរ៉ុប។

ការណ៍​នេះ បាន​ធ្វើ​ឲ្យ​ក្រុម​អ្នក​និយម​ប្រជាធិបតេយ្យ​នៅ​កម្ពុជា ចាត់​ទុក​ដំណើរ​ទស្សនកិច្ច​របស់​លោក ហ៊ុន សែន ថា មិន​បាន​បង្ហាញ​ពី​ការ​យកចិត្តទុកដាក់​ពិត​ប្រាក ចំពោះ​និស្សិត​ខ្មែរ​ដែល​ជាប់​គាំង​ក្នុង​តំបន់​រីក​រាលដាល​នៃ​វីរុស​កូរ៉ូណា​នោះ​ទេ​ ប៉ុន្តែ​លោក ហ៊ុន សែន ទៅ​ទី​នោះ ដើម្បី​ចង់​ឈ្នះ​ចិត្ត​ពលរដ្ឋ​ខ្មែរ​ផង និង​សុំ​ឲ្យ​ចិន​ជួយ​ធ្វើ​ជា​ខ្នង​បង្អែក​ការពារ​អំណាច​របស់​ខ្លួន​ផង​ប៉ុណ្ណោះ។

គិតត្រមថ្ងៃទី៧ ខែ​កុម្ភៈ វីរុស​ដែល​មាន​ប្រភព​ផ្ទុះ​រីក​រាលដាល​ពី​ទីក្រុង​វូហាន ប្រទេស​ចិន បាន សម្លាប់​មនុស្ស​កើន​ដល់ ៦៣៨នាក់​ហើយ ខណៈ​អ្នក​ឆ្លង​វីរុស​នេះ ក៏បាន​កើន​ដល់​ជាង ៣ម៉ឺន​១ពាន់ (៣១.៤៥៣) នាក់។ ក្នុង ១យប់ តួលេខ​អ្នក​ស្លាប់​ដោយ​វីរុស​នេះ​កើន​ឡើង​ចន្លោះ​ពី ៥០នាក់​ទៅ​ជាង ៧០នាក់។ បច្ចុប្បន្ន មាន​ប្រទេស​ជិត ៣០ ត្រូវ​បាន​វីរុស​នេះ​ឆ្លង​រាតត្បាត ហើយ​ប្រទេស​ភាគ​ច្រើន​ទៀត បាន​រក​ឃើញ​អ្នក​ឆ្លង​វីរុស​នេះ​កើត​ឡើង​ជា​បន្ត​បន្ទាប់ លើកលែង​តែ​កម្ពុជា​ប៉ុណ្ណោះ​ដែល​មិនទាន់​រក​ឃើញ​ករណី​ថ្មី​ទៀត​នៅ​ឡើយ ក្រៅ​ពី​បុរស​ជន​ជាតិ​ចិន​ម្នាក់ ដែល​កំពុង​សម្រាក​ព្យាបាល​នៅ​ក្នុង​មន្ទីរ​ពេទ្យ​ខេត្ត​ព្រះសីហនុ។

អង្គការ​សុខភាព​ពិភព​លោក (WHO) កាល​ពី​ថ្ងៃ​ទី៥ កុម្ភៈ បាន​ដាក់​ក្តី​បារម្ភ​ថា ប្រទេស​មាន​ប្រព័ន្ធ សុខាភិបាល​ទន់​ខ្សោយ អាច​មិន​មាន​សមត្ថភាព​រក​ឃើញ​អ្នក​ដែល​បាន​ឆ្លង​មេរោគ​កូរ៉ូណា​ថ្មី​នេះ ខណៈ​មន្ត្រី​សង្គម​ស៊ីវិល​នៅ​កម្ពុជា ក៏​កំពុង​មាន​ការ​ព្រួយ​បារម្ភ​ដូច្នេះ​ដែរ ព្រោះ​ប្រទេស​កម្ពុជា មាន ជន​ជាតិ​ចិន​ចេញ​ចូល​ច្រើន។ ទោះ​ជា​យ៉ាង​ណា ក្រសួង​សុខាភិបាល​​ អះអាង​ប្រាប់​អ្នក​កាសែត​ក្នុង ស្រុក​ថា​ សមត្ថភាព​តាម​ដាន និង​ឆ្លើយ​តប​លើ​វីរុស​កូរ៉ូណា​របស់​កម្ពុជា​មិន​ចាញ់​ប្រទេស​រីក​ចម្រើន​នោះ​ទេ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (1)
Share

More than 3,000 pple from Wuhan city came to Cambodia without checkup or testing them and not control them in one place or investigation..because this rogue govm't failure and corruptions

Secret reveals-inside an anonymous govm't said comrade Hun Sen is gonna moves to Wuhan city of coronavirus outbreak with plans to bring all his family and grand children to live there.Inside anonymous stated that comrade Hun Sen wants to buy some skyscrapers,vacancy,condos or apartments emptiest or abandoned in Wuhan city.They plan to expanse their wealth within $300 to $650 millions.That why comrade HSen brought his eldest adopted son Hun Maneth with him how to becomes a young dictator next his foot father's step after comrade has no more power,retire or die"next big step rookie dictator beggary".Otherwise,comrade unofficial HSen's govm't kept secretly didn't want break outside because he gotten secreted with China commie leaders with bribed him in million dollars to brought all those pple in Wuhan city to Cambodia.

Feb 07, 2020 12:05 PM

គេហទំព័រ​ទាំងមូល