ក្រសួងពាណិជ្ជកម្មឲ្យ​ផ្អាកចរាចរ និងប្រមូលមកវិញ​ផលិតផលម្សៅ​ទឹកដោះគោ Nutrilatt ចំនួន៦លេខកូដ ដោយសារ​ខ្វះ​សារធាតុ​ចិញ្ចឹម

ដោយ​ ហេង រស្មី
2020-09-03
Share
ប៉ាន សូរស័ក្តិ ៨៥៥ ៦២២ រដ្ឋមន្ត្រី​ក្រសួង​ពាណិជ្ជកម្ម លោក ប៉ាន សូរស័ក្តិ ថ្លែង​ក្នុង​កម្មវិធី​ចាប់​ផ្ដើម​គម្រោង​ជំរុញ​ទីផ្សារ​សម្រាប់​កសិកម្ម​ខ្នាត​តូច (AIMS) នា​រាជធានី​ភ្នំពេញ កាល​ពី​ថ្ងៃ​ទី​២៣ ខែ​ឧសភា ឆ្នាំ​២០១៧។
RFA

ក្រសួង​ពាណិជ្ជកម្ម​ប្រកាស​នៅថ្ងៃទី៣ កញ្ញា​នេះ​ឲ្យផ្អាក​ចរាចរ និង​ប្រមូល​ត្រឡប់​មក​វិញ​នូវ​ម្សៅ​ទឹកដោះគោ នូទ្រីលេត ចំនួន៦លេខកូដ ដែល​ត្រូវបាន​រកឃើញ​ថា​ខ្វះ​ជាតិ​ដែក និង​សារធាតុ​ចិញ្ចឹម។ សង្គមស៊ីវិល​សារទរ​ចំពោះ​វិធានការ​នេះ និង​ស្នើ​ឲ្យ​រដ្ឋាភិបាល​ចាត់​វិធានការ​លើ​ផលិតផល​ម្សៅ​ទឹកដោះគោ​សម្រាប់​កុមារ​របស់​ក្រុមហ៊ុន​ផ្សេងទៀត ដើម្បី​ធានា​គុណភាព​ត្រឹមត្រូវ​តាម​ស្តង់ដារ​មុនពេល​ដាក់​លក់​លើ​ទីផ្សារ​កម្ពុជា។

ក្រសួងពាណិជ្ជកម្ម​តម្រូវ​ឲ្យ​ក្រុមហ៊ុន​នូទ្រីលេត (Nutrilatt Master LM Co., LTD) បញ្ឈប់​ការនាំចូល និង​ចែកចាយ​ផលិតផល​ម្សៅ​ទឹកដោះគោ​សម្រាប់​ចិញ្ចឹមទារក និង​កុមារ ដែល​មាន​អាយុ០ខែ ដល់​២ឆ្នាំ។ ក្រសួង​ពាណិជ្ជកម្ម​ក៏​តម្រូវ​ឲ្យ​ក្រុមហ៊ុន​ប្រមូល​ត្រឡប់​មក​វិញ នូវ​ផលិតផល​ទឹកដោះគោ​ម៉ាក នូទ្រីលេត លេខកូដ B/N 487  488  536  537 538 និង 539 ពី​ទីផ្សារ​ក្នុង​ប្រទេស និង​ធ្វើការ​ត្រួតពិនិត្យ​គុណភាព​ម្សៅ​ទឹកដោះគោ​ម៉ាកនូទ្រីលេត ផ្សេង​ទៀត​ផងដែរ។

ជាមួយគ្នា​នេះ ក្រសួង​ពាណិជ្ជកម្ម​តម្រូវ​ឲ្យ​ផ្សារទំនើប ឱសថស្ថាន និង​ហាងលក់​ទំនិញ​នានា ផ្អាក​ជាបន្ទាន់​ការដាក់​លក់​ម្សៅ​ទឹកដោះគោ​ម៉ាកនូទ្រីលេត លេខកូដ​ទាំង៦ ដែល​បាន​រកឃើញ​ថា ខ្វះជាតិ និង​ស័ង្កសី មិន​ត្រូវ​តាម​ស្តង់ដារ និង​ប្រគល់​ម្សៅ​ទឹកដោះគោ​ទាំងនោះ ដល់​ស្ថាប័ន​ជំនាញ​របស់​ក្រសួង​ពាណិជ្ជកម្ម។ ជាងនេះ​ទៅទៀត ក្រសួង​ពាណិជ្ជកម្ម​អំពាវនាវ​ដល់​មាតាបិតា និង​អាណាព្យាបាល​ទាំងអស់​ឲ្យ​បញ្ឈប់​ការបំបៅ​កូន​ដោយ​ម្សៅ​ទឹកដោះគោ​ម៉ាកនូទ្រីលេត លេខកូដ​ទាំង​៦នេះ ហើយ​បើ​សង្ស័យ​ថា កូនចៅ​របស់​ខ្លួន​រងផលប៉ះពាល់​ដោយសារ​ម្សៅទឹកដោះគោនេះ អាច​ដាក់​បណ្តឹង​ទៅ​កាន់​ក្រសួង​ពាណិជ្ជកម្ម​បាន ដោយភ្ជាប់​ជាមួយ​ឯកសារ​ពាក់ព័ន្ធ។

ការដាក់ចេញ​វិធានការ​ក្តៅ​នេះ បន្ទាប់​ពី​ក្រសួង​ពាណិជ្ជកម្ម​រកឃើញ​ថា ម្សៅ​ទឹកដោះគោ ម៉ាក​នូទ្រីលេត ខ្វះ​សារធាតុ​ចិញ្ចឹម និង​ជាតិដែក ដែល​ប៉ះពាល់​ដល់​សុខភាព​របស់​ទារក និង​កុមារ​ធ្ងន់ធ្ងរ។ វិធានការ​របស់​ក្រសួង​ពាណិជ្ជកម្ម ក៏ជា​ការឆ្លើយតប​ទៅនឹង​បណ្តឹង​របស់​ក្រុម​មាតាបិតា​ជា​ច្រើន​នាក់ ដែល​អះអាង​ថា កូនៗ​របស់​ពួកគេ​កើត​ជំងឺ​ស្លេកស្លាំង ដោយ​ខ្វះ​ជាតិដែក និង​ខ្វះ​ឈាមក្រហម​ធ្ងន់ធ្ងរ បណ្តាល​មក​ពី​ទទួលទាន​ម្សៅ​ទឹកដោះគោ​ម៉ាកនូទ្រីលែត កាល​ពី​ខែកក្កដា​កន្លង​ទៅ។

ស្ត្រី​ជា​ម្តាយ លោកស្រី គង់ ចន្ទ័ម៉ាលីស ប្រាប់​អាស៊ីសេរី​ថា លោកស្រី និង​អាណាព្យាបាល​កុមារ​មាន​ជំងឺ​ស្លេកស្លាំង​ដ៏ទៃ​ទៀត សប្បាយ​ចិត្ត​ចំពោះ​វិធានការ​របស់​ក្រសួង​ពាណិជ្ជកម្ម ហើយ​លោកស្រី​ជឿ​ថា វិធានការ​នេះ​នឹង​ជួយ​ដល់​អាណាព្យាបាល​ដទៃ​ប្រយ័ត្ន​ប្រយែង​ចំពោះ​ការប្រើប្រាស់​ផលិតផល​បំបៅ​កូនៗ​របស់​ខ្លួន។ លោកស្រី​បន្តថា​វិធានការ​នេះ​ក៏ជំរុញ​ឲ្យ​ក្រុមហ៊ុន​ដទៃ​ផ្សេង​ទៀត គោរព​ច្បាប់ និង​ធានាថា​ផលិតផល​របស់​ពួកគេ​ពិតជា​មាន​ការត្រួតពិនិត្យ និង​តាម​ស្តង់ដារ ដែល​នឹង​មិន​ធ្វើ​ឲ្យ​ប៉ះពាល់​ដល់​អ្នកប្រើប្រាស់។ លោកស្រី​ក៏​សង្ឃឹម​ថា តុលាការ​នឹង​ផ្តល់​យុត្តិធម៌​ដល់​កូន​លោកស្រី និង​កុមារ​រងគ្រោះ​ដទៃ​ទៀត​ក្នុង​ពេលឆាប់​ខាងមុខ​នេះ​ដែរ៖ «ហើយ​អ្វី​ដែល​ពួកខ្ញុំ​កាន់តែ​រំភើប​ចិត្ត​ទៀត​ហ្នុង​គឺ​ខ្ញុំអាចជួយ​ដល់កុមារដទៃ ដែល​កំពុងតែ​ប្រើប្រាស់​ផលិតផល​ហ្នឹង ដើម្បី​អោយ​ពួកគាត់​មាន​ការប្រុង​ប្រយ័ត្ន។ ពីព្រោះ​កូន​ពួកខ្ញុំ​កំពុងតែ​ឈឺ​ហើយ អ៊ីញ្ចឹង​ពួកខ្ញុំ​ក៏​អត់ចង់​បើកភ្នែក​មើល ហើយេ​ពេល​ទៅ​មន្ទីរពេទ្យ​ឮ​តែមាន​បញ្ហា​ជាបន្តបន្ទាប់ សូម្បី​តែ​មកដល់​ថ្ងៃហ្នឹង​នៅ​តែមានក្មេង​ចូលមន្ទីរ​ពេទ្យ​ចឹង»។

អាស៊ីសេរី​បានទាក់ទង​ទៅ​តំណាង​ក្រុមហ៊ុន នូទ្រីលេត ដើម្បី​សុំ​ការឆ្លើយតប​ចំពោះ​វិធានការ​របស់​ក្រសួង​ពាណិជ្ជកម្ម​នេះ ប៉ុន្តែ​អ្នក​លើក​ទូរស័ព្ទ​មិនបាន​ឆ្លើយតប​អ្វីនោះ​ទេ រួច​ក៏ចុច​ផ្តាច់​ទូរស័ព្ទ​ទៅ​វិញ។ អាស៊ីសេរី​ក៏បាន​ព្យាយាម​ទាក់ទង​ទៅ​ទៀត ប៉ុន្តែ​ទូរស័ព្ទ​របស់​តំណាង​ក្រុមហ៊ុន ក៏លែង​អាច​ទាក់ទង​បាន។

ក្រសួងពាណិជ្ជកម្ម កាល​ពី​ថ្ងៃទី២៦ សីហា បាន​ប្រកាស​លទ្ធផល​ដែល​បាន​មក​ពី​មន្ទីរ​ពិសោធន៍​ឯករាជ្យ​នៅ​ប្រទេស​សឹង្ហបុរី បង្ហាញ​ថា​ម្សៅ​ទឹកដោះគោ​ម៉ាកនូទ្រីលេត​ចំនួន៦ លេខកូដ ខ្វះជាតិ​ដែក និង​សារធាតុ​ស័ង្កសី។ កង្វះ​ជាតិដែក​ជាមូលហេតុ​ដែល​នាំ​ឲ្យ​កុមារ​ស្លេកស្លាំង ប៉ះពាល់​ដល់​ការអភិវឌ្ឍន៍​ផ្នែក​ខួរក្បាល សតិបញ្ញា ស្មារតី និង​ការអភិវឌ្ឍន៍​ផ្នែក​មនោសញ្ចេតនា អារម្មណ៍ ក្នុង​ការទំនាក់ទំនង​ជាមួយ​មនុស្ស​ក្នុង​សង្គម។ ចំណែក​ការខ្វះ​ជាតិស័ង្កសី​នឹង​ធ្វើ​ឲ្យ​កុមារ​មាន​ការលូតលាស់​យឺត អាច​បណ្តាល​ឲ្យ​កុមារក្រិន និង​ថយចុះ​សមត្ថភាព​រាងកាយ​ក្នុង​ការប្រយុទ្ធ​ប្រឆាំង​នឹង​ជំងឺ​ផ្សេងៗ។

នាយករង​ទទួល​បន្ទុក​ផ្នែកឃ្លាំមើល​សិទ្ធិមនុស្ស​នៃ​អង្គការ​លីកាដូ លោក អំ សំអាត សារទរ​ចំពោះ​វិធានការ​របស់​ក្រសួង ប៉ុន្តែ​លោក​ស្នើ​ឲ្យ​ក្រសួង​អនុវត្ត​ឲ្យ​បាន​ត្រឹមត្រូវ និង​មាន​ប្រសិទ្ធភាព​ចំពោះ​ការប្រមូល​ផលិតផល​ម្សៅ​ទឹកដោះគោ​ដែល​ខ្វះ​គុណភាព​នោះ​ត្រឡប់​មក​វិញ។ លោក​បន្ត​ថា ក្រសួង​ក៏ត្រូវ​ជួយ​អាណាព្យាបាល​ក្នុង​ការរៀបចំ​បណ្តឹង​ទៅ​តុលាការ​ផងដែរ។ លោក​បន្ថែម​ថា ក្រសួង​ពាណិជ្ជកម្ម​ត្រូវ​ពង្រឹង​យន្តការ​ត្រួតពិនិត្យ​គុណភាព​នៃ​ផលិតផល​នាំចូល​ទាំងអស់ មុន​នឹង​អនុញ្ញាត​ឲ្យ​ចរាចរ​លើ​ទីផ្សារ​កម្ពុជា៖ «កុមារដែល​ត្រូវបាន ឬ​ក្រុមគ្រួសារ ដែល​ត្រូវបាន​រងគ្រោះ​ដោយសារ​ការប្រើប្រាស់​ម្សៅ​ទឹកដោះគោ​នឹងជួយ គឺ​ក្រសួង​អាចនឹង​ជួយ​រៀបចំ​ពាក្យបណ្ដឹង​ប្ដឹង​ក្រុមហ៊ុន​អោយ​ទទួលខុស​ត្រូវ​ទៅ​លើ​បញ្ហា ដែល​បាន​កើតឡើង​ចំពោះ​ទារក​ដែលបាន​ប្រើប្រាស់​ម្សៅ​ទឹកដោះគោ ហើយ​បាន​ប៉ះពាល់​ដល់​សុខភាព​របស់​ពួកគេ​ហ្នឹង​ជា​រឿងមួយ។»

បណ្តាញ​សង្គម​ស៊ីវិលជាតិ អន្តរជាតិ​ប្រមាណ​៥០ស្ថាប័ន កាល​ពី​ថ្ងៃទី០២ កញ្ញា បានចេញ​សេចក្តីថ្លែងការណ៍​គាំទ្រ​វិធានការ​របស់​ក្រសួង​ពាណិជ្ជកម្ម និង​ស្នើ​ឲ្យ​ស្ថាប័ន​ជំនាញនេះ​ត្រួតពិនិត្យ​គុណភាព​ម្សៅ​ទឹកដោះគោ​ផ្សេង​ទៀត មុន​នឹង​អនុញ្ញាត​ឲ្យ​ដាក់លក់​ផលិតផល​ទាំងនោះ​លើ​ទីផ្សារ​កម្ពុជា។ សង្គមស៊ីវិល​ទាំងនេះ​ក៏​ទាមទារ​ឲ្យ​មាន​ការអនុវត្ត​នូវ​អនុក្រិត្យ​លេខ១៣៣ ស្តីពី​ការគ្រប់គ្រង​ទីផ្សារ​លើ​ផលិតផល​អាហារទារក និង​អាហារ​បំប៉ន​ទារក​ឲ្យមាន​សុវត្ថិភាព និង​មាន​អាហាររូបត្ថម្ភ​គ្រប់គ្រាន់​ដល់ទារក និង​កុមារ​តូចៗ ដើម្បី​ការពារ និង​លើក​កម្ពស់​ការបំបៅដោះ​កូន​ផងដែរ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)

មើល​មតិ​ទាំង​អស់.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល