មន្ត្រី​សង្គម​ស៊ីវិល​បារម្ភ​ពី​ការរាតត្បាត​ជំងឺ​ផ្ដាសាយធំ​ឆ្លង​អ្នកជាប់​ឃុំ​ក្នុង​ពន្ធនាគារ

ដោយ​ ហេង រស្មី
2020-09-17
អ៊ីម៉ែល
មតិ
Share
បោះពុម្ព
អ្នកជាប់ឃុំដេកប្រជ្រៀតគ្នាក្នុងពន្ធនាគារមួយ​នៅកម្ពុជា កាលពីខែឧសភាឆ្នាំ២០២០។
អ្នកជាប់ឃុំដេកប្រជ្រៀតគ្នាក្នុងពន្ធនាគារមួយ​នៅកម្ពុជា កាលពីខែឧសភាឆ្នាំ២០២០។
រូបថតពីវីដេអូរបស់ Amnesty International

មន្ត្រី​អង្គការ​សង្គម​ស៊ីវិល​សម្ដែង​ការព្រួយ​បារម្ភ​អំពី​ការរាតត្បាត​ជំងឺ​ផ្ដាសាយធំ​នៅក្នុង​ពន្ធនាគារ ដែល​អាច​នឹង​ប៉ះពាល់​ធ្ងន់ធ្ងរ​ដល់​សុខភាព​របស់​ជនជាប់​ឃុំ ដែល​ធ្វើឱ្យ​ពួកគេ​រស់នៅ​កាន់តែ​លំបាក។ ក្ដីបារម្ភ​នេះ បន្ទាប់​ពី​នាយកដ្ឋាន​ប្រយុទ្ធ​ប្រឆាំង​នឹង​ជំងឺ​ឆ្លង​នៃ​ក្រសួង​សុខាភិបាល​បាន​បង្ហាញ​របាយការណ៍​ថា​ជំងឺ​ផ្ដាសាយធំ​កំពុង​តែ​រាតត្បាត​ខ្លាំង​នៅ​តាម​ពន្ធនាគារ​ជាច្រើន​កន្លែង​នៅ​កម្ពុជា។

ប្រធាន​ផ្នែក​សិទ្ធិមនុស្ស​នៃ​សមាគម​ការពារ​សិទ្ធិមនុស្ស​អាដហុក​(Adhoc) លោក នី សុខា មាន​ប្រសាសន៍​ថា បន្ទប់​ឃុំឃាំង​តាម​ពន្ធនគារ​ទូទាំង​ប្រទេស​មាន​ភាពចង្អៀតណែន​ជា​ការលំបាក​មួយ​រួចមក​ហើយ។ លោក បន្តថា​ប្រសិនបើ​ជំងឺ​ផ្ដាសាយធំ​កំពុង​រាតត្បាត​នៅ​ក្នុង​ពន្ធនាគារ​ទៀត​នោះ​នឹង​ធ្វើឱ្យ​ជនជាប់ឃុំ​កាន់តែ​លំបាក​ខ្លាំង។ លោក ឱ្យដឹង​ថា​ជនជាប់ឃុំ​ងាយ​ឆ្លង​ជំងឺផ្ដាសាយធំ​បាន​យ៉ាងលឿន​ពីព្រោះ​អ្នកទោស​តែងតែ​កើត​ជំងឺ​រមាស់​ស្បែក​ស្ទើរ​គ្រប់គ្នា ដោយសារ​តែ​បន្ទប់​តូចចង្អៀត និង​ខ្វះ​អនាម័យ។ លោក​ស្នើឱ្យ​អាជ្ញាធរ​ពាក់ព័ន្ធ​មានវិធានការ​ទប់ស្កាត់​រឿងនេះ​ឱ្យបាន​ឆាប់ ដើម្បី​កុំឱ្យ​ជំងឺផ្ដាសាយធំ​ឆ្លងដល់​ជនជាប់ឃុំ​កាន់តែ​ច្រើន​បន្ថែម​ទៀត៖ «ដូច្នេះ​ខាង​នាយកដ្ឋាន​ពន្ធនាគារ លោក​គួរតែ​មាន​វិធានការ​ធ្វើម៉េច ដើម្បី​រំដោះ​អ្នក​ដែល​រស់នៅ​ចង្អៀត​ណែន​តាន់តាប់​ហ្នឹង ឱ្យ​អាច​មាន​លទ្ធភាព​បង្ក​ឱ្យ​មាន​ការរស់នៅ​ឱ្យ​បាន​ឆ្ងាយ​ដាច់ៗ​ពីគ្នា ជា​លក្ខណៈ​បច្ចេកទេស​រៀបចំ​ជាមួយ​ខាង​ក្រសួង​សុខាភិបាល​ឱ្យបាន​ត្រឹមត្រូវ។ យើងខ្ញុំ​ថា​កាល​ខ្ញុំ​ជាប់ឃុំ ជំងឺ​កមរមាស់​តិចតួច​ទេ គឺ ថា​ការឆ្លង​ពីគ្នា​ទៅវិញ​ទៅមក​ហ្នឹង​ពេញ​បន្ទប់​តែ​ម្ដង​ទម្រាំ​ជំងឺ​នេះ​ទៀត ដូច្នេះ​ជា​ការព្រួយបារម្ភ​ធំណាស់​រឿង​នេះ។»

នាយកដ្ឋាន​ប្រយុទ្ធ​នឹង​ជំងឺ​ឆ្លង​នៃ​ក្រសួង​សុខាភិបាល​ប្រកាស​កាល​ពី​ថ្ងៃ​ទី១៦ កញ្ញាថា ជំងឺ​ផ្ដាសាយធំ​កំពុង​ផ្ទុះ​ជា​ចង្កោម​នៅ​ក្នុង​ពន្ធនាគារ ក្នុង​ចំណោម​ព្រះសង្ឃ និង​ពលរដ្ឋ​តាម​ភូមិ​មួយ​ចំនួន នៅ​ក្នុង​ខេត្ត​តាកែវ ព្រះវិហារ កោះកុង បាត់ដំបង បន្ទាយមានជ័យ ហើយ​អាច​ឆ្លង​បន្ត​ដល់​ខេត្ត​ដទៃ​ទៀត។ រោគសញ្ញា​នៃ​ជំងឺ​ផ្តាសាយធំ​នេះ​រួមមាន៖ គ្រុនក្តៅ​លើស​ពី៣៨.៥ អង្សារសេ និង​មាន​ក្អក ឬ​ឈឺក ហើយ​ករណី​ខ្លះ​វិវត្តន៍​ទៅ​ជា​ហត់។

ប្រធាន​នាយកដ្ឋាន​ប្រយុទ្ធ​នឹង​ជំងឺ​ឆ្លង និង​ជា​អ្នកនាំពាក្យ​ក្រសួង​សុខាភិបាល​ប្រាប់​អាស៊ីសេរី​ថា ពិតមែន​តែ​កម្ពុជា​ពុំមាន​ការរាត្បាត​ជំងឺកូវីដ-១៩ នៅ​ក្នុង​សហគមន៍ ប៉ុន្តែ​កម្ពុជា​មាន​ការកើតឡើង​ជំងឺ​ផ្តាសាយធំ​កំពុង​រាលដាល​នៅ​ក្នុង​សហគមន៍ ដែល​ទាមទារ​​ឱ្យ​ប្រជាពលរដ្ឋ​ត្រូវ​ពាក់ម៉ាស​នៅពេល​ជួប​ប្រជុំ​គ្នា នៅ​តាម​ទីវត្តអារាម និង​កន្លែង​ជួប​ប្រជុំ​តាមទី​សាធារណៈ​ផ្សេងៗ៖ «ប្រទេស​យើង​ស្ថិត​នៅ​ក្នុង​តំបន់​ត្រូពិក ហើយ​ជា​ប្រទេស​ដែល​មាន​រដូវក្តៅ ហើយ​សើម។ តាម​ការសិក្សា​របស់​នាយកដ្ឋាន​ទប់ស្កាត់​ជំងឺ​ឆ្លង​រកឃើញ​ថា ប្រទេស​កម្ពុជា​យើង​នៅ​រៀងរាល់​រដូវភ្លៀង​តែងតែ​មាន ការកើនឡើង​នៃ​ជំងឺ​ផ្ដាសាយ​ដែល​បង្ក​ឡើង​ដោយ​មេរោគផ្ដាសាយ​ វីរុស​ឈ្មោះ អាំងប្លង់ហ្សា អា។ នៅក្នុង​អាំងប្លង់ហ្សា វា​មាន​អនុក្រម​ផ្សេងៗ​ទៀត​ច្រើន។ តែ​ឆ្នាំនេះ​យើង​ឃើញ​ថា មាន​ការកើតឡើង​ជា​ចង្កោម​នៃ​អាំងប្លង់ហ្សា អា ប្រភេទ ហាស៣ អ៊ីនពីរ កើត​ឡើង​ច្រើន​តាម​ចង្កោម តាម​បណ្តា​ខេត្ត​មួយ​ចំនួន»

អ្នកនាំពាក្យ​អគ្គនាយកដ្ឋាន​ពន្ធនាគារ​នៃ​ក្រសួង​មហាផ្ទៃ លោក នុត សាវនា ប្រាប់​ថា គិត​ត្រឹម​ថ្ងៃ​ទី១៧ កញ្ញា មាន​ពន្ធនាគារ​ចំនួន​៣កន្លែង​ហើយ ដែល​បាន​ឆ្លង​ជំងឺ​ផ្ដាសាយធំ រួមមាន​ពន្ធនាគារ​នៅ​ខេត្ត​កោះកុង កំពង់ចាម និង ខេត្ត​ព្រះវិហារ ក៏ប៉ុន្តែ​លោក​ថា មិនទាន់​បាន​បូកសរុប​តួលេខ​ជនជាប់ឃុំ​មាន​ប៉ុន្មាន​នាក់ ដែល​បាន​ឆ្លង​ជំងឺ​នេះ​នៅ​ឡើយទេ។ លោក​បន្ត​ថា បច្ចុប្បន្ន​មន្ត្រី​ពន្ធនាគារ​បាន​សហការ​ជាមួយ​មន្ត្រី​ក្រសួង​សុខាភិបាល​ដាក់​គ្រូពេទ្យ​នៅតាម​ពន្ធនាគារ​ទប់ស្កាត់​បញ្ហា​នេះ​រួចហើយ៖ «អនាម័យ​យើង​សម្អាត​ដូច​ករណី​ជំងឺ​កូវីដ-១៩ អីចឹង យើង​សម្អាត​បាញ់ថ្នាំ​ផង យើង​ប្រើសាប៊ូ​ផង ប្រើ​អាល់កុល​ផង ជាពិសេស​ដាក់​ថ្នាំ​ឱ្យ​គាត់​បាន​លេ​ទៅ វាឃើញ​បាន​ធូរស្រាល​មក​វិញ។ ហើយ​គាត់ហូបចុក​អី​បាន​គ្រប់គ្រាន់ និង​បាន​សម្រាក​អី​ឱ្យ​បាន​គ្រប់គ្រាន់​ទៅ​គាត់​មាន​ការធូរថយ​មក​វិញ។»

លោក នុត សាវនា ឱ្យ​ដឹង​ថា គិតត្រឹម​ថ្ងៃ​ទី១២ កញ្ញា មាន​ជនជាប់ឃុំ​ជិត៤ម៉ឺន​នាក់ (៣៩.៣០០) នៅក្នុង​ពន្ធនាគារ​ទូទាំង​ប្រទេស។

ក្រសួង​សុខាភិបាល​ឱ្យ​ដឹងថា ជំងឺ​ផ្ដាសាយធំ​នេះ គឺ​ត្រូវ​ព្យាបាល ដោយប្រើ​ថ្នាំ​បញ្ចុះ​កម្ដៅ ផឹកទឹក​​ឱ្យបាន​ច្រើន គេងឱ្យ​បាន​លក់​ស្កប់ស្កល់ កាត់​បន្ថយ​ការហាត់ប្រាណ ហូបអាហារ​សំបូរ​ជីវជាតិ​ជាពិសេស វីតាមីនសេ។

ទោះជា​យ៉ាងណា ការព្យាបាល​ខ្លះ​អាច​នឹង​ពិបាក​អនុវត្ត​បាន​សម្រាប់​អ្នកជាប់ឃុំ ដោយសារ​តែ​បន្ទប់​ឃុំឃាំង​ចង្អៀត​ណែន ខ្វះ​អនាម័យ ហើយ​អ្នកជាប់ឃុំ​ក្រីក្រ​ក៏​មិនមាន​លទ្ធភាព​ទទួល​បាន​អាហារ​សំបូរ​ជីវជាតិ​នោះ​ដែរ។ ដូច្នេះ​ទើប​អង្គការ​សង្គមស៊ីវិល​ជំរុញ​ឱ្យ​អាជ្ញាធរ​ពាក់ព័ន្ធ​រកដំណោះស្រាយ​រឿងនេះ​ឱ្យ​បាន​ឆាប់ ដើម្បី​កុំឱ្យ​ជំងឺ​ផ្តាសាយធំ​នេះ​កាន់​តែរីករាលដាល​ក្នុង​ពន្ធនាគារ ស្របពេល​នៅក្រៅ​ពន្ធនាគារ​វិញ ក្រសួង​សុខាភិបាល​នៅតែ​រកឃើញ​ករណី​ជំងឺ​រលាកសួតថ្មីកូវីដ-១៩ ជា​បន្ត​បន្ទាប់៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល