ក្រសួង​សុខាភិបាល​អំពាវនាវ​ឲ្យ​លើក​ស្ទួយ​ការ​បំបៅ​កូន​ដោយ​ទឹក​ដោះ​ម្តាយ ក្រោយ​ផ្ទុះ​ករណី​ម្សៅ​ទឹក​ដោះ​គោ​គ្មាន​គុណភាព

2020-09-25
អ៊ីម៉ែល
មតិ
Share
បោះពុម្ព
ស្ត្រី​ម្នាក់​រស់​នៅ​ក្នុង​រាជធានី​ភ្នំពេញ បំបៅ​ដោះ​កូន កាល​ពី​ថ្ងៃ​ទី​២៨ ខែ​មីនា ឆ្នាំ​២០១៧។ RFA
ស្ត្រី​ម្នាក់​រស់​នៅ​ក្នុង​រាជធានី​ភ្នំពេញ បំបៅ​ដោះ​កូន កាល​ពី​ថ្ងៃ​ទី​២៨ ខែ​មីនា ឆ្នាំ​២០១៧។ RFA
Photo: RFA

ក្រសួង​សុខាភិបាល​អំពាវនាវ​ដល់​អាណាព្យាបាល និង​ស្ថាប័ន​ពាក់ព័ន្ធ​ឲ្យ​លើក​កម្ពស់​ការ​បំបៅ​ដោះ​ទារក​ដោយ​ទឹក​ដោះ​ម្ដាយ។ ក្រសួង​អះអាង​ក្នុង​សេចក្ដី​ប្រកាស​ព័ត៌មាន​​កាល​ពី​ថ្ងៃ​ទី២៣ កញ្ញា​ថា គ្មាន​ផលិតផល​អ្វី ប្រសើរ​ជាង​ទឹក​ដោះ​ម្ដាយ ដែល​ជា​អាហារ​សម្រាប់​ទារក​ និង​កុមារ​នៅ​គ្រប់​កាលៈទេសៈ​ទាំង​អស់។ ក្រសួង​បញ្ជាក់​ថា​ ទឹកដោះ​ម្ដាយ​មាន​សារធាតុ​ចិញ្ចឹម​ជួយ​ដល់​ការ​លូតលាស់​រាងកាយ​របស់​កុមារ និង​ប្រឆាំង​ទៅ​នឹង​ជំងឺ​ផ្សេងៗ។

សេចក្ដី​អំពាវ​នាវ​របស់​ក្រសួង​សុខាភិបាល​​នេះ​ ធ្វើ​ឡើង​បន្ទាប់​ពី​ក្រសួង​ពាណិជ្ជកម្ម​ កាល​ពី​ពេល​ថ្មីៗនេះ បាន​រក​ឃើញ​ថា ​ម្សៅ​ទឹក​ដោះ​គោ ម៉ាក នូទ្រីលេត ចំនួន ៦លេខកូដ ខ្វះ​សារធាតុ​ចិញ្ចឹម និង​ជាតិ​ដែក ដែល​នាំ​ឲ្យ​ប៉ះពាល់​ដល់​សុខភាព​ទារក និង​កុមារ។

មជ្ឈមណ្ឌល​ជាតិ​គាំពារ​មាតា​និង​ទារក​ ថ្មីៗនេះ​ បាន​ប្រកាស​ថា កង្វះ​អាហារូបត្ថម្ភ ជា​ពិសេស ជាតិ​ដែក​ និង​ស័ង្កសី ​​ នឹង​ធ្វើ​ឲ្យ​រួប​រាង​កាយ​របស់​ទារក​និង​កុមារ​ ស្គមស្គាំង​ ក្រិន​ ធ្វើ​ឲ្យ​មាន​ជំងឺ​ញឹកញាប់​ សតិបញ្ញា​ស្មារតី​ចុះ​ខ្សោយ ​និង​ឈាន​ដល់​បាត់បង់​ជីវិត​ ក្នុង​ករណី​ធ្ងន់ធ្ងរ។

​​ ក្រសួង​សុខាភិបាល​ បញ្ជាក់​ថា​ ការ​បំបៅ​ទឹក​ដោះ​ម្ដាយ​តែ​មួយ​មុខ​គត់​ចំពោះ​ទារក​ដែល​មាន​អាយុ ៦ខែ​ដំបូង គឺ​ជួយ​ទប់​ស្កាត់​មរណភាព​ទារក​បាន ២០%​ ហើយ​អាច​ជួយ​កាត់​បន្ថយ​ជំងឺ​រាករូស​ចំពោះ​ទារ​ក​ដល់​ទៅ ១១ដង​ និង​ជំងឺ​រលាក​សួត​បាន​ដល់​ទៅ ១៥ដង​ បើ​ប្រៀបធៀប​ទៅ​នឹង​កុមារ​ដែល​មិន​បាន​បំបៅ​ដោយ​ទឹក​ដោះ​ម្ដាយ។ ក្រសួង​សុខាភិបាល​ក៏​អំពាវ​នាវ​ដល់​ភាគី​ពាក់ព័ន្ធ​ ពង្រឹង​ឲ្យ​បាន​ម៉ត់​ចត់ ចំពោះ​វិធាន​ការ​ទាំងឡាយ​អំពី​ការ​ផ្សព្វផ្សាយ​ផលិតផល​សម្រាប់​ទារក​និង​កុមារ​ផង​ដែរ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

 

ព័ត៌មាន (0)
Share
គេហទំព័រ​ទាំងមូល