លោក​ ហ៊ុន សែន​ ថា​ស្ត្រី​ជនជាតិ​ចិន​ពីរ​នាក់​ដែល​បំពាន​ចត្តាឡីស័ក​នឹង​ត្រូវ​ផាក​ពិន័យ​រដ្ឋបាល

ដោយ ហេង រស្មី
2021-03-05
Share
លោក​ ហ៊ុន សែន​ ថា​ស្ត្រី​ជនជាតិ​ចិន​ពីរ​នាក់​ដែល​បំពាន​ចត្តាឡីស័ក​នឹង​ត្រូវ​ផាក​ពិន័យ​រដ្ឋបាល លោកនាយករដ្ឋមន្ត្រី ហ៊ុន សែន កាល​ពី​ថ្ងៃ​ទី​ ១០​ កុម្ភៈថ្លែងនៅក្នុងពិធីសន្និសីទសារព័ត៌មាន ក្រោយចាក់វ៉ាក់សាំងកូវីដ-១៩។
រូប៖ គេហទំព័រលោក​ ហ៊ុន សែន

លោក​នាយករដ្ឋមន្ត្រី​ ហ៊ុន សែន​ ​ថា​ ស្ត្រី​ជនជាតិ​ចិន​ពីរ​នាក់​ ដែល​បាន​រត់​ចេញ​ពី​​មណ្ឌល​ធ្វើ​ចត្តាឡីស័ក​ នៅ​ក្នុង​សណ្ឋាគារ​សុខា​ ក្រុង​ភ្នំពេញ ​ដោយ​មាន​ការ​សហការ​ជាមួយ​​សន្តិសុខ​ នឹង​ត្រូវ​ផាក​ពិន័យ​រដ្ឋបាល ចំណែក​ឯ​​សន្តិសុខ​ម្នាក់​ ដែលឲ្យស្រ្តីទាំងនោះ រត់ចេញពី​កន្លែង​ធ្វើ​​ចត្តាឡីស័ក​ ត្រូវបាន​​កងរាជអាវុធ​ហត្ថ​បញ្ជូន​ទៅឃុំ​ខ្លួន ​នៅ​អគ្គស្នង​ការដ្ឋាន​នគរ​បាល​ជាតិ​។

លោក​ ហ៊ុន សែន​ បាន​និយាយ​តាម​រយៈ​សារ​សំឡេង​ដែល​បាន​ចែក​ចាយ​តាម​បណ្ដាញ​សង្គម​ថា​ ដោយ​សារ​តែ​កម្ពុជា​មិន​ទាន់​មាន​ច្បាប់​ ដើម្បី​ដាក់​ទោស​អ្នក​ដែល​បានរត់​ចេញ​ពី​កន្លែង​ធ្វើ​ចត្តាឡីស័ក​ ដូច្នេះ​មាន​តែ​ពិន័យ​រដ្ឋបាល​ប៉ុណ្ណោះ​ ​ចំពោះ​ស្ត្រី​ជនជាតិ​ចិន​ទាំង​ពីរ​នាក់​នោះ​៖ ​«ការ​បំពាន​ការ​ធ្វើ​ចត្តាឡីស័ក​ នៅ​ក្នុង​សណ្ឋាគារ​សុខា​ ដោយ​ស្ត្រី​ជនជាតិ​ចិន​ ២នាក់​ ស៊ុមគ្រលុំ​ ជា​មួយ​នឹង​សន្តិសុខ​ សណ្ឋាគារ​បញ្ចេញ។​ តើ​ត្រូវ​ដាក់​ទោស​គេ​យ៉ាង​ម៉េច? យើង​អត់​ទាន់​មាន​ច្បាប់។ ដូច្នេះ​យើង​ត្រូវ​ធ្វើ​ច្បាប់​​ អ្នក​បំពាន​​ អ្នក​សមគំនិត​ទទួល​ផាក​ពិន័យ​ប៉ុណ្ណា​ ហើយ​ក្រៅ​ពី​ការ​ផាក​ពិន័យ​ តើ​អាច​មាន​ទោស​ផ្សេង​ទៀត​ទេ អាច​ត្រូវ​ជាប់​គុក​ទេ។ អនុក្រឹត្យ​មិន​អាច​ឱ្យ​គេ​ជាប់​គុក​បាន​ទេ»។​​​​

ជនជាតិ​ចិន​ពីរ​នាក់​ ដែល​បាន​រត់​គេច​ខ្លួន​ចេញ​ពី​សណ្ឋាគារ​សុខា​ក្រុង​ភ្នំពេញ​កាល​ពី​ថ្ងៃ​ទី​៤​ មីនា​ មក​ដល់​ពេល​នេះ​មិន​ទាន់​ដឹង​ថា​ បាន​គេច​ខ្លួន​ទៅ​ដល់​ទីណា​នៅ​ឡើយ​ទេ។​​

​ទាក់​ទិន​នឹង​បញ្ហា​កូវីដ​នេះ​ដែរ​ រដ្ឋបាល​ខេត្ត​ព្រះសីហនុ​ នៅ​ថ្ងៃ​ទី​៥​ មីនា​ នេះ​បាន​ផាក​ពិន័យ​ ចំនួន​ ២លាន​រៀល​ គឺ​ប្រមាណ​ ៥​០០​ដុល្លារ​ លើ​មនុស្ស​ម្នាក់​ ដែល​បាន​បំពាន​ការ​ធ្វើ​ចត្តាឡីស័ក។​

រដ្ឋបាល​ខេត្ត​ព្រះសីហនុ​ឱ្យ​ដឹង​ថា​ បុរស​ម្នាក់​នោះ​ជា​បុគ្គលិក​សណ្ឋាគារ​មួយ​កន្លែង​នៅ​ក្នុង​ខេត្ត​ព្រះ​សីហនុ​ ត្រូវ​ចាប់​ខ្លួន​មក​ទទួល​ពិន័យ​រដ្ឋបាល​ ក្រោយ​ពី​បាន​ចាកចេញ​ពី​កន្លែង​ចត្តាឡីស័ក​ ហើយ​ធ្វើ​ដំណើរ​ជា​ច្រើន​កន្លែង​នៅ​ក្នុង​ខេត្ត​ព្រះ​សីហនុ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។



ព័ត៌មាន (0)

មើល​មតិ​ទាំង​អស់.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល