កម្ពុជា​រក​ឃើញ​អ្នក​ឆ្លង​ជំងឺ​កូវីដ-១៩ ២​ករណី​ថ្មី​ទៀត​លើ​បុរស​ខ្មែរ​ទើប​មក​ពី​ឥណ្ឌូណេស៊ី

ដោយ អាស៊ីសេរី
2020-06-14
អ៊ីម៉ែល
មតិ
Share
បោះពុម្ព
មេរោគ​​វីរុស កូរ៉ូណា (Corona virus)
មេរោគ​​វីរុស កូរ៉ូណា (Corona virus)
courtesy

ក្រសួងសុខាភិបាល នៅ​ថ្ងៃ​ទី​១៤ មិថុនា ប្រកាស​រក​ឃើញ​ករណី​ឆ្លង​វីរុស​កូវីដ-១៩​ថ្មី ពីរ​ករណី​ទៀត កើត​លើ​បុរស​ជនជាតិ​ខ្មែរ មាន​ស្រុកកំណើត​នៅ​ខេត្ត​កំពង់ចាម។

បុរស​ជនជាតិ​ខ្មែរ​ទាំ​ង​ពីរ មាន​ម្នាក់​អាយុ ២៩​ឆ្នាំ និង​ម្នាក់ទៀត​អាយុ ២២​ឆ្នាំ ដែល​បាន​ធ្វើ​ដំណើរ​វិល​ត្រលប់​មក​ពី​ប្រទេស​ឥណ្ឌូណេស៊ី​មកដល់​កម្ពុជា កាលពី​ថ្ងៃ​ទី​១២ ខែ​ឧសភា និង​ត្រូវ​បាន​ក្រុម​គ្រូពេទ្យ​យក​សំណាក​ទៅ​វិភាគ ហើយ​ទទួល​បាន​លទ្ធផល​វិជ្ជមាន​វីរុស​កូវីដ-១៩ នៅ​ថ្ងៃ​ទី​១៣ ខែ​មិថុនា​។ បច្ចុប្បន្ន​បុរស​ទាំងពីរ ត្រូវ​បាន​ដាក់​ឱ្យ​សម្រាក​ព្យាបាល​នៅ​មន្ទីរពេទ្យ​មិត្តភាព​ខ្មែរ​-​សូ​វៀត​រួច​ហើយ។

អ្នកនាំពាក្យ​ក្រសួងសុខាភិបាល លោកស្រី ឱ វណ្ណឌីន លើកឡើង​ក្នុង​សេចក្ដី​ប្រកាស​ព័ត៌មាន​ថា អ្នកដំណើរ​ដែល​បាន​ជិះ​យន្តហោះ ជាមួយ​បុរស​ទាំងពីរ​នេះ សរុប​ចំនួន ៤៦​នាក់ ក្នុង​នោះ​មាន​ជនជាតិ​ខ្មែរ ៤២​នាក់ និង​ជនជាតិ​ឥណ្ឌូណេស៊ី ៤​នាក់​។ អ្នកដំណើរ​ទាំង​៤៤​នាក់ មាន​លទ្ធផល​តេស្ត​អវិជ្ជមាន​ជំងឺ​កូ​វីដ​-១៩ ហើយ​ត្រូវ​បាន​ក្រសួង​ដាក់​ឲ្យ​ធ្វើ​ចត្តាឡឺស័ក​ចំនួន​១៤​ថ្ងៃ ដើម្បី​តាមដាន​សុខភាព​របស់​ពួកគេ​បន្ត​ទៀត​។ ទោះជា​យ៉ាងណា នៅ​ក្នុង​លិខិត​របស់​ក្រសួងសុខាភិបាល​មិនបាន​បញ្ជាក់​ថា អ្នកដំណើរ​ដែល​មកពី​ប្រទេស​ឥណ្ឌូណេស៊ី​នោះ ជា​និស្សិត ឬ​ជា​ពលករ​នោះ​ទេ។

ក្រសួង​សុខាភិបាល បាន​រក​ឃើញ​ករណី​ឆ្លង​កូវីដ-១៩ ដែល​ជា​ករណី​នាំចូល ជា​បន្តបន្ទាប់ ដែល​ធ្វើ​ឱ្យ​កម្ពុ​ជា​មាន​ការពិបាក​ប៉ាន់ស្មាន​ការ​ចម្លង​ជំងឺ​កូវីដ-១៩​នេះ​។​

គិត​ត្រឹម​ថ្ងៃ​ទី១៤ ខែ​មិថុនា ចំនួន​អ្នក​ផ្ទុក​ជំងឺ​កូវីដ​-១៩ សរុប​ទូទាំង​ប្រទេស​កើន​ដល់​ចំនួន ១២៨​នាក់ ក្នុង​នោះ​អ្នកជា​សះស្បើយ ១២៥​នាក់ និង​អ្នក​កំពុង​សម្រាក​ព្យាបាល​នៅ​ក្នុង​មន្ទីរពេទ្យ​មាន​ចំនួន ៣​នាក់៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល