អ្នកស្លាប់ដោយសារជំងឺកូវីដ-១៩ បានកើនឡើងដល់ ៤៩៣នាក់ហើយ បន្ទាប់ពីអ្នកជំងឺ ១៨នាក់ទៀតបានស្លាប់។
ចំណែកករណីឆ្លងថ្មីវិញ មាន ៦៥៥នាក់បន្ថែមទៀត ក្នុងនោះ ៧២នាក់ ជាករណីនាំចូលពីក្រៅប្រទេស ហើយក្រៅពីនេះជាករណីឆ្លងក្នុងសហគមន៍។ រីឯករណីជាសះស្បើយវិញ មាន ៦៩៦នាក់ នៅថ្ងៃដដែលនេះ។
គិតត្រឹមព្រឹកថ្ងៃទី២៤ មិថុនា កម្ពុជាមានអ្នកកើតជំងឺកូវីដ-១៩ ជាង ៤ម៉ឺន ៥ពាន់នាក់(៤៥.៣៦៦)ក្នុងនោះ អ្នកជាសះស្បើយមានប្រមាណ ៤ម៉ឺននាក់ (៤០.០១០)។
ទាក់ទងរឿងវ៉ាក់សាំងបង្ការជំងឺកូវីដ-១៩ វិញ គិតត្រឹមថ្ងៃទី២៣ មិថុនា រដ្ឋាភិបាលចាក់វ៉ាក់សាំងជូនពលរដ្ឋបានជាង ៣លាន ៦សែននាក់ ឬស្មើនឹងជាង ៣៦% ហើយ ក្នុងចំណោមប្រជាជនដែលត្រូវចាក់វ៉ាក់សាំងចំនួន ១០លាននាក់។
ទោះជាយ៉ាងនេះក្តី ក្នុងរយៈពេលជាងមួយសប្តាហ៍ចុងក្រោយនេះ តួលេខអ្នកឆ្លងថ្មី និងអ្នកស្លាប់បានហក់ឡើងខ្ពស់។ អ្នកឆ្លងថ្មីមានចន្លោះពីជិត ៥រយនាក់ រហូតដល់ជិត៨រយនាក់ក្នុងមួយថ្ងៃខណៈអ្នកស្លាប់វិញ មានតិចបំផុត១០នាក់ហើយថ្ងៃខ្លះឈានដល់ ២០នាក់ផងក៏មាន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។