ក្រសួង​សុខាភិបាល​រក​ឃើញ​ជនជាតិ​បារាំង​ម្នាក់​កើត​ជំងឺ​កូវីដ​១៩

ដោយ ហេង រស្មី
2020-10-10
អ៊ីម៉ែល
មតិ
Share
បោះពុម្ព
មេរោគ​​វីរុស កូរ៉ូណា (Corona virus)
មេរោគ​​វីរុស កូរ៉ូណា (Corona virus)
courtesy

ក្រសួង​សុខាភិបាល​បាន​រក​ឃើញ​ស្ត្រី​ជនជាតិ​បារាំង​ម្នាក់​អាយុ​៣៣​ឆ្នាំ​ មាន​វិជ្ជមាន​ជំងឺ​កូវីដ​១៩​ បន្ទាប់​ពី​បាន​ស្នាក់​នៅ​ក្នុង​សណ្ឋាគារ​មួយ​នៅ​ក្នុង​ខេត្ត​ព្រះសីហនុ។​

ស្ត្រី​ជនជាតិ​បារាំង​រូប​នេះ​ បាន​ធ្វើ​ដំណើរ​មក​ដល់​ប្រទេស​កម្ពុជា​ពី​ប្រទេស​បារាំង​ កាល​ពី​ថ្ងៃទី​៨ ខែ​តុលា​ ដោយ​បន្ត​ជើង​ហោះ​ហើរ​ ពី​ប្រទេស​កូរ៉េ​ខាង​ត្បូង​។​

លទ្ធផល​ធ្វើ​វត្ថុ​សំណាក​របស់​អ្នក​ស្រី​ ​បាន​រក​ឃើញ​ថា​ មាន​ជំងឺ​កូវីដ​១៩​ ដែល​បាន​ផ្តល់​ដោយ​វិទ្យាស្ថាន​ប៉ាស្ទ័រ​កម្ពុជា ហើយ​បច្ចុប្បន្ន​អ្នក​ជំងឺ​កំពុង​សម្រាក​ព្យាបាល​នៅ​មន្ទីរ​ពេទ្យ​មិត្តភាព​ខ្មែរ-សូវៀត។

អ្នក​ដំណើរ​ដែល​បាន​ធ្វើ​ដំណើរ​ជាមួយ​អ្នក​ជំងឺ​សរុប​មាន​ចំនួន​ ៥៩នាក់​ ក្នុង​នោះ​មាន​ស្រ្តី​ ១៨​ នាក់​។​ ចំណែក​អ្នក​ដំណើរ​ ផ្សេង​ទៀត​ដែល​ធ្វើតេស្ត​មិន​មាន​វិជ្ជមាន​ជំងឺ​កូវីដ​១៩​ ត្រូវ​ក្រសួង​សុខាភិបាល​ដាក់​ឲ្យ​ធ្វើ​ចត្តាឡឺស័ក ចំនួន​ ១៤ថ្ងៃ​នៅ​វិទ្យា​ល័យ​បូរី​ ១០០​ខ្នង​​ ចំនួន​៦​ នាក់​ ក្រៅ​ពី​នោះ​ស្នាក់​នៅ​ក្នុង​សណ្ឋាគារ​ក្នុង​ទី​ក្រុង​ភ្នំពេញ។​​​

​គិត​ត្រឹម​ថ្ងៃទី​១០​ តុលា​ កម្ពុជា​មាន​អ្នក​ជាសះស្បើយ​ពី​ជំងឺ​កូវីដ​១៩​ សរុប​មាន​ចំនួន​ ២៧៧​នាក់​ គឺ​ស្មើ​ជិត​ ៩៨%​(៩៧,៨៨%)​ បើ​ធៀប​អ្នក​កើត​ជំងឺ​កូវីដ​១៩​ នៅ​ទូទាំង​ប្រទេស​។​ក្នុង​ចំណោម​អ្នក​ជំងឺ​ដែល​បាន​ជា​សះស្បើយ​មាន​ស្ត្រី​ ៥៧​នាក់​ និង​បុរស​ ២២៦​នាក់។​

មក​ដល់​ពេល​នេះ​កម្ពុជា​ដែល​មាន​ប្រព័ន្ធ​សុខាភិបាល​នៅ​ទន់​ខ្សោយ​មិន​ទាន់​មាន​របាយការណ៍​ណា​មួយ​ មក​អះអាង​ថា​ មាន​អ្នក​ជំងឺ​ណា​ម្នាក់​ស្លាប់​ដោយ​សារ​ជំងឺ​កូ​វីដ​១៩​ នៅ​ឡើយ​ទេ​ ខណៈ​នៅ​ទូទាំង​ពិភព​លោក​ មាន​អ្នក​ជំងឺ​ស្លាប់​ ចំនួន​ជាង ​១​លាន​នាក់​ និង​អ្នក​ឆ្លង​ មាន​ចំនួន​ជាង ​៣៧​លាន​នាក់៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល