តុលាការ​បើក​សវនាការ​សំណុំ​រឿង​សកម្មជន​អាដហុក​ខេត្ត​កំពង់ឆ្នាំង

តុលាការ​ខេត្ត​កំពង់ឆ្នាំង នៅ​ព្រឹក​ថ្ងៃ​ទី​១៨ ខែ​មករា​នេះ បាន​បើក​សវនាការ​ដើម្បី​ជម្រះ​រឿង​ក្តី​តាម​បណ្ដឹង​របស់​ក្រុមហ៊ុន​ខេ.ឌី.ស៊ី. អន្តរជាតិ (KDC International) ដែល​បាន​ចោទ​ប្រកាន់​សកម្មជន​ការពារ​សិទ្ធិ​មនុស្ស​អាដហុក ប្រចាំ​ខេត្ត​នេះ ពី​បទ​បរិហារ​កេរ្តិ៍​ក្រុមហ៊ុន​ក្នុង​បញ្ហា​ជម្លោះ​ដីធ្លី​នៅ​ភូមិ​ឡពាង ឃុំ​តាជេស ស្រុក​កំពង់ត្រឡាច ខេត្ត​កំពង់ឆ្នាំង។
ដោយ មណ្ឌលកែវ
2011.01.19
Share on WhatsApp
Share on WhatsApp

មន្ត្រី​សម្រប​សម្រួល​សមាគម​អាដហុក (ADHOC) ការពារ​សិទ្ធិ​មនុស្ស​ខេត្ត​កំពង់ឆ្នាំង លោក សំ ច័ន្ទគា បាន​មាន​ប្រសាសន៍​ប្រាប់​វិទ្យុ​អាស៊ីសេរី នៅ​រសៀល​ថ្ងៃ​ទី​១៨ ខែ​មករា បន្ទាប់​ចេញ​ពី​អង្គ​សវនាការ​ថា ដំណើរ​នៃ​អង្គ​សវនាការ​បាន​បង្ហាញ​ថា ភាគី​ក្រុមហ៊ុន​ពុំ​មាន​អង្គហេតុ និង​ភស្តុតាង​គ្រប់គ្រាន់​យក​មក​ចោទ​ប្រកាន់​លោក​នោះ​ទេ ដូច្នេះ​លោក​មាន​ជំនឿ​ថា ចៅក្រម​កាត់​ក្តី​នឹង​ប្រើ​ឆន្ទានុសិទ្ធិ​របស់​ខ្លួន ដើម្បី​ផ្តល់​យុត្តិធម៌​ចំពោះ​រូប​លោក​ជា​មិន​ខាន។

លោក សំ ច័ន្ទគា មាន​ប្រសាសន៍​បន្ថែម ៖ «ភាគី​ដើម​ចោទ​ដែល​ប្តឹង​ខ្ញុំ​ពី​បទ​បរិហារ​កេរ្តិ៍​នេះ ក្នុង​អង្គ​សវនាការ​មិន​មាន​ភស្តុតាង​ណា​បង្ហាញ​តាម​អង្គហេតុ​ដែល​ខ្លួន​បាន​និយាយ​ក្នុង​ពាក្យ​បណ្ដឹង​នោះ​ទេ។ ខ្ញុំ​បាន​ផ្ដល់​ភស្តុតាង​ជា​ច្រើន​ដល់​លោក​ចៅក្រម ដើម្បី​ជា​មូលដ្ឋាន​ក្នុង​ការ​ពិចារណា​ក្នុង​រឿង​ក្តី​នេះ»

មិន​អាច​ទាក់ទង​សុំ​ការ​ពន្យល់​ពី​លោក ផាត់ ពៅសៀង មេធាវី​ការពារ​ក្តី​ឲ្យ​ភាគី​ក្រុមហ៊ុន ខេ.ឌី.ស៊ី. អន្តរជាតិ​បាន​ទេ នៅ​ល្ងាច​ថ្ងៃ​ទី​១៨ ខែ​មករា​នេះ ដោយ​លោក​ឆ្លើយ​ថា លោក​ជាប់​រវល់​ប្រជុំ។

គួរ​បញ្ជាក់​ថា ជម្លោះ​ដីធ្លី​រវាង​ប្រជាពលរដ្ឋ​ភូមិ​ឡពាង ជាមួយ​ក្រុមហ៊ុន ខេ.ឌី.ស៊ី. អន្តរជាតិ បាន​អូស​បន្លាយ​អស់​រយៈ​ពេល​ជាង ១០​ឆ្នាំ​មក​ហើយ។ ជម្លោះ​នេះ​បាន​បណ្តាល​ឲ្យ​ប្រជាពលរដ្ឋ​ខ្លះ​រត់​ចោល​ស្រុក​ដោយ​ការ​ភ័យ​ខ្លាច និង​ខ្លះ​ទៀត​ត្រូវ​ជាប់​ពន្ធនាគារ តែ​អ្នក​ភូមិ​នៅ​តែ​ក្រាញននៀល​ធ្វើការ​តវ៉ា​មិន​ព្រម​ឈប់។
ចំណែក​លោក សំ ច័ន្ទគា មន្ត្រី​សម្រប​សម្រួល​សមាគម​អាដហុក ការពារ​សិទ្ធិ​មនុស្ស ខេត្ត​កំពង់ឆ្នាំង ក៏​បាន​រង​ការ​ចោទ​ប្រកាន់​ពី​បទ​បរិហារ​កេរ្តិ៍​ក្រុមហ៊ុន ដោយសារ​តែ​លោក​បាន​បញ្ចេញ​មតិ​ដល់​ជុំវិញ​ករណី​ជម្លោះ​ដីធ្លី​នេះ។

លោក នី ចរិយា មន្ត្រី​ស៊ើប​អង្កេត​ជាន់​ខ្ពស់​សមាគម​អាដហុក ការពារ​សិទ្ធិ​មនុស្ស មាន​ប្រសាសន៍​ថា យោង​តាម​មាត្រា ៣០៥ និង ៣០៩ នៃ​ក្រមព្រហ្មទណ្ឌ ដើម​បណ្ដឹង​ពី​បទ​បរិហារ​កេរ្តិ៍​លុះ​ត្រា​អ្នក​នោះ​ជា​អ្នក​រង​ដោយ​ផ្ទាល់ មិន​អាច​ឲ្យ​អ្នក​ផ្សេង​ប្ដឹង​ជំនួស​បាន​ឡើយ។

លោក​បន្ត​ថា លោក ថៃ ហ៊ី មិន​មែន​ជា​អ្នក​រង​ការ​បរិហារ​កេរ្តិ៍​នោះ​ទេ ដូច្នេះ​លោក ថៃ ហី មិន​អាច​ឈរ​ធ្វើ​ជា​ដើម​បណ្តឹង​ក្នុង​រឿង​ព្រហ្មទណ្ឌ​នេះ​បាន​ឡើយ ៖ «អ្វី​ដែល​មេធាវី និង​សាក្សី​បាន​បង្ហាញ​នូវ​ភស្តុតាង​ក្នុង​ការ​ចោទ​ប្រកាន់​លោក សំ ច័ន្ទគា បើ​យើង​មាន​ការ​ជំនំ​ជម្រះ​បាន​ត្រឹមត្រូវ យើង​ធ្វើការ​សម្រេច​សេចក្តី​ឲ្យ​បាន​ត្រឹមត្រូវ​តាម​ច្បាប់ និង​តាម​ទឡ្ហីករណ៍​ដែល​យើង​មាន​នោះ យើង​ឃើញ​ថា លោក សំ ច័ន្ទគា ពុំ​មាន​ពាក់ព័ន្ធ​ពី​បទ​បរិហារ​កេរ្តិ៍​នោះ​ទេ»

គួរ​បញ្ជាក់​ថា កាល​ពី​ថ្ងៃ​ទី​១០ ខែ​មករា ប្រជាពលរដ្ឋ​នៅ​ភូមិ​ឡពាង ២​រូប គឺ​លោក ផេង រុំ និង​លោក រាជ សីមា ត្រូវ​បាន​តុលាការ​ខេត្ត​កំពង់ឆ្នាំង បាន​បើក​សវនាការ​ជម្រះ​ក្តី​ក្នុង​រឿង​ជម្លោះ​ដីធ្លី​ជាមួយ​ក្រុមហ៊ុន ខេ.ឌី.ស៊ី. អន្តរជាតិ​នេះ​ដែរ។ សាលក្រម​កាល​ពី​ថ្ងៃ​ទី​១៧ ខែ​មករា សម្រេច​លើកលែង​ការ​ចោទ​ប្រកាន់​លោក ផេង រុំ និង​ផ្តន្ទា​ទោស​លោក រាជ សីមា ដោយ​ពិន័យ ២​លាន​រៀល និង​បង់​ប្រាក់​ជំងឺ​ចិត្ត ៨​លាន​រៀល ទៅ​ឲ្យ​ភាគី​ក្រុមហ៊ុន។ ចំពោះ​ករណី​លោក សំ ច័ន្ទគា សាលក្រម​សម្រេច​នឹង​ប្រកាស​នៅ​ថ្ងៃ​ទី​២៥ ខែ​មករា ខាង​មុខ​នេះ៕

រឿង​ដែល​គេ​អាន​​ច្រើន​បំផុត
RFA
ធនាគារ​ABA មិន​ព្រម​បើកប្រាក់​ជាង​១​ម៉ឺន ៥​ពាន់​ដុល្លារ ដែល​ឧបត្ថម្ភ​ដល់​បុគ្គលិក​ណាហ្គាវើលដ៍
រឿង​ដែល​គេ​អាន​​ច្រើន​បំផុត
ព័ត៌មាន​ថ្មីៗ
លោក ហ៊ុន សែន បន្ត​ប្រកាស​ថា ​​​នឹង​ការពារ​មិន​ឱ្យ​មាន​​​រដ្ឋប្រហារ​ ដើម្បី​​​អភិវឌ្ឍប្រទេស​ឱ្យ​រីក​ចំរើន
បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។