អង្គការលើកលែងទោសអន្តរជាតិ Amnesty International អំពាវនាវឱ្យអាជ្ញាធរម៉ាឡេស៊ីដោះលែងសកម្មជនគណបក្សសង្គ្រោះជាតិ ពីរ (២) នាក់ ដែលអាជ្ញាធរម៉ាឡេស៊ីបានឃាត់ខ្លួន កាលពីយប់ថ្ងៃចន្ទទី០៤ ខែវិច្ឆិកាកន្លងទៅ។
នាយកប្រតិបត្តិប្រចាំប្រទេសម៉ាឡេស៊ីរបស់អង្គការលើកលែងទោសអន្តរជាតិ (Amnesty International) អ្នកស្រី សាមីនី ដាសនី កាលីម៊ូសូ (Shamini Darshni Kaliemuthu) ថ្លែងក្នុងសេចក្តីប្រកាសព័ត៌មានផ្សាយនៅថ្ងៃ៦ វិច្ឆិកា ថា «យើងអំពាវនាវឱ្យអាជ្ញាធរម៉ាឡេស៊ី ដោះលែង សកម្មជនគណបក្សប្រឆាំងទាំងពីររូបនេះជាបន្ទាន់ ហើយត្រូវធានាថា ពួកគេនឹងមិនត្រូវបានបញ្ជូនត្រលប់ទៅកម្ពុជាវិញឡើយ ដោយសារតែអាជ្ញាធរកម្ពុជា អាចចាប់ និងឃុំខ្លួនពួកគេតាមទំនើងចិត្ត។ » អ្នកស្រីបន្តថា « វាជារឿងគួរឱ្យបារម្ភបំផុត ដែលរដ្ឋាភិបាលម៉ាឡេស៊ីបានឃុំខ្លួនបុគ្គលទាំងពីររូបនេះ»។
នាយកប្រតិបត្តិប្រចាំប្រទេសម៉ាឡេស៊ីរបស់អង្គការលើកលែងទោសអន្តរជាតិរូបនេះ សង្កត់ធ្ងន់ៗថា ការបញ្ជូនពួកគេត្រលប់ទៅកម្ពុជាវិញ នឹងក្លាយជាការរំលោភគោលការណ៍ច្បាប់អន្តរជាតិ ដែលហាមប្រាមប្រទេសទទួលយកអ្នកសុំសិទ្ធិជ្រកកោននយោបាយ មិនឱ្យបញ្ជូនជនទាំងនោះត្រលប់ទៅប្រទេសដើមវិញ»។
អ្នកស្រីបន្តថា បន្ថែមពីលើកាតព្វកិច្ចដែលរដ្ឋាភិបាលម៉ាឡេស៊ីត្រូវធានាថា សកម្មជនទាំងនេះ ត្រូវបានការពារ អាជ្ញាធរកម្ពុជាក៏ត្រូវតែបញ្ឈប់អំពើបង្ក្រាបយ៉ាងចាស់ដៃមកលើបុគ្គលដែលពាក់ព័ន្ធ និងសកម្មជនគណបក្សសង្គ្រោះជាតិដទៃទៀតនៅក្នុងប្រទេស។
កាលពីយប់ថ្ងៃចន្ទទី០៤ វិចិ្ឆកា អាជ្ញាធរម៉ាឡេស៊ីបានឃាត់ខ្លួនសកម្មជនគណបក្សសង្គ្រោះជាតិពីររូប ក្នុងនោះមានម្នាក់ជាអ្នកសុំសិទ្ធិជ្រកកោននយោបាយ ខណៈពួកគេត្រៀមជិះយន្តហោះពីប្រទេសម៉ាឡេស៊ី ទៅកាន់ប្រទេសថៃ ហើយគ្រោងបញ្ជូនពួកគេមកកម្ពុជាវិញនៅរសៀលថ្ងៃអង្គារទី៥ វិច្ឆិកា ដោយមិនបានបញ្ជាក់ពីហេតុផលពិតប្រាកដនៅពីក្រោយចំណាត់ការនេះឡើយ។ ក៏ប៉ុន្តែ ក្រោយមក អាជ្ញាធរម៉ាឡេស៊ីបានសម្រេចមិនបញ្ជូនពួកគេមកកម្ពុជាវិញ ដោយសារតែមានការតវ៉ាជំទាស់ពីគណៈកម្មការសិទ្ធិមនុស្សម៉ាឡេស៊ី។
គិតត្រឹមម៉ោងផ្សាយនេះ អាស៊ីសេរីនៅមិនទាន់មានប្រភពដើម្បីបញ្ជាក់ពីស្ថានភាពចុងក្រោយរបស់សកម្មជនបក្សប្រឆាំងទាំងពីររូបនេះនៅឡើយទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។