មេធាវី ជូង ជូងី បង្ខំ​ចិត្ត​រឹតត្បិត​សេរីភាព​ខ្លួន​ឯង ព្រោះតែ​ចង់​បន្ត​ការពារក្ដី​ អោយ​សកម្មជន​យោបាយ និង​សង្គម

ដោយ សុ​ ជីវី
2020-10-07
អ៊ីម៉ែល
មតិ
Share
បោះពុម្ព
មេធាវី​ការពារ​ក្ដី​ឲ្យ​លោក គឹម សុខ គឺ​លោក ជូង ជូងី ថ្លែងក្រោយ​ពី​សាលាឧទ្ធរណ៍​ចេញ​សាលដីកា​បដិសេធ នៅ​ថ្ងៃ​ទី២២ ខែ​មីនា ឆ្នាំ​២០១៧។
មេធាវី​ការពារ​ក្ដី​ឲ្យ​លោក គឹម សុខ គឺ​លោក ជូង ជូងី ថ្លែងក្រោយ​ពី​សាលាឧទ្ធរណ៍​ចេញ​សាលដីកា​បដិសេធ នៅ​ថ្ងៃ​ទី២២ ខែ​មីនា ឆ្នាំ​២០១៧។
Photo: RFA

លោក ជូង ជូងី មេធាវី ដែល​កម្រ​ឈ្នះក្ដី​ពេល​ការពារក្ដី​ឱ្យ​​អ្នកនយោបាយ និង​សកម្មជន​សង្គម បញ្ជាក់​ថា នៅពេល​ស្ថានភាព​នយោបាយ កាន់តែ​តានតឹង លោក ក៏ត្រូវ​បង្ខំចិត្ត​រឹតត្បិត​សិទ្ធិសេរីភាព​ខ្លួនឯង ​ព្រោះ​តែ​ចង់​បន្ត​ការងារ​ការពារ​ក្ដីឱ្យ​​អ្នកទាំងនោះ​បន្តទៀត ព្រោះ​សំណុំរឿង​បែបនេះ​មាន​មេធាវី​តិចណាស់​ហ៊ាន​ការពារ​ពួកគេ។

លោក ជូង ជូងី ថា​ ការរឹតត្បិត​សេរីភាព​ខ្លួន​ឯង​របស់​លោក មិនមែន​ដោយសារ​តែ លោក​បាត់បង់​ភាពក្លាហាន ឬ​ភ័យខ្លាច​ចំពោះ​ការធ្វើ​ទុក្ខបុក​ម្នេញ​ឡើយ តែ​លោក​មើល​ឃើញ​ថា អ្នកនយោបាយ​បក្ស​ប្រឆាំង និង​អ្នកសកម្ម​ធ្វើការងារ​សង្គម​ត្រូវការ​លោក ឱ្យ​​ជួយ​តតាំង​ការពារក្ដី​ឱ្យ​ពួកគេ។ លោក​ថា​ភាពក្លាហាន​របស់​លោក​មិនផ្លាស់ប្ដូរទេ​រហូត​មក​ដល់​ពេល​នេះ៖ «ខ្ញុំមើលឃើញ​យ៉ាង​ច្បាស់​ថា ខ្ញុំ​មាន​តួនាទី​សំខាន់​ខ្លាំង​ណាស់ សម្រាប់​ជួយ​ការពារ​សកម្មជន ជួយ​ការពារ​អ្នក ដែលហ៊ាន​តវ៉ា​ ដើម្បី​រក​យុត្តិធម៌ ដើម្បី​មាន​ប្រជាធិបតេយ្យ​នៅ​ស្រុក​ខ្មែរ អ៊ីចឹង​តួនាទី​របស់​ខ្ញុំ​ សំខាន់​ក្នុង​ការចូលរួម​ជួយ​ជំរុញ​ឱ្យ​​ស្រុកខ្មែរ​ទៅ​មាន​ការគោរព​ច្បាប់ ឬ​ទៅ​ជា​នីតិរដ្ឋ»។

ចាប់តាំង​ពី​ស្ថានភាព​នយោបាយ​តានតឹង​ខ្លាំង​នៅ​ក្រោយ​ការម្លាយ​គណបក្ស​ប្រឆាំង​កាល​ពី​ខែវិច្ឆិកា ឆ្នាំ២០១៧​មក លោក ជូង ជូងី ដែល​ជា​មេធាវី​ដ៏​មាន​ថ្វីមាត់​តតាំង​ក្ដី​ក្នុង​សវនាការ បាន​កម្រិត​សេរីភាព​ក្នុង​ការនិយាយ​ស្ដី​ជាមួយ​អ្នកសារព័ត៌មាន​កាន់​តែ​ខ្លាំង​ដែរ។ លោក​ថា​ទង្វើនេះ​ខុសពី​និស្ស័យ​ពីកំណើត​របស់​លោក ដែល​តែងតែ​ហ៊ាន​និយាយ និង​ហ៊ាន​រិះគន់៖ «មាន​ការប្រឈម មាន​ការប្រថុយ​ប្រថាន ពីព្រោះ​មក​ដល់​ពេល​ហ្នឹង​គឺ​ការចោទប្រកាន់​ពី​បទញុះញង់ អោយ​ប្រព្រឹត្ត​បទល្មើស​ធ្ងន់ធ្ងរ ហើយ​និង​ការចាប់ខ្លួន​គឺ​វាផុយ​ណាស់ ចាប់​មនុស្ស​ទាំងយប់​ហើយ​នៅតែ​ថា​ត្រូវ​ច្បាប់​ទៀត ខណៈ​ដែល​ខ្ញុំ​ជាមេធាវី​មើល​ឃើញ​នេះ​ជា​ការបំពាន​ច្បាប់​ច្បាស់​ក្រឡែត»។

ក្នុង​វ័យ៥០ឆ្នាំ​លោក​បាន​ប្រឡូក​ក្នុង​អាជីព​អ្នកការពារ​ក្ដី​ជាង​១០ឆ្នាំ​មកនេះ លោក​ជាប់ឈ្មោះ​ថា​ជា​មេធាវី​ខ្សត់​ទ្រព្យ តែ​មាន​ទឹក​ចិត្ត ជា​មេធាវី​ដែល​ឥត​ខ្លាចរអា ទោះ​បី​ជា​សំណុំ​រឿង​លោក​ការពារ​កូន​ក្ដី​របស់​លោក តទល់​នឹង​អ្នក​មាន​អំណាច​កំពូល និង​អ្នក​មាន​លុយកាក់​ក្ដី។ លោក​បាន​ការពារ​រឿងក្ដី​របស់​អ្នកនយោបាយ អ្នកធ្វើការងារ​សង្គម និង​អ្នកតស៊ូមតិ​ជាច្រើន​នាក់ក្នុង​នោះ​ក៏​មាន​អតីត​មេបក្ស​ប្រឆាំង គឺលោក សម រង្ស៊ី ក្នុង​សំណុំរឿង​ដក​តម្រុយ​បង្គោល​ព្រំដែន និង​រឿង​ផែនទី​កម្ពុជា​វៀតណាម លោក កឹម សុខា ប្រធាន​គណបក្ស​សង្រ្គោះជាតិ ក្នុង​សំណុំរឿង​ចោទប្រកាន់​អាស្រូវ​ស្នេហា​ជាមួយ នាង ខុម ចាន់តារាទី ហៅស្រីមុំ និង​រឿង​មិនទទួលស្គាល់​ប្រវត្តិសាស្រ្ត​ខ្មែរ​ក្រហម ក្រុមតំណាងរាស្រ្ត​គណបក្ស​សង្រ្គោះជាតិ ដែល​រួមមាន អ្នកស្រី មូ សុខហួរ លោក ម៉ែន សុថាវរិន្ទ លោក កែវ ភិរម្យ ជាដើម​ក្នុង​សំណុំរឿង​អំពើហិង្សា​នៅ​ទីលានប្រជាធិបតេយ្យ តំណាងរាស្រ្ត លោក អ៊ុំ សំអាន សមាជិកព្រឹទ្ធសភា លោក ហុង សុខហួរ លោក មាជ សុណ្ណារ៉ា និង​អ្នកវិភាគ លោក គឹម សុខ ជាដើម។ គឺរឿង​ទាំងអស់​នេះ​ហើយ ដែល​លោក ជូង ជូងី មិនដែល​ឈ្នះក្ដីសោះ បើទោះបីជា​លោក ប្រឹងប្រែង​អស់​សមត្ថភាព​ការពារ​យ៉ាងណាក្ដី ដែល​ផ្ទុយគ្នា​ស្រឡះ​រឿង​ក្ដី​ធម្មតា​ដែល​មាន​ឈ្នះ មាន​ចាញ់៖ «ការការពារ​អោយ​សកម្មជន​អស់ទាំ​ងហ្នឹង​គឺ​បាន​តែ​បំពេញ​ទៅតាម​នីតិវិធីទេ តែ​ការទាមទារ​រកយុត្តិធម៌​សម្រាប់​គាត់​គឺ​នៅ​ឆ្ងាយ ពីព្រោះ​គាត់​ត្រូវ​បាន​ចោទ​ប្រកាន់​ដោយ​មន្រ្តី​រដ្ឋាភិបាល ឬ​អ្នកមានអំណាច។ ដូច្នេះ​ការទាមទារ​រកយុត្តិធម៌​សម្រាប់​កូន​ក្ដី​ប្រភេទ​ហ្នឹង​គឺនៅ​ឆ្ងាយណាស់»។

ថ្មីៗនេះ​នៅពេលដែល​អាជ្ញាធរ​ក្រុងភ្នំពេញ​បង្កើន​ការចាប់ខ្លួន​សកម្មជន​បក្សប្រឆាំង អ្នកធ្វើការងារ​សង្គម និង​អ្នកតស៊ូមតិ ដើម្បី​យុត្តិធម៌​សង្គម លោក ជូង ជូងី ក៏​ទទួល​ការពាររឿងក្ដី​មួយ​ចំនួន​ដែរ ហើយ​ភាគច្រើន​គឺ​លោក ជួយការពារ​ដោយ​មិន​យក​ប្រាក់។ លោក​ក៏​កំពុង​កាន់​សំណុំរឿង​មេដឹកនាំ​សហជីព លោក រ៉ុង ឈុន ដែល​ត្រូវ​ជាប់ចោទ​ពី​បទ​ញុះញង់ បន្ទាប់​ពី​បានផ្សព្វផ្សាយ​កង្វល់​ពលរដ្ឋ​ក្នុង​ខេត្ត​ត្បូងឃ្មុំ​រឿងបាត់ដីស្រែ ដោយសារ​ការបោះបង្គោលព្រំដែន​ជាមួយ​វៀតណាម។

លោក រ៉ុង វិជ្ជា ប្រាប់​ថា លោក រ៉ុង ឈុន ដែល​ជា​ឳពុកមារ​របស់​លោក​នោះ​គ្មាន​ប្រាក់​នឹង​ជួល​មេធាវី​ឡើយ ប៉ុន្តែ​បាន​កក់ក្ដៅ​ដោយសារ​បាន​ជំនួយ​ពី​មេធាវី​លោក ជូង ជូងី៖ «ខ្ញុំ​មើលឃើញ​ចំពោះ​មេធាវី​គាត់​ខិតខំ​ប្រឹងប្រែង ពី​ព្រោះ​ថា បើរឿង​ដែល​គេ​ចោទប្រកាន់​ហ្នឹង​សុទ្ធតែ​ជា​រឿង​នយោបាយ អ៊ីញ្ចឹង​គឺ​សុទ្ធតែ​ជា​រឿង​អយុត្តិធម៌ ហើយ​អ្វី​ដែល​មេធាវី​លើក​ឡើង​សុទ្ធតែ​ជារឿង​ផ្លូវច្បាប់ ស្រប​ទៅ​តាម​នីតិវិធី ធ្វើយ៉ាងណា​អោយ​ជួយ​ដោះ​បន្ទុក​កូនក្ដី»។

លោក ជួង ជូងី បន្ត​ថា​មេធាវី​គឺ​អ្នកផ្ដល់​ភាពកក់​ក្ដៅ​មុនគេ​ទៅ​អោយ​អ្នកត្រូវ​ចាប់ខ្លួន ឬ​ចោទ​ប្រកាន់ ហើយ​ក៏ជា​អ្នកផ្ដល់ប្រឹក្សា​ច្បាប់​គ្រប់​ដំណាក់​កាល​ដល់​កូនក្ដី។ លោក​ថា​ត្រង់​ចំណុច​នេះ​ហើយ​ដែល​ជំរុញ​អោយ​លោក រិតត្បិត​ការនិយាយ​ស្ដី ធ្វើ​យ៉ាងណា​អោយ​តែ​លោក​នៅ​អាច​ការពារ​ក្ដី​តទៅ​ទៀត។

ឆ្លើយតប​នឹង​ការលើកឡើង​នេះ​ប្រធាន​គណៈមេធាវី លោក សួន វិសាល ប្រាប់​អាស៊ីសេរី​ថា មេធាវី​មាន​សិទ្ធិ​គ្រប់គ្រាន់​ក្នុង​ការបញ្ចេញ​មតិ ដោយ​គ្មាន​ការភ័យខ្លាច​ពី​ការបំភិតបំភ័យ សំខាន់​គឺ​មេធាវី​ត្រូវ​អនុវត្ត​តាម​វិជ្ជាជីវៈ​របស់​ខ្លួន។ លោក​ថា​នៅ​ក្នុង​អាណត្តិ​ការងារ​របស់​​លោក លោក លើកទឹកចិត្ត​ដល់​មេធាវី​អោយ​លើកឡើង​ពី​បញ្ហា ដែល​ជួប​ប្រទះ​មក​ខាង​គណៈមេធាវី​ជានិច្ច៖ «មក​ដល់​ពេលនេះ​គឺ​យើង​អត់ ដែល​បាន​ឃើញ​មេធាវី​ណា​ម្នាក់​ដែល​ប្ដឹង​មក​គណៈមេធាវី​សុំ​អន្តរាគមន៍ ពី​ការគំរាម​កំហែង ឬ​ការកម្រិត​សិទ្ធិ ក្នុងពេល​គាត់ទៅ​ប្រកប​វិជ្ជាជីវៈ​ទេ យើង​អត់​ដែល​បាន​ទទួលទេ»។

បើទោះជាយ៉ាងណា​គណៈមេធាវី​ជាស្ថាប័ន ដែល​មាន​ឥទ្ធិពល​អាច​លុបឈ្មោះ​មេធាវី ដាក់​ពិន័យ និង​ទណ្ឌកម្ម ​ទៅ​លើ​មេធាវី​ណា​ដែល​ត្រូវចោទ​ប្រកាន់​ថា​ប្រព្រឹត្ត​ខុស​និង​វិជ្ជាជីវៈ ក្នុង​នោះ​គឺ​រួមទាំង​ការបញ្ចេញ​មតិ​របស់​មេធាវី​គ្រប់រូប​ផងដែរ។

លោក ជូង ជូងី ដែល​មាន​សម្បុរស មាឌ​តូច​ស្ដើង មាន​ស្រុក​កំណើត​នៅ​ភូមិ​ព្រះប្រសប់ ឃុំ​ព្រះប្រសប់ ស្រុក​ខ្សាច់​កណ្ដាល ខេត្ត​កណ្ដាល ដែល​មាន​ឪពុក​ម្ដាយ​ជា​កសិករ។ មុន​នឹង​ចាប់​មុខ​របរ​ជា​មេធាវី លោក ជូង ជូងី បាន​ធ្វើ​ជា​គ្រូបង្រៀន បន្ទាប់​ពី​លោក​បាន​បញ្ចប់​បរិញ្ញាបត្រ​ផ្នែក​រូបវិទ្យា​ពី​សាកលវិទ្យាល័យ​ភូមិន្ទ​ភ្នំពេញ។ បន្ទាប់​ពី​បាន​ធ្វើ​គ្រូបង្រៀន ២​ឆ្នាំ លោក ជូង ជូងី បាន​បន្ត​ទៅ​រៀន​ច្បាប់ និង​ទទួល​បាន​បរិញ្ញាបត្រ​ជាន់​ខ្ពស់​ផ្នែក​រដ្ឋបាល​សាធារណៈ និង​បាន​បំពេញ​វិជ្ជាជីវៈ​មេធាវី​កាល​ពី​ឆ្នាំ២០០៤ ដោយ​មាន​ការិយាល័យ​ឈ្មោះ​សីលា។ លោក ជូង ជូងី រម្លឹក​ថា ម្តាយ​របស់​លោក​ប្រាប់​លោក​ថា ធ្វើជាមនុស្ស​អោយ​ដឹង​ខុសត្រូវ កុំរំលោភ​បំពាន​គេ គឺ​ត្រូវ​ស្រឡាញ់​យុត្តិធម៌ ការពារ​យុត្តិធម៌។ លោក​បន្ត​ថា​ក្នុង​សង្គម​គឺ​ចាំបាច់​ត្រូវ​មាន​មនុស្ស​ដូច​ដែល​ម្ដាយ​លោក​លើកឡើង​នោះឯង ទើប​លោក​ប្រកាន់​ខ្ជាប់​នូវ​គំនិត​គាំពារ​យុត្តិធម៌​សង្គម​រហូត​មកដល់​ពេល​នេះ៖ «ចាំបាច់ណាស់​គឺ​ត្រូវ​មាន​មនុស្ស ដែល​ហ៊ាន​លះបង់​ខ្លួន​ឯង លះបង់​ប្រយោជន៍ លះបង់​សេចក្ដីសុខ ទាំង​សេចក្ដីសុខ​ខ្លួនឯង ទាំង​សេចក្ដីសុខ​ក្រុមគ្រួសារ ដើម្បី​តវ៉ាទាមទារ​អ្វី ដែល​គួរតែ​បាន​ដូចជា ការគោរព​ច្បាប់ សិទ្ធិមនុស្ស​ប្រជាធិបតេយ្យ សេរីភាព»។

អ្នកឃ្លាំមើល​សង្គម និង​នយោបាយ លោក បណ្ឌិត ឡៅ ម៉ុងហៃ កោត​សរសើរ​ដល់​ភាពក្លាហាន ទឹកចិត្ត​សប្បុរស​របស់​លោក ជូង ជូងី និង​ការប្រឹងប្រែង ដើម្បី​ផ្ដល់​យុត្តិធម៌​ដល់​មនុស្ស​គ្រប់រូប​នេះ​ថា​ជា​ទឹកចិត្ត​ល្អ​កម្រ​រក​បាន៖ «គាត់​យក​វិជ្ជាជីវៈ​ជា​មេធាវី​ជា​មធ្យោបាយ ដើម្បី​ជួយ​អ្នក​ដែល​មាន​ទុក្ខ។ ហ្នឹង​ហើយ​គឺ​ចិត្ត​គាត់​ជា​ចិត្ត​ព្រះ គឺ​មាន​ករុណា»។

ទាក់ទង​នឹង​ការរឹតត្បិត​សិទ្ធិសេរីភាព​របស់​មេធាវី​នេះ លោក ឡៅ ម៉ុងហៃ មើល​ឃើញ​ថា​មាន​ចំណុច​សំខាន់​ពីរ គឺ​ទីមួយ ឥទ្ធិពល​របស់​គណៈមេធាវី ដែល​មិន​ទាន់ទាន់​ជា​ស្ថាប័ន​ឯករាជ្យ ពី​អ្នកនយោបាយ​​ពោល​គឺ​អាច​ដាក់​ការគំរាមកំហែង​ទៅ​ដល់​មេធាវី​គ្រប់រូប។ ទី២ គឺ​មេធាវី​ភាគ​ច្រើន​នៅ​មិន​ទាន់​មាន​ភាព​ក្លាហាន​គ្រប់គ្រាន់ និង​មិនបាន​ស្វែង​យល់​ស៊ីជម្រៅ​ពី​ការប្រើប្រាស់​សិទ្ធិសេរីភាព​ខ្លួន​​ឯង។ លោក​ថា​ចំណុចទាំង​នេះ​ហើយ ដែល​រួមចំណែក​ធ្វើ​អោយ​សង្គម​គ្មាន​យុត្តិធម៌​ពិតប្រាកដ។

នៅពេល​និយាយ​ដល់​បណ្ដឹង លោក មេធាវី ជូង ជូងី ខ្លួន​ឯង​ក៏​រងបណ្ដឹង​ព្រហ្មទណ្ឌ​ដែរ ហើយ​ត្រូវ​តុលាការ​ខេត្ត​កណ្ដាល​កាត់អោយ​លោក​ជាប់ទោស​២ឆ្នាំ ពិន័យ​ប្រាក់​៣លាន​រៀល ហើយ​សំណុំរឿង​នេះ​នៅ​មិនទាន់​បិទ​បញ្ចប់​នៅ​ឡើយ ដែលនេះ​ក៏​ជាគំនាប​មួយ​ដល់​រូបលោក​ដែរ។ ក្នុង​រឿងនេះ​គឺ​លោក មាន​ទោសព្រោះ​តែធ្វើ​គុណ ដោយ​ជួយ​យក​អាសារ​ការពាក្ដី​ក្នុង​រឿង​ទំនាស់​ដីធ្លី​រវាង​ពលរដ្ឋ និង​អ្នក​មាន​អំណាច។

លោក​បន្ត​ថា​ដើម្បី​អោយ​លោក មាន​ចិត្ត​ស្ងប់ អាច​ប្រឈម​នឹង​រឿង​រ៉ាវទាំង​នេះ​បាន​លោក តែង​ឆ្លៀត​ពេល​ធ្វើ​វិប្បសនា នៅ​តាម​ទីអារាម​មួយ​ចំនួន ដែល​មាន​រៀបចំ​កម្មវិធី​នេះ៖ «ប៉ុន្តែ​ក្រោយ​ពី​មាន​វិបត្តិ​កូវីដ​ម៉ោ មជ្ឈមណ្ឌល​គេបិទ​គេ​ខ្លាច​ឆ្លង​កូវីដ គឺ​ខ្ញុំ​ខាន​ទៅ​ជិត​១ឆ្នាំ​ហើយ ប៉ុន្តែ​ក្នុង​ការធ្វើ​សមាធិ​ហ្នឹង​ខ្ញុំ​ព្យាយាម​ធ្វើ​ដោយ​ខ្លួន​ឯង នៅ​ពេល​ដែល​ខ្ញុំ​ធ្វើ​ការងារ​ទៅ​លំបាក​ខ្ញុំ​បាន​បិទភ្នែក​ទៅ ខ្ញុំ​ធ្វើ​ចិត្ត​អោយ​ស្ងប់​ចឹង​ទៅ»។

បើទោះជា​យ៉ាងណា លោក ជូង ជូងី នៅ​តែ​ប្រកាន់​ជំហរ​ជ្រើសរើស​យក​ការអនុវត្ត​វិជ្ជាជីវៈ ដោយ​មិនប្រាថ្នា​តែ​លាភសក្ការៈ ហើយ​ថែម​ទាំង​ជំរុញ​លើក​ទឹកចិត្ត​យុវជន​ជំនាន់​ក្រោយ​អោយ​ឈរ​លើ​គោល​ការណ៍​​យុត្តិធម៌។ លោក​ថា បើចង់​មាន​បាន​ដោយ​មិន​ខ្វល់​ពី​យុត្តិធម៌ ពី​ភាព​ស្មោះត្រង់​សូម​កុំ​ប្រកាន់​យក​វិជ្ជាជីវៈ​មេធាវី៖ «ចំពោះ​អ្នក​ច្បាប់​ត្រូវការ​មេធាវី ដែល​ហ៊ាន ប៉ុន្តែ​ខ្ញុំ​ក៏​មាន​ការសោកស្ដាយ​ដែរ មេធាវី​ស្រុក​ខ្មែរ​យើ​មាន​ចំនួន​ប្រហែល​២០០០នាក់ ប៉ុន្តែ​គេ​ភាគច្រើន គេ​គិត​តែ​ប្រយោជន៍​គេ​ទេ​គឺ​គេ​មិន​ខ្វល់​ពី​សង្គម​ទេ។ ទន្ទឹម​នឹង​នោះ​មាន​អ្នកខ្លះ​គាត់​ចេះដឹង​ជ្រៅ​គាត់​មិន​ត្រឹមតែ​គិតតែ​ប្រយោជន៍​គាត់​ទេ​គាត់​ថែមទាំង​ដើរផ្លូវ​មួយ​បំផ្លាញ​សង្គម បំផ្លាញ​យុត្តិធម៌ ដើរ​ផ្លូវ​ពុករលួយ​សូកប៉ាន់ បក្សពួកនិយម ធ្វើអោយស្ថានភាព​យុត្តិធម៌​ហ្នឹង​កាន់តែ​លំបាក​ទៅ។ មែនទែន​ទៅ​សម្រាប់​បទពិសោធន៍​នៅក្នុង​សង្គមខ្មែរ​យើង​ការបំពាន​ធ្ងន់ធ្ងរ ការបង្កើត​ភាព​អយុត្តិធម៌​ដែល​គ្រោះថ្នាក់​ដល់​សង្គម​គឺ​កើតឡើង​ពី​អ្នកមាន​ចំណេះដឹង​ច្រើន​មួយ​ចំនួន ពី​អ្នក​ដែល​មាន​តួនាទី​ធំៗ​មួយ​ចំនួន»។

លោក​មេធាវី ជូង ជូងី ក៏​នៅ​មាន​ក្ដី​បំណង​មួយ​ទៀត​ដែរ គឺ​ប្រសិន​បើ​អាច​ធ្វើ​ទៅ​បាន លោក​ប្រាថ្នា​ចង់​ឲ្យ​មាន​យន្តការ​ដែល​អាច​ដាក់​ទោស​ចំពោះ​ចៅក្រម និង​ព្រះរាជអាជ្ញា ឬ​ឲ្យ​ពួក​គាត់​ទទួល​ខុស​ត្រូវ​ចំពោះ​ចំណាត់ការ​របស់​ពួក​គាត់​ទាំង​អម្បាលម៉ាន​ដែល​មិន​ត្រឹមត្រូវ ដ្បិត​លោក​សង្កេត​ឃើញ​ថា មាន​ចៅក្រម និង​ព្រះរាជអាជ្ញា​មួយ​ចំនួន​មាន​ចំណាត់ការ​មិន​ត្រឹមត្រូវ ប៉ុន្តែ​ពុំ​ឃើញ​មាន​ការ​តម្រូវ​ឲ្យ​ពួក​គាត់​ទទួល​ខុស​ត្រូវ បើ​ទោះ​ជា​មាន​បណ្ដឹង​ប្រឆាំង​ពួក​គាត់ ទៅ​ដល់​ឧត្ដម​ក្រុម​ប្រឹក្សា​នៃ​អង្គ​ចៅក្រម​ក្ដី។

និយាយ​ពី​ជិវិតគ្រួសារ លោក ជូង ជូងី បាន​រៀបការ​ជាមួយ​មេធាវី​មួយរូបដែរ។ អ្នកទាំង​២​កំពុង​ស្នាក់​ផ្ទះជួល​ក្នុង​រាជធានី​ភ្នំពេញ ដោយ​មិន​ទាន់​មាន​កូន​នៅ​ឡើយ។ ជីវភាព​គ្រួសារ​នេះ​មិន​ជា​ធូរធា ប៉ុន្តែ​​អាច​រកបាន​ចំណូល ដែល​អាច​ទប់ទល់​នឹង​ការចំណាយ​ប្រចាំថ្ងៃ​ដោយ​មិន​លំបាក​ឡើយ។

ចំពោះ​គោលដៅ​ជីវិត​ទៅ​ថ្ងៃ​អនាគត លោក ជូង ជូងី ឆ្លើយ​ថា លោក​អាច​នឹង​ផ្លាស់ប្ដូរ​អាជីព​ដែរ ឲ្យ​តែ​អាច​ជួយ​រក​យុត្តិធម៌​ក្នុង​សង្គម៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល