មន្ត្រីឃ្លាំមើលសិទ្ធិមនុស្ស ព្រួយបារម្ភថា ការបង្កើតច្រកទ្វារអ៊ីនធឹណិតជាតិ តាមរយៈសេចក្តីព្រាងអនុក្រឹត្យថ្មីរបស់រដ្ឋាភិបាល នឹងរឹតតែផ្តល់អំណាចកាន់តែទូលំទូលាយ និងគ្មានដែនកំណត់ឲ្យរដ្ឋាភិបាល អាចរាំងខ្ទប់ ឬរឹតត្បិតសេរីភាពនៃការបញ្ចេញមតិ និងសិទ្ធិទទួលបានព័ត៌មានរបស់ពលរដ្ឋទូទៅ។ ក្តីបារម្ភនេះ កើតមានឡើងស្របពេលដែលអាជ្ញាធរកម្ពុជា កំពុងបង្កើនយុទ្ធនាការរឹតត្បិតសិទ្ធិសេរីភាពរបស់ពលរដ្ឋកាន់តែខ្លាំងឡើងៗ ទាំងនៅក្នុងសង្គម និងនៅលើបណ្តាញអ៊ីនធឹណិត។
នាយករងទទួលបន្ទុកផ្នែកឃ្លាំមើលសិទ្ធិមនុស្សនៃអង្គការ លីកាដូ លោក អំ សំអាត ថា ការពន្លឿនការជំរុញឲ្យមានច្រកទ្វារអ៊ីនធឹណិតជាតិនេះ គឺជារឿងគួរឲ្យព្រួយបារម្ភខ្លាំង អំឡុងពេលដែលប្រជាពលរដ្ឋកាន់តែច្រើននាក់កំពុងទទួលរងការធ្វើទុក្ខបុកម្នេញ ឬចាប់ដាក់គុក ដោយសារតែផ្សព្វផ្សាយ និងចែករំលែកគំនិតយោបល់របស់ពួកគេលើបណ្តាញសង្គម។ លោកថា តាមរយៈសេចក្តីព្រាងអនុក្រឹត្យថ្មីនេះ រួមទាំងយន្តការដែលមានស្រាប់ និងច្បាប់ស្តីពីទូរគមនាគមន៍ផងនោះ រដ្ឋាភិបាលនឹងមានអំណាចគ្មានដែនកំណត់ក្នុងការរឹតត្បិតសេរីភាពនៃការបញ្ចេញមតិ និងសិទ្ធិទទួលបានព័ត៌មាននៅលើបណ្តាញអ៊ិនធឹណិត៖ « សេចក្តីព្រាងអនុក្រឹត្យនេះ យើងមើលទៅហាក់ដូចជាផ្តល់សិទ្ធិអំណាចទូលំទូលាយ និងគ្មានដែនកំណត់ទៅដល់រដ្ឋាភិបាល។ អ៊ីចឹង គេអាចនឹងមានការរិះគន់ ហើយនឹងមានការព្រួយបារម្ភថា អនុក្រឹត្យនេះ វារឹតត្បិតបន្ថែមទៀតទៅលើសេរីភាពក្នុងការបញ្ចេញមតិ ក៏ដូចជាការទទួលព័ត៌មានរបស់ប្រជាពលរដ្ឋក្នុងសម័យបច្ចេកវិជ្ជា ជាពិសេសគឺប្រជាពលរដ្ឋជាច្រើនកំពុងប្រើប្រាស់តាមប្រព័ន្ធអនឡាញអ៊ឹនធឹណិត »។
លោក អំ សំអាត បន្តថា សេចក្តីព្រាងអនុក្រឹត្យនេះ ក៏នឹងអនុញ្ញាតឲ្យរដ្ឋាភិបាលអាចច្រោះយកព័ត៌មាន តាមដានឈ្លបយកការណ៍ ឬបិទប្រភពព័ត៌មាននៅលើអ៊ិនធឹណិតដែលអាជ្ញាធរមិនពេញចិត្ត ព្រមទាំងដាក់សម្ពាធបន្ថែមទៀតទៅលើក្រុមហ៊ុនដែលជាប្រតិបត្តិករចែកចាយបណ្តាញអ៊ិនធឹណិតផងដែរ។
អាស៊ីសេរី មិនអាចទាក់ទងអ្នកនាំពាក្យក្រសួងប្រៃសណីយ៍ និងទូរគមនាគមន៍ លោក មាស ប៉ូ និងលោក ខូវ មករា ដើម្បីសុំអត្ថាធិប្បាយជុំវិញរឿងនេះបានទេ ដោយសារពួកលោកមិនលើកទូរស័ព្ទកាលពីល្ងាចថ្ងៃទី៣ កញ្ញា។
យ៉ាងណា ផ្អែកតាមសេចក្តីព្រាងអនុក្រឹត្យចុងក្រោយ ចុះថ្ងៃទី៨ កក្កដា ស្តីពីការបង្កើតច្រកទ្វារអ៊ិនធឹណិតជាតិ ឬហៅជាភាសាអង់គ្លេសថា National Internet Gateway រដ្ឋាភិបាលមានគោលបំណងគ្រប់គ្រងរាល់ការតភ្ជាប់បណ្តាញអ៊ិនធឺណិតទាំងអស់នៅក្នុងប្រទេស ក្រោមហេតុផលថា ដើម្បីការពារសន្តិសុខជាតិ និងថែរក្សារបៀបរៀបរយសណ្តាប់ធ្នាប់សង្គម។ សេចក្តីព្រាងអនុក្រឹត្យថ្មីនេះ កំណត់និយមន័យថា ច្រកទ្វារអ៊ិនធឹណិត សំដៅដល់ច្រកទ្វារដែល «សេវាអ៊ិនធឺណិតគ្រប់ប្រភេទត្រូវតភ្ជាប់បណ្តាញទៅវិញទៅមកក្នុងប្រទេស និងអន្តរជាតិ»។
មាត្រា១២ នៃសេចក្តីព្រាងអនុក្រឹត្យនេះ តម្រូវឲ្យក្រុមហ៊ុន ឬប្រតិបត្តិករនៃច្រកទ្វារអ៊ិនធឹណិតជាតិទាំងអស់ ត្រូវសហការជាមួយអាជ្ញាធរ ក្នុងការធានាសុវត្ថិភាព សណ្តាប់ធ្នាប់សាធារណៈ សីលធម៌ វប្បធម៌ ប្រពៃណី និងទំនៀមទម្លាប់សង្គម ព្រមទាំងបង្ការ ទប់ស្កាត់ និងបង្ក្រាបបទល្មើសនានា។ អនុក្រឹត្យនេះ ពុំបានកំណត់និយមន័យជាក់លាក់អំពីពាក្យពេចន៍អស់ទាំងនេះឡើយ ដោយគ្រាន់តែចែងថា បុគ្គលដែលប្រព្រឹត្តិល្មើសបណ្តាលឲ្យប៉ះពាល់ដល់សន្តិសុខជាតិ របៀបរៀបរយសណ្តាប់ធ្នាប់សង្គម ឬចំណូលជាតិ នឹងត្រូវផ្តន្ទាទោសដូចមានចែងក្នុងច្បាប់ជាធរមាន។
លោក អំ សំអាត ថា គិតមកទល់ពេលនេះ រដ្ឋាភិបាលធ្វើសេចក្តីព្រាងអនុក្រឹត្យនេះឡើងដោយគ្មានការពិគ្រោះយោបល់ ឬប្រមូលធាតុចូលពីសង្គមស៊ីវិលនៅឡើយទេ។ លោកសំណូមពរឲ្យក្រសួងពាក់ព័ន្ធ ឬរដ្ឋាភិបាល ពិចារណាឡើងចំពោះមាត្រាទាំងឡាយណា ដែលបង្កើតឡើងក្នុងន័យជាការរឹតត្បិតសិទ្ធិសេរីភាពនៅលើអ៊ិនធឺណិត ដែលមានចែងក្នុងអនុក្រឹត្យថ្មីនេះ៖ « យើងជាសង្គមស៊ីវិល មកដល់ពេលនេះ យើងមិនទាន់ទទួលបានការដាក់ឲ្យពិគ្រោះយោបល់ជាផ្លូវការណាមួយទេ។ ប៉ុន្តែ គ្រាន់ថា ជាសំណូមពរ សូមឲ្យពិនិត្យពិចារណាឡើងវិញដែរ ដើម្បីកុំឲ្យអនុក្រឹត្យចេញទៅ នាំឲ្យមានការរិះគន់អំពីការរឹតត្បិតបន្ថែមនៃសេរីភាពក្នុងការបញ្ចេញមតិ និងទទួលព័ត៌មាន »។
យោងតាមស្ថិតិរបស់និយ័តករទូរគមនាគមន៍កម្ពុជា ចំនួនអ្នកចុះបញ្ជីប្រើប្រាស់ទូរស័ព្ទដៃនៅកម្ពុជាតាមរយៈស៊ីមកាត គិតត្រឹមខែមេសា ឆ្នាំ២០២០ មានជាង ២០លាននាក់ (២០.៧៤៥.៣៩២)។ រីឯ ចំនួនអ្នកប្រើប្រាស់សេវាអ៊ិនធឹណិត គិតត្រឹមខែសីហា ឆ្នាំ២០២០ មានជាង ១៥លាននាក់ (១៥.២៦២.៥២៦) ដែលជាតួលេខកើនឡើងយ៉ាងគំហុកក្នុងរយៈពេលប្រមាណ១០ឆ្នាំចុងក្រោយនេះ ក្នុងនោះរដ្ឋបានផ្តល់អាជ្ញាប័ណ្ណឲ្យក្រុមហ៊ុនផ្គត់ផ្គង់សេវាអ៊ិនធឹណេតសរុប ៣៨ក្រុមហ៊ុន។
ក្នុងរយៈពេលជាច្រើនឆ្នាំបន្តបន្ទាប់មកនេះ កម្ពុជាជាប់ក្នុងចំណាត់ថ្នាក់ជាប្រទេសមានសេរីភាពតិចតួចនៅលើបណ្តាញអ៊ិនធឹណិត របស់អង្គការឃ្លាំមើលសេរីភាពពិភពលោក Freedom House ដោយសារតែរដ្ឋាភិបាលបានព្យាយាមប្លុកគេហទំព័រមួយចំនួន រួមទាំងគេហទំព័រអាស៊ីសេរី នៅមុនពេលបោះឆ្នោតជាតិឆ្នាំ២០១៨ ដែលត្រូវគេចាត់ទុកថា «ក្លែងក្លាយ» និងបានបង្កើនយុទ្ធនាការចាប់ខ្លួន និងបំភិតបំភ័យក្រុមអ្នករិះគន់ និងសំឡេងប្រឆាំងនៅលើបណ្តាញអ៊ិនធឹណិត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។