រូបវីដេអូ VOD
ក្រុមគ្រួសារលោក រ៉ាត់ រត្នមុនី និងសកម្មជនមួយចំនួន ផ្អាកការតវ៉ានៅមុខស្ថានទូតរុស្ស៊ីចំនួន២ សប្ដាហ៍ នៅថ្ងៃពុធទី១០ មេសា នេះ និងថ្ងៃពុធ សប្ដាហ៍ក្រោយ។
ភរិយាលោក រាត់ រត្នមុនី អ្នកស្រី ឡុង គីមហ៊ាង ឱ្យអាស៊ីសេរីដឹងថា មូលហេតុនៃការផ្អាកការតវ៉ានៅសប្ដាហ៍នេះ គឺដោយសារខ្លាចមានក្រុមជនមិនស្គាល់អត្តសញ្ញាណ មកអុកឡុកដូចសប្ដាហ៍មុនទៀត ចំណែកនៅសប្ដាហ៍ក្រោយ គឺជាអំឡុងពេលពិធីបុណ្យចូលឆ្នាំថ្មីប្រពៃណីជាតិខ្មែរ។ អ្នកស្រីបញ្ជាក់ថា បន្ទាប់ពី២ សប្ដាហ៍នេះទៅ អ្នកស្រីនឹងនាំគ្នាទៅតវ៉ានៅមុខស្ថានទូតរុស្ស៊ីសាជាថ្មីទៀត ប្រសិនបើសំណុំរឿងរបស់ស្វាមីមិនមានអ្វីប្រែប្រួលទេនោះ៖ «សប្ដាហ៍នេះពួកខ្ញុំអត់ទៅទេ ដោយសារតែខ្ញុំបារម្ភខ្លាចមានជនបាតដៃទីបី នឹងត្រូវគេដាក់មកដើម្បីបង្ករឿងក្នុងការធ្វើសកម្មភាពរបស់ខ្ញុំ ក្នុងឱកាសមុនចូលឆ្នាំខ្មែរ ដែលគេចង់បង្ករឿងអ្វីម្យ៉ាង ដើម្បីចាប់ខ្ញុំ។ អ៊ីចឹងទៅបានជាទាំងប្តីរបស់ខ្ញុំ ទាំងគ្រួសារ និងប៉ាម៉ាក់ សំណូមពរថា សប្ដាហ៍ហ្នឹងមិនឱ្យធ្វើសកម្មភាពទេ ដោយថារង់ចាំចូលឆ្នាំខ្មែរហើយ នឹងមកធ្វើសកម្មភាពជារៀងរាល់ថ្ងៃវិញ»។
ប្រធានសហព័ន្ធសហជីពកម្មករសំណង់កម្ពុជា លោក រ៉ាត់ រត្នមុនី បានជាប់ឃុំក្នុងពន្ធនាគារព្រៃសអស់រយៈពេល៤ ខែមកហើយ ដោយរងការចោទប្រកាន់ពីបទ “ញុះញង់ឱ្យមានការរើសអើង” បន្ទាប់ពីលោកបានជួយផលិតភាពយន្តឯកសារស្ដីពីការជួញដូរផ្លូវភេទនៅកម្ពុជា ឱ្យសារព័ត៌មាន RT (Russia Today) របស់រុស្ស៊ី។
ក្រៅពីការតតាំងក្តីតាមផ្លូវតុលាការ គ្រួសាររបស់លោក រ៉ាត់ រត្នមុនី បានសម្រេចយកថ្ងៃពុធជារៀងរាល់សប្ដាហ៍ ដើម្បីតវ៉ាសុំឱ្យរដ្ឋាភិបាលរុស្ស៊ីជួយអន្តរាគមន៍ករណីនេះ ព្រោះសារព័ត៌មាន RT ត្រូវបានគាំទ្រដោយរដ្ឋាភិបាលក្រុងមូស្គូ (Moscow)។
គ្រួសាររបស់លោកបានតវ៉ាដោយសន្តិវិធីនៅមុខស្ថានទូតរុស្ស៊ីនៅភ្នំពេញចំនួន ១២លើករួចមកហើយ ក៏ប៉ុន្តែមិនទទួលបានការឆ្លើយតបពីស្ថានទូតនេះនោះទេ ហើយកាលពីសប្ដាហ៍មុន ស្រាប់តែលេចមុខស្ត្រីមិនស្គាល់អត្តសញ្ញាណមួយក្រុម មកបង្កការរំខាន និងរារាំងមិនឱ្យគ្រួសាររបស់លោកតវ៉ាទៅវិញ៕
