អាជ្ញាធរ​ព្រះសីហនុ មិន​អនុញ្ញាត​ពលរដ្ឋ​មាន​ជម្លោះដីធ្លី​រៀបចំ​ទិវា​សិទ្ធិមនុស្ស ១០​ធ្នូ នៅ​សាល​វេទិកា​៧​មករា

ដោយ ជី វិតា
2019-12-09
អ៊ីម៉ែល
មតិ
Share
បោះពុម្ព
អភិបាល​ខេត្ត​ព្រះសីហនុ លោក គួច ចំរើន ក្នុង​ពិធី​ប្រកាស​ចូល​កាន់​ដំណែង​របស់​ខ្លួន កាល​ពី​ថ្ងៃ​ទី២៩ ខែ​មិថុនា ឆ្នាំ​២០១៩។
អភិបាល​ខេត្ត​ព្រះសីហនុ លោក គួច ចំរើន ក្នុង​ពិធី​ប្រកាស​ចូល​កាន់​ដំណែង​របស់​ខ្លួន កាល​ពី​ថ្ងៃ​ទី២៩ ខែ​មិថុនា ឆ្នាំ​២០១៩។
រូប​រដ្ឋបាល​ខេត្ត​ព្រះសីហនុ

អាជ្ញាធរ​ខេត្ត​ព្រះសីហនុ មិន​អនុញ្ញាត​ឱ្យ​ប្រជាពលរដ្ឋ​មាន​ជម្លោះ​ដីធ្លី​ក្នុង​ខេត្ត​មួយ​នេះ រៀបចំ​ទិវា​សិទ្ធិមនុស្ស​អន្តរជាតិ តាម​ការ​ស្នើសុំ​របស់​ពលរដ្ឋ​នោះ​ឡើយ ។ ប្រជាពលរដ្ឋ ខកចិត្ត ចំពោះ​ការ​បដិសេធ​នេះ ប៉ុន្តែ​ពួកគាត់​នៅតែ​មាន​គម្រោង​ជួបជុំគ្នា​នៅ​កន្លែង​ផ្សេង​ហើយ​ដង្ហែ​ញត្តិ​តាម ផ្លូវ​សាធារណៈ​ទៅ​ដាក់​ជូន​អភិបាលខេត្ត​ព្រះសីហនុ ឱ្យ​ពន្លឿន​ការ​ដោះស្រាយ​ទំនាស់ ដីធ្លី​ជូន​ពួកគាត់។

អភិបាលខេត្ត​ព្រះសីហនុ លោក គួច ចំរើន បាន​ជូនដំណឹង​ទៅ​តំណាង​សហគមន៍​ដីធ្លី​ថា នឹង​មិន អនុញ្ញាត​ឱ្យ​ប្រជា​សហគមន៍​មាន​ទំនាស់​ដីធ្លី​ទាំងអស់ ជួបជុំគ្នា​រៀបចំ​ប្រារព្ធ​ទិវា​សិទ្ធិមនុស្ស​១០​ធ្នូ នៅ​ថ្ងៃ​ទី​៩ ខែ​ធ្នូ នៅ​ទីតាំង​សាល​វេទិកា​៧​មករា សង្កាត់​លេខ​៣ ក្រុងព្រះសីហនុ ទៅតាម​ការ​ស្នើសុំ​នោះ ទេ​។

លិខិត​ជូនដំណឹង​ដែល​អាស៊ីសេរី​ទទួល​បាន​នៅ​ថ្ងៃ​ទី​៨ ខែ​ធ្នូ បង្ហាញ​ថា មូល​ហេតុ​ដែល​អាជ្ញាធរ​មិន​អនុញ្ញាត ដោយសារតែ​កន្លងមក​រដ្ឋបាល​ខេត្ត​ព្រះសីហនុ ធ្លាប់​បាន​រៀបចំ​វេទិកា​សាធារណៈ នៅ​តាម​ឃុំ​-​សង្កាត់​នីមួយៗ​ជា​បន្តបន្ទាប់ ជាពិសេស​បាន​រៀបចំ​កិច្ចប្រជុំ​សន្ទនា​ជាមួយ​ក្រុម​អង្គការ​សង្គម​ស៊ីវិល ក្នុង​មួយ​ឆ្នាំ​ចំនួន​ពីរ​ដង​យ៉ាង​ទៀងទាត់ ពាក់ព័ន្ធ​វិវាទ​ដីធ្លី និង​វិវាទ​ផ្សេងៗ​។ លើស​ពី​នេះ រដ្ឋបាល​ខេត្ត​ព្រះសីហនុ ក៏បាន​ទទួលយក​រាល់​សំណើ និង​សំណូមពរ​របស់​ប្រជាពលរដ្ឋ រងគ្រោះ​ដីធ្លី​នៅ​តាម​សហគមន៍​នីមួយៗ ដោះស្រាយ​ជា​បន្តបន្ទាប់​ផង​ដែរ។

កាល​ពី​ដើម​សប្ដាហ៍​នេះ តំណាង​សហគមន៍​រងគ្រោះ​ដីធ្លី​នៅ​ខេត្ត​ជាប់មាត់​សមុទ្រ​មួយ​នេះ បាន​ដាក់ លិខិត​ផ្សេងៗ​គ្នា​ស្នើសុំ​រៀបចំ​ទិវា​សិទ្ធិមនុស្ស​១០​ធ្នូ និង​អញ្ជើញ​អភិបាលខេត្ត​ព្រះសីហនុ​ចូលរួម ទិវា​នេះ ដើម្បី​ពួកគាត់​មានឱកាស​បង្ហាញ ពី​ទុក្ខ​កង្វល់​របស់​ខ្លួន​ទៅ​អាជ្ញាធរ​ដែនដី​និង​ស្ថាប័ន​ពាក់ព័ន្ធ​ដើម្បី​ឆ្លើយតប និង​ដោះស្រាយ​ព្រមទាំង បង្កើត​កិច្ច​សហប្រតិបត្តិការ​ល្អ​ប្រសើរ​ជាមួយគ្នា ក្នុង​ការ​លើកកម្ពស់​សិទ្ធិ​មនុស្ស យុត្តិធម៌​សង្គម និង​លទ្ធិប្រជាធិបតេយ្យ។

តំណាង​ពលរដ្ឋ​មាន​ជម្លោះ​ដី​នៅ​សហគមន៍​អូរដំរី ស្រុក​ស្ទឹងហាវ លោក ម៉ន ស៊ីណា ថ្លែងប្រាប់ អាស៊ីសេរី​ថា ប្រជាពលរដ្ឋ ខកចិត្ត​ចំពោះ​ការ​បដិសេធ​របស់​អាជ្ញាធរ។ លោក​បញ្ជាក់​ថា ដើម្បី បញ្ចៀស​ការ​ប្រឈម​មុខ​ជាមួយ​អាជ្ញាធរ គឺ​ពលរដ្ឋ​នឹង​ជួបជុំគ្នា​នៅ​ទីតាំង​ផ្សេង ហើយ​នាំគ្នា​ដើរ​ដង្ហែ ក្បួន​ទៅ​ដាក់​ញ​តិ្ត​ជូន​អភិបាលខេត្ត​ព្រះសីហនុ​ឱ្យ​ពន្លឿន​ដំណោះស្រាយ​ដីធ្លី​ជូន​ពួកគាត់​។ តំណាង ពលរដ្ឋ​រងគ្រោះ​ដីធ្លី​រូប​នេះ បន្ថែម​ថា ជម្លោះដីធ្លី​របស់​ពលរដ្ឋ​ក្នុង​ខេត្ត​ព្រះសីហនុ​ភាគច្រើន​មិនទាន់ ត្រូវ​បាន​ដោះស្រាយ​ជាច្រើន​ឆ្នាំ​មក​ហើយ ទោះបីជា​មានការ​ផ្លាស់ប្ដូរ​រ​អភិបាលខេត្ត​ពីរ​រូប​ទៅ​ហើយ ក្តី៖ «យើង​ប្រារព្ធ​រាល់​ឆ្នាំ​មិនដែល​ខាន​ទេ ។ នៅ​ពេល​ខាង​ឯកឧត្តម​អភិបាលខេត្ត មិន​អនុញ្ញាត​អ៊ីចឹង គឺ​យើង​មិន​សប្បាយចិត្ត​ដែរ​។ យើង​មិន​ចង់បាន​អី​ទាំងអស់ គឺ​យើង​ចង់​បានតែ​ដំណោះស្រាយ​ដីធ្លី​របស់​យើង ដូចជា​នៅ​កន្លែង​យើងខ្ញុំ គឺ​មិនទាន់​បាន​ដោះស្រាយ​តាំងពី​យូរ​ឆ្នាំ​ទៅ​ហើយ តាំងពី​ឆ្នាំ​២០០២​ដែល​ជិត ២០​ឆ្នាំ​ហើយ។

លោក ម៉ន ស៊ីណា ឱ្យ​ដឹង​ដែរ​ថា វេទិកា​សាធារណៈ​ដែល​រៀបចំ​ដោយ​អាជ្ញាធរ​ខេត្ត​ព្រះសីហនុ​កន្លង មក គឺ​មិនដែល​បាន​ជូនដំណឹង​ឱ្យ​ប្រជាពលរដ្ឋ​មាន​ទំនាស់​ដីធ្លី​ចូលរួម​នោះ​ទេ។

អ្នក​សម្របសម្រួល​សមាគម​អាដហុក​(Adhoc)​ប្រចាំ​ខេត្ត​ព្រះសីហនុ អ្នកស្រី ជៀប សុធារី សោកស្តាយ​ដែល លោក គួច ចំរើន មិន​អនុញ្ញាត​ឱ្យ​ប្រជាពលរដ្ឋ​រៀបចំ​ទិវា​សិទ្ធិមនុស្ស ព្រោះ​កន្លង​មក​អតីត​អភិបាលខេត្ត​ព្រះសីហនុ លោក យន្ត មីន មិន​ដែល​ហាមឃាត់​ពលរដ្ឋ​បែបនេះ​ទេ។ អ្នកស្រី បន្ថែម​ថា ការ​លើក​ហេតុផល​របស់​អាជ្ញាធរ​ខេត្ត​ព្រះសីហនុ គឺ​មិន​ត្រឹមត្រូវ​ឡើយ ហើយ អាជ្ញាធរ កំពុង​រឹតត្បិត​សិទ្ធិ​សេរីភាព​របស់​ប្រជាពលរដ្ឋ​។ មន្ត្រី​សិទ្ធិមនុស្ស​រូប​នេះ ថ្លែង​ទៀត​ថា ប្រជា​ពលរដ្ឋ បាន​ដាក់​លិខិត​ស្នើសុំ​ទីតាំង​ប្រារព្ធ​ពិធី និង​អញ្ជើញ​អាជ្ញាធរ​ចូលរួម​ត្រឹមត្រូវ​តាមច្បាប់ ដូច្នេះ អាជ្ញាធរ មិន​គួរ​ហាមឃាត់​នោះ​ទេ៖ «ការ​អះអាង​របស់​គាត់​ថា បាន​ធ្វើ​វេទិកា​ពិគ្រោះ​យោបល់​តាម​ឃុំ​-​សង្កាត់ គឺ​ធ្វើ​មែន ប៉ុន្តែ​មិនបាន​ទូលំទូលាយ​ទេ ដោយ​ភាគច្រើន​ពលរដ្ឋ​ដែល​មាន​បញ្ហា​គេ​មិនសូវ បាន​ហៅ​ចូលរួម។ ការ​ចូលរួម​គឺ​ត្រូវ​បាន​អាជ្ញាធរ​ជា​អ្នក​អញ្ជើញ មិនមែន​ជា​វេទិកា​សេរី​ដែល​យើង​អាច​ចូល​បាន​គ្រប់គ្នា​នោះ​ទេ​។ ពេលខ្លះ​ពួកគាត់​មិន​ដឹង​ផង។ ការ​ធ្វើ​ទិវា​សិទ្ធិមនុស្ស​នេះ គឺ​មាន​ការ ស្នើសុំ​ត្រឹមត្រូវ​និង​ជា​ឆន្ទៈ​របស់​គាត់។ ខ្ញុំ​គ្រាន់តែ​សំណូមពរ​ថា អាជ្ញាធរ​គួរតែ​តែ​ផ្ដល់​ឱកាស​ឱ្យ​ពលរដ្ឋ​បាន​ធ្វើ​ទៅ និង​ចូលរួម​ជាមួយ​ដើម្បី​ជជែក​គ្នា និង​ស្ដាប់​ពី​សំណើ ឬ​សំណូមពរ​របស់​ពួកគាត់»

អ្នកស្រី ជៀប សុធារី សង្កេត​ឃើញ​ថា ទំនាស់​ដីធ្លី​នៅ​ក្នុង​ខេត្ត​ព្រះសីហនុ​ភាគច្រើន កើតឡើង​រវាង ពលរដ្ឋ​សាមញ្ញ ជាមួយ​អ្នកមាន​ទ្រព្យ​និង​មាន​ឥទ្ធិពល ហើយ​អាជ្ញាធរ មិន​សូវ​មាន​ឆន្ទៈ​ដោះស្រាយ ដោយ​ពិតប្រាកដ​នោះ​ទេ ធ្វើ​ឱ្យ​ទំនាស់​ដីធ្លី​អូស​បន្លាយ​ពេល​រាប់​ឆ្នាំ ហើយ​ពលរដ្ឋ​ធ្លាក់ខ្លួន​លំបាក​ក្នុង​ជីវភាព​គ្រប់​បែប​យ៉ាង។

តំណាង​សហគមន៍​ដីធ្លី អះអាង​ថា តាម​គម្រោង គឺ​មាន​ប្រជាពលរដ្ឋ​ប្រមាណ ៣​រយ​នាក់​ចូលរួម​ដង្ហែ ក្បួន​ដោយ​ថ្មើរជើង​ទៅ​ដាក់​ញត្តិ​ជូន​អភិបាលខេត្ត​ព្រះសីហនុ ដើម្បី​សុំ​ដំណោះស្រាយ​ដីធ្លី​ឱ្យ​បាន ឆាប់៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល