តំណាងរាស្រ្តអាមេរិក ៥រូប ស្នើ​ឲ្យ​របប​លោក ហ៊ុន សែន ទម្លាក់​ចោល​​បទ​​ចោទ​​ប្រកាន់​អតីត​អ្នក​យក​ព័ត៌មាន​អាស៊ី​សេរី

លោក មួង ណារ៉េត
2019-09-07
អ៊ីម៉ែល
មតិ
Share
បោះពុម្ព
សមាជិកសភាអាមេរិក (រូបជួរលើពីឆ្វេងទៅស្ដាំ) លោក ស្ទីវ ឆាបុត (Steve Chabot) លោក អាឡែន ឡូវ៉ិនស្សល (Alan Lowenthal) លោក ថិត យ៉ូហូ (Ted Yoho) លោក ប្រ៊ែដ ស៊ើម៉ែន (Brad Sherman) និង លោក អាដាម ស៊ិហ្វ (Adam Schiff)។ រូបខាងក្រោម គឺលោក អ៊ួន ឈិន និង លោក យាង​ សុធារិន្ទ អតីត​អ្នកយកព័ត៌មាន​អាស៊ីសេរី។
សមាជិកសភាអាមេរិក (រូបជួរលើពីឆ្វេងទៅស្ដាំ) លោក ស្ទីវ ឆាបុត (Steve Chabot) លោក អាឡែន ឡូវ៉ិនស្សល (Alan Lowenthal) លោក ថិត យ៉ូហូ (Ted Yoho) លោក ប្រ៊ែដ ស៊ើម៉ែន (Brad Sherman) និង លោក អាដាម ស៊ិហ្វ (Adam Schiff)។ រូបខាងក្រោម គឺលោក អ៊ួន ឈិន និង លោក យាង​ សុធារិន្ទ អតីត​អ្នកយកព័ត៌មាន​អាស៊ីសេរី។
Those congressmen's Facebook

តំណាងរាស្រ្តអាមេរិក ៥ រូប រួមគ្នា​ស្នើឲ្យ​របបលោក ហ៊ុន សែន ​ទម្លាក់ចោលបទចោទ​ប្រកាន់​​លើ​​អតីត​​អ្នក​​យក​ព័ត៌មាន​​អាស៊ី​សេរី​លោក អ៊ួន ឈិន​ និង លោក យាង​ សុធារិន្ទ។ ក្នុង​សេចក្តី​ប្រកាស​ព័ត៌មាន កាលពីថ្ងៃទី៦ ខែ​កញ្ញា សមាជិក​សភា​​អាមេរិក រួមមាន​លោក ស្ទីវ ឆាបុត (Steve Chabot) លោក អាឡែន ឡូវ៉ិនស្សល (Alan Lowenthal) លោក ថិត យ៉ូហូ (Ted Yoho) លោក ប្រ៊ែដ ស៊ើម៉ែន (Brad Sherman) និង លោក អាដាម ស៊ិហ្វ (Adam Schiff) ចាត់​ទុក​ការ​​ធ្វើ​ទុក្ខ​បុក​ម្នេញ​​លើ​​អ្នក​សារ​ព័ត៌មាន​​ទាំង​ពីរ​​រូប ជាផ្នែកមួយនៃរឹតត្បិត​សិទ្ធិសេរីភាព​។

តំណាងរាស្រ្តទាំងនេះ លើកឡើងថា៖ «អ្នកយកព័ត៌មានខ្មែរពីររូប​គឺលោក អ៊ួន ឈិន និង លោក យាង សុធារិន្ទ ត្រូវ​បាន​ចោទប្រកាន់ពីបទ “ផ្តល់​ព័ត៌មាន​ដល់​រដ្ឋ​បរទេស” គឺ​ដោយសារ​តែ​ផ្សាយ​ព័ត៌មានមួយ នៅ​បីថ្ងៃក្រោយ​វិទ្យុ​អាស៊ី​សេរី​​បង្ខំ​​ចិត្ត​​បិទ​ការិយាល័យ​​​នៅ​ភ្នំពេញ ​កាល​ពី​ឆ្នាំ២០១៧។ ការបិទការិយាល័យ​វិទ្យុអាស៊ីសេរីនោះទៀតសោត​ គឺ​ក្រោយ​​រង​សម្ពាធ​ឥត​ស្រាកស្រាន្ត ​ពី​លោកនាយករដ្ឋ​មន្រ្តី​ ហ៊ុន សែន។ ការចោទប្រកាន់ទាំងនេះ គឺរបបលោក ហ៊ុន សែន ប្រឌិត​ឡើង​​ទាំង​ស្រុង និង​​​ជា​ផ្នែក​មួយនៃការ​វាយប្រហារលើសិទ្ធិ និងសេរីរីភាព​របស់​ប្រជាពលរដ្ឋខ្មែរ»។

អ្នកទាំងប្រាំរូប​បន្ត​ទៀតថា៖ «លោក ហ៊ុន សែន បានកាន់អំណាចរាប់​ទសវត្សន៍​មកហើយ ដោយ​មិន​ឲ្យ​ប្រជាពលរដ្ឋខ្មែរ សម្រេចជោគវាសនាអនាគតរបស់​ប្រទេសខ្លួនដោយ​ខ្លួន​ឯង។ លោក ហ៊ុន សែន គ្មានចេតនាការពារ​សិទ្ធិ​របស់​ពលរដ្ឋ​ខ្លួន​នោះទេ។ ជាងនេះទៅទៀត ក្នុង​ពេលថ្មីៗនេះ ដោយសារ​តែ​ការ​បន្ត​ក្តោបក្តាប់ និងក្រាញអំណាច​នេះ ទើប​របបនេះ​បន្ត​រំលោភសិទ្ធិមនុស្ស ដូចជាការ​វាយប្រហារលើអង្គការ​សង្គមស៊ីវិល និង បិទ​ប្រព័ន្ធ​ផ្សព្វផ្សាយ ​ដែលហ៊ាន​រិះគន់របបនេះ មាន​វិទ្យុអាស៊ីសេរីជាដើម។ មិន​តែប៉ុណ្ណោះ ទង្វើបំពាន​របស់​របបនេះ បែរជាគ្មានទោសទៅវិញ។ ដូច្នេះ​ហើយ ទើប​សហគមន៍​អន្តរជាតិ ត្រូវតែ​ចាត់វិធានការ​ឲ្យ​បាន​ម៉ឺងម៉ាត់ ដើម្បី​ប្រឆាំង​នឹង​អំពើ​អយុត្តិធម៌ទាំងនេះ។ រដ្ឋាភិបាល​​កម្ពុជា គម្បី​ទម្លាក់​បទ​ចោទ​ប្រកាន់​ ដែលគ្មានភ័ស្តុតាងទាំងនេះ រួចហើយ​ផ្តល់សេរីភាពជូនប្រជាពលរដ្ឋ​ខ្មែរវិញ»។

សារ​របស់​សមាជិកសភាអាមេរិកទាំងនេះ ធ្វើឡើងមួយសប្តាហ៍​ក្រោយ​តុលាការ​នៃ​របបលោក ហ៊ុន សែន កាលពី​ចុងខែ សីហា ​លើកពេលប្រកាស​សាលក្រម ឥតមានថ្ងៃកំណត់ ក្នុង​សំណុំរឿង​ចោទប្រកាន់អ្នកទាំងពីរ​។

តុលាការ​របប​លោក ហ៊ុន សែន បាន​ចោទ​ប្រកាន់​លោក អ៊ួន ឈិន និង​លោក យាង សុធារិន្ទ ហៅ យាង សុជាមេត្តា ចំនួន​ពីរ​បទ​ចោទ គឺ​ទី​មួយ​បទ “​ផ្ដល់​ឱ្យ​រដ្ឋ​បរទេស​នូវ​ព័ត៌មាន​ជាអាទិ៍​ដែល​នាំ​ឱ្យ​អន្តរាយ​ការ​ការពារ​ជាតិ​” និង​ទី​ពីរ​បទ “​ផលិត​វីដេអូ​អាសអាភាស​”​។ តុលាការ​បាន​ឃុំខ្លួន​អ្នក​ទាំងពីរ​ក្នុង​ពន្ធនាគារ​ព្រៃ​ស​អស់​រយៈពេល​ជាង ៩​ខែ មុននឹង​អនុញ្ញាត​ឱ្យ​នៅ​ក្រៅ​ឃុំ​បណ្ដោះអាសន្ន ក៏ប៉ុន្តែ​តុលាការ​នៅតែ​រក្សាទុក​វត្ថុ​ចាប់​យក និង​លិខិតឆ្លងដែន​របស់​អ្នក​ទាំងពីរ​ដដែល។ ចំណាត់​បែបនេះ ធ្វើ​ឱ្យ​អ្នក​ទាំងពីរ​មិន​មាន​សិទ្ធិ​ដើរហើរ​ពេញលេញ​ឡើយ ហើយ​ការ​ប្រកប​របរ​ចិញ្ចឹមជីវិត​ក៏​ជួប​ការ​លំបាក​ដែរ ព្រោះ​គ្មាន​ឧបករណ៍​ប្រើប្រាស់ ក្រោយ​ពី​តុលាការ​ដកហូត​ទុក។

មន្រ្តីរបបក្រុង​ភ្នំពេញឯណោះ ចាត់ទុកការ​ឈឺឆ្អាល​របស់​សមាជិកស​ភា​ទាំងនេះ ថា​ធ្វើ​ឡើង​ដោយ​ខ្វះ​កា​រយល់ដឹង​អំពី​ទម្លាប់​អនុវត្ត​ច្បាប់​នៅ​កម្ពុជា។ អ្នក​នាំ​ពាក្យ​​ក្រសួង​យុត្តិធម៌លោក ជិន ម៉ាលីន ថ្លែង​ប្រាប់​អាស៊ីសេរី កាលពីថ្ងៃទី៧ ខែ​កញ្ញា ថា​រដ្ឋាភិបាល​របស់​លោកគ្មាន​អ្វី​ភ្ញាក់ផ្អើល​នោះទេ។ លោក​បាន​ចោទ​តំណាង​រាស្រ្ត​ទាំងនោះ​​ថា​ មាន​ចេតនា​នយោបាយប្រឆាំង​នឹង​រដ្ឋាភិបាល​សព្វថ្ងៃ ទើប​ចេញ​សារ​បែបនេះ៖ «សម្រាប់​រាជរដ្ឋាភិបាល​ ដូច​អត់​មាន​ស្អី​ចម្លែកទេ សម្រាប់​​សមាជិកសភា​ប៉ុន្មាន​នាក់​នេះ​ចេញ​ statement ប្រឆាំងនឹង​រដ្ឋាភិបាល ព្រោះ​វាជាអ្វីដែល​ពួកគេ​ធ្លាប់​ធ្វើ នា​ពេល​កន្លង​​មក​ ហើយ​​ក្រោម​​របៀបវារៈ​​នយោបាយ​ ដោយ​មិន​គិត​គូ មិន​ខ្វល់ ធ្វើ​មិន​ដឹង​ពីយន្តការ​នៃការ​អនុវត្ត​ច្បាប់​របស់​កម្ពុជា។ យើង​ធ្លាប់​បាន​ពន្យល់​ជា​ច្រើន​លើក​ច្រើន​សារ​ហើយ ក៏​ប៉ុន្តែ​ទោះ​យ៉ាង​​ណា​​ក៏គាត់ ធ្វើ​មិន​ឮ ធ្វើ​មិន​ដឹង ធ្វើ​មិន​យល់​។ ដូច្នេះ​​ការ​​ចេញ​ statement ដូច​​គ្មាន​​អ្វី​​ចម្លែក​ទេ សម្រាប់​​ពួក​គាត់​»។

របបលោក ហ៊ុន សែន រងការថ្កោលទោសជុំទិសពីសហគមន៍អន្តរជាតិ ជុំវិញ​ការ​រំលោភសិទ្ធិមនុស្ស និង​បំផ្លាញ​ប្រជាធិបតេយ្យធ្ងន់ធ្ងរ​​នៅកម្ពុជា ជាពិសេស​ក្នុង​​រយៈពេលពីរឆ្នាំចុងក្រោយនេះ។ ក្នុងការ​រំលោភសិទ្ធមនុស្សនេះ ក៏​មាន​ករណី​នៃ​ការ​ធ្វើ​ទុក្ខ​បុក​ម្នេញ​លើ​ប្រព័ន្ធ​ផ្សព្វផ្សាយ​​ឯករាជ្យ និង​ការ​ចោទ​​ប្រកាន់​​អតីត​​អ្នក​​ឆ្លើយ​ឆ្លង​​​ព័ត៌មាន​​អាស៊ី​​សេរី​​ទាំង​​ពីរ​​រូប​​នេះ​​ដែរ។

ចំណាត់ថ្នាក់សេរីភាពនៅកម្ពុជា បាន​បន្ត​ធ្លាក់ចុះក្នុង​ឆ្នាំ​២០១៩ នេះ។ អង្គការ​អ្នករាយការណ៍​គ្មាន​​ព្រំដែន The Reporters Without Borders រកឃើញថា សេរីភាព​នៅកម្ពុជា បាន​ធ្លាក់ចុះមួយលេខទៀត ចុះមកនៅលេខ ១៤៣ បើប្រៀបធៀបនឹងឆ្នាំ​២០១៨ ដែលកម្ពុជាឈរ​នៅលេខរៀង ១៤២ ដែលជិត​បាត​តារាង។

ស្របពេល​គ្នានេះដែរ សភាអាមេរិក​ កាលពីពេលថ្មីៗ នេះ បាន​អនុម័តជាឯកឆន្ទលើ​ច្បាប់​​ដាក់​ទណ្ឌកម្ម​មន្រ្តី​របប​លោក ហ៊ុន សែន ដើម្បី​ដាក់​សម្ពាធ​ឲ្យ​​របប​នេះ ងាក​មក​រក​គន្លង​​ប្រជាធិបតេយ្យ​​ឡើង​វិញ។ ឥឡូវ​ច្បាប់​​នេះ​ កំពុង​​រង់ចាំ​​ព្រឹទ្ធសភា​អនុម័ត៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល