កម្មករ​ម្នាក់ ដែល​ជា​ប្រធាន​សហជីព​នៅ​រោងចក្រ សេងបូ (Shengbo) ធ្វើ​កូដកម្ម​ទាមទារ​ចូល​ធ្វើការវិញ

ដោយ សុជីវី
2023.11.06
កម្មករ​ម្នាក់ ដែល​ជា​ប្រធាន​សហជីព​នៅ​រោងចក្រ សេងបូ (Shengbo) ធ្វើ​កូដកម្ម​ទាមទារ​ចូល​ធ្វើការវិញ អ្នកស្រី រឿន កូលាប ​ជា​ប្រធាន​សហជីព ប្រចាំ​ក្រុមហ៊ុន សេងបូ ហ្គាមិន (Shengbo Garment) ស្ថិត​នៅ​ភូមិពោធិ៍កោង សង្កាត់ព្រះស្រែ ក្រុងឧដុង្គម៉ែជ័យ ខេត្តកំពង់ស្ពឺ ឈរតវ៉ាម្នាក់ឯង​នៅ​មុ​ខរោងចក្រ សេងបូ នៅ​ព្រឹក​ថ្ងៃ​ទី៦ ខែវិច្ឆិកា​ ឆ្នាំ២០២៣ ដោយទាមទារ​ថៅកែក្រុមហ៊ុន ​ទទួល​យក​រូប​គាត់​ចូល​ធ្វើ​ការ​វិញ។
រូប៖ ហ្វេសប៊ុកសហព័ន្ធសហជីពសេរីកម្មករ នៃព្រះរាជាណាចក្រកម្ពុជា។

កម្មករ​ម្នាក់ ដែល​ជា​ប្រធាន​សហជីព ប្រចាំ​ក្រុមហ៊ុន សេងបូ ហ្គាមិន (Shengbo Garment) ស្ថិត​នៅ​ភូមិពោធិ៍កោង សង្កាត់ព្រះស្រែ ក្រុងឧដុង្គម៉ែជ័យ ខេត្តកំពង់ស្ពឺ នៅ​ព្រឹក​ថ្ងៃ​ទី៦ វិច្ឆិកា​ធ្វើ​កូដកម្ម នៅ​ខាង​មុខ​ក្រុមហ៊ុន ដើម្បី​ទាមទារ​ឲ្យ​ថៅកែ​ទទួល​យក​រូប​គាត់​ចូល​ធ្វើ​ការ​វិញ។

កូដករ ជា​ប្រធាន​សហជីព ឈរ​កាន់​បដា​ពណ៌​ស សរសេរ​ថា សូម​បញ្ឈប់​ការ​រើសអើង​សហជីព។ នៅ​អំឡុង​ពេល ឈរ​លើក​បដា​នៅ​មុខ​ក្រុមហ៊ុន​នោះ សន្តិសុខ​ក្រុមហ៊ុន សេង បូ បាន​មក​ថតរូប​ប្រធាន​សហជីព​រូប​នោះ​ផង​ដែរ។

ប្រធាន​សហជីព ប្រចាំ​ក្រុមហ៊ុន សេងបូ ហ្គាមិន អ្នកស្រី រឿន កូលាប ថ្លែង​ក្នុង​ការ​ផ្សាយ​បន្ត​ផ្ទាល់​លើ​ទំព័រ​ហ្វេសប៊ុក​របស់​សហព័ន្ធ​សហជីព​សេរី​កម្មករ​ថា នៅ​ក្នុង​ក្រុមហ៊ុន សេងបូ មិន​ធ្លាប់​មាន​ការ​បង្កើត​សហជីព ដើម្បី​ការពារ​សិទ្ធិ​កម្មករ​ពី​មុន​មក​នោះ​ទេ។ អ្នកស្រី​បន្ត​ថា ដោយ​ឃើញ​ពី​ទុក្ខ​លំបាក​កម្មករ​នៅ​ក្នុង​ក្រុមហ៊ុន ដូច​ជា ការ​បើក​ប្រាក់ខែ​មិន​គ្រប់​ចំនួន ការ​បើក​ប្រាក់ខែ​មក​បាន​ក្រដាស​ប្រាក់​ទក់ ឬ​រហែក​ជា​ដើម កម្មករ​តែង​ស្នើសុំ​ឲ្យ​រដ្ឋបាល​ក្រុមហ៊ុន​ឲ្យ​ដោះស្រាយ ប៉ុន្តែ​គ្មាន​ដំណោះស្រាយ​អ្វី​នោះ​ទេ ថែម​ទាំង​គំរាម​បញ្ឈប់​កម្មករ​ពី​ការងារ​ទៀត ។

កាល​ពី​ថ្ងៃ​ទី២៧ តុលា មុន​ពេល​កូដករ​ធ្វើ​កូដកម្ម​នៅ​នេះ ពួក​គាត់​បាន​ជូន​ដំណឹង​ដល់​ថៅកែ​ក្រុមហ៊ុន​អំពី​ការ​ធ្វើ​កូដកម្ម​ទាមទារ​ឲ្យ​ថៅកែ​ក្រុមហ៊ុន​ទទួល​យក​ប្រធាន និង​អនុប្រធាន​សហជីព​ប្រចាំ​ក្រុមហ៊ុន សេងបូ ឲ្យ​ចូល​ធ្វើ​ការ​វិញ ។ នៅថ្ងៃទី៦ វិច្ឆិកា ក្រុមហ៊ុន​បាន​អនុញ្ញាត​ឲ្យ​អនុ​ប្រធាន​សហជីព​ប្រចាំ​ក្រុមហ៊ុន សេងបូ លោក ហាក់ ហៀង ចូល​ធ្វើ​ការ​វិញ ហើយ​អ្នកស្រី រឿន កូលាប នៅ​បន្ត​ធ្វើ​កូដកម្ម​តែ​ម្នាក់​ឯង ។

ឆ្លើយ​តប​ចំពោះ​ការ​ធ្វើ​កូដកម្ម​នេះ ប្រធាន​ផ្នែក​រដ្ឋបាល នៃ​ក្រុមហ៊ុន សេងបូ ហ្គាមិន លោក អាំ មន្នី ប្រាប់​វិទ្យុ​អាស៊ី​សេរី​ថា អ្នកស្រី រឿន កូលាប មិន​បាន​ជូន​ដំណឹង​ផ្ទាល់​មាត់ ឬ​លាយ​លក្ខណ៍​អក្សរ​ពី​ការ ដែល​ត្រូវ​បាន​ជ្រើសរើស​ជា​តំណាង​សហជីព​នោះ​ទេ តែ​ករណី​តំណាង​សហជីព​ពិតប្រាកដ គឺ​លោក ហាក់ ហៀង ដែល​បាន​ការពារ​ដោយ​ច្បាប់ គឺ​ត្រូវ​បាន​ក្រុមហ៊ុន​អនុញ្ញាត​ឲ្យ​ចូល​ធ្វើការ​វិញ​ហើយ។ លោក​បញ្ជាក់​ថា ការ​បញ្ឈប់​អ្នកស្រី រឿន កូលាប នេះ​មិន​ជាប់​ពាក់ព័ន្ធ​នឹង​ការ​រើសអើង​សហជីព​អ្វី​នោះ​ទេ ហើយ​មូលហេតុ ដែល​ឈាន​ដល់​ការ​បញ្ឈប់​អ្នកស្រី រឿន កូលាប បណ្ដាល​មក​ពី​អ្នកស្រី​ធ្វើ​ការ​មិន​គ្រប់​ចំនួន​ដូច​កម្មករ​ដទៃ​តែ​ប៉ុណ្ណោះ។

សហព័ន្ធ​សហជីព​សេរី​កម្មករ នៅថ្ងៃទី៦វិច្ឆិកា បាន​បង្ហោះ​រូបភាព​ធ្វើ​កូដកម្ម​នៅ​ខាង​មុខ​ក្រុមហ៊ុន សេងបូ ហ្គាមិន នៅ​លើ​ទំព័រ​ហ្វេសប៊ុក និង​បាន​ចាត់​ទុក​ការ​បញ្ឈប់​ថ្នាក់​ដឹកនាំ​សហជីព​អ្នកស្រី រឿន កូលាប ជា​ការ​ធ្វើ​ទុក្ខ​បុក​ម្នេញ​លើ​សកម្មជន និង​ថ្នាក់​ដឹកនាំ​សហជីព​នៅ​កន្លែង​ការងារ។ សហព័ន្ធ​សហជីព​សេរី​កម្មករ ស្នើ​រដ្ឋមន្ត្រី​ក្រសួង​ការងារ អន្តរាគមន៍​ដោះស្រាយ​ការ​រើសអើង​សហជីព​នៅ​កន្លែង​ការងារ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។