សង្គមស៊ីវិលជំរុញឲ្យរដ្ឋាភិបាលថ្មី មានគោលនយោបាយដោះស្រាយវិបត្តិជួញដូរមនុស្ស និងការឆបោកតាមប្រព័ន្ធអនឡាញនៅកម្ពុជា ក្នុងពេលអាមេរិកសន្យាថា នឹងបន្តជួយពង្រឹងផ្នែកបច្ចេកទេស ដើម្បីទប់ស្កាត់បទឧក្រិដ្ឋកម្មឆ្លងដែនមួយនេះ។ សង្គមស៊ីវិលថា នេះ វាពាក់ព័ន្ធបញ្ហាសិទ្ធិមនុស្សដ៏ធំមួយសម្រាប់កម្ពុជា ដែលប៉ះពាល់ដល់មុខមាត់ប្រទេស និងសេដ្ឋកិច្ចជាតិ។
បញ្ហាការជួញដូរមនុស្សតាមប្រព័ន្ធអនឡាញ ជាបញ្ហាធំមួយក្នុងប្រទេសកម្ពុជា ដែលពិភពលោកបានដឹងឮក្នុងរយៈពេលប៉ុន្មានឆ្នាំកន្លងទៅនេះ ហើយសហរដ្ឋអាមេរិកបានដាក់កម្ពុជាក្នុងបញ្ជីខ្មៅក្នុងកម្រិតទី៣មកទល់ពេលនេះ។ កាលពីថ្ងៃទី១៣ កញ្ញា កន្លងទៅ ឯកអគ្គរាជទូតសហរដ្ឋអាមេរិកប្រចាំប្រទេសកម្ពុជា លោក ប៉ាទ្រីក ម័រហ្វី (Patrick Murphy) បានផ្តល់បទសម្ភាសន៍ដល់កាសែត ខ្មែរថែមស៍ (Khmer Times) ដែលស្និទ្ធនឹងរដ្ឋាភិបាល មានប្រសាសន៍ថា សហរដ្ឋអាមេរិកនៅបន្តជួយដោះស្រាយបញ្ហានេះ តែកម្ពុជាត្រូវមានឆន្ទៈនយោបាយ។
នាយកទទួលបន្ទុកកិច្ចការទូទៅនៃអង្គការសិទ្ធិមនុស្សលីកាដូ (Licadho) លោក អំ សំអាត មានប្រសាសន៍ថាកម្ពុជាត្រូវពង្រឹងច្បាប់ ដោយអាជ្ញាធរត្រូវតែអនុវត្តឲ្យបានហ្មត់ចត់ ហើយចាប់ផ្តើមសហការជាមួយប្រទេសជិតខាង ឬប្រទេសដែលបានប្តឹងមកម្ពុជា ថាមានប្រជាជនរបស់គេត្រូវបានចាប់ជំរិតហើយធ្វើការខុសច្បាប់ក្នុងប្រទេសកម្ពុជា ដោយចាញ់បោកឧក្រិដ្ឋជនតាមប្រព័ន្ធអនឡាញ។ លោកបន្តថា រឿងអំពើពុករលួយក៏ជាកត្តាសំខាន់ដែលកម្ពុជាត្រូវលប់បំបាត់។ «»
ស្រដៀងគ្នានេះដែរ អ្នកសិក្សាផ្នែកច្បាប់ លោក វ៉ន ចាន់ឡូត យល់ឃើញថា នេះជាសញ្ញាវិជ្ជមាន ដែលអាមេរិកប្ដេជ្ញាបន្តជួយកម្ពុជាក្នុងរឿងមួយនេះ ព្រោះគេយល់ឃើញថា ជាវិបត្តិធ្ងន់ធ្ងរមួយសម្រាប់មុខមាត់កម្ពុជា និងប៉ះពាល់ដល់សេដ្ឋកិច្ចជាតិទៀតផង។ លោក វ៉ន ចាន់ បន្តថា អាមេរិកជាប្រទេសប្រជាធិបតេយ្យ ដែលគោរពនីតិរដ្ឋច្បាស់លាស់ ហើយគេតែងរកដំណោះស្រាយបញ្ហាចម្បងជូនពលរដ្ឋគេ ហើយរឿងនេះក៏មានពាក់ព័ន្ធជាមួយជនជាតិអាមេរិក ដែលបានលង់ខ្លួនចាញ់ការឆបោកអនឡាញដែរ។ លោកបន្ថែមថា កម្ពុជាក្នុងអាណត្តិរដ្ឋាភិបាលមុនៗ បានចំហព្រំដែនជើងមេឃ អ្នកណាក៏អាចចូលកម្ពុជាបានដោយងាយ រួមមានទាំងបណ្ដាញឧក្រិដ្ឋកម្មអនឡាញរបស់ជនជាតិផង។ នេះសបញ្ជាក់ថា កម្ពុជាពុំបានអនុវត្តច្បាប់ត្រឹមត្រូវទេ។ «»
ជុំវិញរឿងនេះ វិទ្យុអាស៊ីសេរីពុំអាចសុំការឆ្លើយតមពីអង្គភាពអ្នកនាំពាក្យរដ្ឋាភិបាលខ្មែរ លោក ប៉ែន បូណា បានទេ នៅថ្ងៃទី១៥ កញ្ញា។
ក្នុងឆ្នាំ២០២២ និង២០២៣ នេះ សហរដ្ឋអាមេរិកបានដាក់កម្ពុជាក្នុងបញ្ជីខ្មៅក្នុងចំណោមប្រទេសដែលមានឧក្រិដ្ឋកម្មជួញដូរមនុស្សតាមប្រព័ន្ធអនឡាញ និងឆ្លងដែន។ អាមេរិកមានគោលការណ៍ បន្តជួយកម្ពុជាក្នុងការពង្រឹងច្បាប់ និងការហ្វឹកហាត់ផ្នែកបច្ចេកទេសដល់ក្រសួងពាក់ព័ន្ធ ដើម្បីបន្តសហប្រតិបត្តិការប្រយុទ្ធប្រឆាំងអំពើខុសច្បាប់ទាំងនេះ។ អាមេរិកថា គោលការណ៍ទាំងនេះគឺដើម្បីជួយប្រទេសកម្ពុជា និងពលរដ្ឋជាខ្មែរជាចម្បង ហើយទីបំផុតអាមេរិកនឹងដកកម្ពុជាចេញពីបញ្ជីខ្មៅនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។