អាជ្ញាធរ​ខ្មែរ​ថា កម្ពុជា​ព្យាយាម​ជួយ​សង្គ្រោះ​ជនជាតិ​ឥណ្ឌា ដែល​រងគ្រោះ​ពី​ការ​ឆបោក​តាម​អនឡាញ

ដោយ សេក បណ្ឌិត
2024.05.23
អាជ្ញាធរ​ខ្មែរ​ថា កម្ពុជា​ព្យាយាម​ជួយ​សង្គ្រោះ​ជនជាតិ​ឥណ្ឌា ដែល​រងគ្រោះ​ពី​ការ​ឆបោក​តាម​អនឡាញ ​កាស៊ីណូ​ឈ្មោះ ជីនប៉ី ៤ (Jinbei-4) នៅ​ខេត្តព្រះសីហនុ ជា​ទីតាំង​ ដែល​មាន​ជនជាតិ​ឥណ្ឌា​ជា​ច្រើន​នាក់ ត្រូវ​បាន​គេ​បង្ខាំង និង​បង្ខំឱ្យធ្វើការងារ​ឆបោកតាមអនឡាញ ហើយ​អាជ្ញាធរ​ជួយ​សង្គ្រោះ​បាន ៥៨នាក់ កាល​ពី​ថ្ងៃ​ទី២០ ខែ​ឧសភា ឆ្នាំ២០២៤។
រូប៖ ហ្វេសប៊ុក

អាជ្ញាធរ​ខ្មែរ​ថា រដ្ឋាភិបាល​កម្ពុជា និង​ស្ថានទូត​ឥណ្ឌា​បាន​ធ្វើ​ការ​ជា​មួយ​គ្នា​ដិតដល់ ដើម្បី​ជួយ​សង្គ្រោះ​ជនជាតិ​ឥណ្ឌា​ដែល​រងគ្រោះ​ពី​ការ​ឆបោក​តាម​អនឡាញ។ ទោះ​ជា​យ៉ាង​ណា​មន្ត្រី​សិទ្ធិមនុស្ស​ថា អាជ្ញាធរ​ត្រូវ​តែ​ពន្លឿន​ក្នុង​ការ​ជួយ​សង្គ្រោះ​ ព្រម​ទាំង​ចាត់​វិធាន​ការ​ច្បាប់​ម៉ឺង​ម៉ាត់ ដើម្បី​បង្ក្រាប​ទៅ​លើ​មេ​ក្លោង និង​ទីតាំង​ទីតាំង​ប្រើប្រាស់​សម្រាប់​ការ​ឆបោក​ផង​ដែរ។

អ្នក​នាំ​ពាក្យ​រង​នៃ​ក្រសួង​មហាផ្ទៃ លោក ទូច សុឃៈ ប្រាប់​វិទ្យុ​អាស៊ី​សេរី​នៅ​ថ្ងៃ​ទី២៣ ខែឧសភា​ថា កន្លង​មក​ឯក​អគ្គ​រដ្ឋទូត​ឥណ្ឌា​ប្រចាំ​កម្ពុជា អ្នកស្រី ដេវីយ៉ានី អ៊ុតាំ ខូប្រាហ្គេត (Devyani Uttam Khobragade) និង​រដ្ឋមន្ត្រី​ក្រសួង​មហាផ្ទៃ លោក ស សុខា បាន​ជួប​គ្នា​ជា​ច្រើន​ដង ដើម្បី​ធ្វើ​ការ​រួម​គ្នា​ក្នុង​ការ​ជួយ​សង្គ្រោះ​ជនជាតិ​ឥណ្ឌា ដែល​ត្រូវ​បាន​បង្ខំ​ឱ្យ​ធ្វើ​ការ​ឆបោក​តាម​អនឡាញ​នៅ​កម្ពុជា។ លោក ទូច សុឃៈ ថា ការ​ចេញ​សេចក្ដី​ថ្លែងការណ៍​របស់​ស្ថាន​ទូត​ឥណ្ឌា​ឱ្យ​ពលរដ្ឋ​ខ្លួន​មាន​ការ​ប្រុង​ប្រយ័ត្ន​ក្នុង​ការ​ស្វែង​រក​ការងារ​នៅ​ប្រទេស​កម្ពុជា​នោះ គឺ​ជា​រឿង​ធម្មតា​ក្នុង​នាម​ជា​រដ្ឋាភិបាល​នៃ​ប្រទេស​មួយ ដើម្បី​ជួយ​ពលរដ្ឋ​របស់​ខ្លួន។

ទោះ​ជា​យ៉ាង​ណា​ក្ដី លោក​ថា កម្ពុជា​ក៏​ជា​ប្រទេស​រង​គ្រោះ​មួយ​នៅ​ក្នុង​តំបន់​ដោយ​សារ​បទ​ល្មើស​បច្ចេកវិទ្យា។

លោក ទូច សុឃៈ៖ «យើង​អាច​និយាយ​បាន​ថា កម្ពុជា​គឺ​ជា​ប្រទេស​មួយ​រងគ្រោះ ហើយ​យើង​មាន​ឆន្ទៈ​នៅ​ក្នុង​ការ​បោសសំអាត គ្រាន់​តែ​ថា ការ​បោស​សំអាត​របស់​យើង យើង​ត្រូវ​ការ​ស៊ើបអង្កេត​ឱ្យ​បាន​ដិតដល់​ដើម្បី​កំណត់​សញ្ញាណ​ គោលដៅ ឬ​ក៏​ទី​តាំង​របស់​ក្រុម​ជន​ល្មើស​ ព្រោះ​ក្រុម​ជន​ល្មើស​ចង់​មិន​ចង់​គេ​លប​លួច​បើក​មិន​ឱ្យ​សមត្ថកិច្ច​បាន​ដឹង មាន​ន័យ​ថា​គេ​ព្យាយាម​មិន​ឱ្យ​សមត្ថកិច្ច​ស៊ើបអង្កេត»

ស្ថានទូត​ឥណ្ឌា​នៅ​ប្រទេស​កម្ពុជា​បាន​ចេញ​សេចក្ដី​ជូន​ដំណឹង​ជា​បន្ត​បន្ទាប់​ក្នុង​រយៈ​ពេល​ប៉ុន្មាន​ខែ​ចុង​ក្រោយ​នេះ​ទៅ​កាន់​ជនជាតិ​ឥណ្ឌា ដែល​រស់​នៅ ឬ​មាន​បំណង​មក​ធ្វើ​ការ​នៅ​ប្រទេស​កម្ពុជា ឱ្យ​មាន​ការ​ប្រុង​ប្រយ័ត្ន​ក្នុង​ការ​ស្វែងរក​ប្រភព​ការងារ​ត្រឹមត្រូវ​ដើម្បី​ជៀស​ផុត​ពីការ​កុហក​បោក​ប្រាស់ដែល​ផ្សព្វផ្សាយ​តាម​ប្រព័ន្ធ​អ៊ីនធឺណិត ជា​ពិសេស ឱ្យ​ទៅ​ធ្វើការ​នៅ​តំបន់​សេដ្ឋកិច្ច​ពិសេស​ត្រី​កោណ​មាស ជាប់​ព្រំដែន​កម្ពុជា ឡាវ និង​វៀតណាម​ជា​ដើម។ គិត​ត្រឹម​ថ្ងៃ​ទី២២ ខែឧសភា មាន​ជន​ជាតិ​ឥណ្ឌា​ជាង ៣៦០នាក់ ត្រូវ​បាន​ជួយ​សង្គ្រោះ​ឱ្យ​ត្រឡប់​ទៅ​ប្រទេស​កំណើត​វិញ។

ប្រធាន​សមាគម​ការពារ​សិទ្ធិ​មនុស្ស​អាដហុក (Adhoc) លោក នី សុខា មាន​ប្រសាសន៍​ថា អាជ្ញាធរ​កម្ពុជា​គួរ​តែ​ពន្លឿន​ក្នុង​ការ​ជួយ​សង្គ្រោះ​ទាំង​ជន​ជាតិ​ឥណ្ឌា និង​ជនជាតិ​ផ្សេងៗ ដើម្បី​បញ្ជូន​ពួក​គាត់​ទៅ​ប្រទេស​កំណើត​វិញ។ ទន្ទឹម​នឹង​នេះ លោក នី សុខា ថា អាជ្ញាធរ​ត្រូវ​តែ​ចាត់​វិធាន​ការ​ច្បាប់​ម៉ឺង​ម៉ាត់ ដើម្បី​បង្ក្រាប​ទៅ​លើ​មេ​ក្លោង​ និង​ទីតាំង​នានា ដើម្បី​លុប​បំបាត់​ករណី​ជួញដូរ​មនុស្ស​ ករណី​ឆបោក​ នៅ​ប្រទេស​កម្ពុជា​តទៅ​ទៀត។

លោក នី សុខា«នៅ​លើ​ទឹក​ដី​របស់​យើង យើង​ត្រូវ​តែ​ធានា​គ្រប់​ប្រជាពលរដ្ឋ​ទាំង​អស់ ធានា​អំពី​សុវត្ថិភាព ​អំពី​បញ្ហា​សន្តិសុខ អំពី​អី​ហ្នឹង ហើយ​ប្រសិន​បើ​ករណី​ហ្នឹង​មិន​បាន​ឆ្លើយ​តប​ឱ្យ​បាន​ត្រឹម​ត្រូវ​ ឱ្យ​បាន​ជា​វិជ្ជមាន ដើម្បី​រក្សា​សុវត្ថិភាព​ឱ្យ​មាន​ការ​ទុក​ចិត្ត​ទេ វា​អាច​ធ្វើ​ឱ្យ​ជះ​ឥទ្ធិពល​មិន​ល្អ​សម្រាប់​បញ្ហា​សន្តិសុខ​របស់​ប្រទេស​យើង​ដែរ»

ស្ថានទូត​ឥណ្ឌា​ឱ្យ​ដឹង​ថា ពួកគេ​កំពុង​ទាក់ទង​ជា​មួយ​ជនជាតិ​ឥណ្ឌា​ជា​ច្រើន​នាក់ ដែល​ត្រូវ​បាន​ជម្លៀស​ជា​បន្ត​បន្ទាប់​ពី​កន្លែង​មួយ​ឈ្មោះ​ថា ក្រោយ​ធ្លាប់​ជាប់​ឃុំឃាំង​នៅ​កន្លែង​មួយ​ដែល​មាន​ឈ្មោះ​ថា ជីនប៉ី ៤ (Jinbei-4) កាល​ពី​ថ្ងៃ​ទី ២០ ខែ​ឧសភា។

កន្លង​ទៅ​អត្ថបទ​ស៊ើបអង្កេត​របស់​វិទ្យុ​អាស៊ី​សេរី​រក​ឃើញ​ថា ក្រុមហ៊ុន ជីនប៉ី (Jinbei Cambodia Investment Co. Ltd.) ដែល​ជា​ការ​ធ្វើ​អាជីវកម្ម​រួមគ្នា រវាង​ឈ្មួញ​ជន​ជាតិ​ចិន លោក ចេន ហ្ស៊ី និង​លោក ស សុខា ត្រូវ​បាន​រម្លាយ​ចោល​នៅ​ឆ្នាំ២០២១ តែ​វា​គឺ​ជា​ក្រុមហ៊ុន​មួយ​ក្នុង​ចំណោម​ក្រុមហ៊ុន​ចំនួន ៥ដាក់​ឈ្មោះ ជីនប៉ី ដែល​ត្រូវ​បាន​បង្កើត​ឡើង​ដោយ​លោក ចេន ហ្ស៊ី និង​នាយក​ប្រតិបត្តិ​សម្ព័ន្ធ​ក្រុមហ៊ុន ព្រីនស៍ ដទៃ​ទៀត។ នេះ​បើ​យោង​តាម​ទិន្នន័យ​ចុះបញ្ជី​អាជីវកម្ម​នៅ​កម្ពុជា។ ក្រុមហ៊ុន​ទាំងនេះ​រួមគ្នា​បង្កើត​បាន​ជា​សម្ព័ន្ធ​ក្រុមហ៊ុន ជីនប៉ី គ្រូប (Jinbei Group) ដែល​វ៉ឹបសៃថ៍ (Web site) របស់​សម្ព័ន្ធ​ក្រុមហ៊ុន​នេះ​អះអាង​ថា​មាន​​ទឹកប្រាក់​វិនិយោគ ៣០០លាន​ដុល្លារ ក្នុង​វិស័យ​ទេសចរណ៍​នៅ​កម្ពុជា៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។