ស្ត្រីវិចិត្រករខ្មែរដែលត្រូវជនបរទេសធ្វើទារុណកម្មស្ទើរបាត់បង់ជីវិតនៅប្រទេសថៃ ទាមទារឲ្យអាជ្ញាធរខ្មែរ និងថៃចាប់ជនដៃដល់មកដាក់ទោស និងរកអ្នកដែលបញ្ជាពីក្រោយ ព្រោះកញ្ញាមិនដែលមានរឿងជាមួយជនជាតិប៉ូឡូញ (Polish) ទាំងពីរនាក់នោះទេ។ មន្ត្រីសង្គមស៊ីវិលថា ស្ថានទូត និងរដ្ឋាភិបាលខ្មែរមិនត្រូវព្រងើយកន្តើយ ចំពោះករណីនេះទេ ពោលគឺ កម្ពុជាត្រូវសហការជាមួយថៃចាប់ជនល្មើស ដើម្បីរកយុត្តិធម៌ជូនស្ត្រីខ្មែររងគ្រោះ។
ស្ត្រីជាងគំនូរខ្មែរ ដែលត្រូវបានបុរសជនជាតិប៉ូឡូញពីរនាក់វាយធ្វើបាប ដោយជះទឹកអាស៊ីតលើមុខ និងលើរាងកាយ ហើយចាក់ឲ្យរបួសជាង ២៦០ថ្នេរ កាលពីថ្ងៃទី១ ខែវិច្ឆិកា នៅទីក្រុងផាត់ថៈយ៉ា (Pattaya) ខេត្តឈុនបុរី (Chonburi) ចង់ឃើញប៉ូលិសថៃ និងខ្មែរតាមចាប់ជនល្មើសមកផ្ដន្ទាទោស និងវែកមុខអ្នកនៅពីក្រោយអំពើហិង្សានេះ។
ស្ត្រីវិចិត្រករខ្មែរធ្វើការនៅប្រទេសថៃជាង ២ឆ្នាំ កញ្ញា នី ស្រីរ័ត្ន ប្រាប់វិទ្យុអាស៊ីសេរី នៅព្រឹកថ្ងៃទី១៥ ខែធ្នូថា កញ្ញាចេញពីពេទ្យមកសម្រាកព្យាបាលនៅផ្ទះជួលក្នុងប្រទេសថៃ ព្រោះដេកពេទ្យត្រូវបង់ប្រាក់ច្រើន។ កញ្ញានៅមិនទាន់អស់ចិត្តពីទង្វើហិង្សាលើរាងកាយនាង ដោយសារកញ្ញាមិនស្គាល់ជនជាតិប៉ូឡូញទាំងពីរនាក់នោះទេ ហើយក៏មិនដែលធ្វើអាក្រក់លើអ្នកណាដែរ។ កញ្ញាសង្ស័យថា ករណីនេះអាចជាការប្រច័ណ្ឌរបស់ស្ត្រីថៃ ដែលមិនបានរៀបការនឹងប្ដីបរទេស ហើយចោទកញ្ញាជាអ្នកបំបែកបំបាក់ពួកគេ។ កញ្ញាបន្តថា កញ្ញាបានប្ដឹងទៅអគ្គស្នងការនគរបាលជាតិថៃ និងស្ថានទូតកម្ពុជាប្រចាំប្រទេសថៃ ហើយប៉ូលិសថៃកំពុងប្រតិបត្តិការលើរឿងនេះ តែស្ថានទូតខ្មែរមិនទាន់មានការឆ្លើយតបទេ។ យ៉ាងណាក្ដី កញ្ញាស្នើរដ្ឋាភិបាល និងស្ថានទូតខ្មែរជួយការពារសុវត្ថិភាពកញ្ញានៅថៃ និងឪពុកម្ដាយនៅកម្ពុជាផង ព្រោះនៅតែមានជនអនាមិកផ្ញើសារគំរាមធ្វើបាបកញ្ញា និងគ្រួសារទៀត។
កញ្ញា នី ស្រីរ័ត្ន៖ «អ្វីដែលគេធ្វើបាបខ្ញុំហ្នឹងគ្រាន់តែជាតេស្ត(សាកល្បង) ទេ ព្រោះគេនឹងត្រឡប់មក មកខ្ញុំវិញ។ ពួកហ្នឹង គឺគេនឹងផ្ដោត(Focus)មកលើខ្ញុំវិញ។ ខ្ញុំអត់ដឹងថា គេចង់បានអីពីខ្ញុំ ខ្ញុំអត់មានលុយទេ ខ្ញុំក្រទេ ហើយក៏មិនមែនជាអ្នកល្បីដែរ ហើយក៏មិនមែនអ្នកធ្វើការធំដំអីដែរ។ ខ្ញុំអត់ដឹងថា ពួកគាត់ចង់បានអីពីខ្ញុំ ហើយខ្ញុំក៏អត់ដឹងថាមានចម្លើយអីឲ្យគេ។ ចាស៎! ជួយផ្សព្វផ្សាយដំណឹង ហើយឲ្យមានការការពារ ព្រោះខ្ញុំមិនដឹងថា ធ្វើម៉េច ខ្ញុំបារម្ភពីសុវត្ថិភាពខ្ញុំ និងគ្រួសារអនាគតណ៎ា។ ខ្ញុំអត់ដឹងថា គេគម្រោងចង់ធ្វើម៉េចទៀតណាបង»។
តាមរូបដែលផុសក្នុងបណ្ដាញសង្គម គឺកញ្ញាមានរបួសធ្ងន់រលាកពេញផ្ទៃមុខ ដោយសារជនបរទេសជះទឹកអាស៊ីតដាក់ និងចាក់ជាច្រើនកាំបិតឱ្យរបួសដេរជាង ២៦០ថ្នេរ ស្ទើរតែបាត់បង់ជីវិត។ កញ្ញាថា បើគេចង់សម្លាប់កញ្ញាគឺជារឿងងាយ តែនេះគេគ្រាន់តែព្រមានកញ្ញាប៉ុណ្ណោះ។
កញ្ញាបញ្ជាក់ថា ថ្ងៃកើតហេតុ មានស្ត្រីជនជាតិថៃម្នាក់ទូរស័ព្ទហៅកញ្ញាឲ្យទៅគូរគំនូរនៅលើជញ្ជាំងក្នុងហាង ដែលគេទើបបើកថ្មី។ តែលុះទៅដល់កន្លែងកើតហេតុ ស្ត្រីថៃនោះឲ្យបុរសបរទេសពីរនាក់មកទទួលកញ្ញា ហើយបុរសទាំងពីរក៏បានធ្វើសកម្មភាពចាប់កញ្ញាធ្វើបាប។
កញ្ញា នី ស្រីរ័ត្ន៖ «គាត់មកចាប់ជើងយើងជាប់ចឹង ប្រុសពីរនាក់ចាប់ក្ដោបស្មាឱបដៃយើងជាប់អត់ឲ្យរើ ហើយជើងហើយយកស្កុតរុំថែបជើងយើង ហើយយកមកបិទមាត់ទៀត ហើយក្រៀកយើងគ្រប។ ចង់និយាយថា គាត់ទ្រោបពីលើណា កុំឲ្យយើងរើណា មានម្នាក់ទ្រោបយើងពីលើកុំឲ្យយើងរើ។ ទៅពីក្រោយអគារហ្នឹង ហើយម្នាក់ទៀតធ្វើសកម្មភាព ចាក់ទឹកអាស៊ីដពីលើមុខយើង ហើយគាត់លើកខោ លើកខោយើង ហើយព្យាយាមចាក់ទឹកអាស៊ីដចូលទៅ ដើម្បីបង្ខូច ចង់និយាយថា អវយវៈរបស់យើងណា»។
កាសែតថៃរ៉ាត់ (Thairath) ចុះផ្សាយថា ស្ត្រីរងគ្រោះគឺ កញ្ញា នី ស្រីរ័ត្ន អាយុ ៣០ឆ្នាំ ត្រូវបុរសជនជាតិប៉ូឡូញពីរនាក់ គឺម្នាក់ឈ្មោះ ដាញ៉ែល (Daniel) និងម្នាក់ទៀតឈ្មោះ មេធីវ (Mathiv) បានបង្ករបួសលើដងខ្លួនស្ទើរបាត់បង់ជីវិត នៅថ្ងៃទី១ ខែវិច្ឆិកា នៅរីសត (resort) មួយ ក្នុងក្រុងផាត់ថៈយ៉ា (Pattaya) ខេត្តឈុនបុរី (Chonburi)។ អាជ្ញាធរថៃបានចេញដីកានៅថ្ងៃទី១០ ខែវិច្ឆិកា ឲ្យប៉ូលិសអន្តរជាតិអាំងទែប៉ូល (Interpol) តាមចាប់ជនបង្កហេតុទាំងពីរនាក់នោះមកផ្ដន្ទាទោសតាមច្បាប់ប្រទេសថៃ។ ករណីនេះ ចាប់ផ្ដើមផ្ទុះល្បីក្នុងប្រទេសថៃ ក្រោយពីស្ត្រីរងគ្រោះបានដាក់បណ្ដឹងទៅប៉ូលិសថៃ និងស្ថានទូតកម្ពុជា។
ទាក់ទងករណីស្ត្រីវិចិត្រករខ្មែរ ដែលត្រូវជនបរទេសធ្វើទារុណកម្មនៅប្រទេសថៃនេះ អគ្គលេខាធិការនៃគណៈកម្មាធិការជាតិដឹកនាំការបង្ក្រាបការជួញដូរ និងរត់ពន្ធមនុស្ស ការកេងប្រវ័ញ្ចកម្លាំងពលកម្ម និងការកេងប្រវ័ញ្ចផ្លូវភេទលើស្រ្ដី និងកុមារ អ្នកស្រី ជូ ប៊ុនអេង បានប្រាប់វិទ្យុអាស៊ីសេរី នៅយប់ថ្ងៃទី១៥ ធ្នូថា អ្នកស្រីមិនទាន់បានដឹងថា មានករណីនេះកើតឡើងនៅឡើយនោះទេ។ តែទោះជាយ៉ាងណាក្តី អ្នកស្រីថា អ្នកស្រីនឹងទាក់ទងទៅស្ថានទូតកម្ពុជាប្រចាំនៅប្រទេសថៃ ដើម្បីសួរនាំអំពីរឿងនេះ។
អ្នកស្រី ជូ ប៊ុនអេង៖«ពីព្រោះខ្ញុំអត់ដឹងរឿងមែន អត់ដឹងសោះ!ហើយអត់នឹងទាន់យល់អំពីរឿងនេះផង ប៉ុន្តែចាំមើលចង់ដឹងរឿងហ្នឹង ឥឡូវវាដល់ណា រឿងពិតវាយ៉ាងម៉េច?»។
អនុប្រធានយុវជនថ្នាក់ជាតិគណបក្សភ្លើងទៀន នៅប្រទេសថៃ លោក ផន ផាន់ណា ដែលតាមដានករណីនេះ បានរិះគន់ថា រដ្ឋាភិបាលខ្មែរមិនអើពើនឹងសុខទុក្ខរបស់ពលរដ្ឋខ្លួននៅក្រៅប្រទេស ខណៈរដ្ឋាភិបាលថៃបានដុតដៃដុតជើងតាមចាប់ជនដៃដល់ រហូតចេញលិខិតស្នើដល់ប៉ូលិសអន្តរជាតិ តាមចាប់បុរសជនជាតិប៉ូឡូញទាំងពីរមកផ្ដន្ទាទោសតាមបណ្ដឹងរបស់ស្ត្រីខ្មែររងគ្រោះ។ លោកបន្តថា សារព័ត៌មានថៃចុះព្រោងព្រាតពាក់ព័ន្ធករណីនេះ តែសារព័ត៌មានខ្មែរមិនឃើញចុះផ្សាយ ដើម្បីជួយដល់ស្ត្រីខ្មែររងគ្រោះនោះទេ។
លោក ផន ផាន់ណា៖ «ស្ថានទូតខ្មែរមិនថានៅប្រទេសថៃ ឬប្រទេសណាទេ យើងឃើញដូចជាប្រទេសម៉ាឡេស៊ី ដូចជាប្រទេសចិនដូចអី ដែលស្ត្រីខ្មែរគាត់ទៅបម្រើការងារនៅតាមបណ្ដាប្រទេសផ្សេងៗ ហ្នឹង។ ឃើញការរំលោភសិទ្ធិច្រើនជាពិសេសសិទ្ធិលើរាងកាយ រំលោភលើរាងកាយ រំលោភលើផ្លូវភេទផ្លូវអីហ្នឹង គឺច្រើនមែនទែន ហើយអាជ្ញាធរខ្មែរ ស្ថានទូតខ្មែរដែលប្រចាំការនៅទីនោះ ហើយជាឪពុកម្ដាយរបស់ប្រជាពលរដ្ឋខ្មែរ ហាក់ដូចជាមិនយកចិត្តទុកដាក់អីប៉ុន្មាន»។
ជុំវិញរឿងនេះដែរ មន្ត្រីគម្រោងនៃមជ្ឈមណ្ឌលសម្ពន្ធភាពការងារ និងសិទ្ធិមនុស្ស អង្គការសង់ត្រាល់ លោក លឹង សុផុន លើកឡើងថា ពលរដ្ឋខ្មែរនៅក្រៅប្រទេសដែលត្រូវជនបរទេសធ្វើបាប ហើយរដ្ឋាភិបាលខ្មែរ និងស្ថានទូតខ្មែរនៅទីនោះ មិនជួយធ្វើអន្តរាគមន៍ គឺធ្វើឲ្យអាប់ឱនមុខមាត់រដ្ឋាភិបាល ហើយធ្វើឲ្យបរទេសកាន់តែមើលងាយជាតិសាសន៍ខ្មែរ។ លោកបន្តថា ករណីស្ត្រីវិចិត្រករខ្មែរត្រូវជនបរទេសវាយដំ និងជះទឹកអាស៊ីតលើខ្លួន ជាអំពើមួយសាហាវ ហើយរដ្ឋាភិបាលខ្មែរត្រូវតែជំរុញស្ថានទូតខ្មែរ ឲ្យទៅត្រួតពិនិត្យរកហេតុផលពិតប្រាកដ ដើម្បីឲ្យជនរងគ្រោះទទួលបានយុត្តិធម៌។
លោក លឹង សុផុន៖ «រដ្ឋាភិបាលវាគួរណាតែយកចិត្តទុកដាក់ទៅលើករណីអ៊ីចឹងៗណា ព្រោះអានេះជាការប្រើអំពើហិង្សាបំពានអ៊ីចឹងណា បំពានសិទ្ធិ បំពានលើរាងកាយហើយជាករណីដែលត្រូវតែធ្វើណា។ ត្រូវតែធ្វើព្រោះអី យើងជាមនុស្សជាតិមួយដែរ ហើយបើកាលណាតែជនជាតិសាសន៍គេធ្វើបាបទៅលើប្រជាជនយើង យើងគួរតែគិតពិចារណាច្បាស់លាស់ថា តើទុកឲ្យគេមើលងាយយើងធ្វើបាបតាមតែចិត្ត ឬយើងត្រូវតែជួយ តែនិយាយឲ្យពិតទៅវាគួរណាតែជួយរឿងអ៊ីចឹងៗ។ គួរណាតែជួយរកយុត្តិធម៌ឲ្យច្បាស់លាស់ សួរថាហេតុផល ដែលហេតុកើតឡើងអ៊ីចឹង ដោយសារអី»។
កាសែតថៃ ចុះផ្សាយថា ជនជាតិប៉ូឡូញពីរនាក់ដែលធ្វើទារុណកម្មស្ត្រីវិចិត្រករខ្មែរនោះ ចូលមកប្រទេសថៃនៅថ្ងៃទី២០ ខែតុលា ហើយបានចាកចេញពីប្រទេសថៃកាលពីថ្ងៃទី៣ ខែវិច្ឆិកា បន្ទាប់ពីវាយប្រហារលើស្ត្រីខ្មែរបានពីរថ្ងៃ។ ប៉ូលិសថៃកំពុងចាត់វិធានការតាមចាប់ជនបរទេសទាំងពីរនាក់នោះ។
នេះមិនមែនជាករណីថ្មីនោះទេដែលពលរដ្ឋខ្មែរ ត្រូវបានគេធ្វើទារុណកម្ម វាយធ្វើបាប ចាប់រំលោភ និងបាញ់សម្លាប់នៅក្នុងប្រទេសថៃនោះ។ ករណីទាំងនោះ រួមមាននារីខ្មែរម្នាក់ត្រូវបានថៅកែកាស៊ីណូជនជាតិថៃ នៅទីក្រុងបាងកក វាយធ្វើបាបសម្រាតខោអាវ បង្ខាំងនៅក្នុងបន្ទប់ កាលពីឆ្នាំ២០១៣ ករណីបុរសជនជាតិថៃ ៣នាក់ចាប់ស្ត្រីខ្មែរលក់ភេសជ្ជៈផ្សាររ៉ុងក្លឿ ទៅរំលោភបូកនៅក្នុងផ្ទះសំណាក់ខេត្តស្រះកែវ ព្រមទាំងករណីថៅកែថៃ បាញ់សម្លាប់ពលករខ្មែរជាច្រើននាក់ទៀត។ ប៉ុន្តែករណីទាំងអស់នេះ មន្ត្រីសង្គមស៊ីវិល ឲ្យដឹងថា ជនរងគ្រោះខ្មែរ កម្រទទួលបានយុត្តិធម៌ណាស់ ដោយសារតែភាគីអាជ្ញាធរកម្ពុជាពុំសូវសហការ និងជួយអន្តរាគមន៍ទៅអាជ្ញាធរថៃ៕
អត្ថបទនេះ ត្រូវបានធ្វើបច្ចុប្បន្នភាព៖ ដោយដាក់បញ្ចូលព័ត៌មានឆ្លើយតបពីអ្នកស្រី ជូ ប៊ុនអេង អគ្គលេខាធិការនៃគណៈកម្មាធិការជាតិដឹកនាំការបង្ក្រាបការជួញដូរ និងរត់ពន្ធមនុស្ស ការកេងប្រវ័ញ្ចកម្លាំងពលកម្ម និងការកេងប្រវ័ញ្ចផ្លូវភេទលើស្រ្ដី និងកុមារ។
សម្រាប់លោកអ្នកនាង ដែលចង់អានអត្ថបទទាក់ទងរឿងនេះ ជាភាសាអង់គ្លេស សូមចុចតំណភ្ជាប់នេះ៖
[ Attacked with knife and acid, Cambodian artist calls for arrest of 2 assailantsOpens in new window ]
A Cambodian artist living in Thailand has called on authorities in the two countries to arrest and bring to justice two foreign nationals believed to be Polish who attacked her with a knife, a hammer and acid last month in a case that has gotten widespread attention in Thailand.