គ្រួសារសកម្មជនបរិស្ថានជំរុញឱ្យរដ្ឋាភិបាលបញ្ឈប់យកគុកច្រវាក់ពង្រត់ពួកគាត់ឱ្យបែកបាក់គ្រួសារ
2024.09.09
សកម្មជនចលនាមាតាធម្មជាតិចំនួន ៥នាក់ រួមមាន ពីឆ្វេងទៅស្ដាំ លោក លី ចាន់ដារ៉ាវុត កញ្ញា ឡុង គន្ធា កញ្ញា ភួន កែវរស្មី លោក យីម លាងហ៊ី និងលោក ថុន រដ្ឋា ដែលត្រូវបានសមត្ថកិច្ចបញ្ជូនទៅឃុំខ្លួននៅពន្ធនាគារតាមខេត្តផ្សេងៗ គ្នា។
រូបពីពលរដ្ឋ
សាច់ញាតិសកម្មជនបរិស្ថានទទូចដល់រដ្ឋាភិបាលលោក ហ៊ុន ម៉ាណែត ឱ្យបញ្ឈប់ប្រើប្រាស់គុកច្រវាក់ដើម្បីពង្រាត់ក្រុមគ្រួសាររបស់ពួកគាត់ឱ្យរស់នៅបែកបាក់គ្នា និងរងសម្ពាធផ្លូវចិត្តគ្រួសារតទៅទៀត។ មន្ត្រីសិទ្ធិមនុស្សយល់ឃើញថា រដ្ឋាភិបាលត្រូវដោះលែងអ្នកជាប់ឃុំទាំងអស់ដែលរដ្ឋាភិបាលចោទប្រកាន់តែគ្មានកំហុសឱ្យបានជួបជុំគ្រួសារឡើងវិញ និងដើម្បីផ្សះផ្សាជាតិ។
ស្របពេលដែលពួកអ្នកកាន់អំណាចកំពុងជួបជុំគ្រួសារ តែងនិពន្ធបទចម្រៀងបង្ហាញពីភាពស្និទ្ធស្នាលក្នុងគ្រួសារនោះ ក្រុមគ្រួសាររបស់សកម្មជនបរិស្ថានដែលកំពុងជាប់ពន្ធនាគារដោយសារសកម្មភាពការការពារធនធានធម្មជាតិកំពុងរស់នៅដោយទុក្ខសោកសង្រេង។
ប្អូនស្រីរបស់សកម្មជនចលនាមាតាធម្មជាតិ កញ្ញា ឡុង គន្ធា គឺកញ្ញា ឡុង សុខលីន ប្រាប់វិទ្យុអាស៊ីសេរីនៅថ្ងៃទី៨ ខែកញ្ញា ថា កញ្ញាបានទៅជួបសួរសុខទុក្ខបងស្រីនៅពន្ធនាគារខេត្តព្រះវិហារ ហើយស្ថានភាពបញ្ហាឈឺចង្កេះរបស់បងស្រីមានភាពប្រសើរឡើងច្រើន។ កញ្ញាបន្តថា ស្មារតីរបស់បងស្រីនៅតែរឹងមាំ ប៉ុន្តែកញ្ញាសោកស្ដាយដែលរដ្ឋាភិបាលចាប់បងស្រីដាក់ពន្ធនាគារទាំងអយុត្តិធម៌បែបនេះ។
កញ្ញា ឡុង សុខលីន៖ «ដោយសារឥឡូវក៏ជិតដល់ភ្ជុំបិណ្ឌហើយក៏និយាយទៅអាណិតម៉ែខ្លាំងដោយសារអីឆ្នាំនេះបាត់បង់សមាជិកម្នាក់ហើយយាយទើបតែស្លាប់។ ហើយឥឡូវត្រូវបាត់បង់កូនម្នាក់ទៀតហើយត្រូវថ្ងៃបុណ្យក៏កូនចៅគេគ្រប់គ្នាគេមកជួបជុំគ្នាតែកូនចៅគាត់បែរជាម្នាក់ត្រូវជាប់ពន្ធនាគារបើសិននេះត្រូវម្ដាយអ្នកមកលេងកូនវិញកូនអត់អាចមកលេងម្ដាយទៅវត្តជួបជុំគ្នាដូចលើកមុន»។
មិនខុសគ្នានេះដែរ បងប្រុសរបស់កញ្ញា ភួន កែវរស្មី គឺលោក ភួន ធារិទ្ធិ ថ្លែងថា វាគឺជារឿងដ៏អាម៉ាស់ដែលប្រព័ន្ធយុត្តិធម៌មិនអាចផ្ដល់យុត្តិធម៌ឱ្យប្អូនស្រីលោកបាន។ លោកអំពាវនាវដល់រដ្ឋាភិបាលឱ្យបញ្ឈប់ធ្វើទុក្ខបុកម្នេញដល់សកម្មជនបរិស្ថាន និងស្នើឱ្យមន្ត្រីពាក់ព័ន្ធបញ្ជូនប្អូនលោកមកឃុំនៅពន្ធនាគារព្រៃសវិញ។
លោក ភួន ធារិទ្ធិ៖ «រដ្ឋធម្មនុញ្ញយើងបាននិយាយហើយប្រជាជនយើងមានសិទ្ធិនិយាយស្ដី បញ្ចេញមតិ ចូលរួមការពារធនធានធម្មជាតិចូលរួមលើកកម្ពស់យុត្តិធម៌សង្គមអ៊ីចឹងទាំងអស់នេះវាអ្វីដែលមានចែងនៅក្នុងរដ្ឋធម្មនុញ្ញ ហើយក៏អត់មានអ្វីត្រូវខុសច្បាប់ ល្មើសច្បាប់ដែរ។ ហើយអំពើរបស់ពួកគាត់ក៏មិនត្រូវជាអំពើក្បត់ជាតិអីណាមួយដែលយើងមើលឃើញ ជាទូទៅប្រជាពលរដ្ឋទាំងអស់គាត់មើលឃើញជាក់ស្ដែងទាំងអស់គ្នា។ អ៊ីចឹងគឺជារឿងអាម៉ាស់ដែលប្រព័ន្ធយុត្តិធម៌នៅក្នុងប្រទេសយើងចោទប្រកាន់ពួកគាត់»។
កន្លងទៅអង្គការឃ្លាំមើលសិទ្ធិមនុស្ស និងក្រុមគ្រួសារសកម្មជនបរិស្ថានរិះគន់ថា អាជ្ញាធរយកសកម្មជនទាំងនោះទៅឃុំនៅក្នុងពន្ធនាគារដាច់ដោយឡែកពីគ្នានៅតាមខេត្តឆ្ងាយពីក្រុមគ្រួសារ គឺជាទណ្ឌកម្មផ្លូវចិត្តដ៏ធ្ងន់ធ្ងរ និងរំលោភបំពានសិទ្ធិរបស់ជនជាប់ឃុំ។ ក្រៅពីនេះពួកគេថា ការចាប់ខ្លួនសកម្មជនបរិស្ថាន និងសកម្មជនសង្គមកន្លងមកគឺធ្វើឡើងក្រោមរូបភាពនយោបាយដែលផ្ទុយពីរដ្ឋធម្មនុញ្ញ និងបង្ហាញថាប្រព័ន្ធយុត្តិធម៌ស្ថិតនៅក្រោមខ្សែញាក់របស់អ្នកនយោបាយកាន់អំណាច។
វិទ្យុអាស៊ីសេរីមិនអាចទាក់ទងអ្នកនាំពាក្យក្រសួងយុត្តិធម៌លោក ជិន ម៉ាលីន និងប្រធានអង្គភាពអ្នកនាំពាក្យរដ្ឋាភិបាល លោក ប៉ែន បូណា ដើម្បីសុំការឆ្លើយតបបញ្ហានេះទេនៅថ្ងៃទី៨ ខែកញ្ញា។
ជុំវិញបញ្ហានេះ អនុប្រធានផ្នែកសិទ្ធិមនុស្សដីធ្លី ធនធានធម្មជាតិនៃសមាគមការពារសិទ្ធិមនុស្ស អាដហុកលោក យិន ម៉េងលី មានប្រសាសន៍ថា រដ្ឋាភិបាលគួរតែមានការផ្សះផ្សាជាតិឡើងវិញ និងបើកលំហសិទ្ធិសេរីភាពបញ្ចេញមតិដល់ពលរដ្ឋ ឱ្យស្របតាមច្បាប់ ។ លោកបន្តថា ការចាត់ទុកពលរដ្ឋ ឬសកម្មជនបរិស្ថានដែលមានគំនិតផ្ទុយពីរដ្ឋាភិបាលគឺជាក្រុមប្រឆាំងមិនមែនជាដំណោះស្រាយសមស្របសម្រាប់ជាតិឡើយ។
លោក យិន ម៉េងលី៖ «នៅតែទទូចឱ្យបើកលំហនយោបាយធ្វើការសម្របសម្រួលនយោបាយហើយទាំងមតិជាតិ និងអន្តរជាតិក៏នៅតែទទូចសុំឱ្យរដ្ឋាភិបាលសម្របសម្រួលបញ្ហានយោបាយនេះឡើងវិញ។ បញ្ហានយោបាយមិនអាចសម្របសម្រួលបានទេយើងមិនសង្ឃឹមថា សេរីភាពនេះនឹងល្អប្រសើរឡើងវិញទេ»។
គិតចាប់តាំងពីខែកក្កដាមក មានសកម្មជនសង្គម នយោបាយ និងបរិស្ថានប្រមាណ ៦០នាក់ហើយ ដែលត្រូវបានរដ្ឋាភិបាលចាប់ដាក់ពន្ធនាគារ ក្រោមការចោទប្រកាន់គ្មានភស្តុតាងអំពីបទរួមគំនិតក្បត់ និងញុះញង់ឱ្យមានភាពវឹកវរធ្ងន់ធ្ងរដល់សន្តិសុខសង្គម ដែលបញ្ហានេះធ្វើឱ្យអង្គការជាតិ និងអន្តរជាតិចេញសាររិះគន់ធ្ងន់ៗ និងចោទមេដឹកនាំកម្ពុជា ជាពិសេស លោក ហ៊ុន សែន និងលោក ហ៊ុន ម៉ាណែត ថា ដឹកនាំប្រទេសបែបផ្ដាច់ការ។
ក្រុមគ្រួសារសកម្មជនបរិស្ថាន និងអ្នកឃ្លាំមើលសិទ្ធិមនុស្សតែងតែជំរុញដល់រដ្ឋាភិបាលលោក ហ៊ុន ម៉ាណែត ថា គួរតែដោះលែងអ្នកជាប់ឃុំមនសិការទាំងអស់ឱ្យមានសេរីភាពឡើងវិញ ដើម្បីបង្ហាញអំពីឆន្ទៈស្ដារប្រជាធិបតេយ្យ និងការគោរពសិទ្ធិមនុស្សពិតប្រាកដ។ ប៉ុន្តែរយៈពេល ១ឆ្នាំក្រោយពីឡើងកាន់តំណែងជានាយករដ្ឋមន្ត្រី លោក ហ៊ុន ម៉ាណែត ដែលបានបញ្ចប់ការសិក្សានៅប្រទេសប្រជាធិបតេយ្យអស់ជាច្រើនឆ្នាំ មិនទាន់បានយកឱកាស និងតំណែងដ៏កម្រនេះមកដោះស្រាយវិបត្តិនយោបាយ និងបញ្ហាប្រព័ន្ធយុត្តិធម៌ ដែលបន្សល់ទុកពីឪពុករបស់លោកឡើយ។ ផ្ទុយទៅវិញ លោកកាន់តែបង្កើនការចាប់ខ្លួនពលរដ្ឋ និងយុវជន ដែលហ៊ានរិះគន់ការដឹកនាំរបស់រដ្ឋាភិបាលលោកដាក់ពន្ធនាគារជាបន្តបន្ទាប់ថែមទៀតផង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- ក្រសួងមហាផ្ទៃបញ្ជាក់ថា កូនមន្ត្រីជាន់ខ្ពស់ ដែលបើកឡានបុកមនុស្សស្លាប់ពីរនាក់ នៅអូស្ត្រាលីនោះ គឺឈ្មោះ ឌឿន ឧត្ដមសេនីយ៍
- ក្រុមប្រឹក្សាអភិវឌ្ឍន៍កម្ពុជាគ្រោងធ្វើបេសកកម្មដើរគោះទ្វាររកវិនិយោគិននៅអាមេរិកជាថ្មី
- លោក ហ៊ុន ម៉ាណែត ប្រតិកម្មអ្នករិះគន់ព្រឹត្តិការណ៍ Gumball 3000
- លោក ហ៊ុន សែន បង្កើនការគំរាមកំហែងឆ្លងដែនលើអ្នករិះគន់
- សមត្ថកិច្ចម៉ាឡេស៊ីចាប់ពលករខ្មែរម្នាក់ពាក់ព័ន្ធរិះគន់រដ្ឋាភិបាលកម្ពុជា
អត្ថបទពេញនិយម
សិទ្ធិមនុស្ស
- អ្នកឃ្លាំមើលថា រដ្ឋមន្ត្រីការបរទេសកម្ពុជា និយាយភូតកុហកពិភពលោកថាកម្ពុជាគោរពសិទ្ធិមនុស្ស និងនីតិរដ្ឋ
- សមត្ថកិច្ចចាប់ខ្លួនអ្នកសារព័ត៌មានឯករាជ្យ ដែលធ្លាប់បានពានពីសហរដ្ឋអាមេរិក គឺលោក ម៉ិច ដារ៉ា
- សមត្ថកិច្ចម៉ាឡេស៊ីបញ្ជូនពលករខ្មែរម្នាក់ដែលរិះគន់រដ្ឋាភិបាលលោក ហ៊ុន ម៉ាណែត មកកម្ពុជា
- អង្គការអន្តរជាតិថា រដ្ឋាភិបាលបានបរាជ័យ ចំពោះការធានារបស់ខ្លួនលើកកម្ពស់សិទ្ធិមនុស្ស
- សកម្មជននិងសង្គមស៊ីវិលទទូចឱ្យរដ្ឋាភិបាលស្ដារទំនាក់ទំនងកម្ពុជា និងស៊ុយអែតឡើងវិញ