មន្ត្រី​ជាន់​ខ្ពស់​អឺរ៉ុប​ជំរុញ​រដ្ឋាភិបាល​កម្ពុជា​ឱ្យ​ប្រឹង​ស្ដារ​​ស្ថានការណ៍​ស្រុក​ទេស​ ដើម្បី​រក្សា EBA

ដោយ សេក បណ្ឌិត
2019-12-16
អ៊ីម៉ែល
មតិ
Share
បោះពុម្ព
ទង់ជាតិ សហគមន៍អឹរ៉ុប។
ទង់ជាតិ សហគមន៍អឹរ៉ុប។
Facebook

មន្ត្រី​ជាន់ខ្ពស់​របស់​សហភាព​អឺរ៉ុប​ទទូច​​ឱ្យ​រដ្ឋាភិបាល​​កម្ពុជា​ស្ដារ​​សិទ្ធិមនុស្ស និង​​លទ្ធិប្រជាធិបតេយ្យ​​ឡើងវិញ ដើម្បី​រក្សា​ការ​អនុគ្រោះ​ពន្ធ EBA។ សហជីព​យល់​ថា មក​ដល់​ពេល​នេះ ស្ថានភាព​សិទ្ធិមនុស្ស និង​ប្រជាធិបតេយ្យ​នៅ​​មិន​​ទាន់​មាន​ការ​វិវឌ្ឍ​ជា​វិជ្ជមាន​​គួរ​ឱ្យ​កត់​សម្គាល់​នោះ​ទេ ហើយ​បើ​ស្ថានភាព​បែបនេះ​​នៅ​​តែ​បន្ត​ កម្ពុជា​ទំនង​​ជា​គេច​មិន​ផុត​ពី​ការ​បាត់​​បង់​​ប្រព័ន្ធ​អនុគ្រោះ​ពន្ធ EBA នោះ​ឡើយ។

តំណាង​ជាន់​ខ្ពស់​សហភាព​អឺរ៉ុប​ទទួល​បន្ទុក​​កិច្ច​​ការបរទេស និង​​គោល​នយោបាយ​សន្តិសុខ និង​​ជា​អនុប្រធាន​​គណៈកម្មការ​​អឺរ៉ុប លោក ចូសេប បូរែល ហ្វុងតែល (Josep Borrell Fontelles) ថ្លែង​ថា រដ្ឋាភិបាល​​កម្ពុជា​ត្រូវ​ប្រឹង​ប្រែង​បន្ថែម​​ទៀត​ដើម្បី​​ធ្វើ​ឱ្យ​ប្រសើរ​ឡើង​នូវ​ស្ថានភាព​សិទ្ធិមនុស្ស និង​​ប្រជាធិបតេយ្យ ព្រោះ​នេះ​ជា​រឿង​ចាំបាច់ ដែល​អាច​ឱ្យ​​កម្ពុជា​ទទួល​​បាន​ការ​អនុគ្រោះ​ពន្ធ EBA បន្ត​ទៅ​ទៀត។

លោក ចូសេប បូរែល ហ្វុងតែល (Josep Borrell Fontelles) ថ្លែង​បែប​នេះ​លើ​​បណ្ដាញ​សង្គម​​ធ្វីតធ័រ (Twitter) នៅ​ថ្ងៃទី១៥ ធ្នូ​ថា បន្ទាប់​ពី​​លោក​បាន​ជួប​ជាមួយ​រដ្ឋ​មន្ត្រី​ការ​បរទេស​កម្ពុជា លោក ប្រាក់​ សុខុន នៅ​​ក្នុង​ជំនួប​ដាច់​ដោយ​ឡែក​មួយ​​ក្នុង​​កិច្ច​ប្រជុំ​​អាស៊ី-អឺរ៉ុប (ASEM) ដែល​កំពុង​ប្រព្រឹត្តទៅ​​នៅ​ប្រទេស​អេស្ប៉ាញ។ លោ​ក​បញ្ជាក់​ថា នៅ​ក្នុង​ជំនួប​នោះ ពួ​ក​​លោក​​​បាន​ជជែក​​គ្នា​អំពី​​លទ្ធភាព​នៃ​ការ​ដក​ហូត​ប្រព័ន្ធ​អនុគ្រោះ​ពន្ធ ដែល​សហភាព​អឺរ៉ុប​​ធ្លាប់​​បាន​ផ្ដល់​ឱ្យ​កម្ពុជា។

ការ​ក្រើន​រំឭក​របស់​មន្ត្រី​ជាន់ខ្ពស់​សហភាព​អឺរ៉ុប ធ្វើ​ឡើង​ក្រោយ​​ពេល​​រដ្ឋាភិបាល​​កម្ពុជា​បាន​ផ្ញើ​របាយការណ៍​ឆ្លើយ​តប​នឹង​កង្វល់​របស់​សហភាព​អឺរ៉ុប​ជុំ​វិញ​រឿង​រំលោភ​សិទ្ធិមនុស្ស ដែល​​ជា​ផ្នែក​​មួយ​នៃ​នីតិវិធី​ព្យួរ​ការ​អនុគ្រោះ​ពន្ធ EBA

អាស៊ី​សេរី​​មិន​អាច​សុំ​ការ​បញ្ជាក់​បន្ថែម​ពី​​ជំនួប​រវាង​លោក ប្រាក់ សុខុន និង​​មន្ត្រី​​ជាន់ខ្ពស់​អឺរ៉ុប​នេះ​បាន​​ទេ នៅថ្ងៃទី១៦ ធ្នូ ដោយ​អ្នក​នាំ​ពាក្យ​ក្រសួង​ការបរទេស​លោក កុយ គួង មិន​លើក​ទូរស័ព្ទ។

ទោះ​ជា​យ៉ាង​ណា នៅ​ពេល​ផ្ញើ​របាយការណ៍​​ទៅ​សហភាព​អឺរ៉ុប​កាល​ពី​ពេល​ថ្មីៗនេះ ក្រសួង​​ការបរទេស​កម្ពុជា​បាន​ចេញ​សេចក្ដី​ថ្លែង​ការណ៍​​មួយ ដោយ​ស្នើ​ឱ្យ​​សហភាព​អឺរ៉ុប​ពិចារណា​ផ្តល់​​ការ​អនុគ្រោះ​ពន្ធ EBA ដល់​កម្ពុជា​បន្ត​​ទៅទៀត។ ក្រសួង​​ទទួល​ស្គាល់​ថា ការ​ដក​​ហូត​ប្រព័ន្ធ​អនុគ្រោះ​ពន្ធ EBA នឹង​ប៉ះពាល់​ដល់​កម្មករ​ប្រមាណ​ជិត​​មួយ​​លាន​នាក់ និង​​ក្រុម​គ្រួសារ​សាច់​ញាតិ​​របស់​ពួក​គាត់​ថែម​​ទៀត។

ប្រធាន​សហភាព​ការងារ​កម្ពុជា លោក អាត់ ធន់ សង្កេត​ឃើញ​ថា សហភាព​អឺរ៉ុប​ហាក់​មិន​ចង់​ដក​​ EBA ពី​កម្ពុជា​ឡើយ ព្រោះ​សហភាព​អឺរ៉ុប​​ដឹង​ថា វិធាន​ការ​​នេះ​នឹង​ប៉ះពាល់​ដល់​ពលរដ្ឋ​ខ្មែរ​រាប់​លាន​នាក់។ ទោះ​ជា​យ៉ាង​ណា លោក​ថា សហភាព​អឺរ៉ុប​មាន​លក្ខខណ្ឌ​ច្បាស់លាស់​ក្នុង​​ការ​ផ្តល់​ការ​អនុគ្រោះ​ពន្ធ​នេះ ដូច្នេះ​បើ​លក្ខខណ្ឌ​ទាំងនោះ​​មិន​​ត្រូវ​បាន​គោរព​ទេ សហភាព​អឺរ៉ុប​នឹង​ពិចារណា​ដក​ហូត​ទាំង​ស្រុង ឬ​ដក​​ហូត​ទៅ​តាម​វិស័យ​​។ លោក​​បន្ថែម​ថា ថ្វី​ដ្បិត​តែ​វិបត្តិ EBA បាន​​ឈាន​មក​ដល់​ដំណាក់​កាល​ទុំ​​ជោរ​បន្តិច​មែន ក៏​រដ្ឋាភិបាល​កម្ពុជា​នៅ​មាន​ពេល​ចុង​ក្រោយ​ដើម្បី​កែ​ប្រែ​ស្ថានភាព​ស្រុក​​ទេស​ឡើងវិញ មុន​ពេល​សហភាព​អឺរ៉ុប​សម្រេច​ចិត្ត​ចុងក្រោយ​ក្នុង​​រវាង២ ខែ​ខាង​មុខ​ទៀត​នេះ៖ «ខាង​សហភាព​អឺរ៉ុប​ហ្នឹង បាន​​ស្នើ​​ឱ្យ​ខាង​រដ្ឋាភិបាល​ពិនិត្យ​មើល​រឿង​ដែល​​ពាក់ព័ន្ធ​ទៅ​នឹង​ការ​វិវឌ្ឍ​នៅ​ក្នុង​ប្រទេស​កម្ពុជា​ ហើយ​រដ្ឋាភិបាល​អត់​ទាន់​បាន​ដោះស្រាយ​ អា​ហ្នឹង​ហើយ​ដែល​ជា​បញ្ហា​ដែល​សហភាព​អឺរ៉ុប​មិន​​អាច​បន្ត​ទៀត​បាន»

កាល​ពី​ឆ្នាំ២០១៨ កន្លងទៅ ​កម្ពុជា​បាន​នាំ​ទំនិញ​ទៅ​លក់​នៅ​ទីផ្សារ​អឺរ៉ុប ​គិត​ជា​ទឹកប្រាក់​ប្រមាណ ៥ពាន់ ៨រយ​លាន​ដុល្លារ​អាមេរិក ($5.8 billion) ដែល​ទំនិញ​ស្ទើរតែ​ទាំងអស់​រួច​កាតព្វកិច្ច​ពន្ធ​ដោយ​សារ​តែ​កម្មវិធី EBA។ ទោះ​ជា​យ៉ាង​ណា បើ​អត់ EBA ទេ នោះ​កម្ពុជា​នឹង​ត្រូវ​បង់​ពន្ធជិត៧ រយ​លាន​ដុល្លារ​អាមេរិក ក្នុង​មួយ​ឆ្នាំ ដែល​ប៉ះពាល់​ដល់​​ប្រាក់​ចំណេញ​​របស់​វិស័យ​​ឯកជន​ ហើយ​ក៏​នឹង​រាល​ដាល​ដល់​ប្រាក់​ចំណូល​របស់​កម្មករ​ក្នុង​វិស័យ​កាត់​ដេរ​ផង​ដែរ។

សមាគម​​ថៅកែ​រោងចក្រ​ដែល​តែង​​សម្រប​ខ្លួន​តាម​រដ្ឋាភិបាល​កម្ពុជា​នោះ បាន​ចេញ​មុខ​បង្ហាញ​ក្តី​​កង្វល់​ថា ការ​ដក​ប្រព័ន្ធ​អនុគ្រោះ​ពន្ធ EBA នឹង​ប៉ះពាល់​​ដល់​កម្មករ​ប្រមាណ ៧៥ម៉ឺន​នាក់ និង​​គ្រួសារ​របស់​ពួកគេ​ជាង ៣លាន​នាក់​ទៀត។ សមាគម​ថៅកែ​រោងចក្រ​បាន​ទទូច​ឱ្យ​សហភាព​អឺរ៉ុប​ផ្ដល់​ការ​អនុគ្រោះ​ពន្ធ EBA ដល់​កម្ពុជា​បន្ត​ទៅទៀត។

សហភាព​អឺរ៉ុប​នឹង​សម្រេច​ចិត្ត​​ជា​ចុងក្រោយ​ថា ត្រូវ​រក្សា​ទុក ឬ​ដក​ការ​អនុគ្រោះ​ពន្ធ​ពី​កម្ពុជា នៅ​អំឡុង​​ខែ​កុម្ភៈ ឆ្នាំ២០២០ ខាង​មុខ ក៏​ប៉ុន្តែ​សហភាព​អឺរ៉ុប​ធ្លាប់​​បាន​បញ្ជាក់​ប្រាប់​រដ្ឋាភិបាល​​លោក ហ៊ុន សែន រួច​ហើយ​ថា មាន​តែ​ការ​ស្ដារ​សិទ្ធិមនុស្ស​ និង​ប្រជាធិបតេយ្យ​​ឡើងវិញ​​ទេ ទើប​ជា​លក្ខខណ្ឌ​ដែល​កម្ពុជា​អាច​ទទួល​បាន​ផល​ប្រយោជន៍​ពី​ការ​អនុគ្រោះ​ពន្ធ​នេះ​​បន្ត​​ទៅ​ទៀត៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល