នៅថ្ងៃច័ន្ទនេះ គណបក្សសង្គ្រោះជាតិដែលត្រូវបានរំលាយដោយរដ្ឋាភិបាលឯកបក្សរបស់លោក ហ៊ុន សែន បានចេញសេចក្តីថ្លែងការណ៍«ថ្កោលទោសយ៉ាងដាច់អហង្ការ» ចំពោះការបង្ខំឱ្យបិទវិទ្យុសំឡេងប្រជាធិបតេយ្យ(VOD)ទាំងបំពាន។
គណបក្សប្រឆាំងបានបញ្ជាក់ថា ការបិទវិទ្យុឯករាជ្យមួយនេះគឺធ្វើឡើងតាមការចង់បានរបស់លោក ហ៊ុន សែន ហើយផ្ទុយពីរដ្ឋធម្មនុញ្ញរបស់ប្រទេសកម្ពុជា ក្នុងនោះដែរដំណើរការនៃការបិទវិទ្យុVODគឺលើសពីការគ្រប់គ្រងអភិបាលកិច្ចនៅកម្ពុជា និងមិនមានភាពត្រឹមត្រូវ ឬឆ្លងកាត់ត្រួតពិនិត្យដោយឯករាជ្យនោះទេ។ អ្វីៗត្រូវបានធ្វើឡើងតាមការទាមទារចង់បានរបស់លោក ហ៊ុន សែន តែប៉ុណ្ណោះ ដោយដំបូងលោក ហ៊ុន សែន ទាមទារឱ្យមានការសុំទោស ក្រោយមកក៏បញ្ជាឱ្យដកអាជ្ញាប័ណ្ណតែម្តង។
គណបក្សសង្គ្រោះជាតិបន្តថា៖ «ការបិទស្ថាប័នផ្សព្វផ្សាយក្នុងចំណោមស្ថាប័នផ្សព្វផ្សាយឯករាជ្យចុងក្រោយបង្អស់របស់កម្ពុជានេះ មានន័យថាជារួមប្រព័ន្ធផ្សព្វផ្សាយគ្រប់ទំរង់ទាំងអស់ក្នុងប្រទេសនេះត្រូវបានគ្រប់គ្រងទាំងស្រុងដោយរដ្ឋាភិបាល។ ការបិទនេះគឺធ្វើឡើងក្នុងបរិបទនៃការបន្តចាប់ឃុំឃាំងសកម្មជន និងអ្នកគាំទ្រគណបក្សប្រឆាំងដាក់ពន្ធនាគារ ដោយមិនត្រឹមត្រូវ និងធ្វើការបំភិតបំភ័យជាប្រចាំដល់អ្នកដែលនៅតែហ៊ានប្រឆាំង»៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។