ក្រុម​ស្ត្រី​ថ្ងៃ​សុក្រ​ដាក់​ញត្តិ​ទៅ​ស្ថានទូត​បារាំង​សុំ​កិច្ច​អន្តរាគមន៍​ឱ្យ​របប​ភ្នំពេញ​គោរព​ស្មារតី ២៣​តុលា

ដោយ ខែ សុណង
2021-10-22
Share
ក្រុម​ស្ត្រី​ថ្ងៃ​សុក្រ​ដាក់​ញត្តិ​ទៅ​ស្ថានទូត​បារាំង​សុំ​កិច្ច​អន្តរាគមន៍​ឱ្យ​របប​ភ្នំពេញ​គោរព​ស្មារតី ២៣​តុលា ទិដ្ឋភាព​ក្រុមសន្តិសុខខណ្ឌដូនពេញប្រើអំពើហឹង្សាលើក្រុមស្ត្រីថ្ងៃសុក្រ នៅ​មុខ​ស្ថានទូតបារាំង​ប្រចាំ​កម្ពុជា នៅ​ថ្ងៃទី២២ ខែ​តុលា ឆ្នាំ​២០២១។
Photo Provided

ក្រុម​ស្ត្រី​ថ្ងៃ​សុក្រ​ដាក់​ញត្តិ​ទៅ​ស្ថានទូត​បារាំង​ប្រចាំ​កម្ពុជា នៅ​ថ្ងៃទី​២២ តុលា​នេះ ដើម្បី​សុំ​ឱ្យ​រដ្ឋាភិបាល​បារាំង​ជំរុញ​ទៅ​របប​លោក ហ៊ុន សែន អនុវត្ត​ឱ្យ​បាន​ពេញលេញ​នូវ​ស្មារតី​ស្មារតី​កិច្ចព្រមព្រៀង​សន្តិភាព​ទីក្រុង​ប៉ារីស និង​ដោះលែង​អ្នក​ទោស​នយោបាយ និង​សង្គម ដែល​កំពុង​ជាប់​ពន្ធនាគារ។ សកម្មភាព​របស់​គ្រួសារ​អ្នក​ជាប់ឃុំ​នយោបាយ​នេះ ធ្វើឡើង​ចំ​ពេល​ខួប​៣០​ឆ្នាំ​នៃ​កិច្ចព្រមព្រៀង​សន្តិភាព​ទីក្រុង​ប៉ារីស។

ក្រុម​ស្ត្រី​ថ្ងៃ​សុក្រ​ជាង​២០​នាក់ បាន​នាំគ្នា​លើក​បដា ស្រែក​ទាមទារ នៅ​តាម​បណ្តោយ​ផ្លូវ​ព្រះមុនីវង្ស ទល់មុខ​ស្ថានទូត​បារាំង​ប្រចាំ​កម្ពុជា ដើម្បី​ស្វែងរក​យុត្តិធម៌​ឱ្យ​សកម្មជន​នយោបាយ និង​សង្គម ដែល​កំពុង​ជាប់ឃុំ​ក្នុង​ពន្ធនាគារ​ដោយ​អយុត្តិធម៌។

តំណាង​ស្ត្រី​ថ្ងៃ​សុក្រ ជា​ប្រពន្ធ​មន្ត្រី​គណបក្សប្រឆាំង​ដែល​កំពុង​ជាប់​ពន្ធនាគារ គឺ​លោកស្រី ព្រុំ ចាន់ថា ថ្លែងប្រាប់​វិទ្យុ​អាស៊ីសេរី​ក្រោយ​ដាក់​ញត្តិ​ថា លោកស្រី​បាន​ជម្រាប​ប្រាប់​មន្ត្រី​ស្ថានទូត​អំពី​គោល​បំណង​នៃ​ញត្តិ ដោយ​ស្នើ​សុំ​ឱ្យ​ប្រទេស​ប្រជាធិបតេយ្យ​មួយ​នេះ ជំរុញ​រដ្ឋាភិបាល​កម្ពុ​ជា​អនុវត្ត​ឱ្យ​បាន​ពេញលេញ​នូវ​ស្មារតី​កិច្ចព្រមព្រៀង​សន្តិភាព​ទីក្រុង​ប៉ារីស ដោយ​ផ្សះផ្សា​ជាតិ គោរព​សិទ្ធិមនុស្ស និង​ប្រជាធិបតេយ្យ​សេរី​ពហុបក្ស ព្រមទាំង​ដោះលែង​អ្នក​ទោស​នយោបាយ​ដែល​កំពុង​ជាប់​ពន្ធនាគារ។

លោកស្រី​បញ្ជាក់​ថា មន្ត្រី​ស្ថាន​បារាំង​បាន​សន្យា​ថា នឹង​ពិនិត្យមើល​ញត្តិ​របស់​ពួក​លោក​ស្រី ហើយ​ដាក់​ជូនទៅ​ថ្នាក់លើ​បន្ត​ទៀត​៖ «​រដ្ឋាភិបាល​កម្ពុជា​ត្រូវតែ​គោរព​ដាច់ខាត​នូវ​ស្មារតី​កិច្ចព្រមព្រៀង​សន្តិភាព​ទីក្រុង​ប៉ារីស ឱ្យ​ពេញលេញ​ទាំងស្រុង មិនមែន​ធ្វើ​ដាច់អហង្ការ​ដូច​ឥឡូវ​ទេ អ៊ីចឹង​មាន​កិច្ចព្រមព្រៀង​២៣ តុលា ធ្វើ​អ៊ីចឹង​គាត់​ចង់​បំភ្លេច​ចោល ខ្ញុំ​អត់​សុខចិត្ត​ទេ ខ្ញុំ​ត្រូវ​ទៅ​រក​ប្រទេស​ដែល​ចុះ​ហត្ថលេខី​ទាំងអស់​ដើម្បី​ឱ្យ​គាត់​ដោះ​ប្រជុំ​ឡើងវិញ ស្មារតី​កិច្ចព្រមព្រៀង​សន្តិភាព​ទីក្រុង​ប៉ារីស ២៣ តុលា ឆ្នាំ​១៩៩១ ត្រូវ​ដោះលែង​ដូចជា​ប្តី​ខ្ញុំ ម្តាយ កូន ឪពុក​ទាំងអស់​ដើម្បី​ឱ្យ​គាត់​មាន​សេរីភាព​ឡើងវិញ»

ដូច​លើក​មុនៗ​ដែរ ការ​តវ៉ា​ដោយ​សន្តិវិធី​របស់​ក្រុម​ស្ត្រី​ថ្ងៃ​សុក្រ​នេះ បាន​រង​ការ​យាយី និង​រំខាន​ពី​ក្រុម​សន្តិសុខ និង​អាជ្ញាធរ​រាជធានី​ភ្នំពេញ​ដែល​មាន​ចំនួន​ច្រើន​លើសលប់។

កូនស្រី​សកម្មជន​បក្ស​ប្រឆាំង​នៅ​ខេត្ត​កណ្តាល​អ្នកស្រី លឹម សាន គឺ​កញ្ញា ផាន សាត បាន​ឱ្យ​ដឹង​ថា ក្រុម​សន្តិសុខ​ខណ្ឌដូនពេញ និង​សមត្ថកិច្ច​ស្លៀកពាក់​ឯកសណ្ឋាន​និង​ស៊ីវិល​ជិត ១០០​នាក់​បាន​តាម​ឃ្លាំមើល​ក្រុម​ស្ត្រី​ដាក់​ញត្តិ​នៅ​ថ្ងៃនេះ​។ កញ្ញា​ប្រាប់​ទៀត​ថា ក្រុម​សន្តិសុខ​បាន​ប្រើ​អំពើ​ហិង្សា​លើ​ក្រុម​ស្ត្រី​ថ្ងៃ​សុក្រ​ដោយ​រុញច្រាន ច្របាច់ក ជាន់​ក្បាល ហើយ​រឹបអូស​យក​បដា​ជាច្រើន​ផ្ទាំង បណ្តាល​ឱ្យ​ស្ត្រី​៣ នាក់​រង​របួស​ធ្ងន់​និង​មួយ​ចំនួន​ទៀត​រង​របួស​ស្រាល ខ្លះ​បែក​មាត់ ហើម​មុខ ក្បាល កញ្ចឹង​ក និង​ឡើង​ស្នាម​ជាំ​លើ​ដៃជើង ជាដើម​។ លើស​ពី​នេះ​ក្រុម​សន្តិសុខ​បាន​ប្រើ​ពាក្យ​សម្ដី​គំរាម​កំហែង និង​មាក់ងាយ​លើ​ក្រុម​ស្ត្រី​ផង​ដែរ​។ កញ្ញា​ចាត់ទុក​អំពើ​ហិង្សា​ពី​សំណាក់​សន្តិសុខ​នេះ​គឺជា​អំពើ​ឃោរឃៅ និង​រំលោភបំពាន​លើ​ស្ត្រី​ទន់ខ្សោយ​ដែល​គ្រាន់តែ​អនុវត្ត​សិទ្ធិ​របស់​ខ្លួន​ដោយ​សន្តិវិធី​៖ «​គាត់​អត់​មាន​គោរព​សិទ្ធិ​ពួក​ខ្ញុំ​ទេ ដែល​ជា​ស្ត្រី​ដៃជើង​តូចៗ ស្គមៗ​គ្មាន​កម្លាំង ដោយ​គ្រាន់តែ​តវ៉ា​ដោយ​សន្តិវិធី​សោះ​គាត់​បែរជា​ប្រើ​ហិង្សា​លើ​ពួក​ខ្ញុំ បំពាន​ទាំង​សិទ្ធិមនុស្ស​និង​សិទ្ធិ​នារី ពួកគាត់​សុទ្ធតែ​ប្រុស​ខ្ញុំ​ខកចិត្ត​ចំពោះ​គាត់​ខ្លាំង​បំផុត ខកចិត្ត​ចំពោះ​ថ្នាក់ដឹកនាំ​គាត់​ធ្វើ​ទង្វើ​នេះ អត់​មាន​ស្រឡាញ់​ប្រជាជន​ខ្លួនឯង​អត់​មាន​ឱ្យ​សេចក្តី​សុខ​ប្រជាជន​ខ្លួនឯង គាត់​កុំ​ប្រើ​ពាក្យ​ជួយ​ប្រជាជន ឈប់​ប្រើ​ទៅ​ហើយ​បោះចោល​ទៅ រាល់ថ្ងៃ​ខ្ញុំ​មានទុក្ខ​ខ្លាំង​ណាស់​ដូចជា​ម្តាយ​ខ្ញុំ​ចាប់​គាត់​ទាំង​អយុត្តិធម៌​គាត់​ខុស​អី»

អ្នកនាំពាក្យ​អគ្គស្នងការដ្ឋាន​នគរបាល​ជាតិ លោក ឆាយ គឹមខឿន បដិសេធ​​ឆ្លើយ​បំភ្លឺ​រឿង​នេះ​ទេ។ វិទ្យុ​អាស៊ីសេរី​ក៏​មិនអាច​ទាក់ទង អ្នកនាំពាក្យ​ស្នងការដ្ឋាន​នគរបាល​រាជធានី​ភ្នំពេញ លោក សាន សុខសីហា ដើម្បី​បកស្រាយ​ជុំវិញ​រឿង​នេះ​បាន​ដែរ នៅ​ថ្ងៃទី​២២ តុលា​។ ប៉ុន្តែ​កន្លង​មក លោក សាន សុខ​សីហា តែងតែ​លើកឡើង​ដដែលៗ​ថា ក្រុម​ស្ត្រី​ដែល​ចេញ​ដាក់​ញត្តិ និង​តវ៉ា​ទាំងនេះ មិន​បាន​សុំច្បាប់​ពី​អាជ្ញាធរ​រាជធានី​ភ្នំពេញ ទើប​អាជ្ញាធរ បំបែក​ដើម្បី​រក្សា​សណ្ដាប់ធ្នាប់​សាធារណៈ​។​

បន្ទាប់ពី​ដាក់​ញត្តិ​នៅ​ស្ថានទូត​បារាំង ក្រុម​ស្ត្រី​ថ្ងៃ​សុក្រ​បាន​បន្ត​ដាក់​ញត្តិ​នៅ​ស្ថានទូត​ប្រទេស​ឥណ្ឌូណេស៊ី ប៉ុន្តែ​ពួកគាត់​ត្រូវ​ខកខាន​ទៅវិញ​ដោយ​ស្ថានទូត​ប្រទេស​នេះ ជាប់រវល់​រៀបចំ​ពិធីបុណ្យ​សាសនា​។ ទោះ​យ៉ាងណា​ក្រុម​ស្ត្រី​ថ្ងៃ​សុក្រ​អះអាង​ថា នឹង​យក​ញត្តិ​ទៅ​ដាក់​ជូន​ស្ថានទូត​ឥណ្ឌូណេស៊ី​ម្តង​ទៀត ដើម្បី​ជំរុញ​ឱ្យ​បណ្តា​ប្រទេស​អាស៊ាន​យកចិត្ត​ទុក​លើ​ស្មារតី​កិច្ចព្រមព្រៀង​សន្តិភាព​ទីក្រុង​ប៉ារីស។

ជុំវិញ​រឿង​នេះ ប្រធាន​សមាគម​ការពារ​សិទ្ធិមនុស្ស​អាដហុក (ADHOC) លោក នី សុខា មាន​ប្រសាសន៍ថា បើ​រដ្ឋាភិបាល​មាន​ឆន្ទៈ​ពិតប្រាកដ​គោរព​ស្មារតី​កិច្ចព្រមព្រៀង​សន្តិភាព​ទីក្រុង​ប៉ារីស និង​រដ្ឋធម្មនុញ្ញ រដ្ឋាភិបាល​គួរ​ពិចារណា​ទម្លាក់​ចោលការ​ចោទប្រកាន់​ទៅលើ​សកម្មជន​នយោបាយ និង​សិទ្ធិមនុស្ស ដើម្បី​ផ្សះផ្សា​ជាតិ និង​បង្រួបបង្រួម​ជាតិ​ឡើងវិញ​។ ជាមួយ​គ្នា​នេះ លោក​បញ្ជាក់​ថា អង្គការ​សង្គម​ស៊ីវិល​ព្រួយបារម្ភ​ចំពោះ​ក្រុម​ស្ត្រី​ថ្ងៃ​សុក្រ​ដែល​តែងតែ​រង​នូវ​ការ​ធ្វើទុក្ខបុកម្នេញ ពី​សំណាក់​អាជ្ញាធរ​ជា​បន្តបន្ទាប់​។ លោក​ចាត់ទុក​ការ​បង្ក្រាប និង​គំរាមកំហែង​លើ​ស្ត្រី​ថ្ងៃ​សុក្រ​ដែល​ដាក់​ញត្តិ​ដោយ​សន្តិវិធី​នេះ​ថា ជា​ការ​រំលោភបំពាន​ច្បាប់ និង​សិទ្ធិមនុស្ស​ធ្ងន់ធ្ងរ ដែល​ផ្ទុយ​ពី​ស្មារតី​កិច្ចព្រមព្រៀង​សន្តិភាព​ទីក្រុង​ប៉ារីស​៖ «​រដ្ឋាភិបាល​គួរ​ពិចារណា​ទម្លាក់​ចោល​រាល់​ការចោទប្រកាន់​ទៅលើ​ក្រុម​អ្នកនយោបាយ ក៏ដូចជា​សកម្មជន​សិទ្ធិមនុស្ស សកម្មជន​បរិស្ថាន ព្រំដែន​ជាពិសេស​អ្នក​ជាប់ឃុំ​ដោយសារតែ​បញ្ហា​មនសិការ ដើម្បី​ឈាន​ទៅ​បង្ហាញ​ឆន្ទៈ​ក្នុង​ការគោរព​កិច្ចព្រមព្រៀង​សន្តិភាព​ទីក្រុង​ប៉ារីស គឺ​គោលការណ៍​ផ្សះផ្សា​ជាតិ​និង​បង្រួបបង្រួម​ជាតិ»

មន្ត្រី​សង្គម​ស៊ីវិល​ជំរុញ​ឱ្យ​រដ្ឋាភិបាល​អប់រំ​អាជ្ញាធរ​ទាំងនោះ​អំពី​ការអនុវត្ត​តួនាទី​របស់​ខ្លួន​ដោយ​ផ្អែកលើ​ក្រមសីលធម៌​និង​ច្បាប់ ដើម្បី​ជៀសវាង​ការប្រើប្រាស់​អំពើ​ហិង្សា​លើ​ស្ត្រី និង​អ្នកប្រើប្រាស់​សិទ្ធិ​សេរីភាព​បញ្ចេញមតិ។

កន្លងទៅ ក្រុម​ស្ត្រី​ថ្ងៃ​សុក្រ​បាន​ដាក់​ញត្តិ​នៅ​ស្ថានទូត​ប្រទេស​ប្រជាធិបតេយ្យ​ធំៗ មួយចំនួន​រួចហើយ ដូចជា​សហរដ្ឋអាមេរិក សហភាព​អឺរ៉ុប ជប៉ុន អូស្ត្រាលី ព្រមទាំង​ការិយាល័យ​ឧត្ដមស្នងការ​អង្គការ​សហប្រជាជាតិ​ទទួល​ប​បន្ទុក​សិទ្ធិមនុស្ស​ប្រចាំ​កម្ពុជា​ជាដើម​។ ទោះជា​ត្រូវ​ប្រឈម​នឹង​ការ​តាម​យាយី និង​អំពើ​ហិង្សា​ពី​សំណាក់​អាជ្ញាធរ និង​ក្រុម​សន្តិសុខ​យ៉ាង​ណា​ក្តី ក្រុម​ស្ត្រី​បញ្ជាក់​ថា ពួកគាត់​មិន​រាថយ​នោះ​ទេ ក្នុង​ការ​ធ្វើ​សកម្មភាព​ជួយ​រក​យុត្តិធម៌​ដល់​ក្រុម​គ្រួសារ​អ្នក​កំពុង​ជាប់ឃុំ​។ ពួកគាត់​នៅតែ​ស្នើ​យ៉ាង​ទទូច​ដល់​អាជ្ញាធរ​ឱ្យ​ទម្លាក់​ចោល​បទចោទប្រកាន់ និង​ដោះលែង​សាច់ញាតិ​ពួកគេ​ឡើងវិញ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)

មើល​មតិ​ទាំង​អស់.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល