លោកនាយករដ្ឋមន្ត្រី ហ៊ុន សែន សម្រេចដក លោក ភូ លិ ពីតំណែងជាអភិបាលរងខេត្តកែប និងបញ្ចប់តំណែងជាមន្ត្រីរាជការ ក្រោយពីរូបលោករងការចោទប្រកាន់ថា បានបៀតបៀនស្ត្រីជាប្រពន្ធអ្នកដទៃ និងរហូតឈានដល់ប្រើអំពើហិង្សាលើស្ត្រីម្នាក់។
មន្ត្រីសង្គមស៊ីវិលគាំទ្រចំណាត់ការរបស់រដ្ឋាភិបាលដែលបានបញ្ចប់តំណែង លោក ភូ លិ ចេញពីក្របខ័ណ្ឌមន្ត្រីរាជការ។ ពួកគេជំរុញដល់រងគ្រោះថា គួរដាក់ពាក្យប្ដឹងទៅកាន់តុលាការបន្ថែមទៀត ដោយសារទង្វើរបស់ លោក ភូ លិ គឺជាទង្វើរំលោភបំពានស្ត្រីភេទធ្ងន់ធ្ងរ។
នាយកទទួលបន្ទុកកិច្ចការទូទៅនៃអង្គការការពារសិទ្ធិមនុស្សលីកាដូ (LICADHO) លោក អំ សំអាត ថា ករណីនេះ គឺជាការរំលោភបំពានលើស្ត្រីភេទធ្ងន់ធ្ងរ ដែលផ្ទុយពីច្បាប់ជាតិ និងអន្តរជាតិ។ លោកបន្ថែមថា ក្នុងនាមលោក ភូ លិ ជាអភិបាលរងខេត្តកែបមិនគួរប្រព្រឹត្តទង្វើបែបនេះឡើយ។ លោកអំពាវនាវដល់តុលាការត្រូវតែចាត់វិធានតាមផ្លូវច្បាប់លើជនដៃដល់ ដើម្បីជាការព្រមានដល់មន្ត្រីផ្សេងទៀតកុំឱ្យយកគំរូតាម។
លោក អំ សំអាត៖ «ការបញ្ចប់មុខតំណែងអភិបាលរងខេត្តនេះ មិនមែនសំណុំរឿងនេះត្រូវបានបញ្ចប់ទេ។ ជនរងគ្រោះ និងក្រុមគ្រួសារជនរងគ្រោះអាចនឹងប្ដឹងទៅតុលាការតទៀត ដើម្បីទាមទារនូវសំណងរដ្ឋប្បវេណី សំណងជំងឺចិត្ត សំណងថ្លៃព្យាបាលជាដើម។ គាត់ជាដើមបណ្ដឹងរដ្ឋប្បវេណី ឯព្រះរាជអាជ្ញាជាដើមបណ្ដឹងអាជ្ញាក្នុងរឿងប្រើប្រាស់នូវអំពើហិង្សាហ្នឹង។ អ៊ីចឹងការណ៍ដែលស្វែងរកយុត្តិធម៌សម្រាប់ជនរងគ្រោះ និងក្រុមគ្រួសារជនរងគ្រោះត្រូវបានធានាដោយច្បាប់ បាទ»។
លោក ហ៊ុន សែន ចេញអនុក្រឹត្យមួយនៅថ្ងៃទី៣១ ខែធ្នូ ដើម្បីដកមុខតំណែងតួនាទីរបស់លោក ភូ លិ ចេញពីមន្ត្រីក្របខណ្ឌរាជការ។ មាត្រា ១ នៃអនុក្រឹត្យនោះឱ្យដឹងថា លោក ភូ លិ ត្រូវបានបញ្ចប់នៃមុខតំណែង ឋានន្តរស័ក្ដិវរមន្ត្រីថ្នាក់លេខ១ ពីអភិបាលរងខេត្តកែប។ អនុក្រឹត្យនេះ ចេញរយៈពេលពីរថ្ងៃប៉ុណ្ណោះក្រោយពីលោក ភូ លិ រងការចោទប្រកាន់ថា បានបៀតបៀន និងប្រើអំពើលើស្ត្រីភេទ។
មកទល់នឹងពេលនេះ ជនរងគ្រោះម្នាក់ដែលត្រូវលោក ភូ លិ គប់ឲ្យបែកក្បាល កំពុងសម្រាកនៅមន្ទីរពេទ្យនៅឡើយទេ។
សាច់ញាតិស្ត្រីជនរងគ្រោះ ប្រាប់វិទ្យុអាស៊ីសេរីតាមបណ្ដាញសង្គមតេឡេក្រាម (Telegram) នៅថ្ងៃទី៣១ ខែធ្នូថា ក្រុមគ្រួសារកញ្ញាបានពាក្យបណ្តឹងទៅកាន់តុលាការរួចរាល់ហើយ។
វិទ្យុអាស៊ីសេរីមិនអាចទាក់ទងអភិបាលខេត្តកែប លោក សោម ពិសិដ្ឋ ស្នងការខេត្តនេះ លោក សម្បត្តិ សុធារដ្ឋ និងប្រធានមន្ទីរបរិស្ថានថ្មី លោក អ៊ិន សៅ ដើម្បីសាកសួរអំពីរឿងនេះបាននៅឡើយទេ។ ចំណែក លោក ភូ លិ ក៏វិទ្យុអាស៊ីសេរី មិនទាន់អាចទាក់ទងបានដែរ។
សមត្ថកិច្ចខេត្តកែបម្នាក់ថ្លែងសុំមិនបញ្ចេញឈ្មោះ ឱ្យវិទ្យុអាស៊ីសេរីដឹងយ៉ាងខ្លីថា មកទល់នឹងពេលនេះ លោក ភូ លិ មិនត្រូវបានសមត្ថកិច្ចចាប់ខ្លួននោះទេ
... «ខ្ញុំអត់ដឹងនីតិវិធីគេបន្តយ៉ាងម៉េចទេ ព្រោះមន្ត្រីយុត្តិធម៌គេកំពុងតែរៀបចំឯកសារ មិនគេស្នើសុំយ៉ាងម៉េចខ្ញុំអត់ទាន់ដឹងដែរ។ ឬមួយគេឃាត់ខ្លួន [ លោក ភូ លិ ] ទៅដាក់នៅកន្លែងណាក៏ខ្ញុំអត់ដឹង ព្រោះខ្ញុំនៅកន្លែងអត់ឃើញឃាត់ខ្លួនឃាត់អីផង»។
កាលពីឆ្នាំ២០២០ កន្លងទៅ ក្រសួងមហាផ្ទៃសម្រេចដក លោក អ៊ុក កុសល ពីតំណែងជាស្នងការនគរបាលខេត្តកំពង់ធំ បន្ទាប់ពីរកឃើញថា ជាប់ពាក់ព័ន្ធ និងការបៀតបៀនផ្លូវភេទលើមន្ត្រីនគរបាលជាស្ត្រី។ ទោះជាយ៉ាងណា លោកមិនត្រូវបានតុលាការខេត្តកំពង់ធំចាត់វិធានការឡើយ បើទោះបីជាជនរងគ្រោះបានដាក់ពាក្យប្ដឹងយ៉ាងណាក្ដី។ ជាងនេះទៅទៀត កាលពីឆ្នាំ២០១៨ កូនប្រុសលោក ហ៊ុន សែន គឺលោក ហ៊ុន ម៉ានី ក៏ធ្លាប់បែកធ្លាយប្រវត្តិរឿងរ៉ាវអាស្រូវដែរ ប៉ុន្តែ លោក ហ៊ុន ម៉ានី ពុំដែលចេញមុខបដិសេធ ឬប្រតិកម្មជុំវិញរឿងនេះទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។