អង្គការឃ្លាំមើលសិទ្ធិមនុស្សអន្តរជាតិរកឃើញថា ដោយសារតែមានការគំរាមកំហែង និងការសូកប៉ាន់អង្គបោះឆ្នោតរបស់គណបក្សប្រឆាំង ដូច្នេះការបោះឆ្នោតព្រឹទ្ធសភានៅកម្ពុជាកាលពីពេលកន្លងទៅ មិនមានភាពត្រឹមត្រូវ និងយុត្តិធម៌នោះឡើយ។ មន្ត្រីជាន់ខ្ពស់គណបក្សប្រឆាំងយល់ឃើញថា ការរកឃើញរបស់អង្គការឃ្លាំមើលសិទ្ធិមនុស្សអន្តរជាតិនេះ គឺជាការឆ្លុះបញ្ចាំងការពិត ដើម្បីដាស់តឿនអ្នកកាន់អំណាចកុំឱ្យបន្តធ្វើនយោបាយបែបទុច្ចរិតតទៅទៀត។
អង្គការឃ្លាំមើលសិទ្ធិមនុស្សអន្តរជាតិរកឃើញថា ការបោះឆ្នោតព្រឹទ្ធសភាកាលពីខែកុម្ភៈ ជាការបោះឆ្នោតមិនត្រឹមត្រូវ និងយុត្តិធម៌នោះទេ។
អង្គការឃ្លាំមើលសិទ្ធិមនុស្សអន្តរជាតិលើកឡើងនៅក្នុងរបាយការណ៍ ចេញកាលពីថ្ងៃទី៣ ខែមេសា ថា ដោយសារតែក្រុមប្រឹក្សាឃុំ សង្កាត់របស់គណបក្សប្រឆាំង បានរងការគំរាមកំហែងតាមរយៈប្រព័ន្ធតុលាការ ការដកតួនាទី និងការទិញទឹកចិត្តតាមរយៈការផ្ដល់តួនាទី និងថវិកាផងនោះ ដូច្នេះក្រុមម្ចាស់ជំនួយ គួរតែអំពាវនាវឱ្យរដ្ឋាភិបាលរបស់លោកនាយករដ្ឋមន្ត្រី ហ៊ុន ម៉ាណែត ស៊ើបអង្កេតឱ្យមានតម្លាភាព និងហ្មត់ចត់ ចំពោះការធ្វើទុក្ខបុកម្នេញទៅលើ សមាជិកក្រុមប្រឹក្សា និងសកម្មជនបក្សប្រឆាំង ពាក់ព័ន្ធនឹងការបោះឆ្នោតថ្ងៃទី២៥ ខែកុម្ភៈ កន្លងទៅ។
របាយការណ៍របស់អង្គការឃ្លាំមើលសិទ្ធិមនុស្សអន្តរជាតិ ដែលបានសម្ភាសន៍ផ្ទាល់ និងតាមទូរស័ព្ទជាមួយអង្គបោះឆ្នោតគណបក្សប្រឆាំងចំនួន ៤នាក់ និងមន្ត្រីគណបក្សប្រឆាំងចំនួន ២នាក់ផ្សេងទៀត បង្ហាញថា ពួកគេត្រូវបានសមាជិកគណបក្សប្រជាជនកម្ពុជាគំរាមកំហែង និងលួងលោមមិនឱ្យទៅបោះឆ្នោតជ្រើសរើសសមាជិកព្រឹទ្ធសភា ឬទៅបោះឆ្នោតដែរ ប៉ុន្តែបោះឆ្នោតឱ្យគណបក្សប្រជាជនកម្ពុជា ជាថ្នូរនឹងការផ្ដល់ថវិកាប្រមាណ ៣ពាន់ដុល្លារអាមេរិក ម៉ូតូ និងតួនាទីផ្សេងៗ នៅក្នុងរដ្ឋាភិបាល។ របាយការណ៍របស់អង្គការដដែលបានសង្កត់ធ្ងន់ថា គណបក្សកាន់អំណាចបានសន្យាថា នឹងការពារក្រុមប្រឹក្សាឃុំ សង្កាត់ ដែលបោះឆ្នោតឱ្យគណបក្សប្រជាជនកម្ពុជា កុំឱ្យបាត់បង់តួនាទីជាក្រុមប្រឹក្សាឃុំ សង្កាត់ តាមរយៈក្រសួងមហាផ្ទៃផងដែរ។
ប្រធានអង្គការឃ្លាំមើលសិទ្ធិមនុស្សអន្តរជាតិ យូមែន រ៉ៃត៍ វ៉ច្ឆ (Human Rights Watch) ប្រចាំនៅតំបន់អាស៊ី អ្នកស្រី អេឡែន ភាសិន (Elaine Pearson) លើកឡើងថា ការចោទប្រកាន់ពីសំណាក់តុលាការទៅលើក្រុមប្រឹក្សាឃុំសង្កាត់ និងមន្ត្រីគណបក្សប្រឆាំង បានធ្វើឱ្យមានក្ដីបារម្ភជាខ្លាំងចំពោះភាពត្រឹមត្រូវ និងស្មើភាពគ្នានៅក្នុងដំណើរការបោះឆ្នោតព្រឹទ្ធសភា។ អ្មកស្រីបន្តថា រដ្ឋាភិបាលដែលជាម្ចាស់ជំនួយគួរតែដាក់សម្ពាធទៅលើរដ្ឋាភិបាលកម្ពុជាឱ្យទទួលស្គាល់ការគំរាមកំហែងដែលកើតមានឡើងទាំងនេះ និងមិនត្រូវទទួលយកលទ្ធិប្រជាធិបតេយ្យបែបក្លែងក្លាយ ដែលនៅសល់តែបន្តិចបន្តួចនោះឡើយ។
វិទ្យុអាស៊ីសេរីមិនអាចទាក់ទងអ្នកនាំពាក្យគណបក្សប្រជាជនកម្ពុជា លោក សុខ ឥសាន និងប្រធានអង្គភាពអ្នកនាំពាក្យរដ្ឋាភិបាល លោក ប៉ែន បូណា ដើម្បីសុំការបកស្រាយជុំវិញរឿងនេះបានឡើយនៅថ្ងៃទី៤ ខែមេសា។
ជុំវិញរឿងនេះ អតីតតំណាងរាស្រ្ដ គណបក្សសង្គ្រោះជាតិ លោក អ៊ំ សំអាន មានប្រសាសន៍ថា ការរកឃើញរបស់អង្គការឃ្លាំមើលសិទ្ធិមនុស្សអន្តរជាតិនេះ គឺជាការឆ្លុះបញ្ចាំងការពិតអំពីស្ថានភាពនយោបាយនៅកម្ពុជា។ លោកបន្តថា ដោយសារតែសមាជិកក្រុមប្រឹក្សាឃុំសង្កាត់គណបក្សប្រឆាំងរងការគំរាមកំហែង និងទិញទឹកចិត្តពីគណបក្សកាន់អំណាច ដូច្នេះតំណែងប្រធានព្រឹទ្ធសភារបស់លោក ហ៊ុន សែន ដែលបោះឆ្នោតដោយសមាជិកព្រឹទ្ធសភានោះ ក៏មិនមានតម្លៃនោះដែរ។
លោក អ៊ំ សំអាន៖«សារនេះគឺជាការដាស់តឿនទៅដល់អ្នកគាំទ្រហ្នឹងឱ្យយល់ថា លោក ហ៊ុន សែន ហ្នឹងកាន់អំណាចផ្ដាច់ការកន្លងមកនេះ រហូតការពារអំណាចទៅដល់កូនហ្នឹងគឺ តាមរយៈការបំភិតបំភ័យ គំរាមកំហែងទៅដល់អ្នកបោះឆ្នោត ហើយគាត់ធ្វើនេះគ្រាន់តែដើម្បីជាផលប្រយោជន៍ បក្ខពួក និងគ្រួសារត្រកូលហ៊ុនតែប៉ុណ្ណោះឯង មិនមែនដើម្បីប្រទេសជាតិ ដើម្បីស្រុកទេសនោះទេ ដូច្នេះឱ្យអ្នកគាំទ្រគណបក្សប្រជាជនហ្នឹង ភ្ញាក់រឭក ហើយចូលរួមជាមួយអ្នកប្រជាធិបតេយ្យដើម្បីធ្វើម៉េចបញ្ចប់ការកាន់អំណាចផ្ដាច់ការតពូជ»។
លទ្ធផលនៃការបោះឆ្នោតជ្រើសតាំងសមាជិកព្រឹទ្ធសភា កាលពីថ្ងៃទី២៥ ខែកុម្ភៈ បង្ហាញថា គណបក្សប្រជាជនកម្ពុជាទទួលបាន ៥៥កៅអី ចំណែកឯគណបក្សឆន្ទៈខ្មែរទទួលបាន៣កៅអី។ លទ្ធផលនៃការបោះឆ្នោតនេះបង្ហាញថា អង្គបោះឆ្នោតរបស់គណបក្សប្រឆាំងនៅមណ្ឌលកំពង់ចាម និងខេត្តកណ្ដាលប្រមាណ២៥ភាគរយ បានបោះឆ្នោតគាំទ្រគណបក្សកាន់អំណាច។ កន្លងមក បើទោះបីជាគណបក្សភ្លើងទៀន បានស្នើសុំផ្លាស់ប្ដូរសមាសភាពក្រុមប្រឹក្សាឃុំសង្កាត់មួយចំនួនក្ដី ប៉ុន្តែក្រសួងមហាផ្ទៃមិនបានអន្តរាគមន៍ផ្លាស់ប្ដូរទៅតាមការស្នើសុំរបស់គណបក្សប្រឆាំងនេះ ឱ្យបានទាន់ពេលវេលាតាមនីតិវិធីរបស់ក្រសួងមហាផ្ទៃនោះឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។