សហជីព​ប្រារព្ធ​ទិវា​ពលកម្ម​អន្តរជាតិ​ក្រោម​ការ​រឹត​បន្តឹង​សិទ្ធិ​សេរីភាព​ពី​អាជ្ញាធរ​ក្រុងភ្នំពេញ

ដោយ ហេង សកល
2018-05-01
អ៊ីម៉ែល
មតិ
Share
បោះពុម្ព
ក្រុម​សហជីព និង​កម្មករ​លើក​បដា​ក្នុង​ទិវា​ពលកម្ម​អន្តរជាតិ ថ្ងៃ​ទី​១ ខែ​ឧសភា ឆ្នាំ​២០១៧។
ក្រុម​សហជីព និង​កម្មករ​លើក​បដា​ក្នុង​ទិវា​ពលកម្ម​អន្តរជាតិ ថ្ងៃ​ទី​១ ខែ​ឧសភា ឆ្នាំ​២០១៧។
Photo: RFA

ក្រុម​សហជីព កម្មករ សមាគម និង​អង្គការ​ផ្នែក​សិទ្ធិ​ការងារ នៅ​ថ្ងៃទី១ ឧសភា នេះ បាន​នាំ​គ្នា​ប្រារព្ធ​ទិវា​ពលកម្ម​អន្តរជាតិ​នៅ​ទីតាំង​ដោយឡែក​ពី​គ្នា ក្រោម​ការ​រឹត​បន្តឹង​សន្តិសុខ​ពី​សំណាក់​អាជ្ញាធរ​នៃ​របប​ក្រុងភ្នំពេញ។ អាជ្ញាធរ​បាន​ប្រើប្រាស់​កម្លាំង​ជាច្រើន​ដើម្បី​ឃ្លាំមើល​សកម្មភាព​របស់​ក្រុម​អ្នក​ប្រារព្ធ​ពិធី ដើម្បី​កុំ​ឱ្យ​មានការ​ដង្ហែ​ក្បួន​ណាមួយ​ចេញពី​ទីតាំង​ដែល​ខ្លួន​បាន​កំណត់។ មន្ត្រី​សិទ្ធិមនុស្ស​វាយ​តម្លៃ​ថា នេះ​ជា​ការ​រឹតត្បិត​យ៉ាង​ខ្លាំង​លើ​សិទ្ធិ​សេរីភាព​របស់​ក្រុម​សហជីព និង​កម្មករ។

ប្រធាន​សហភាព​ការងារ​កម្ពុជា (CLC) លោក អាត់ ធន់ អះអាង​ថា ក្រុម​អាជ្ញាធរ​រាជធានី​ភ្នំពេញ បាន​ចេញ​មករា​រាំង​ក្រុមការងារ​របស់​លោក​មិន​ឱ្យ​មានការ​រៀបចំ​លើក​បដា និង​ដាក់​គ្រឿង​បំពង​សំឡេង​នៅ​តាម​រ៉ឺម៉ក​នោះ​ទេ ខណៈ​កម្មករ​ចាប់​ផ្ដើម​កម្មវិធី​នៅ​ម៉ោង ៧​ព្រឹក ដោយសារ​អាជ្ញាធរ​បារម្ភ​ខ្លាច​ពួក​លោក​មានការ​ដង្ហែ​ក្បួន​ចេញពី​ទីតាំង​ដែល​បាន​កំណត់ ក៏ប៉ុន្តែ​ក្រោយពេល​មានការ​ពន្យល់ និង​សម្របសម្រួល ទើប​ក្រុម​អាជ្ញាធរ​អនុញ្ញាត​ឱ្យ​ពួក​លោក​ដំណើរការ​កម្មវិធី​ដូច​ការ​គ្រោងទុក​វិញ។

លោក​ថា តំណាង​សហជីព និង​កម្មករ​ក្នុង​វិស័យ​នានា ដែល​ចូលរួម​ក្នុង​កម្មវិធី បាន​លើកឡើង​ពី​ក្តី​កង្វល់ បញ្ហា​ប្រឈម និង​សំណូមពរ​របស់​ខ្លួន​ទៅកាន់​សមាជិកសភា​ដែល​ទៅ​ទទួលយក​ញត្តិ​របស់​ពួកគាត់​ដល់​ទី​តាំង​ប្រារព្ធ​ពិធី នៅ​សួនច្បារ​ខាងមុខ​ក្រុមប្រឹក្សា​អភិវឌ្ឍន៍​កម្ពុជា ខាងកើត​វត្តភ្នំ។ សំណូមពរ​សំខាន់ៗ​របស់​ក្រុម​សហជីព និង​កម្មករ​នោះ មាន​ដូចជា ស្នើ​ឱ្យ​រដ្ឋាភិបាល​កំណត់​ប្រាក់​ឈ្នួល​អប្បបរមា​ដល់​វិស័យ​ដទៃ​ទៀត រួមមាន​វិស័យ​សំណង់ ដឹកជញ្ជូន ទេសចរណ៍ និង​សេដ្ឋកិច្ច​ក្រៅ​ប្រព័ន្ធ ស្នើ​ឱ្យ​រដ្ឋាភិបាល​ពិនិត្យ​ឡើងវិញ​ចំពោះ​ក្រុមហ៊ុន និង​សហគ្រាស​ដែល​បាន​រត់ចោល​កម្មករ​ដោយ​មិនបាន​គិតគូរ​លុយ​ឱ្យ​កម្មករ ស្នើ​ឱ្យ​មានការ​ទម្លាក់​ចោល​បណ្ដឹង​ប្រឆាំង​នឹង​ថ្នាក់ដឹកនាំ​សហជីព ព្រមទាំង​ស្នើ​ឱ្យ​រដ្ឋាភិបាល​ជួយ​ការពារ​កម្មករ​ចំណាកស្រុក និង​ការ​ជួយ​រក​ទីផ្សារ​កសិកម្ម​សម្រាប់​កសិករ​ជាដើម។ ជាពិសេស​ទៅទៀត ក្រុម​សហជីព និង​កម្មករ​បាន​ស្នើ​ឱ្យ​រដ្ឋាភិបាល​ពិនិត្យ​ឡើងវិញ​ចំពោះ​ការអនុវត្ត​ច្បាប់​ស្ដីពី​សហជីព ដែល​បាន​ប៉ះពាល់​ដល់​សិទ្ធិ​របស់​សហជីព​ក្នុង​ការ​ការពារ​ផលប្រយោជន៍​របស់​កម្មករ «យើង​សូម​លើក​ទឹក​ចិត្ត​ដល់​កម្មករ​និយោជិក​ឱ្យ​បន្ត​​ចូល​រួម​ជាមួយ​សហជីព​ និង​ចូល​រួម​ជាមួយ​សកម្មភាព​មួយ​ចំនួន​ទៀត​ដែល​បង្ហាញ​ទៅ​ដល់​ក្រុមហ៊ុន សហគ្រាស ​គ្រឹះស្ថាន និង​អាជ្ញាធរ​ដើម្បី​ឱ្យ​​ដោះស្រាយ​បញ្ហា​របស់​ខ្លួន​តាម​រយៈ​ការ​ចរចា​ ឬ​តវ៉ា​ដោយ​សន្តិវិធី​។ ​យើង​ក៏​ស្នើ​ឱ្យ​ក្រុមហ៊ុន​ សហគ្រាស គ្រឹះ​ស្ថាន​​​បញ្ឈប់​ការ​កេង​ប្រវ័ញ្ច និង​ធ្វើ​ទុក្ខបុកម្នេញ​ផ្សេងៗ ដែល​ពាក់​ព័ន្ធ​នឹង​សិទ្ធិ​កម្មករ​ ព្រោះ​កម្មករ​ជា​អ្នក​ផលិត​ និង​ជំរុញ​ឱ្យ​ក្រុមហ៊ុន​មាន​បាន​ដែរ។ ប្រសិន​បើ​ធ្វើ​បាប​គាត់ ហើយ​យក​មាន​បាន​តែ​ឯង​នោះ វា​មិន​ថ្លៃថ្នូរ​ជា​អ្នក​វិនិយោគ​ត្រឹម​ត្រូវ​ទេ​ ហើយ​រដ្ឋាភិបាល​ក៏​ត្រូវ​ធានា​ថា សិទ្ធិ​របស់​កម្មករ​ ឬ​ក៏​លក្ខខណ្ឌ​ការងារ​ដែល​ច្បាប់​បាន​កំណត់​ត្រូវ​អនុវត្ត​ឱ្យ​បាន​ពេញ​លេញ ហើយ​ត្រូវ​លុប​បំបាត់​ឱ្យ​អស់​ចំពោះ​មន្ត្រី​មួយ​ចំនួន​ដែល​គាត់​ទៅ​កាង​ក្រុមហ៊ុន​ ឬ​ទៅ​ទីប្រឹក្សា​ក្រុមហ៊ុន​ រាយការណ៍​តែ​រឿង​អវិជ្ជមាន​ធ្វើ​បាប​ក្រុមហ៊ុន»

លោក អាត់ ធន់ បញ្ជាក់​ថា សមាជិកសភា​ដែល​មក​ទទួល​ញត្តិ បាន​សន្យា​ថា នឹង​ពិនិត្យមើល​សំណើ​របស់​ក្រុម​សហជីព និង​កម្មករ​រួច​ផ្ញើ​ទៅ​ប្រធានរដ្ឋសភា លោក ហេង សំរិន ដើម្បី​ប្រជុំ​ពិភាក្សា និង​បញ្ជូន​បន្ត​ទៅ​រដ្ឋាភិបាល​ដើម្បី​រក​ដំណោះស្រាយ។ លោក​រំពឹង​ថា សំណើ​ចំនួន ១៩ ចំណុច​របស់​ក្រុម​សហជីព និង​កម្មករ​នេះ នឹង​ត្រូវ​បាន​រដ្ឋសភា និង​រដ្ឋាភិបាល​យក​ទៅ​ពិចារណា និង​ដោះស្រាយ​ជូន​សហជីព និង​កម្មករ «ខ្ញុំ​មាន​ជំនឿ​ថា អ្វី​ដែល​យើង​ដាក់​ទៅ​ ទោះបី​ជា​មិន​មាន​ការ​ឆ្លើយ​តប ឬ​និយាយ​ថា​នឹង​ធ្វើ​តាម​សំណើ​របស់​យើង​ក៏ដោយ ប៉ុន្តែ​ជា​ទូទៅ​យើង​ឃើញ​ថា យើ​ង​បាន​ផល​មួយ​ចំនួន​​ដែរ គ្រាន់​តែ​ថា ផល​កន្លង​ទៅ​មាន​ភាព​យឺត​យ៉ាវ​។ យើង​ចង់​ឱ្យ​ផល​បាន​ច្រើន​ជាង​នេះ ហើយ​ត្រូវ​ឆ្លើយ​តប​ចំពោះ​ចំណុច​សំខាន់ៗ​ដែល​យើង​ចង់​បាន​ ដូចជា ធ្វើ​វិសោធនកម្ម​ច្បាប់​ស្ដីពី​សហជីព​ ដើម្បី​ធានា​សិទ្ធិ​សហជីព​ និង​តំណាង​របស់​សហជីព​ ការ​កំណត់​ប្រាក់​ឈ្នួល​អប្បបរមា​ រៀបចំ​ប្រព័ន្ធ​សន្តិសុខ​សង្គម​ឱ្យ​មាន​សំឡេង​កម្មករ​នៅ​ទីនោះ និង​ដក​ពាក្យ​បណ្ដឹង​ ឬ​ទម្លាក់​ចោល​ការ​ចោទប្រកាន់​លើ​សហជីព​ជា​ដើម»

ស្រប​ពេល​សហភាព​ការងារ​កម្ពុជា​ប្រារព្ធ​ទិវា​ពលកម្ម​អន្តរជាតិ​នេះ ខាង​អង្គការ សមាគម​ដែល​ការពារ​សិទ្ធិ​កម្មករ​មួយ​ក្រុម​ទៀត ក៏​ប្រារព្ធ​ទិវា​នេះ​ដូចគ្នា។ អង្គការ​សមាគម​ទាំងនោះ មាន​ដូចជា មជ្ឈមណ្ឌល​សម្ពន្ធភាព​ការងារ និង​សិទ្ធិមនុស្ស (CENTRAL) សម្ព័ន្ធ​សហគមន៍​កសិករ​កម្ពុជា (CCFC) បណ្តាញ​យុវជន​កម្ពុជា (CYN) និង​អង្គការ​មួយ​ចំនួន​ទៀត។ ក្រុម​អង្គការ សមាគម និង​សហជីព​ទាំងនេះ បែងចែក​កម្មវិធី​ជា​ពីរ គឺ​ពេលព្រឹក​យក​ញត្តិ​ទៅ​ដាក់​នៅ​ស្ថាប័ន​ជាតិ​សំខាន់ៗ និង​ពេល​រសៀល​មានការ​ជួប​ប្រជុំ​ជាមួយ​ក្រុម​កម្មករ​ដើម្បី​រំលឹក​ពី​ទិវា​ពលកម្ម​អន្តរជាតិ ១ ឧសភា​នេះ។

ប្រធាន​សមាគម​ប្រជាធិបតេយ្យ​ឯករាជ្យ​នៃ​សេដ្ឋកិច្ច​ក្រៅ​ប្រព័ន្ធ (IDEA) លោក វ៉ន ពៅ អះអាង​ថា ពួក​លោក​បាន​នាំគ្នា​យក​ញត្តិ​ដែល​ជា​សំណូមពរ​របស់​ក្រុម​កម្មករ និង​អ្នក​ធ្វើការ​ក្នុង​វិស័យ​មួយ​ចំនួន ទៅ​ដាក់​នៅ​ក្រសួង​ការងារ និង​រដ្ឋសភា។ លោក​បន្ត​ថា ការ​ដាក់​ញត្តិ​នៅ​ក្រសួង​ការងារ​មិន​មាន​បញ្ហា​អ្វី​នោះ​ទេ ប៉ុន្តែ​នៅ​រដ្ឋសភា​វិញ ពួក​លោក​ត្រូវ​បាន​រារាំង​ដោយ​ក្រុម​សមត្ថកិច្ច​ដែល​យាមកាម​នៅមុខ​រដ្ឋសភា ប៉ុន្តែ​ក្រោយពេល​សម្របសម្រួល សមត្ថកិច្ច​ក៏បាន​អនុញ្ញាត​ឱ្យ​ពួក​លោក​ចូល​ទៅ​ដាក់​ញត្តិ​នៅ​រដ្ឋសភា។ លោក​បញ្ជាក់​ថា សំណើ​របស់​ក្រុម​ពួក​លោក​មាន​ចំនួន ១៨ចំណុច ដែល​ចំណុច​សំខាន់ៗ​រួមមាន ការ​ស្នើ​ឱ្យ​រដ្ឋសភា​ពិចារណា​ក្នុង​ការ​ធ្វើ​វិសោធនកម្ម​ច្បាប់​ស្ដីពី​សហជីព ការ​ស្នើ​ឱ្យ​រដ្ឋាភិបាល​កំណត់​ប្រាក់​ឈ្នួល​គោល​អប្បបរមា ការ​ស្នើ​ឱ្យ​រដ្ឋាភិបាល​លើកលែង​ការចោទប្រកាន់​លើ​ក្រុម​សហជីព​កាល​ពី​ពេល​កន្លងទៅ​ជាដើម។ លោក​អំពាវនាវ​ដល់​របប​ក្រុងភ្នំពេញ​ឱ្យ​យកចិត្តទុកដាក់​ចំពោះ​សំណើ​របស់​ក្រុម​សហជីព និង​ឆ្លើយតប​ជា​វិជ្ជមាន​ចំពោះ​សំណើ​ទាំងនោះ«ទិវា ១ ឧសភា​ជា​រៀង​រាល់​ឆ្នាំ​ យើង​មាន​ពិធី​ហែក្បួន​ជា​លក្ខណៈ​ទ្រង់​ទ្រាយ​ធំ ដែល​មាន​កម្មករ​ចូល​រួម​រាប់​ពាន់​រាប់​ម៉ឺន​នាក់​ឯណោះ ដូច្នេះ​យើង​មិន​ចង់​ឃើញ​ទិដ្ឋភាព​ថ្ងៃ​ទី ១ ឧសភា ដែល​មន្ទីរ​រដ្ឋសភា​ត្រូវ​បាន​ឡោម​ព័ទ្ធ​ដោយ​អាជ្ញាធរ​មាន​សមត្ថកិច្ច​បំពាក់​អាវុធ​គ្រប់​ដៃ​នោះ​ទេ។ យើង​ចង់​ឱ្យ​រដ្ឋាភិបាល​ និង​អ្នក​ពាក់ព័ន្ធ​ទាំងអស់​បង្ក​លក្ខណៈ​ទូលាយ​ ដើម្បី​ផ្តល់​សិទ្ធិ​សេរីភាព​ឱ្យ​បាន​គ្រប់​គ្រាន់​ដល់​យើង​ ដើម្បី​សម្ដែង​មតិ​សម្រាប់​ទិវា ១ ឧសភា និង​កម្មវិធី​ផ្សេង​ទៀត​របស់​ប្រជាពលរដ្ឋ​ ដើម្បី​សម្ដែង​មតិ​បង្ហាញ​ពី​ឆន្ទៈ​​ ដែល​ជា​សេចក្ដី​ត្រូវ​ការ​របស់​ពួក​គាត់​ជូន​រដ្ឋាភិបាល និង​រដ្ឋសភា​ជាតិ»

អ្នកនាំពាក្យ​សមាគម​អាដហុក (ADHOC) លោក សឹង សែនករុណា ដែល​បាន​ឃ្លាំមើល​ដំណើរការ​ប្រារព្ធ​ទិវា​ពលកម្ម​អន្តរជាតិ​របស់​ក្រុម​សហជីព​នោះ ថ្លែង​ថា សមត្ថកិច្ច​បាន​បង្ហាញ​សាច់ដុំ​របស់​ខ្លួន​យ៉ាង​សម្បើម តាមរយៈ​ការ​ដាក់​ពង្រាយ​កងកម្លាំង និង​ក្រុម​សន្តិសុខ​ជាច្រើន នៅ​ក្បែរ​កន្លែង​ប្រារព្ធ​ពិធី។ លោក​សង្កេត​ឃើញ​ថា ការ​រឹត​បន្តឹង​បែបនេះ​បាន​បង្ក​ការភ័យខ្លាច​ដល់​ក្រុម​សហជីព និង​កម្មករ ហើយ​ក៏បាន​ប៉ះពាល់​ដល់​សេរីភាព​នៃ​ការ​បញ្ចេញមតិ និង​ការ​លើក​ឡើង​ពី​កង្វល់​របស់​ពួកគាត់​ទាក់ទង​នឹង​បញ្ហា​ការងារ​នេះ​ផង​ដែរ

«ដំណើរការ​នេះ​នៅ​តែ​មិន​ទាន់​បើក​ទូលាយ​ដល់​សហជីព​ និង​កម្មករ​បាន​ចូល​រួម​ពេញ​លេញ​ទាំង​ផ្លូវ​កាយ​ និង​ផ្លូវ​សតិ​អារម្មណ៍​របស់​គាត់​ឱ្យ​ធូរស្រាល​នៅ​ឡើយ​ទេ។ ហើយ​ការ​ចង់​ដង្ហែ​ញត្តិ​ដើម្បី​សម្ដែង​មតិ​ឱ្យ​សាធារណជន​ផ្សេងៗ​បាន​ដឹង​អំពី​កម្លាំង​របស់​ពួក​គាត់​ ក៏​មិន​បាន​ធ្វើ​ទៅតាម​បំណង​គាត់​ដែរ ប៉ុន្តែ​ផ្ទុយ​ទៅ​វិញ បែរ​ជា​មាន​ការ​រឹតត្បិត​ដាក់​កំហិត​ទៅតាម​អ្វី​ដែល​អាជ្ញាធរ​​ចង់​បាន​ទៅវិញ​»

អាជ្ញាធរ​ក្រុងភ្នំពេញ បកស្រាយ​ថា ការ​មិន​អនុញ្ញាត​ឱ្យ​ក្រុម​សហជីព​ដើរ​ដង្ហែ​ក្បួន​នេះ គឺ​ដើម្បី​រក្សា​សន្តិសុខ សុវត្ថិភាព សណ្ដាប់ធ្នាប់ និង​របៀបរៀបរយ​សាធារណៈ ជាពិសេស ដើម្បី​បញ្ចៀស​ការ​កកស្ទះ​ចរាចរណ៍ ក៏ប៉ុន្តែ មេធាវី​ជាន់ខ្ពស់​ផ្នែក​ការពារ​សិទ្ធិ​ស្ត្រី នៃ​អង្គការ​ឃ្លាំមើល​សិទ្ធិមនុស្ស​អន្តរជាតិ យូមែន រ៉ៃត៍ វ៉ច្ឆ (Human Rights Watch) អ្នកស្រី អារុណា កាហ្សយ៉ាប (Aruna Kashyap) អះអាង​ថា នេះ​ជា​ការ​រឹតត្បិត​យ៉ាង​ខ្លាំង​ទៅលើ​សេរីភាព​នៃ​ការ​ជួប​ប្រជុំ​របស់​កម្មករ​និយោជិក ពី​សំណាក់​របប​លោក ហ៊ុន សែន ហើយ​នេះ​ក៏​ស្ដែង​ឲ្យ​ឃើញ​ពី​បញ្ហា​ប្រឈម ដែល​ត្រូវការ​ការកែ​ទម្រង់​ប្រព័ន្ធ​គ្រប់គ្រង​នៃ​របប​មួយ​នេះ​ផង​ដែរ។

ស្រប​ពេល​ដែល​ក្រុម​អង្គការ សមាគម សហជីព និង​កម្មករ​ប្រារព្ធ​ទិវា​ពលកម្ម​អន្តរជាតិ ក្រោម​ការ​រឹត​បន្តឹង​សិទ្ធិ​សេរីភាព​នេះ មេដឹកនាំ​របប​ក្រុងភ្នំពេញ លោក ហ៊ុន សែន ឯណោះ​វិញ បាន​ចុះទៅ​ជួប​កម្មករ​-​កម្ម​ការ​នី នៅ​តំបន់​សេដ្ឋកិច្ច​ពិសេស​ភ្នំពេញ។ លោក ហ៊ុន សែន បាន​ទទួល​ទាន​អាហារ​រួមគ្នា និង​រាំ​លេង​កម្សាន្ត​ជាមួយ​ក្រុម​កម្មករ​នៅ​ទីនោះ ហើយ​លោក​ក៏បាន​ឆ្លៀត​ឃោសនា​រក​សំឡេងឆ្នោត​ផង​ដែរ គឺ​អំពាវនាវ​ឱ្យ​ក្រុម​កម្មករ​បោះឆ្នោត​ជូន​គណបក្ស​ប្រជាជន​កម្ពុជា​របស់​លោក​តទៅទៀត ដោយ​លើក​ហេតុផល​ថា ដើម្បី​ការពារ​សន្តិភាព ក៏ប៉ុន្តែ​ពាក្យ "​ការពារ​សន្តិភាព​” ក្នុង​ន័យ​នេះ ត្រូវ​បាន​អ្នកវិភាគ​នយោបាយ និង​អ្នកឃ្លាំមើល​សង្គម វាយ​តម្លៃ​ថា ជា​ការ “​ការពារ​អំណាច​របស់​លោក ហ៊ុន សែន និង​ក្រុម​គ្រួសារ​” ទៅវិញ​ទេ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល