ពលករខ្មែរដែលជាបនៅឯប្រទេសម៉ាឡេស៊ី ស្នើសុំដល់រដ្ឋាភិបាលកម្ពុជា ជួយពន្លឿន និងជួយចេញថ្លៃសំបុត្រយន្តហោះត្រឡប់មកកម្ពុជាវិញ។ ការស្នើសុំនេះ ដោយសារពួកគេមិនទាន់ឃើញរដ្ឋាភិបាលមានវិធានការជាក់លាក់នៅឡើយ បន្ទាប់ពីលោកនាយករដ្ឋមន្ត្រី ហ៊ុន សែន ប្រកាសអនុញ្ញាតឱ្យពួកគេអាចវិល ត្រឡប់មកកាន់មាតុប្រទេសវិញ។
ពលករខ្មែរធ្វើការនៅរោងចក្រក្នុងខេត្តចូហូ ប្រទេសម៉ាឡេស៊ី លោកស្រី សាវី សាឡាស់ សម្ដែងក្តីរីករាយដែលរដ្ឋាភិបាល ប្រកាសអនុញ្ញាតឱ្យពលករខ្មែរអាចត្រឡប់ទៅកម្ពុជាវិញ ប៉ុន្តែលោកស្រី មិនទាន់បានទទួលដំណឹងពីខាងស្ថានទួតកម្ពុជា ថា ពួកគាត់ ត្រូវទៅពិនិត្យសុខភាពថ្ងៃណា និងត្រូវជិះយន្តហោះទៅកម្ពុជាថ្ងៃណានោះទេ។
ពលកររូបនេះ ស្នើសុំឱ្យរដ្ឋាភិបាល ជួយសម្របសម្រួលបញ្ជូនពួកគាត់ត្រឡប់ទៅកម្ពុជាវិញឱ្យបានឆាប់ ព្រោះថា ពលករភាគច្រើន មិនអាចបន្តរស់នៅប្រទេសម៉ាឡេស៊ីក្នុងស្ថានភាពអត់ការងារធ្វើបានទៀតឡើយ។ លោកស្រី សាវី សាឡាស់ បន្តថា ប្រសិនបើរដ្ឋាភិបាល អាចជួយចេញថ្លៃសំបុត្រយន្តហោះ គឺកាន់តែល្អ ព្រោះថា លោកស្រីនិងពលករដទៃទៀត គ្មានលទ្ធភាពទិញសំបុត្រ យន្តហោះខ្លួនឯងនោះទេ ដោយសារបានចំណាយលុយសម្រាប់ធ្វើដំណើរ និងទិញសំបុត្រយន្តហោះទៅស្រុកខ្មែរ កាលពីលើកមុនអស់ពីខ្លួនរួចទៅហើយ ប៉ុន្តែត្រូវបានរដ្ឋាភិបាលហាមឃាត់មិនឱ្យចូលស្រុកខ្មែរវិញ។ ម្យ៉ាងវិញ លោកស្រីអះអាងថា ថៅកែម៉ាឡេស៊ីភាគច្រើន ក៏មិនទទួលខុស ត្រូវលើរឿងថ្លៃសំបុត្រយន្តហោះនេះដែរ៖ «ពេលអត់មានធ្វើការ អត់មានលុយចំណូលដែរ។ ចំពោះគេផ្សេងអត់ដឹងទេ តែចំពោះខ្ញុំមានតែឱ្យផ្ទះនៅស្រុកខ្មែរផ្ញើលុយមក ដើម្បីទិញសំបុត្រយន្តហោះខ្លួនឯង។ អត់ការងារធ្វើ ហើយយើងនៅទីនេះយូរទៅកាន់តែលំបាកហើយមានអ្នកខ្លះលំបាកជាងខ្ញុំទៀត»។
ចំណែកនិស្សិតខ្មែររៀននៅប្រទេសម៉ាឡេស៊ីម្នាក់ គឺលោក ស្លេះ សាព្រី មានប្រសាសន៍ថា លោកក៏មិនទាន់ឃើញខាងស្ថានទូត ចាត់វិធានការជាក់លាក់បែបណានៅឡើយដែរ ដើម្បីជួយសម្របសម្រួលឱ្យពលរដ្ឋខ្មែរដែលមានបំណងចាកចេញពីម៉ាឡេស៊ីទៅកម្ពុជាវិញ៖ «យោបល់របស់ខ្ញុំគួរតែធ្វើដូចប្រទេសគេ គឺប្រទេសគេយកបញ្ជូនកប៉ាល់ហោះមកយកប្រជាជនគេអ៊ីចឹងហា ព្រោះអីព្រោះថា បងប្អូនយើងដែលទៅថ្ងៃមុននោះ គឺ សំបុត្រយន្តហោះគាត់ចោលហើយមិនអាចប្រើប្រាស់បានទៀតទេ។ មួយទៀត រឿងទៅពិនិត្យទៅអីនោះ ខាងស្ថានទូត ចាត់ចែងទៅ ធ្វើម៉េចអីម៉េចទាក់ទងប្រជាជនទៅ ហើយបើឱ្យគាត់ទាក់ទងខ្លួនឯងមិនដឹងថា រត់ការទៅខាងណាមកខាងណាអីទេ គឺពិបាកណាស់»។
លោកនាយករដ្ឋមន្ត្រី ហ៊ុន សែន បានប្រកាសតាមហ្វេសប៊ុកកាលពីថ្ងៃទី២៧ ខែមេសា អនុញ្ញាតឱ្យពលករជាងពីររយនាក់( ២០០នាក់) ដែលក្នុងនោះក៏មានអ្នកទោសចំនួន ៧៣នាក់ផងដែរ អាចវិលត្រឡប់មកកាន់មាតុប្រទេសវិញបានហើយ។ ទោះជាយ៉ាងណា លោកស្នើសុំឱ្យប្រជាពលរដ្ឋនៅ ម៉ាឡេស៊ីទាំងនោះ ទុកពេលវេលាឱ្យខាងអាជ្ញាធរម៉ាឡេស៊ី ធ្វើតេស្តសុខភាពរកជំងឺកូវីដ-១៩ ជាមុន សិន ហើយក្នុងករណីគ្មានជំងឺកូវីដ-១៩ គឺពួកគេ អាចវិលត្រឡប់មកកម្ពុជាក្នុងពេលឆាប់ៗនេះ ប៉ុន្តែ បើមានជំងឺកូវីដ គឺត្រូវនៅសម្រាកព្យាបាលនៅទីនោះរហូតជាសះស្បើយ។ លោក ហ៊ុន សែន បញ្ជាក់ថា ចំពោះអ្នកណាដែលនឹងមកដល់កម្ពុជាវិញ គឺត្រូវធ្វើចត្តាឡីស័ក ឬនៅដាច់ដោយឡែក នៅកន្លែងដែលរដ្ឋរៀបចំចំនួន១៤ថ្ងៃ និងនៅតាមផ្ទះរៀងៗខ្លួន១៤ថ្ងៃ ដូច្នេះសរុប២៨ថ្ងៃ ដើម្បីតាម ដានសុខភាពបន្តទៀត។
អ្នកនាំពាក្យក្រសួងការបរទេស លោក កុយ គួង ប្រាប់អាស៊ីសេរីថា ខាងតំណាងស្ថានទូតកម្ពុជា បានទាក់ទងទៅខាងអាជ្ញាធរម៉ាឡេស៊ីរួចហើយ ដើម្បីឱ្យជួយពិនិត្យសុខភាពជូនពលករខ្មែរដោយ មិនគិតថ្លៃ ។ លោកបញ្ជាក់ថា ចំពោះថ្លៃសំបុត្រយន្តហោះនោះ គឺរដ្ឋាភិបាលមិនទទួលខុសត្រូវ ឡើយ ព្រោះលោកមិនជឿថា ក្រុមនិស្សិត និងពលករខ្មែរ គ្មានលទ្ធភាពទិញសំបុត្រយន្តដោយខ្លួនឯងនោះទេ៖ «ទី២ រឿងសោហ៊ុយធ្វើដំណើរនេះភាគច្រើនខាងថៅកែនិងពលករខ្លួនឯង គាត់អាចដោះស្រាយបាន។ ឧទាហរណ៍ថា ពលករខាងនេសាទអ៊ីចឹង ខាងថៅកែខាងម្ចាស់ ទូកនេសាទ គឺខ្ញុំទទួលបានព័ត៌មានពីខាងស្ថានទូតថា គាត់អាចដោះស្រាយសោហ៊ុយសោដាជូនគាត់បានក្នុងការធ្វើដំណើរមកប្រទេសយើងវិញ»។
អ្នកគ្រប់គ្រងកម្មវិធីការងារនៃមជ្ឈមណ្ឌលសម្ពន្ធភាពការងារនិងសិទ្ធិមនុស្សហៅកាត់ថា សង់ ត្រាល់ (CENTRAL) លោក ឃុន ថារ៉ូ មានប្រសាសន៍ថា ក្នុងពេលវេលាដ៏លំបាកនេះ រដ្ឋាភិបាល ត្រូវមានកាតព្វកិច្ចគាំពារ និងជួយសម្របសម្រួលដូចជាផ្តល់នូវថវិកា និងម្ហូបអាហារ ដើម្បីធ្វើយ៉ាងណាធានាឱ្យប្រជាពលរដ្ឋខ្មែរ នៅក្រៅប្រទេសបានវិលត្រឡប់មកកម្ពុជាដោយសុវត្ថិភាព។ លោក សង្កេតឃើញថា កន្លងមក រដ្ឋាភិបាល ទទួលបានជំនួយជាកញ្ចប់ថវិកាពីសប្បុរសជននិងបណ្ដាប្រទេសធំៗលើពិភពលោក ជាច្រើន ដើម្បីដោះស្រាយជំងឺកូវីដ-១៩ ដូច្នេះរដ្ឋាភិបាល គួរតែបញ្ចេញកញ្ចប់ថវិកាទាំងនោះ ដើម្បីជួយដល់ពលរដ្ឋដែលងាយរងគ្រោះឱ្យមានតម្លាភាព និងប្រសិទ្ធភាព៖ «ក្រសួងសុខាភិបាល ក៏បានប្រកាសដែរថា រដ្ឋាភិបាល ត្រៀមកញ្ចប់ថវិកាចំនួន៣០លានដុល្លារ សម្រាប់ត្រៀមទប់ស្កាត់ការរីករាលដាលជំងឺកូវីដ ដូច្នេះទឹក ប្រាក់នេះច្រើនណាស់ តើយើងយកទៅណា គួរតែយកទៅជួយប្រជាពលរដ្ឋដែលកំពុងមានបញ្ហាប្រឈមទាំងផ្នែកសេដ្ឋកិច្ច ហើយអ្នកដែលអាទិភាពគឺពលករដែលជាប់គាំងនៅម៉ាឡេស៊ី និងនៅថៃជាដើម ។រដ្ឋត្រូវតែប្រើប្រាស់ថវិកាទាំងអស់នេះដោយតម្លាភាព ប្រសិទ្ធភាពហើយនឹងសេចក្តីត្រូវការដែលចាំបាច់ហើយយើងមើលឃើញថា វាជាតម្រូវការមិនអាចខ្វះខាត់បាន»។
តួលេខផ្លូវការរបស់ក្រសួងការងារបង្ហាញថា ពលករខ្មែរដែលកំពុងធ្វើការនៅប្រទេសម៉ាឡេស៊ីមានជាង ៣ ម៉ឺននាក់ ក្នុងឆ្នាំ២០១៩ ប៉ុន្តែតាមការប៉ាន់ស្មានក្រៅផ្លូវការរបស់អង្គការ សង់ត្រាល់ (CENTRAL) ចំនួនពលករខ្មែរ ដែលកំពុងធ្វើការនៅប្រទេសម៉ាឡេស៊ី មានមិនក្រោម១០ម៉ឺន នាក់នោះទេ ដោយរាប់ទាំងពលករស្របច្បាប់ និងមិនស្របច្បាប់។ ពួកគេភាគច្រើនធ្វើការងារតាម រោងចក្រ ធ្វើការងារតាមផ្ទះ និងខ្លះទៀតធ្វើការនៅលើទូកនេសាទ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។