សហព័ន្ធខ្មែរកម្ពុជាក្រោមបានបញ្ចប់ថ្ងៃទីពីរ នៃមហាសន្និបាតលើកទី១១ ដែលមានរយៈពេលបីថ្ងៃ ចាប់ពីថ្ងៃទី៦ ដល់ថ្ងៃទី៨ ខែឧសភា។ តំណាងពលរដ្ឋខ្មែរក្រោម និងអង្គការប្រទេសនិងពលរដ្ឋគ្មានតំណាង (UNPO) និងវាគ្មិនប្រមាណ ១០០នាក់ បានជជែកអំពើស្ថានភាពសិទ្ធិមនុស្សនៅកម្ពុជាក្រោម និងយុទ្ធសាស្ត្រដើម្បីស្វែងរកសិទ្ធិស្វ័យសម្រេចដោយខ្លួនទៅថ្ងៃអនាគត។ មហាសន្និបាតលើកទី១១នេះ ក៏បានបោះឆ្នោតជ្រើសរើសសមាជិកគណៈកម្មការ និងនាយកប្រតិបត្តិសហព័ន្ធថ្មីដែរ។
ប្រធានសហព័ន្ធខ្មែរកម្ពុជាក្រោម ដែលទើបជាប់ឆ្នោតសម្រាប់រយៈពេល៤ឆ្នាំទៀត គឺលោក ប្រាក់ សេរីវុឌ្ឍ សំណូមពរឲ្យខ្មែរទាំងអស់រួមគ្នាតស៊ូដើម្បីបុព្វហេតុខ្មែរកម្ពុជាក្រោម។
លោក ប្រាក់ សេរីវុឌ្ឍ ប្រាប់វិទ្យុអាស៊ីសេរីថា សហព័ន្ធនឹងបង្កើតយុទ្ធសាស្ត្រថ្មី សម្រាប់ពង្រឹងសមត្ថភាព និងការងាររបស់សហព័ន្ធខ្មែរក្រោម។ លោក ប្រាក់ សេរីវុឌ្ឍ បន្តថា សហព័ន្ធក៏នឹងធ្វើសកម្មភាពការទូតនឹងប្រទេសដែលសម្រេចជោគជ័យក្នុងការទាមទារសិទ្ធិស្វ័យសម្រេច ដោយខ្លួនឯង ដើម្បីយកបទពិសោធន៍ពីប្រទេសទាំងនោះ ក្នុងទាមទារសិទ្ធិស្វ័យសម្រេចដោយខ្លួនឯងសម្រាប់ពលរដ្ឋខ្មែរក្រោម៖ «ការយល់ដឹងរបស់បងប្អូនកម្ពុជាក្រោមយើងកាន់តែច្រើនឡើង ហ៊ានងើបឡើងតស៊ូដោយសន្តិវិធីហ្នឹងជារឿងទីមួយ និងរឿងទីពីរជាស្ថានការអន្តរជាតិវាមានឥទ្ធិពល បានផលប្រយោជន៍ដល់យើងដែរ ទាក់ទងតំបន់ភូមិភាគយើងហ្នឹង»។
លោក ប្រាក់ សេរីវុឌ្ឍ អំពាវនាវឲ្យពលរដ្ឋខ្មែរក្រោមទូទាំងពិភពលោក ចូលរួមចលនារបស់សហព័ន្ធដើម្បីសម្រេចយុទ្ធសាស្ត្រសហព័ន្ធទៅថ្ងៃអនាគត៖ «ខ្ញុំសូមអំពាវនាវឲ្យបងប្អូននៅព្រះរាជាណាចក្រកម្ពុជា បងប្អូនភៀសខ្លួននៅខាងក្រៅក្តី សូមមេត្តាជួយគាំទ្រសហព័ន្ធខ្មែរកម្ពុជាក្រោមផង។ វាជាអង្គការដែលអន្តរជាតិទទួលស្គាល់ ហើយវាជាតំណាងឲ្យមតិខ្មែរក្រោមនៅលើទឹកដីសណ្ដទន្លេមេគង្គ»។
សហព័ន្ធខ្មែរកម្ពុជាក្រោម មានមូលដ្ឋាននៅសហរដ្ឋអាមេរិក ជាអង្គការធ្វើចលនាតស៊ូមតិដោយអហិង្សាលើឆាកអន្តរជាតិ ដើម្បីតស៊ូទាមទារឱ្យរដ្ឋាភិបាលវៀតណាម គោរពសិទ្ធិមនុស្ស សិទ្ធិរស់នៅដោយសុវត្ថិភាព សិទ្ធិរក្សាសាសនា វប្បធម៌ ទំនៀមទម្លាប់ ប្រពៃណី និងសិទ្ធិសម្រេចវាសនាខ្លួន ដោយខ្លួនឯង របស់ខ្មែរក្រោម ដែលជាជនជាតិដើមនៅលើដែនដីកម្ពុជាក្រោម។ សហព័ន្ធខ្មែរកម្ពុជាក្រោម ត្រូវបានមហាសន្និបាតលើកទី៥ នៃខ្មែរកម្ពុជាក្រោមពិភពលោក បង្កើតឡើងកាលពីថ្ងៃទី៤ ខែសីហា ឆ្នាំ១៩៩៦៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។