ឆ្មាំ​ពន្ធនាគារ​ព្រៃ​ស​មិន​អនុញ្ញាត​ឲ្យ​យុវជន គង់ រ៉ៃយ៉ា ជួប​មិត្តភក្តិ​ និង​គ្រូពេទ្យ​ដែល​ចូល​សួរ​សុខ​ទុក្ខ

ដោយ សេក បណ្ឌិត
2019-09-10
អ៊ីម៉ែល
មតិ
Share
បោះពុម្ព
លោកស្រី​ សុខ​ ស្រី​និច ភរិយា​លោក​គង់​ រ៉ៃ​យ៉ា​
លោកស្រី​ សុខ​ ស្រី​និច ភរិយា​លោក​គង់​ រ៉ៃ​យ៉ា​
រូប៖ ហ្វេសប៊ុកលោក​គង់​ រ៉ៃ​យ៉ា​

ភរិយា​របស់​សកម្មជន កែម ឡីនិយម លោក គង់ រ៉ៃយ៉ា អះអាង​ថា មន្ត្រី​ពន្ធនាគារ​បាន​ភូត​កុហក​ដោយ​មិន​អនុញ្ញាត​ឲ្យ​ស្វាមី​របស់​លោកស្រី​ ជួប​​​មិត្តភក្តិ​ និង​គ្រួ​ពេទ្យ​របស់​អង្គការ លីកាដូ ដែល​ចូល​សួរ​សុខ​ទុក្ខ​ កាល​ពី​សប្តាហ៍​មុន​នោះ​ទេ​។ មន្ត្រី​សិទ្ធិមនុស្ស​ និង​មេធាវី​ការពារ​ក្តី​ថា ទង្វើ​មន្ត្រី​ពន្ធនាគារ​ គឺជា​ការ​រើសអើង​ និង​ជា​ការ​រំលោភ​សិទ្ធិ​របស់​ជន​ជាប់​ឃុំ។

ភរិយា​លោក​គង់​ រ៉ៃ​យ៉ា​ គឺ​លោកស្រី​ សុខ​ ស្រី​និច​ ប្រាប់​អាស៊ី​សេរី​បន្ទាប់ពី​ចូល​សួរ​សុខ​ទុក្ខ​ស្វាមី​ នៅ​ព្រឹក​ថ្ងៃ​ទី៩​ ខែកញ្ញា​ថា​ លោក គង់ រ៉ៃយា សម្តែង​ការ​សោក​ស្តាយ​ ដែល​មន្ត្រី​ពន្ធនាគារ​និយាយ​ភូត​កុហក​ប្រាប់​មិត្តភក្តិ​របស់​លោក​ និង​គ្រួ​ពេទ្យ​របស់​អង្គការ លីកាដូ​ ដែល​បាន​ចូល​សួរ​សុខទុក្ខ​ក្នុង​ ពន្ធនាគារ​ថា​ លោក​មិន​ចង់​ជួប​នរណា​ទាំង​អស់​ក្រៅ​ពី​ប្រពន្ធ​កូន​របស់​លោក។

លោកស្រី​ បន្ត​ថា​ មន្ត្រី​ពន្ធ​នា​ មិនបាន​ប្រាប់​លោក គង់ រ៉ៃយ៉ា ថា​ មាន​មិត្តភក្តិ​ និង​គ្រួ​ពេទ្យ​អង្គការ​លី​ កាដូ​ចូល​សួរ​សុខ​ទុក្ខ​ឡើយ​។ លោកស្រី​រៀបរាប់​ទៀត​ថា​ លោក គង់ រ៉ៃយ៉ា មានចិ​ត្ត​ត្រេកអរ​បំផុត ដែល​មាន​មិត្តភក្តិ​ចូល​សួរ​សុខ​ទុក្ខ​ ហើយ​ថា លោក​ក៏​ជា​អ្នក​ស្នើសុំ​ឲ្យ​ខាង​គ្រូពេទ្យ​អង្គការ​ លីកាដូ ជួយ​ពិនិត្យ​ឈាម​ ដូច្នេះ​គ្មាន​ហេតុផល​អ្វី​ដែល​គាត់​មិន​ចង់​ជួប​អ្នក​ទាំងនោះ​ឡើយ៖ «មិន​ដឹង​ជា​មូលហេតុ​អី​ ទើប​យក​ឈ្មោះ​ស្វាមី​ខ្ញុំ​ថា មិន​ចង់​ជួប​អ្នក​ណា​អ្នក​ណី។ ដូច្នេះ​កាល​ពី​ព្រឹក​មិញ​ប្តី​ខ្ញុំ​អំពាវនាវ​ដល់​សង្គម​ស៊ីវិល និង​អ្នក​សារព័ត៌មាន​ ជួយ​ផ្សព្វផ្សាយ​ថា​ កុំ​ឲ្យ​មាន​ការ​យក​ឈ្មោះ​របស់​គាត់​ថា មិន​ចង់​ជួប​អ្នក​ណា​ទៀត។ គាត់​មិន​ដឹង​រឿង​អី​ទេ ហើយ​ជា​ធម្មតា គឺ​គាត់​ចង់​ឲ្យ​តែ​គេ​ទៅ​ជួប។ សូម​ឲ្យ​មន្ត្រី​ពន្ធនាគារ​ជួយ​បក​ស្រាយ​ករណី​នេះ​ផង»

ការ​លើកឡើង​នេះ​ បន្ទាប់ពី​សប្តាហ៍​មុន គឺ​មាន​មិត្តភក្តិ​មួយ​ក្រុម​របស់​លោក​ គង់​ រ៉ៃ​យ៉ា​ បាន​ចូល​ទៅ​សួរ​សុខទុក្ខ​លោក​ នៅ​ក្នុង​ពន្ធនាគារ​ ប៉ុន្តែ​មន្ត្រី​ពន្ធនាគារ​ ប្រាប់​ថា​ លោក​ គង់​ រ៉ៃ​យ៉ា​ មិន​ចង់​ ជួប​នរណា​ទេ​ក្រៅ​ពី​ប្រពន្ធ​កូន។ លុះ​នៅ​ថ្ងៃ​បន្ទាប់​ទៀត​ ក្រុម​គ្រូពេទ្យ​របស់​អង្គការ លី​កាដូ​ បាន​ចូល​ ទៅ​ពិនិត្យ​ជំងឺ​ឲ្យ​អ្នក​ជាប់​ឃុំ រួម​ទាំង​លោក​ គង់​ រ៉ៃយ៉ា ប៉ុន្តែ​មន្ត្រី​ពន្ធនាគារ​ ប្រាប់​ថា​ លោក គង់ រ៉ៃយ៉ា មិន​ចង់​ពិនិត្យ​ជំងឺ​អ្វី​ទេ។

អាសី​សេរី​ មិន​អាច​សុំ​ការ​បំភ្លឺ​ជុំ​រិញ​រឿង​នេះ​ពី​អ្នក​នាំ​ពាក្យ​អគ្គនាយកដ្ឋាន​ពន្ធនាគារ​នៃ​ក្រសួង​មហាផ្ទៃ​លោក នុត សាវនា បាន​ទេ ដោយ​ទូរស័ព្ទ​ចូល​ពុំ​មាន​អ្នក​ទទួល។ ទោះ​យ៉ាង​ណា​ក្តី​ កន្លង​មក​ លោក​ នុត​ សាវនា​ ធ្លាប់​ព្រមាន​ថា កុំ​ឲ្យ​យុវជន​ គង់​ រ៉ៃ​យ៉ា​ កូរ​ពេក ប្រយ័ត្ន​មន្ត្រី​ពន្ធនាគារ​កូរ​វិញ ឬ​ទុក​ចោល​លែង​ខ្វល់។ ការ​ព្រមាន​នេះ បន្ទាប់​ពី​យុវជន​ គង់​ រ៉ៃយ៉ា ធ្វើ​កូដកម្ម​បង្អត់​អាហារ ដើម្បី​ស្នើសុំ​ឲ្យ​ពន្ធនាគារ​អនុញ្ញាត​ឲ្យ​លោក​បាន​ហាត់ប្រាណ​គ្រប់គ្រាន់ និង​មាន​សិទ្ធិ​ខ្ចី​សៀវភៅ​ទៅ​អាន​ក្នុង​បន្ទប់​ ព្រមទាំង​ស្នើសុំ​កន្លែង​គេង ដែល​ល្មម​អាច​ធ្វើ​វិបស្សនា​បាន។

មេធាវី​ការពារ​ក្តី​ឲ្យ​យុវជន គង់ រ៉ៃយ៉ា គឺ​លោក សំ សុគង់ ថ្លែង​ថា​ លោក​មិន​ទាន់​បាន​ដឹង​រឿង​នេះ​នៅ​ឡើយ​ទេ​ ប៉ុន្តែ​ប្រសិន​បើ​ករណី​នេះ​ ជា​ការ​ពិត គឺ​ជា​រំលោភ​លើ​សិទ្ធិ​កូន​ក្តី​របស់​លោក។ លោក​បញ្ជាក់​ថា​ កូន​ក្តី​របស់​លោក​ គ្រាន់​តែ​ជា​ជន​សង្ស័យ ដែល​ត្រូវ​បាន​តុលាការ​ឃុំ​ខ្លួន​បណ្តោះអាសន្ន​ប៉ុណ្ណោះ​ ដូច្នេះ​ តាម​គោលការណ៍​ច្បាប់​ គឺ​កូន​ក្តី​របស់​លោក​ នៅ​មាន​សិទ្ធិ​ជួប​ជាមួយ​គ្រួសារ​សាច់​ញាតិ និង​មិត្ត​ភិ​ក្ត​ទាំង​អស់ ដែល​បាន​ស្នើសុំ​ចូល​សួរ​សុខ​ទុក្ខ៖ «គាត់​មាន​សិទ្ធិ​ជួប​ជាមួយ​គ្រួសារ​ សាច់ញាតិ​ និង​អ្នកដទៃ​ទៀត​ដែល​ចង់​ចូល​ជួប​សួរ​ទុក្ខ​គាត់​ក្នុង​ពន្ធនាគារ​ គ្រាន់តែ​ការ​ស្នើសុំ​ជួប​សួរ​សុខទុក្ខ​នេះ គឺ​ត្រូវ​មាន​បែបបទ​មួយ​ចំនួន​​របស់​ពន្ធនាគារ»

សមត្ថកិច្ច​របប​ក្រុង​ភ្នំពេញ​បាន​ចាប់​ខ្លួន​លោក គង់ រ៉ៃយ៉ា អាយុ ២៨ឆ្នាំ កាល​ពី​ថ្ងៃ​ទី៩ ខែ​កក្កដា​ ដោយ​ចោទ​ប្រកាន់​ពី​បទ​ញុះញង់​ឱ្យ​ប្រព្រឹត្ត​បទ​ឧក្រិដ្ឋ​ជា​អាទិ៍​តាម​មាត្រា៤៩៤ និង ៤៩៥ នៃ​ក្រម​ព្រហ្មទណ្ឌ។ ការ​ចោទ​ប្រកាន់​នេះ​ ដោយសារ​តែ​លោក​ ផ្សព្វផ្សាយ​លក់​អាវ​យឺត​មាន​រូប និង​ទស្សនៈ​បណ្ឌិត​ កែម ​ឡី​ នៅ​លើ​បណ្ដាញ​សង្គម​ហ្វេសប៊ុក (Facebook) សម្រាប់​ខួប​បី​ឆ្នាំ​នៃ​អំពើ​ឃាតកម្ម​លើ​បណ្ឌិត កែ​ ឡី ដែល​ត្រូវ​បាន​ឃាតករ​បាញ់​សម្លាប់​កណ្តាល​ទីក្រុង​ភ្នំពេញ​ កាល​ពី​ថ្ងៃ​ទី១០​ ខែ​កក្កដា​ ឆ្នាំ២០១៦។

នាយករង​ទទួលបន្ទុក​ផ្នែក​ឃ្លាំមើល​សិទ្ធិមនុស្ស​នៃ​អង្គការ​ លី​កាដូ​ (LICADHO) លោក​ អំ​ សំអាត​ មាន​ប្រសាសន៍​ថា​ ជន​ជាប់​ឃុំ​ទាំង​អស់​ គឺ​បាត់បង់​តែ​សិទ្ធិ​ដើរ​ហើរ​មួយ​ប៉ុណ្ណោះ​ ដូច្នេះ​ប្រសិន​បើ​ ពន្ធនាគារ​ហាម​ឃាត់​សិទ្ធិ​ដទៃ​ទៀត​របស់​អ្នក​ជាប់​ឃុំ គឺ​ជា​ការ​រំលោភ​ច្បាប់៖ «បើ​យើង​និយាយ​ជាទូទៅ​ ទណ្ឌិត​ក៏ដោយ​ ពិរុទ្ធជន​ក៏ដោយ​ គឺ​​តាមផ្លូវ​ច្បាប់​ស្តី​ពី​ការគ្រប់គ្រង​ពន្ធនាគារ​ និង​បទដ្ឋាន​ច្បាប់​ផ្សេង​ៗ រួម​ទាំង​បទដ្ឋាន​អន្តរជាតិ​ជាដើម​ គាត់​នៅតែ​មាន​សិទ្ធិ​ជួប​គ្រួសារ​ និង​មិត្តភក្តិ​របស់​គាត់​។ នេះ​គឺជា​សិទ្ធិ​របស់​គាត់ ​ដែល​មិន​អាច​ដកហូត​​បាន​ទេ​ ហើយ​សិទ្ធិ​ទទួល​បាន​សេវា​សុខភាព​ ប្រសិនបើ​គាត់​ឈឺ​ស្កាត់​អី​ គឺ​ត្រូវតែ​ទទួល​បាន​ ពីព្រោះ​​សិទ្ធិ​ទាំងអស់​នេះ​មិន​ត្រូវ​បាន​ដកហូត​នោះ​ទេ»

អង្គការ​សហប្រជាជាតិ​ សហរដ្ឋអាមេរិក​ និង​អង្គការ​សង្គម​ស៊ីវិល​ជាតិ​ និង​អន្តរជាតិ​ផ្សេង​ទៀត​ បាន​ចេញ​សេចក្ដីថ្លែង​ការណ៍​ថ្កោលទោស​ជា​បន្ត​បន្ទាប់​ថា​ចំណាត់ការ​របស់​អាជ្ញាធរ​របប​នេះ​ថា​ មាន​គោលដៅ​ធ្វើ​ទុក្ខ​បុក​ម្នេញ​អ្នក​ដែល​ហ៊ាន​បញ្ចេញមតិ​ និង​ការ​ជួប​ប្រជុំ​គ្នា​ដោយ​សន្តិវិធី។ ពួក​គេ​​អំពាវនាវ​ដល់​របប​ក្រុង​​ភ្នំពេញ​​ដោះ​​លែង​​យុវជន​ គង់​ រ៉ៃ​យ៉ា​ និង​​បញ្ឈប់​ការ​រឹតត្បិត​សិទ្ធិ​សេរីភាព​ប្រជាពលរដ្ឋ​ដូច្នេះ​តទៅ​ទៀត៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល