អង្គការ លីកាដូ រំឭក​អំពី​ការ​រំលោភ​សិទ្ធិ​មនុស្ស​នៅ​ឆ្នាំ២០១៨ សមាគម​​អាដហុក​​រំលឹក​ទិវា​សិទ្ធិមនុស្ស ១០​ធ្នូ លើក​ទី៧១

ដោយ ទីន ហ្សាការីយ៉ា
2019-12-09
អ៊ីម៉ែល
មតិ
Share
បោះពុម្ព
(ឆ្វេង) រូប​សញ្ញា​អង្គការ​សិទ្ធិមនុស្ស លីកាដូ (LICADHO) និង​(ស្ដាំ) រូប​សញ្ញា​នៃ​សមាគម​ការពារ​សិទ្ធិមនុស្ស អាដហុក (ADHOC)។
(ឆ្វេង) រូប​សញ្ញា​អង្គការ​សិទ្ធិមនុស្ស លីកាដូ (LICADHO) និង​(ស្ដាំ) រូប​សញ្ញា​នៃ​សមាគម​ការពារ​សិទ្ធិមនុស្ស អាដហុក (ADHOC)។
រូប៖ អង្គការ និង​សមាគម​ទាំង​ពីរ

អង្គការ​សិទ្ធិ​មនុស្ស​លីកាដូ នៅ​ថ្ងៃ​ទី​០៩ ធ្នូ ​​ចេញ​ផ្សាយ​របាយការណ៍​ ការ​ពិនិត្យ​ឡើង​វិញ​រយៈពេល​ ១០ឆ្នាំ​ ស្ដី​ពី​ការ​រំលោភ​សិទ្ធិមនុស្ស​នៅ​កម្ពុជា ​ជា​របាយការណ៍​សិទ្ធិ​មនុស្ស​សម្រាប់​ឆ្នាំ​២០១៨។ ការរំលោភ​សិទ្ធិ​មនុស្ស សំខាន់ៗ សម្រាប់​ឆ្នាំ​២០១៨ មាន​ដូចជា ​ សាលា​ដំបូង​រាជធានី​ភ្នំពេញ​ នៅ​​ខែ​មករា បាន​​ចោទ​ប្រកាន់​ ថ្នាក់​ដឹកនាំ​សង្គម​ស៊ីវិល៣​នាក់ គឺ​លោក ប៉ា ងួន​ទៀង លោក មឿន តុលា និង​ព្រះ​តេជ​គុណ ប៊ុត ប៊ុន​តិញ ពី​បទ​រំលោភ​លើ​​សេចក្ដី​ទុក​​ចិត្ត ពាក់ព័ន្ធ​នឹង​បច្ច័យ​ចូល​បុណ្យ​សព​របស់​បណ្ឌិត កែម ឡី។ អង្គការ​លីកាដូ​ យល់​ថា ​នេះ​ជា​ការ​ចោទ​ប្រកាន់​បែប​មិន​សម​ទំនង ហើយ​​ក្រុម​គ្រួសារ​​របស់​បណ្ឌិត កែម ឡី ចាត់​ទុក​ថា ជា បណ្តឹង​គ្មាន​មូលដ្ឋាន។

នៅ​ឆ្នាំ​២០១៨ សិទ្ធិ​បញ្ចេញ​មតិ និង​សិទ្ធិ​នយោបាយ ត្រូវ​បាន​អង្គការ​លីកាដូ រក​ឃើញ​ថា មាន​ការ​រំលោភ​ខ្លាំង​ ដូច​ជា​ ករណី​អាជ្ញាធរ​ប្រទេស​ថៃ​ ​និរទេស សកម្មជន​បក្ស​ប្រឆាំង​ អ្នក​ស្រី សំ សុខា ​ដែល​​​អង្គការ​សហប្រជាជាតិ​ចាត់​ទុក​ជា​ជន​ភៀស​ខ្លួន​មកពី​ប្រទេស​កម្ពុជា​វិញ ហើយ​តុលាការ​​បាន​ចោទ​​អ្នកស្រី ពី​បទ​ញុះញង់​ឱ្យ​​មាន​ការ​រើសអើង​ និង​បទ ​ប្រមាថ​មន្ត្រី​សាធារណៈ​ ក្រោយ​ពេល​អ្នកស្រី បាន​យក​ស្បែក​ជើង​គប់​លើ​ស្លាក​គណបក្ស​កាន់​អំណាច។ ករណី​ សភា​ឯក​បក្ស​នៅ​កម្ពុជា​ បាន​អនុម័ត​​​ច្បាប់​ស្តីពី ការ​ប្រមាថ​ព្រះ​មហាក្សត្រ ការ​បោះឆ្នោត​ជ្រើស​រើស​សមាជិក​ព្រឹទ្ធ​សភា នៅ​ខែ​កុម្ភៈ ដែល​បាន​ហាមឃាត់ ក្រុម​ប្រឹក្សា​ជាប់​ឆ្នោត​​របស់​បក្ស​ប្រឆាំង​ចូល​រួម ក្រោម​ហេតុផល ​តុលាការ​កំពូល បាន​រំលាយ​គណបក្ស​សង្គ្រោះ​ជាតិ។ ខែ​មីនា​ កើត​មាន​ករណី​​រំលោភ​សិទ្ធិ​ដីធ្លី លើ​ពលរដ្ឋ ៣នាក់ នៅ​ខេត្ត​ក្រចេះ​ ត្រូវ​បាន​បាញ់ និង​រង​របួស​នៅ​ពេល​ដែល​​កង​កម្លាំង​ប្រដាប់​អាវុធ​ចម្រុះ​ប្រមាណ ១០០នាក់ បាន​ធ្វើការ​បាញ់​បង្ក្រាប ​ទៅ​លើ​ពលរដ្ឋ​ប្រមាណ ៣០០នាក់ កំពុង​​តវ៉ា​ប្រឆាំង​​​ការ​បណ្ដេញ​ចេញ​ដោយ​ហិង្សា​មួយ នៅ​ម្ដុំ​ចម្ការ​កៅស៊ូ​មេមត់។

នៅ​ខែ​ឧសភា​ មាន​ការ​ចាប់​ខ្លួន​​ ពលរដ្ឋ​ដំបូង​បង្អស់ ពី​បទ​ប្រមាថ​ព្រះ​មហាក្សត្រ គឺ​សកម្មជន​បក្ស​ប្រឆាំង​នៅ​ខេត្ត​សៀមរាប​ លោក បាន សម្ភីរ ដែល​បាន​​ចែក​រំលែក​អត្ថបទ​មួយ​​រិះគន់ ព្រះ​មហាក្សត្រ និង​មេដឹកនាំ​របប​ក្រុង​ភ្នំពេញ​ លោក ហ៊ុន សែន​ ក្នុង​បណ្ដាញ​សង្គម​ (facebook)។ ព្រឹត្តិការណ៍​រំលោភ​សិទ្ធិ​មនុស្ស​ធំ​មួយ​ទៀត កាល​ឆ្នាំ​នោះ គឺ​ការ​បោះ​ឆ្នោត​ ខែ​កក្កដា ឆ្នាំ​២០១៨។ គណបក្ស​ប្រជាជន​កម្ពុជា បាន​ឈ្នះ​អាសនៈ​ទាំង​អស់​នៃ​រដ្ឋសភា​ជាតិ នៅ​ក្នុង​ការ​បោះឆ្នោត​ជាតិ​មួយ ដែលផាត់​ចោល​គណបក្ស​ប្រឆាំង។ នេះ​ជា​លើក​ទី​មួយ​ក្នុង​ប្រវត្តិសាស្ត្រ​ប្រជាធិបតេយ្យ​កម្ពុជា ដែល​មាន​​តែ​គណបក្ស មួយ​គត់ គ្រប់​គ្រង​រដ្ឋសភា​ជាតិ ។ ចំនួន​សន្លឹក​​ឆ្នោត​​មិន​បាន​ការ ច្រើន​ជាង​ចំនួន​សន្លឹក​ឆ្នោត​បាន​ការ​ ដែល​គណបក្ស​តូចៗ ដទៃ​ទៀត​ទទួល​បាន។ ក្រោយ​ការ​ឈ្នះ​ឆ្នោត​​តែ​ម្នាក់​ឯង​នេះ​មក​ នៅ​ខែ​សីហា អ្នក​ទោស​មនសិការ​ច្រើន​នាក់ រួម​មាន​ សកម្មជន​ដីធ្លី អ្នកស្រី ទេព វន្នី អតីត​អ្នក​រាយការណ៍​ព័ត៌មាន​អាស៊ី​សេរី លោក អ៊ួន ឈិន និង​លោក យាង សុធារិន្ទ ដែល​​រង​​បទ​ចោទ​​មិន​ត្រឹម​ត្រូវ ត្រូវ​បាន​ដោះលែង​ឲ្យ​នៅ​ក្រៅ​ឃុំ​បណ្ដោះ​អាសន្ន​ តែ​តុលាការ​បាន​​កម្រិត​សិទ្ធ​សេរីភាព​មួយ​ចំនួន ជា​ពិសេស​ពាក់ព័ន្ធ​នឹង​ការ​ធ្វើ​ដំណើរ។

អង្គការ​លីកាដូ នឹង​បង្ហាញ​របាយការណ៍​សង្ខេប​​​ឆ្នាំ២០១៩ នៅ​ថ្ងៃ​ទី១០ ធ្នូ នៅ​លើ​គេហទំព័រ​របស់​ខ្លួន។ ការ​ដាក់​បង្ហាញ​របាយការណ៍​សង្ខេប​ព្រឹត្តិ​ការណ៍ ស្ដី​ពី​សិទ្ធិ​​មនុស្ស និង​ការ​រំលោភ​សិទ្ធិ​មនុស្ស​សំខាន់ៗ នានា ក្នុង​រយៈ​ពេល ១០ឆ្នាំ​ចុង​ក្រោយ​នេះ គឺ​ដើម្បី​អបអរ​ដល់​ទិវា​សិទ្ធិ​មនុស្ស​អន្តរជាតិ ១០ ធ្នូ ឆ្នាំ​២០១៩។

ទន្ទឹម​គ្នា​នឹង​អង្គការ​សិទ្ធិមនុស្ស លីកាដូ (LICADHO) ចេញ​របាយការណ៍ ស្ដីពី​ការ​ពិនិត្យ​ឡើង​វិញ នៃ​ការ​រំលោភ​សិទ្ធិមនុស្ស​នៅ​កម្ពុជា រយៈ​ពេល ១០ឆ្នាំ​នេះ សមាគម​ការពារ​សិទ្ធិមនុស្ស អាដហុក (ADHOC) ក៏​នឹង​រៀបចំ​ពិធី​រំលឹក​ខួប​នៃ​ទិវា​សិទ្ធិ​មនុស្ស​អន្តរជាតិ នៅ​ថ្ងៃ​ទី១០ ធ្នូ នៅ​ទីលាន​ប្រជាធិបតេយ្យ​ដែរ៕

(លោក នី សុខា ប្រធាន​ផ្នែក​ឃ្លាំមើល​ការ​រំលោភ​សិទ្ធិមនុស្ស​នៃ​សមាគម អាដហុក (ADHOC)។ រូប៖ ហ្វេសប៊ុក​សមាគម)


កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល