នៅក្នុងរដូវកាលបុណ្យភ្ជុំបិណ្ឌ និងកាន់បិណ្ឌ ពុទ្ធបរិសទ្យតែងតែយកចង្ហាន់ទៅវត្តដើម្បីប្រគេនព្រះសង្ឃ តែខុសប្លែកអីតែកូដករណាហ្គាវើលដ៍ នៅថ្ងៃទី២ នៃពិធីកាន់បិណ្ឌនេះ ពួកគេនាំគ្នាធ្វើពិធីកាន់បិណ្ឌនៅខាងមុខក្រុមហ៊ុនណាហ្គាវើលដ៍ ដើម្បីទាមទារឲ្យថៅកែដោះស្រាយវិវាទការងារ។
កូដករប្រមាណ ៣០នាក់ នៅថ្ងៃទី១ តុលា នាំគ្នាកាន់បដា និងចានស្រាក់ ដែលធ្វើពីក្រដាស ហើយមានចំនួន ៤ថត ដោយសរសេរថា ដោះស្រាយ ដោះលែង ទទួលយក និងបញ្ឈប់ការរើសអើង សំដៅទាមទារឲ្យថៅកែក្រុមហ៊ុនណាហ្គាវើលដ៍ និងរដ្ឋាភិបាលដោះស្រាយវិវាទការងារ ដោះលែងតំណាងសហជីពណាហ្គាវើលដ៍ គឺកញ្ញា ឈឹម ស៊ីថរ ទទួលយកកម្មករដែលនៅសេសសល់ចូលធ្វើការឡើងវិញ និងបញ្ឈប់ការរើសអើងនៅកន្លែងការងារ។
កូដករណាហ្គាវើលដ៍កញ្ញា ផាត ចាន់ណា ប្រាប់អាស៊ីសេរីនៅថ្ងៃទី១ តុលា ថា ក្នុងរដូវបុណ្យភ្ជុំ កញ្ញាក៏ចង់ត្រឡប់ទៅ ធ្វើបុណ្យនៅឯស្រុកកំណើតដែរ ក៏ប៉ុន្តែពួកគេគ្មានលទ្ធភាពត្រឡប់ទៅវិញ។ កញ្ញាស្នើដល់រដ្ឋាភិបាល និងថៅកែក្រុមហ៊ុនដោះស្រាយបញ្ចប់វិវាទការងារនេះ ដើម្បីឲ្យកម្មករមានលទ្ធភាព ទៅធ្វើបុណ្យនៅស្រុកកំណើត។
កញ្ញា ផាត ចាន់ណា៖ «បច្ចុប្បន្នអ្វី ដែលយើងធ្វើនេះ គឺយើងចង់បានដំណោះស្រាយពីថៅកែណាហ្គា និងក្រសួងពាក់ព័ន្ធឲ្យឆាប់ជួយពន្លឿនរកដំណោះស្រាយឲ្យពួកយើង ដើម្បីឲ្យពួកយើងអាចមានពេលវេលាចូលធ្វើការជាមួយនឹងថវិកាទៅជួបជុំគ្រួសារទៅកាន់បិណ្ឌនៅស្រុកកំណើតរៀងៗខ្លួនអីហាណាបងចា៎»។
វិវាទការងារ ដែលអូសបន្លាយពេលជាង២ឆ្នាំនេះ ធ្វើឲ្យកម្មករមួយចំនួនធ្លាក់ខ្លួនក្រីក្រជំពាក់បំណុលធនាគារ អ្នកខ្លះទៀតបង្ខំចិត្តលក់ដីដែលជាទ្រព្យសម្បត្តិចុងក្រោយដោយសារពួកគេបាត់បង់ការងារ និងគ្មានប្រាក់ចំណូល។ កូដករទទូចឲ្យរដ្ឋាភិបាល និងថៅកែក្រុមហ៊ុន ដោះស្រាយបញ្ចប់វិវាទការងារនេះ ដើម្បីឲ្យពួកគេមានលទ្ធភាពត្រឡប់ទៅស្រុកកំណើតជួបជុំក្រុមគ្រួសារក្នុងឱកាសបុណ្យភ្ជុំបិណ្ឌនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។