តុលាការលើកពេលសវនាការលើសំណុំរឿងញុះញង់បង្កភាពវឹកវរធ្ងន់ធ្ងរដល់សន្តិសុខសង្គម របស់សហជីពណាហ្គាវើលដ៍ទៅពេលក្រោយ។ សវនាការនេះមានក្រុមកូដករជាង ១០០នាក់តាមដានឃ្លាំមើលនៅមុខតុលាការ ដោយអ្នកខ្លះកាន់បដាជាប់ដៃ ដែលមានខ្លឹមសារថា «ខ្ញុំមកធ្វើជាសាក្សី» ដើម្បីបង្ហាញដល់តុលាការថា ពួកគាត់ចូលរួមធ្វើកូដកម្មដោយស្ម័គ្រចិត្តមិនមាននរណាម្នាក់ញុះញង់ ឬបង្ខិតបង្ខំឡើយ។
អគ្គលេខាធិការសហជីពណាហ្គាវើលដ៍ លោកស្រី ឃ្លាំង សុបិន្ត ប្រាប់វិទ្យុអាស៊ីសេរី នៅថ្ងៃទី២១ ខែកុម្ភៈនេះថា សវនាការនៅថ្ងៃនេះតុលាការមិនបានសាកសួរក្រុមកូដករណាហ្គាវើលដ៍ ដែលនៅក្រៅឃុំ នោះទេ ប៉ុន្តែតុលាការបានសួរកញ្ញា ឈឹម ស៊ីថរ តែម្នាក់ប៉ុណ្ណោះ។ លោកស្រីបន្តថា អ្នកដែលចូលស្ដាប់សវនាការបានឲ្យដឹងថា តំណាងអយ្យការអមសាលាដំបូង បានសាកសួរកញ្ញា ឈឹម ស៊ីថរ ម្ដងហើយម្ដងទៀត ក្នុងន័យដាក់បន្ទុកលើកញ្ញាពាក់ព័ន្ធនឹងប្រភពថវិកាជំនួយមនុស្សធម៌ ដោយមិនបានសាកសួរអំពីការទាមទារឲ្យក្រុមហ៊ុនដោះស្រាយវិវាទការងារនោះទេ។
លោកស្រីបញ្ជាក់ថា ពេលដែលតុលាការឲ្យជនត្រូវចោទចេញក្រៅបន្ទប់សវនាការ គឺមិនបង្កភាពងាយស្រួលក្នុងការរង់ចាំនោះទេ ដោយប៉ូលិសនៅតុលាការ មិនឲ្យនិយាយ ឬសួរនាំជាមួយអ្នកផ្សេង ហើយម្ដងដេញឲ្យទៅអង្គុយនៅទីនេះ ម្ដងដេញឲ្យអង្គុយនៅទីនោះ។ សូម្បីតែអង្គុយក្បែរបង្អួចសម្លឹងមើលក្រុមសហជីព ដែលមកលើកទឹកចិត្ត ក៏សមត្ថកិច្ចមិនអនុញ្ញាតដែរ។
តុលាការបានលើកពេលសវនាការជំនុំជម្រះលើសំណុំរឿងបទញុះញង់បង្កភាពវឹកវរធ្ងន់ធ្ងរដល់អន្តិសុខសង្គម ចំពោះក្រុមសហជីពណាហ្គាវើលដ៍ទៅថ្ងៃទី២៨ ខែកុម្ភៈខាងមុខ។
សវនាការនេះ ធ្វើឡើងក្រោយពីក្រុមសហជីពណាហ្គាវើលដ៍ធ្វើកូដកម្មទាមទារឲ្យក្រុមហ៊ុនណាហ្គាវើលដ៍ដោះស្រាយវិវាទការងារ ដែលអូសបន្លាយតាំងជាងមួយឆ្នាំមកហើយ តាំងពីចុងឆ្នាំ២០២១ មកដល់បច្ចុប្បន្ន៕