តុលាការឧទ្ធរណ៍សម្រេចតម្កល់សាលដីកាសំណុំរឿងមន្ត្រីអាដហុក ៤នាក់ និង សមាជិកគណៈកម្មាធិការជាតិរៀបចំការបោះឆ្នោតម្នាក់ ទុកជាបានការដដែល នៅថ្ងៃទី២៣ ឧសភា។ មន្ត្រីអាដហុក ចាត់ទុកការសម្រេចរបស់តុលាការបែបនេះថា ជារឿងអយុត្តិធម៌ ខណៈដែលសាក្សីដាក់បន្ទុកមិនមានវត្តមាន ដើម្បីសួរដេញដោលរកហេតុផលឱ្យបានត្រឹមត្រូវឡើយ។
មន្ត្រីឃ្លាំមើលការរំលោភសិទ្ធិមនុស្ស លើកឡើងថា រឿងនេះ សាលាឧទ្ធរណ៍គួរតែទម្លាក់បទចោទប្រកាន់មកលើពួកគេទាំង ៥នាក់ ឱ្យមានសេរីភាពវិញ ដោយមិនត្រូវតម្កល់សាលក្រមរបស់តុលាការជាន់ទាបបែបនេះឡើយ។
ប្រធានសមាគមការពារសិទ្ធិមនុស្ស និងអភិវឌ្ឃន៍នៅកម្ពុជា ហៅកាត់ថា អាដហុក លោក នី សុខា ដែលរងការចោទប្រកាន់នៅក្នុងសំណុំរឿង «សូកប៉ាន់សាក្សី និងសមគំនិតសូកប៉ាន់សាក្សី» ដែលនោះបានប្រាប់វិទ្យុអាស៊ីសេរីថា ការសម្រេចរបស់សាលាឧទ្ធរណ៍តម្កល់សាលក្រមរបស់តុលាការជាន់ទាបទុកជាបានការដដែលនេះ ជារឿងអយុត្តិធម៌សម្រាប់រូបលោក រួមនឹងសមាជិកផ្សេងទៀត ព្រោះគ្មានភស្តុតាងដាក់បន្ទុកណាមួយ ដែលអាចទទួលយកបាននោះទេ។
លោកបន្តថា ការបដិសេធរបស់លោក ស៊ិន វិសាល ប្រធានក្រុមប្រឹក្សាជំនុំជម្រះសាលាឧទ្ធរណ៍រាជធានីភ្នំពេញ ចំពោះការមិនកោះហៅដើមបណ្ដឹង គឺកញ្ញា ខុម ចាន់តារាទី ហៅ ស្រីមុំ និងអ្នកស្រី ទ្រី ឈួន ចូលរួមសវនាការ ជាការបំពាននីតិវិធីធ្ងន់ធ្ងរ ខណៈដែលការសម្រេចចោទប្រកាន់របស់តុលាការថ្នាក់ក្រោមដោយឱ្យមន្ត្រីសមាគមការពារសិទ្ធិមនុស្សអាដហុក ៤នាក់ និងសមាជិក គ.ជ.ប ម្នាក់ ជាប់ពន្ធនាគារ ៥ឆ្នាំ ជារឿងមិនត្រឹមត្រូវនោះទេ៖ «អ៊ីចឹងពួកយើងធ្វើការក្នុងគោលដៅតែលើកកម្ពស់សិទ្ធិមនុស្ស លើកកម្ពស់បញ្ហាច្បាប់ ប៉ុន្តែផ្ទុយទៅវិញតុលាការបែរទៅជឿលើសាក្សី ដែលនិយាយម្ដងចេះ ម្ដងនិយាយចុះ។ និយាយខ្វះការទទួលខុសត្រូវ ខ្វះការពិត ហើយយកមកដាក់បន្ទុក យកមកចោទប្រកាន់យើង នេះជារឿងអយុត្តិធម៌បំផុត ដែលយើងមិនអាចទទួលយកបានចំពោះការសម្រេចរបស់សាលាឧទ្ធរណ៍ ដែលតម្កល់សាលក្រមរបស់សាលាដំបូង ដែលជាសាលក្រមមួយមានភាពអយុត្តិធម៌ »។
លោក នី សុខា បន្ថែមថា ការសម្រេចសាលាឧទ្ធរណ៍រាជធានីភ្នំពេញនាថ្ងៃចន្ទនេះ ធ្វើឡើងបន្ទាប់ពីបើកសវនាការសួរដេញដោលលើបណ្ដឹងសាទុក្ខសំណុំរឿងមន្ត្រីសមាគមការពារសិទ្ធិមនុស្សអាដហុក ៤នាក់ និងសមាជិក គ.ជ.ប ម្នាក់គឺលោក នី ចរិយា កាលពីថ្ងៃទី២៨ ខែមេសាកន្លងទៅ។
បុគ្គលិក គ.ជ.ប និងមន្ត្រី សមាគមការពារសិទ្ធិមនុស្សអាដហុក ៥រូប ត្រូវបានសាលាដំបូងរាជធានីភ្នំពេញកាត់ទោសឱ្យជាប់ពន្ធនាគារម្នាក់ៗ ចំនួន ៥ឆ្នាំ ក្រោមបទចោទប្រកាន់សូកប៉ាន់សាក្សី និងសមគំនិតសូកប៉ាន់សាក្សីពាក់ព័ន្ធនឹងសំណុំរឿងរបស់កញ្ញា ខុម ចាន់តារាទី ហៅស្រី មុំ ដែលត្រូវបានគេចោទថា ជាស្រីកំណាន់របស់លោក កឹម សុខា កាលពីខែកញ្ញា ឆ្នាំ២០១៨ កន្លងមកទៅ។ ប៉ុន្តែទោស ៥ឆ្នាំនេះ ដោយតុលាការឱ្យអនុវត្តទោសក្នុងពន្ធនាគាររយៈពេល ១៤ខែ ហើយទោសដែលនៅសល់ត្រូវបានព្យួរ។
មេធាវីការពារក្ដីឱ្យមន្ត្រីអាដហុកទាំង ៥រូប លោក សំ ទិត្យសីហា ដែលចូលរួមស្ដាប់ប្រកាសសាលដីកា ប្រាប់អាស៊ីសេរីថា លោកសោកស្ដាយ ដែលសាលាឧទ្ធរណ៍សម្រេចតម្កល់សាលក្រម របស់សាលាដំបូងរាជធានីភ្នំពេញទុកជាបានការដដែលមកលើកូនក្ដីរបស់ខ្លួន។ លោកអះអាងថា ការកាត់ក្ដីនេះមានភាពលំអៀងទៅលើដើមបណ្ដឹង ដែលផ្ទុយនឹងនីតិវិធីច្បាប់៖ « ចំពោះការសម្រេចសេចក្ដីនេះ យើងអត់មានឃើញភស្តុតាងអ្វីផ្សេង ដែលក្រៅតែពីចម្លើយរបស់កញ្ញា ខុម ចាន់តារាទី ហៅ ស្រីមុំ និងអ្នកស្រី ទ្រី ឈួន ទេ ហើយវិនិច្ឆ័យថា កូនក្ដីខ្ញុំថា បានប្រព្រឹត្តបទល្មើសសូកប៉ាន់សាក្សី តាមបញ្ញត្តិតាមមាត្រា៥៤៨ ផ្ដន្ទាទោសពួកគាត់ដល់ ៥ឆ្នាំ ចំពោះការផ្ដន្ទាទោសនេះ ហាក់ដូចជាធ្ងន់ធ្ងរ និងអយុត្តិធម៌ » ។
លោកមេធាវី សំ ទិត្យសីហា បន្តថា ការប្រកាសសាលដីការបស់សាលារាជធានីភ្នំពេញ នាព្រឹកថ្ងៃទី២៣ ឧសភា មិនមានវត្តមានចុងចោទ លោក នី សុខា លោក យី សុខសាន្ត និងអ្នកស្រី លឹម មុនី្ន លោក ណៃ វ៉ងដា និងលោក នី ចរិយា នោះទេ។
អាស៊ីសេរីមិនអាចទាក់ទងប្រធានក្រុមប្រឹក្សាជំនុំជម្រះសាលាឧទ្ធរណ៍រាជធានីភ្នំពេញ លោក ស៊ិន វិសាល ដើម្បីសុំអត្ថាធិប្បាយជុំវិញបញ្ហានេះបានទេ នៅថ្ងៃទី២៣ ឧសភា ដោយទូរស័ព្ទចូលតែគ្មានអ្នកទទួល។
សមាជិក គ.ជ.ប ម្នាក់ និងមន្រ្តីសមាគមការពារសិទ្ធិមនុស្សអាដហុកទាំង ៤រូប ត្រូវបានអាជ្ញាធរចាប់ខ្លួនដោយចោទប្រកាន់ពីបទ «សូកប៉ាន់សាក្សី និងសមគំនិតសូកប៉ាន់សាក្សី» ក្នុងសំណុំរឿងផ្ដល់ប្រាក់ជាង ២០០ដុល្លារទៅឱ្យនាង ស្រីមុំ ក្នុងនាមជនរងគ្រោះ ដែលរត់មករកអាដហុកឱ្យជួយ កាលពីខែមេសា ឆ្នាំ២០១៦។ បុគ្គលិក គ.ជ.ប និងមន្ត្រីអាដហុកទាំង ៥នាក់ ត្រូវបានអាជ្ញាធរបញ្ជូនទៅឃុំខ្លួននៅពន្ធនាគារព្រៃស កាលពីថ្ងៃទី១ ខែឧសភា ឆ្នាំ២០១៦ រហូតដល់មានការដោះលែងពួកគេឱ្យនៅក្រៅឃុំបណ្ដោះអាសន្នវិញ កាលពីថ្ងៃទី២៩ ខែមិថុនា ឆ្នាំ២០១៧៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។