ក្រុមអង្គការសង្គមស៊ីវិលចំនួន ៣០ស្ថាប័នផ្សេងគ្នា ចាត់ទុកថា សកម្មភាពរាជរដ្ឋាភិបាលកម្ពុជា ដែលបានចាប់និងឃុំខ្លួនបេក្ខជនជាប់ឆ្នោតតំណាងរាស្ត្ររបស់គណបក្សសង្គ្រោះជាតិ គឺជាចេតនានយោបាយជាជាងការអនុវត្តច្បាប់ឲ្យបានត្រឹមត្រូវ ពិសេសកំពុងធ្វើឲ្យការគោរពសិទ្ធិមនុស្សជាមូលដ្ឋាន និងលទ្ធិប្រជាធិបតេយ្យនៅកម្ពុជា ដើរថយក្រោយ។
អង្គការសង្គមស៊ីវិលអំពាវនាវឲ្យរាជរដ្ឋាភិបាលកម្ពុជា ដោះលែងបេក្ខជនជាប់ឆ្នោតតំណាងរាស្ត្រគណបក្សសង្គ្រោះជាតិឲ្យមានសេរីភាពវិញដោយគ្មានលក្ខខណ្ឌ ខណៈដែលគណបក្សនយោបាយទាំងពីរណាត់គ្នាចរចាផ្លូវការ ដើម្បីទម្លុះទម្លាយភាពទ័ល ច្រកនយោបាយ។
ការអំពាវនាវនេះ ធ្វើឡើងក្នុងសន្និសីទកាសែតរបស់ក្រុមអង្គការសង្គមស៊ីវិល នៅថ្ងៃទី២១ កក្ដដា។
អង្គការសង្គមស៊ីវិលគិតថា ការគោរពសិទ្ធិមនុស្ស និងលំហប្រជាធិបតេយ្យនៅកម្ពុជា កាន់តែរួមតូចចង្អៀត ដែលជាការជះឥទ្ធិពលដល់សេរីភាពជាមូលដ្ឋានរបស់មនុស្ស ដូចជាការប្រើសេរីភាពក្នុងការបញ្ចេញមតិ និងសកម្មភាពជួបប្រជុំគ្នាជាដើម។
ប្រធានផ្នែកសិទ្ធិមនុស្សនិងច្បាប់នៃអង្គការអាដហុក លោក នី ចរិយា ថ្លែងថា ការបិទទីលានប្រជាធិបតេយ្យ គឺជានិមិត្តរូបនៃការបិទសេរីភាព ហើយការចាប់និងឃុំខ្លួនអ្នកតំណាងរាស្ត្រនិងសកម្មជនគណបក្សសង្គ្រោះជាតិ មានមូលហេតុតែមួយគត់ គឺយកបញ្ហាទាំងនោះជាចំណាប់ខ្មាំងនៃដំណោះស្រាយបញ្ហានយោបាយ។ លោកបន្តថា ប្រសិនបើការចរចារវាងគណបក្សប្រជាជនកម្ពុជា និងគណបក្សសង្គ្រោះដំណើរការល្អនោះ ទីលានប្រជាធិបតេយ្យអាចនឹងបើកឲ្យប្រើប្រាស់ឡើងវិញ ហើយបេក្ខជនតំណាងរាស្ត្រនិងសកម្មជនគណបក្សសង្គ្រោះជាតិទាំង ៨រូប ក៏ត្រូវដោះលែងឲ្យមានសេរីភាពឡើងវិញដែរ៖ «សំឡេង»។
កាលពីថ្ងៃទី១៥ កក្កដា បេក្ខជនជាប់ឆ្នោតតំណាងរាស្ត្រ ៧នាក់ និងសកម្មជនគណបក្សសង្គ្រោះជាតិ ១រូបទៀត ត្រូវបានចាប់និងឃុំខ្លួនក្នុងពន្ធនាគារព្រៃស ពីបទដឹកនាំធ្វើកុបកម្ម បទញុះញង់ឲ្យមានអំពើហិង្សា និងបទផ្ដើមគំនិតក្នុងអំពើហិង្សា ដោយចេតនាមានស្ថានទម្ងន់ទោស។ ក្រៅពីនោះ ចៅក្រមតុលាការបានចេញដីការស្វែងរកចាប់ខ្លួនអញ្ញាតជន ឬជនដែលគេមិនស្គាល់សាវតារជាតិមួយចំនួនទៀត។
នាយកប្រតិបត្តិនៃគណៈកម្មាធិការដើម្បីការបោះឆ្នោតដោយសេរីនិងយុត្តិធម៌នៅកម្ពុជា ហៅកាត់ថា ខុមហ្វ្រែល លោក គល់ បញ្ញា ទទូចឲ្យរាជរដ្ឋាភិបាលដោះលែងបេក្ខជនជាប់ឆ្នោតតំណាងរាស្ត្រទាំងអស់ឲ្យមានសេរីភាព និងបញ្ឈប់ការតាមចាប់ខ្លួនអ្នកពាក់ព័ន្ធដទៃទៀត ពិសេសសូមឲ្យបើកឲ្យប្រើប្រាស់ទីលានប្រជាធិបតេយ្យឡើងវិញ៖ «សំឡេង»។
ក្រុមអង្គការសង្គមស៊ីវិលយល់ឃើញថា រាជរដ្ឋាភិបាលកំពុងចេញបម្រាមជាច្រើនទប់ស្កាត់ រារាំងមិនឲ្យពលរដ្ឋប្រើប្រាស់សិទ្ធិសេរីភាពរបស់ពួកគេឲ្យបានពេញលេញ។ ប៉ុន្តែផ្ទុយទៅវិញ អំពើហិង្សាដែលកើតមានកន្លងមក រួមមានព្រឹត្តិការណ៍នៅលើស្ពានស្ទឹងមានជ័យ ស្ពានអាកាសក្បាលថ្នល់នៅផ្លូវវ៉េង ស្រេង និងនៅរោងចក្រយ៉ាកជីនជាដើម អាជ្ញាធរបានខកខានស្វែងរកជនប្រព្រឹត្តយកមកផ្ដន្ទាទោសតាមច្បាប់។ រីឯក្រុមសន្តិសុខស៊ីឈ្នួលរបស់ខណ្ឌដូនពេញ ដែលបានវាយពលរដ្ឋនិងអ្នកកាសែតជាច្រើនលើកឲ្យរងរបួសនោះ មិនត្រូវបានសមត្ថកិច្ចចាប់ខ្លួនមកផ្ដន្ទាទោសតាមច្បាប់ឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។